Yeni Azərbaycan Partiyası bu günün, sabahın və gələcəyin partiyasıdır

Yeni Azərbaycan Partiyası keçən əsrin 80-ci illərinin sonu 90-cı illərin əvvəllərində ölkəmizdə meydana çıxan mürəkkəb siyasi situasiyanın daxili məntiqindən, zamanının təxirəsalınmaz tələbindən və Azərbaycan xalqının arzu və istəklərinin ifadəçisi kimi yaranan partiyadır. Belə bir siyasi qüvvənin yaranmasını tələb edən tarixi zərurət mövcud zaman kəsiyində ölkəmizin düşdüyü mürəkkəb, fəlakətli, ümidsiz vəziyyətdən onu xilas etmək kimi misilsiz tarixi vəzifənin yerinə yetirilməsi arzusu və istəyi ilə əlaqədar idi.

Həmin illərdə Azərbaycanın düşdüyü ağır vəziyyəti tarixi yaddaşımızın süzgəcindən keçirsək aşağıdakı mənzərə canlanar. 1988-ci ildən başlanan iqtisadi, siyasi, xüsusilə dövlət hakimiyyəti böhranı, həmin illərdə rəhbərliyə gətirilən səriştəsiz, imperiya ağaları qarşısında əyilən, milli maraqlarımızdan xəbərsiz olan dairələrin gündən-günə güclənən erməni təcavüzünün qarşısını almaq, ordu yaratmaq, xalqı səfərbər etmək, vətənin təhlükəsizliyini və əhalinin rifahını təmin etmək əvəzinə öz hakimiyyətləri hayına qalmaları ölkəmizdə vəziyyəti daha da gərginləşdirmişdi. Azərbaycanın iqtisadiyyatı bərbad hala salınmış, onilliklər ərzində yaradılmış iqtisadi potensial dağıdılmış, respublika faktiki olaraq iqtisadi iflas vəziyyətinə gəlib çıxmışdı. Ölkəni bürüyən total böhran AXC-Müsavat liderlərinin bacarıqsızlığı, səriştəsizliyi, naşılığı ucbatından daha da dərinləşmişdi. Populist şüarlarla hakimiyyətə gələn bu "siyasət dəllallarının" birillik iqtidarı dövründə Azərbaycanın olduqca ağır, fəlakətli, anarxiya vəziyyətinə düşdüyünü təəssüf hissi ilə yadda saxlamalı və bu tarixdən dərs almalıyıq.

Azərbaycanın düçar ola biləcəyi fəlakətlərin qarşısını almaq məqsədilə xalqın sağlam qüvvələrinin, geniş təbəqələrinin böyük tarixi şəxsiyyət Heydər Əliyevə müraciəti, oktyabrın 24-də ziyalıların müraciətinə cavab məktubunda onun yaranmış vəziyyəti dərindən təhlil etməsi və çıxış yolunu göstərməsi noyabrın 21-də Naxçıvanda Yeni Azərbaycan Partiyasının təsis edilməsi zərurətini reallaşdırdı. Məhz həmin illərdə xalqın böyük əksəriyyətinin nicat yolu axtararaq öz nəzərlərini Naxçıvana, Heydər Əliyev şəxsiyyətinə, böyük inam və ümidlərlə yönəltməsi təsadüfi deyildi. Cəmiyyətdə qəti bir inam, qənaət yaranmışdı ki, ölkəni fəlakətli vəziyyətdən yalnız Heydər Əliyev və onun ətrafında birləşən qüvvə qurtara bilər. Xalqın Heydər Əliyev şəxsiyyətinə olan bu inamı onun keçən əsrin 70-80-cı illərində Azərbaycana rəhbərlik etdiyi zaman göstərdiyi xidmətlərin misilsizliyi, gördüyü nəhəng işlərin miqyasının daim qədirbilən xalqımız tərəfindən xatırlanması, keçmiş SSRİ kimi böyük bir dövlətin ali rəhbərliyinə yüksəlməklə qazandığı nüfuz, blokada şəraitində olan Naxçıvanda həyata keçirdiyi uğurlu tədbirlər və fenomenal keyfiyyətləri ilə şərtlənirdi. Məhz 1993 - cü ildə bu görkəmli şəxsiyyətin böyük siyasətə möhtəşəm dönüşü, üzərinə götürdüyü xilaskarlıq missiyası Azərbaycanı bir dövlət kimi yaşatdı, onun müstəqilliyinin dönməzliyini təmin etdi.

Yarandığı gündən Yeni Azərbaycan Partiyasının ümummilli lider Heydər Əliyev tərəfindən müəyyənləşdirilən və uğurla tətbiq edilən əsas proqram məramı Azərbaycanın dövlət müstəqilliyinin qorunub möhkəmləndirilməsindən, ərazi bütövlüyünün təmin edilməsindən, demokratik, hüquqi, dünyəvi cəmiyyət qurulmasından (1995-ci ilin noyabrında ilk Konstitusiyanın qəbulu), əmin-amanlıq, ictimai-siyasi sabitlik, milli həmrəylik, güclü və sosial yönümlü iqtisadiyyat yaratmaqdan (1994-cü ilin sentyabrında neft strategiyasının əsasını qoyan "Əsrin müqaviləsi"nin imzalanması) ibarət olmuş və bu on altı ildə öz proqram məqsədlərinə (MÜSTƏQİL DÖVLƏTÇİLİK PRİNSİPİ, QANUNÇULUQ PRİNSİPİ, AZƏRBAYCANÇILIQ, VƏTƏNÇİLİK PRİNSİPİ, VARİSLİK, YARADICI TƏKAMÜL PRİNSİPİ, KONSTRUKTİV ƏMƏKDAŞLIQ, VƏTƏNDAŞ HƏMRƏYLİYİ PRİNSİPİ, SOSİAL ƏDALƏT PRİNSİPİ) sadiq fəaliyyət göstərmişdir. Məhz buna görə də xalqın partiyasına çevrilən, yüz minlərlə üzvü birləşdirən YAP bu müddət ərzində ölkədə keçirilən bütün səviyyələrdə - prezident, parlament və bələdiyyə seçkilərində inamlı qələbələr qazana bilmişdir. Ötən müddət ərzində YAP-ın keçirdiyi qurultaylarda (1999, 2001, 2005, 2008) aldığı tarixi qərarlar ölkəmizin gələcək inkişaf perspektivlərinin müəyyənləşdirilməsi baxımından mühüm rol oynamışdır. Yaxın tariximizə mərhələli və təhlili şəkildə nəzər salsaq, aydın şəkildə görərik ki, ümummilli lider Heydər Əliyevin uzaqgörən və məqsədyönlü siyasəti nəticəsində Azərbaycan böyük inkişaf yoluna daxil olmuş, böhran və xaos mərhələsini arxada qoymuşdur. Ulu öndər Heydər Əliyevin hakimiyyətdə olduğu 1993-2003-cü illər ərzində Azərbaycan öz dövlət müstəqilliyinin dönməzliyini təmin etmiş, sosial-iqtisadi və beynəlxalq sahədə mühüm nailiyyətlər qazanmışdır. Ermənistanın Azərbaycana qarşı təcavüzünün qarşısı alınmış, Dağlıq Qarabağ münaqişəsinin həlli yolunda, diplomatik cəbhədə düşmən üzərində üstünlük əldə edilmişdir. Məlumdur ki, hər zamanın özünəməxsus tələbi və vəzifələri vardır. Ümummilli liderimiz Heydər Əliyev Azərbaycanın qarşısında duran vəzifələri dəqiq göstərərək dövlətimizin söykəndiyi təməl prinsipləri müəyyən etmişdir. Bu gün Azərbaycan, məhz həmin prinsiplərə istinad edərək inkişaf edir. Təsadüfi deyil ki, Heydər Əliyev yolunu rəhbər tutan YAP ölkəmizdə keçirilən bütün səviyyədə seçkilərdə (1993, 1998, 2003, 2008 prezident, 1995, 2000, 2005 parlament, 1999, 2004 bələdiyyə) parlaq qələbə qazanaraq, Ulu Öndərin əsasını qoyduğu inkişaf strategiyasının geniş ümümxalq dəstəyinə malik yeganə və alternativsiz tərəqqi yolu olduğunu sübut edib.

Ulu öndərin müəyyən etdiyi təməl prinsiplərindən biri siyasi varislikdir. Bu hər şeydən əvvəl müstəqil dövlətimizin inkişafı üçün başlanan siyasətin davamlı olmasıdır. Məhz bu ali məqsədin reallaşması naminə, ümummilli liderimiz Heydər Əliyev böyük çətinliklərlə qurduğu dövlətə, misilsiz fədakarlıqlar hesabına yaşatdığı xalqına rəhbərlik etmək üçün namizədini elan etdi: "O, yüksək intellekti, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir.Sizi əmin edirəm ki, İlham Əliyev bundan sonra da xalqımızın ən layiqli övladlarını öz ətrafında sıx birləşdirərək Azərbaycan dövlətinin inkişafı və xalqımzın firavanlığı yolunda çox işlər görəcək. İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümüdlər bəsləyirəm."Bu fikirlərin məntiqi nəticəsi cənab İlham Əliyevin 2003-cü ilin 15 oktyabrında xalqın mütləq əksəriyyətinin etimadını qazanması oldu. Xalq liderinin sözünə güvənərək , öz tarixi seçimini etdi.

Cənab İlham Əliyevin ötən dövr ərzində prezident kimi fəaliyyəti ulu öndərimizin sözlərinin doğrulduğu məqam kimi yaddaşlara və tarixə həkk edildi. Dövlət başçısının istər daxili, istərsə də xarici siyasət sahəsində qazandığı uğurlar xalqımızın öz tarixi seçimində yanılmadığını sübut etdi. Prezident İlham Əliyev həm seçki kampaniyası dövründə, həm də andiçmə mərasimində xalqımız qarşısında verdiyi bütün sözləri yerinə yetirmək istiqamətində mühüm addımlar atdı və sözlə əməlin üzvi vəhdətinə söykənən lider imici ilə həm də gələcək nəsillər üçün mükəmməl nümunə yaratdı. Əsl siyasətin məhz real iş və konkret fəaliyyət olduğunu prioritet prinsip kimi qəbul edən dövlət başçımız demişdir: " Bizdə bütün imkanlar - təbii sərvətlər, insan potensialı və ən önəmlisi, xalqın iradəsi vardır. Biz hamımız birləşərək və bir nöqtəyə vuraraq Azərbaycanı zəngin, qüdrətli dövlətə çevirəcəyik. Əhalinin sosial müdafiəsi yüksək səviyyədə təmin olunacaq."

Daxili siyasət sahəsində ötən dövr ərzində mühüm addımlar atılmışdır. Azərbaycanda sivil, demokratik,hüquqi dövlət quruluşu möhkəmlənmiş, insan hüquq və azadlıqlarına hörmət edən, dini-siyasi tolerantlığa əsaslanan vətəndaş cəmiyyətinin bütün zəruri atributlarının formalaşma prosesi sürətlənmişdir. Ölkədə qanunvericilik sahəsindəki islahatlar geniş vüsət almış, məhkəmə hüquq islahatları sayəsində bu sahədə mövcud olan normativ aktlar tamamilə Avropa standartlarına uyğunlaşdırılmış, bazar iqtisadiyyatının hüquqi bazası daha da möhkəmləndirilmişdir.

Bu gün artıq dövlət büdcəsi 15 milyard ABŞ dollarına çatan Azərbaycanda qanunvericilik sahəsində əldə edilən uğurlar həm də iqtisadi islahatlar üçün möhkəm hüquqi baza yaratmışdır. Ümummilli liderimiz Heydər Əliyev tərəfindən əsası qoyulan və bu gün möhtərəm prezidentimiz İlham Əliyev tərəfindən uğurla həyata keçirilən neft strategiyasının böyük əhəmiyyəti vardır. 1994-cü ilin sentiyabrında Azərbaycan hökuməti ilə dünyanın aparıcı neft şirkətləri arasında imzalanan "Əsrin Müqaviləsi" bu gün öz real nəticələrini verməkdə və ölkə iqtisadiyyatının digər sahələri üçün lokomotiv rolunu oynamaqdadır. Yalnız iqtisadi deyil, həmçinin çox böyük geopolitik əhəmiyyət daşıyan, region ölkələrinin gələcək ictimai - siyasi və iqtisadi həyatında ciddi dəyişikliklərə yol açan Bakı-Tbilisi-Ceyhan neft və Bakı-Tbilisi-Ərzurum qaz kəmərlərinin istifadəyə verilməsi, Bakı-Tbilisi-Qars dəmir yolu xəttinin çəkilməsi istiqamətində ötən dövr ərzində görülmüş böyük işlər, müstəqil Azərbaycanın möhkəm iqtisadi əsaslarını yaratmışdır. Gələcək nəsillərin maddi rifahının başlıca təminatlarından olan "Neft Fondunun" vəsaiti durmadan artmaqdadır. Fondun fəaliyyəti tamamilə şəffaf və cəmiyyətə açıq zəmin üzərində qurulmuşdur. "Neft Fondunun" vəsaitindən daha çox qeyri - neft sektorunun inkişafında və qaçqın və məcburi köçkünlərin sosial - məişət şəraitinin yaxşılaşdırılması istiqamətində istifadə olunur.

Prezident İlham Əliyev ümummilli liderimiz Heydər Əliyevin siyasi kursunun bütün sahələrdə olduğu kimi elm, mədəniyyət, incəsənət, ədəbiyyat sferalarında, həmçinin milli - mənəvi, dini dəyərlərin qorunması və möhkəmləndirilməsi istiqamətində də davam etdirmişdir.

Bu gün YAP ölkəmizdə ən mütəşəkkil və kütləvi siyasi təşkilatdır. Cəmiyyətin ən müxtəlif sosial təbəqələrini sıralarında birləşdirən partiyanın ictimai - siyasi proseslərə təsir imkanları ildən ilə genişlənir, beynəlxalq nüfuzu artır. Partiya üzvlərinin təxminən 40 faizinin gənclərdən ibarət olması onun böyük siyasi gələcəyindən və inkişaf potensialından xəbər verir. YAP Azərbaycanın siyasi partiyaları tarixində ilk dəfə beynəlxalq miqyasda konfranslar keçirməklə ("Sivilizasiyaların dialoqunda siyasi partiyaların rolu" - 27 sentyabr 2007 - ci il, "Demokratiya və sabitlik naminə: əməkdaşlığın yeni imkanları" - 7 may 2008-ci il) yalnız ölkə miqyasında deyil, regionun ən qüdrətli partiyası olduğunu təsdiqləmişdir.

Partiya fəaliyyətinin ən konkret və dərin məzmunlu yekununu möhtərəm prezident İlham Əliyev dəyərləndirmiş və YAP-ın 15 illik yubiley mərasimində gələcək hədəfləri müəyyənləşdirərək demişdir: "Bizim hakimiyyətin yeganə mənbəyi xalqdır. Azərbaycan xalqından bizə verilən dəstək bizi gücləndirir və bizim məsuliyyətimizi də artırır. Biz bu məsuliyyətə hazırıq. Bu məsuliyyəti öz üzərimizə götürmüşük. Azərbaycan xalqı əsrlər boyu müstəqillik həsrətində idi. Nəsillər gəlirdi, gedirdi, ölkəmiz müstəqil deyildi. Başqa ölkələrin tərkibində yaşayırdı. Böyük sərvətdir, böyük xoşbəxtlikdir ki, biz, indiki nəsil bu müstəqilliyi görürük. Azərbaycan xalqı azaddır. Azərbaycan bayrağı bütün beynəlxalq tədbirlərdə, beynəlxalq təşkilatlarda dalğalanır. Biz azadıq, biz müstəqilik, biz güclü Azərbaycan yaradırıq, güclü dövlət qururuq. Mən bu dövlət quruculuğunda Yeni Azərbaycan Partiyasının rolunu çox yüksək qiymətləndirirəm. Əlbəttə ki, Yeni Azərbaycan Partiyası Azərbaycan xalqının bir parçasıdır. Bütün Azərbaycan xalqının xoşbəxt gələcəyi üçün bizim partiyamız əlindən gələni əsirgəmir və biz bundan sonra da bunu edəcəyik. İndi biz inkişaf yolundayıq. Bizim qarşımızda bütün yollar açıqdır, səma aydındır, üfüqlər açıqdır və biz irəli gedirik. Bu yolda sizə, Yeni Azərbaycan Partiyasının fəallarına, bütün üzvlərinə uğurlar arzu edirəm".

Əldə edilən bu uğurlar qətiyyətlə deməyə imkan verir ki, Ümummilli Liderimizin müstəqil Azərbaycana rəhbərlik etdiyi illərdə ölkəmiz xaosdan sabitliyə, inkişafa qədəm qoymuş və bu siyasəti uğurla davam etdirən Prezidentimiz İlham Əliyev Azərbaycanı bölgənin güclü, qüdrətli, zəngin ölkəsinə çevirməklə rifaha doğru inamla aparmaqdadır. Məhz bunun nəticəsidir ki, bu gün hakimiyyətlə xalqın vəhdəti yaranmışdır və YAP bu birliyin parlaq ifadəsidir.

A.Mənsumə

Mövqe.- 2009.- 21-23 noyabr.- S. 4.