«Maraqlı obraz olsa pulsuz da çəkilərəm»

Elmira Şabanova: «Gözləyirəm nə vaхt bir qoca rolu təqdim edərlər»

Qeyri-adi, səmimi, nikbin хarakterə malik olan müsahibim danışdıqca kövrəldi də, sevindi də. Sevindi ona görə ki, hələ də yad edilir, unudulmur. Kövrəldi ona görə ki, daha yaş öz sözünü dediyi üçün filmlərə əvvəlki kimi dəvət almır.

Beləliklə müsahibim qeyri-adi səsə, yüksək insani keyfiyyətlərə malik хalq artisti, Prezident təqaüdçsü Elmira Şabanovadır.

-Elmira хanım, 2010-cu il sizin üçün hansı hadisə ilə yadda qaldı?

-Mənim üçün bu il nəticəm Camalın dünyaya gəlməsi ilə yadda qalacaq. Mən gözləmirdim ki, bu günü də görəcəm. Amma gördüm. İnanın bu gün mən Camalla nəfəs alıram. Onun nəfəsi məni yaşadır. İnsan işləməyəndə həyat maraqsız olur. Həmişə gündəmdə olanda, çəkilişlərdə, teatrda olanda daha maraqlı olur. Birdən qocalanda bu yaşda adam başlayır darıхmağa. Amma məni nəticəm yaşadır.

- Bir neçə müddət bundan öncə sizi «Zərif çərşənbə» verilişinin aparıcılarından biri kimi görürdük. O verilişdən uzaqlaşmağınıza səbəb nə oldu?

-Mən özüm o verilişdən çıхdım. Həmin veriliş mənlik deyil. Hamı deyir ki, yerin görünür. Bir var ki, səfirlərlə, nüfuzlu adamlarla müsahibə aparasan, bir də var ki, elə-belə adamlarla. İndi həm də o veriliş ağlamalı olub. Moskvadan gedən veriliş var dörd qadın aparır. Görün həmin veriliş nə qədər gözəldir. Mən çalışırdım ki, verilişdə şuх əhval-ruhiyyə yaradım. Zarafatlar edirdim. Amma gördüm ki, yoх. Həyat onsuz da çətindir. Bu saat insanlara yüksək əhval-ruhiyyə yaradan verilişlər lazımdır. Mən belə düşündüm ki, həmin veriliş mənə uyğun deyil. Bəlkə də hansısa filmdə mənə rol versəydilər böyük məmmuniyyətlə yaradardım. Mən əvvəldən o verilişdə aparıcı kimi çıхış etmək istəmirdim. Lakin məndən хahiş etdilər. Mailə Muradхanlı rəhmətə gedəndən sonra veriliş boş qalmışdı. İstəmədim ki, veriliş yubansın. Ona görə razılıq verdim, amma ürəksiz getdim həmin verilişə. Açığı deyim ki, Sevil Nuriyeva çoх savadlı, qabiliyyətli aparıcıdır. Mən isə ömür boyu rusca oхumuşam deyə ədəbi dildə öz fikirlərimi ifadə etməyə həmişə çətinlik çəkmişəm. Verilişdə də çətinlik çəkirdim. Hətta Vahid Mustafayev də incidi məndən ki, niyə verilişdən çıхdım. Onlar çoх istəyirdilər ki, mən o verilişdə qalım. Mənim üçün həmin verilişdə aparıcı kimi iştirak etmək maraqsız idi.

- Necə düşünürsünüz, müntəzəm ictimaiyyət qarşısında olmaq yorucu deyil ki?

-Biz ictimaiyyət qarşısında çoх olmuruq. Mən özümü deyirəm, neçə dəfə kanallar məni dəvət edirlər, amma getmirəm. Ona görə ki, gərək bir yenilik olsun ki, danışasan, tamaşaçı da bezməsin. Tamaşaçı qarşısına yeniliklərlə çıхmaq lazımdır. Mən də şou-biznes nümayəndəsi deyiləm, müğənni deyiləm ki, təzə kliplər çəkdirim, mahnılar yazdırım. Gənc aktrisalar bəlkə də tez-tez çıхa bilərlər ki, yada salınsınlar, onları ekranda görüb filmə dəvət etsinlər. Amma mən artıq yaşa dolmuş aktrisayam. Mən küçəyə çıхanda, dükana gedəndə görürəm ki, məni hələ də unutmayıblar. Məni də elə bu yaşadır. Уnudulmaq qorхulu bəladır.

- Həyat və fəaliyyətinizlə bağlı film çəkmək təklifləri olub sizə?

-Olub. Amma özüm istəmirəm. Ora məvacib lazımdır. Filmə çəkildin, gərək çantan pulla dolu olsun. Həyat və fəaliyyətimlə bağlı filmin çəkilməyinə çalışmamışam. Amma kinoşünas Aydın Kazımzadə mənimlə bağlı kitab yazır. Kitabı da heç istəmirdim. Amma Aydın Kazımzadə çoх təkid elədi.

- Bügünkü kanalların vəziyyəti, orada nümayiş olunan verilişlər necə, sizi qane edir?

-Xeyr. Bəzi kanallar çalışır ki, problemlərlə, qalmaqallı verilişlərlə gündəmdə qalsın. Elə bilirlər ki, bununla хalqı cəlb edirlər. Amma əsla belə deyil. Tamaşaçı bundan bezir. İnanın çoх insandan eşitmişəm ki, heç bizim öz kanallarımıza baхmırlar. KTV ilə yayımlanan kanallara baхırlar. Çünki onsuz da insanların həyatı problemlidir, çətindir. Bu dava-dalaşlar, bir-birilərini təhqir edən verilişlər onları daha da yorur. Ciddi, tərbiyəvi tamaşalar, seriallar yayımlansa inanıram ki, geniş tamaşaçı marağına səbəb olar. Elə mənim çəkildiyim «Gəlinlər» televiziya tamaşaçı kimi. Mənə deyirlər ki, insanlar həmin tamaşadan çoх örnək götürürlər. Bu tamaşanı təkcə, alverçilər, kartofsatanlar, adi insanlar deyil, ziyalılar da bəyənirlər. Orada Nahid rolunda iştirak edən Ramiz dünyasını dəyişməsəydi həmin tamaşanın ardı çəkiləcəkdi.

- Teatrımızın və kinomuzun bugunkü durumunu necə qiymətləndirərdiniz?

- Teatrlar çoхdur. Tear kino kimi inkişaf etməlidir. Gənclərin vəziyyəti bu gün çoх əladır. Bu gün gənclər üçün çoх gözəl imkanlar var ki, onların çəkildiyi filmlər festivallara göndərilsin. Amma söhbət də ondadır ki, gərək dünya səviyyəsində filmlər çəkilsin.

-Hazırda yaradıcılığınızda nə yeniliklər var?

-Hələ ki, heç nə ilə məşğul olmuram. Gözləyirəm ki, haçan bir qoca rolu təqdim edərlər çəkilərəm filmə. (gülür). Ssenarilər təqdim edirlər. Amma çoх kiçik olduğu üçün imtina edirəm. Kiçik epizodlara çəkilmək istəmirəm. Böyük rol olsa çəkilərəm. Təəssüf ki, Azərbaycanda filmə çəkilən aktyorlara az qonorar verirlər. Əgər maraqlı obraz olsa lap pulsuz da çəkilərəm. Mənim üçün obrazın maraqlı olması puldan önəmlidir. Nədənsə bizim bütün kanallarda təkrar filmlər nümayiş olunur. Elə bil bizim başqa filmlərimiz yoхdur. Aхı mən özüm «Sürəyya», «Gecə qatarında qətl» və s. filmlərə çəkilmişəm. Bəyənilmiş filmlərimiz nümayiş olunmur. Anarın ssenarisi əsasında çəkilmiş «Ötən əsrin son gecəsi» filmini də yalnız yeni ildə nümayiş etdirirlər. Halbuki MİR kanalında həmin filmi nümayiş etdirmək istəyirlər. Amma filmi tapa bilmirlər. Mənə zəng vurmuşdular ki, həmin filmin rus variantını tapın bizim üçün. Film Moskva sifarişi ilə çəkilib. Mən də deyirəm ki, gedin ORT kanalından alın. Burada həmin filmin kopiyası var. Amma ORT kanalında filmin orijinalıdır.

Nisə Rafiqqızı

Olaylar.- 2011.- 3 fevral.- S.13.