Erməni hərbçiləri Qubada 16 min insanı qətlə yetiriblər

"Daşnak-bolşevik birləşmələri 162 kəndi, 26 məscidi, yüzlərlə ev və tikilini məhv ediblər"

"Ermənilər 3 minə yaxın yəhudini öldürüblər".

Prezident yanında Kütləvi İnformasiya Vasitələrinə Dövlət Dəstəyi Şurasının maliyyə dəstəyi ilə "Olaylar" qəzetinin həyata keçirdiyi "Erməni terroru və separatizmi bəşəriyyətə təhlükədir" layihəsi çərçivəsində tədbirlər davam edir. Qəzet növbəti tədbirini mayın 15-də Qubada keçirib. Bir qrup jurnalistin Quba şəhərində yerləşən Soyqırım muzeyinə səfəri təşkil edilib. Qeyd edək ki, məzarlıq 2007-ci ildə ərazidə stadion tikintisi zamanı aşkarlanıb. Sonradan AMEA Arxeologiya və Etnorqafiya İnstitutunun əməkdaşı, "Quba Soyqırımı" Ekspedisiyasının rəhbəri, arxeoloq Qəhrəman Ağayevin rəhbərlik etdiyi ekspedisiya qrupu ərazidə arxeoloji qazıntılar aparıb və dəhşətli faktlar meydana çıxıb. Qəhrəman Ağayev Quba məzarlığının yaranma tarixi haqqında jurnalistlərə məlumat verib. O, qeyd edib ki, məzarlığın yaranması ötən əsrə təsadüf edir. Belə ki, 1918-ci ilin mart-aprel aylarında Şimali Azərbaycanın bir neçə şəhər və rayonunda erməni və bolşevik terror birləşmələri qanlı qırğınlar törədiblər: "1918-ci ili mayın 1-də Qubaya daxil olan 5 mindən artıq daşnak-bolşevik birləşmələri 16 min dinc əhalini öldürüb, 162 kəndi, 26 məscidi, yüzlərlə ev və tikilini, 1300-ə yaxın kitabı yandıraraq məhv ediblər. Həmin vaxt Azərbaycanda yaşayan digər millətlərin nümayəndələri də öldürülüb. Ermənilər 3 minə yaxın yəhudini qətlə yetiriblər". Q.Ağayev bildirib ki, Qubada aşkarlanan kütləvi məzarlıqda 1918-ci ildə ermənilər tərəfindən qətlə yetirilən azərbaycanlılar dəfn olunub. Kütləvi məzarlıqda dəfn olunanları yalnız kəllə sümüklərinə görə müəyyənləşdirmək mümkün olub: "Qazıntılar zamanı 400-dən yuxarı kəllə sümüyü aşkarlanıb. Qeyd edk ki, qazıntılar zamanı onların bir qismi dağılıb və 400 kəllə sümüyü qalıb. Kəllə sümüklərinin 50-dən çoxu uşaqlara, 100-ü qadınlara, qalanları isə kişilərə məxsusdur. Məzarlıqda aşkar olunan kişilərə məxsus kəllə sümüklərinin demək olar ki, 95 faizi yaşlı insanlara məxsusdur. Sümüklər üzərində aparılan araşdırmalar zamanı sümüklərdə güllə izləri aşkarlanmayıb. Belə ki, vəhşi ermənilər insanları əsasən küt alətlərdən istifadə etməklə öldürüblər. Sümüklərdən mismar, bıçaq kimi alətlər tapılıb ki, bu da ermənilərin insanları bu alətlərdən istifadə edərək öldürdüyünü göstərir.

İbrahimova Aygün

Olaylar. -2010. – 18 may. – S.11.