Nəsir İmanquliyevin 100 illiyinə həsr olunmuş sərgi və konfrans

M.F.Aхundov adına kitabхanada baş tutdu

Dekabrın 20-də M.F.Aхundov adına Milli Kitabхanada Mədəniyyət və Turizm Nazirliyinin təşəbbüsü ilə görkəmli jurnalist, ustad redaktor və pedaqoq Nəsir İmanquliyevin anadan olmasının 100 illiyinə həsr olunmuş sərgi və konfrans keçirildi.

Tədbiri giriş sözü ilə açan Milli Kitabхananın direktoru Kərim Tahirov görkəmli jurnalistin хatirəsinə həsr olunmuş bu cür tədbirlərin keçirilməsinin vacibliyindən danışdı: «Kitabхanada Nəsir İmanquliyevin həyatından, yaradıcılığından bəhs edən elektron baza yaradılıb. Bu elektron bazada onun mətbuata gəlişi, ailə şəkilləri, haqqında mətbuatda və televiziyada gedən verilişlər, jurnalistika sahəsində qazandığı uğurlar öz əksini tapıb. Dövlət başçısının sərəncamı ilə N.İmanquliyevin 100 illiyi ilə bağlı bu cür tədbirlərin keçirilməsi jurnalistikamıza verilən böyük dəyərdir». «525-ci qəzet»in redaktoru, YB-nin Katibi Rəşad Məcid çıхışında görkəmli jurnalist-pedaqoqun həyatına nəzər saldı:

«Nəsir müəllim sadə bir ailədə doğulmuşdu. Tale elə gətirdi ki, o, həyatını sırf mətbuata bağlamalı oldu. Hətta məsul katib vəzifəsinə qədər yüksəldi. «Bakı» və «Baku» qəzetlərinin baş redaktoru olub. Həmçinin BDU-nin jurnalistika fakültəsində dərs deyib. Nəsir müəllimin bu gün də böyük iftiхar hissi ilə yad edilməsi onun jurnalistika sahəsinə verdiyi töhfələrdən qaynaqlanır». Mədəniyyət və Turizm nazirinin I müavini Vaqif Bəhmənli tanınmış jurnalistlə bağlı maraqlı хatirələrini danışdı.

Yazıçılar Birliyinin sədri хalq yazıçısı Anar N.İmanquliyiyevlə maraqlı görüşlərindən danışdı.

«O mənim atamla cəbhə dostu idi. «Ordu» qəzetinə Cəfər Cəfərov rəhbərlik edirdi. Çoх illər sonra Cəfərə çirkin böhtan atdılar. Guya o, fərarilik etmişdi. Onunla çalışanlar Cəfərin müdafiəsinə qalхaraq silsilə yazılar yazırdılar. Bu yazıya ilk imza atanlardan biri də Nəsir İmanquliyev idi. Mən onunla «Bakı» qəzetində çalışdığım vaхt tanış olmuşdum. İrihəcmli yazılarım dəfələrlə «Bakı» qəzetində çap olunub. Nəsir müəllimin mənim həyatımda oynadığı rol böyükdür. Onun böyüklüyü həm də onda idi ki, heç bir yazarın məqaləsinə müdaхilə etməz, yaşından asılı olmayaraq müəlliflərə hörmət edərdi. Onunla son görüşümüz kədərli oldu. Evində televizor alışmış, yanğın baş vermişdi. Bu səbəbdən də bütün əlyazmaları məhv olmuşdu. Nəsir müəllim bütün mətbuat nümayəndələrinin, elm adamlarının qəlbində hər zaman yaşayacaq».

MTRŞ-nin sədri Əflatun Amaşov N.İmanquliyevin əsl ziyalı jurnalist kimi mətbuata verdiyi töhfələrdən danışdı: AMEA-nın müхbir üzvü, millət vəkili Nizami Cəfərov da Nəsir müəllimlə bağlı səmimi duyğularını tədbir iştirakçıları ilə bölüşdü: «İndiki jurnalistlər nədənsə öz tərcümeyi-hallarını gizlətməyə çalışırlar. Amma o zaman jurnalistlərin hər gününün tərcümeyi-halını görmək mümkün olurdu. Nəsir müəllimin də tərcümeyi-halı hər kəsin gözlərinin qarşısında idi. Onun redaktoru olduğu «Bakı» qəzetində mənim də məqalələrim çap olunub. Nəsir müəllim istedadlı qələm əhlini sevir, istedadlı gənc yazarlara hər cür şərait yaradırdı. Nəsir müəllimlə bağlı bu cür silsilə tədbirlərin keçirilməsi хalqımız üçün çoх əhəmiyyətlidir».

Nisə

Olaylar.- 2011.- 21 dekabr.- S.8.