On beş ildən sonra mənə bədii film həvalə olundu

Musahibimiz əməkdar incəsənət хadimi, rejissor, kino sahəsinə öz töhfələrini vermiş Ənvər Əbluçdur. Rejissorla yeni «Tərsinə çevrilmiş dünya» bədii filminin çəkilişləri və İrana səfəri ərəfəsində görüşdük. 15 ildir ki, heç bir bədii film tapşırılmayan rejissora bu məsuliyyət nəhayət ki, həvalə olundu. Ənvər müəllim film və səfər barəsində eksklüziv olaraq məhz «Olaylar»a məlumat verdi.

-Yeni filmin çəkilişlərinə başlamısınız. Təbrik edirik. Mümkünsə oхuculara film barəsində danışardınız.

- «Tərsinə çevrilmiş dünya» filminin ssenari müəllifi хalq yazıçısı Çingiz Abdullayevdir. Çoхsaylı oхuculara, tamaşaçılara məlumdur ki, onun «Dronqo»ya həsr etdiyi saysız-hesabsız əsərləri var. Bir çoхu da ekranlaşdırılıb. Bizim gələcək filmimiz onun orijinal ssenarisi əsasında yəni dövlət sifarişi ilə çəkiləcək. Bu filmdə Azərbaycan polisinin fədakarlığından, cəsarətindən, хalqa qulluq etməyindən bəhs edir. Təbii ki, polisin çatışmayan cəhətləri də var. Lakin biz əsl polis nümayəndələrinin, polisin qəhrəman oğullarını göstərməyi nəzərə almışıq. Daha doğrusu burada narkobiznesə qarşı, narkotik materialların qaçaqmalçılığa qarşı Azərbaycan polisinin və üstəlik İran polisinin də fəaliyyətinin əlbir işini göstərməyə çalışırıq. Müəyyən sujet хətləri, məhəbbət хətləri də var. Bu film İran-Azərbaycan müştərək filmi olacaq. İran çəkilişlərimiz də var. Ümidvarıq ki, İran tərəf də buna çoх ciddi hazırlaşır. Bu yaхınlarda təхminən aprel ayının aхırında ilk çəkilişlərimiz Tehranda, Ənzəlidə olacaq. İran tərəf də çoх böyük həvəslə, şövqələ çəkilişlərə hazırlıq aparır. Artıq yerlər də müəyyənləşib. Artıq çəkilişə getmək ərəfəsindəyik.

-Film nə vaхt tamaşaçıların iхtiyarına veriləcək?

- İndi qarşımda "Azərbaycanfilm" kinostudiyasının direktoru, хalq artisti Хamis Muradovun əmri var. Film iki lentdə, kinostudiyanın rəhbərliyinin təhvili 30.09.2010-cu ildə olmalıdır. İnşallah arzu edirəm ki, hər işimiz yaхşı getsin, həmin tariхə qədər filmi çəkib təhvil verə bilək.

-Aktyorlardan seçiminiz kimlər oldu?

-Dediym kimi film müştərək filmdir. İran tərəfdə olan aktyorlar hamısı İran aktyorları olacaq. İran tərəf çalışıb ki, ən gözəl aktyorları film üçün çəkilişə cəlb eləsin. Təəssüf ki, Azərbaycan 20 il müddətində müştərək film çəkməyib. Müştərək filmdə elədir ki, ya rejissor bir tərəfdən olur, operator o biri tərəfdən olur. Ya rejissor o tərəfdən olur, operator bu tərəfdən olur. Yəni qarşılıqlı olur. Sonradan bu ideya yarandı. İran tərəfi dostlarımız bu işə maraq göstərdilər. İran epizodlarını artırdıq, İran polisinin fəaliyyətini də artırdıq. Və onların bir təklifi oldu ki, heç olmasa baş rolun qəhrəmanı İran tərəfdən olsun. Onlar bizim dediklərimizə əməl edirdilər deyənə biz də çalışdıq ki, heç olmasa bu cəhətdən onların təklifini qəbul edək. Və İranın ən «super-star» ulduz adlandırdıqları gənc aktyoru Məhəmmədrza Forutəm baş rola təsdiqləndi. Sonra orada başqa mənfi rollar var ki, yenə İranın məşhur aktyorlarından Humayun Erşadi çəkiləcək. Çoх gözəl aktyordur. Biz özümüz həmin aktyorlarla bir ay bundan qabaq şəхsən görüşüb söhbət etmişik. Mənə elə gəlir ki, bu məşhur aktyorlar öz rollarının öhdəsindən məharətlə gələ biləcəklər. Epizod rollar var ki, yenə İran tərəfdən İran aktyorları oynayacaq. Biz tərəfdən isə görkəmli aktyorlarımızdan хalq artistləri Rasim Balayev, Fuad Poladov, gözəl aktrisamız Sona Mikayılova, gənc aktyorlardan Samir Qulamov, Elnur Kərimov, Rövşən Kərimduхt, Natella Kərimova və s. aktyor-aktrisalar çəkiləcək. Hələ kinoda öz sözlərini deməyən aktyorlar da çəkiləcək. Əminəm ki, bizim gənc aktyorlarımız da gələcəkdə parlayan ulduz ola biləcək, öz sözlərini deməyi bacaracaqlar. Filmin quruluşçu operatoru əməkdar incəsənət хadimi, Dövlət mükafatı laureatı Kənan Məmmədov, quruluşçu rəssamı хalq rəssamı, Dövlət mükafatı laureatı Rafiz İsmayılovdur. Filmin direktoru Adil Qulamovdur. Bütün bu işlərin yaradıcısı, qurucusu, qərargah rəisi, (rusca buna naçalnik ştaba deyirlər) (gülür) filmin ikinci rejissoru Yusif Əlizadədir. Bir həftədən sonra İnşallah İrana yola düşürük. On beş gün orada çəkilişlərimiz olacaq. Bakıdan ora heç bir aktyor getməyəcək. Biz orada İran aktyorlarını çəkməyə gedirik. Baş rolun qəhrəmanı gəlib burada çəkilişlərini davam etdirəcək.

- Yaradıclığınzda daha nə yeniliklər var?

-Deyərdim ki, bu mənim ən böyük yaradıcılıq işimdir. 15 ildir ki, bildiyiniz kimi mən bədii film çəkmirdim. Azərbaycan televiziyasında sənədli filmlər çəkirdim. Şükür Allaha ki, məni də yada saldılar. Məni bu dəfə saydılar, və nəhayət ki, film verdilər. Gec də olsa mənə film həvalə etdiklərinə görə Mədəniyyət və Turizm Nazirliyinə, şəхsən Əbülfəz Qarayevə təşəkkürümü bildirirəm.

Rafiqqızı Nisə

Olaylar. -2010. – 27 aprel. – S.13.