“Çap
mətbuatı müasir media
texnologiyalarına qoşulmalıdır”
“Mətbuat canlı orqanizm kimi daim
hərəkətdə olmalı və cəmiyyətin
önündə getməlidir”
Day.Az Media Şirkətinin direktor
müavini Sevda İlhamqızının “Olaylar” İnformasiya
Agentliyinə müsahibəsi
- Azərbaycanda Milli Mətbuat
Günü ərəfəsindəyik. İllər
keçdikcə mətbuatın fəaliyyətində
hansı dönüş yaranır?
- Azərbaycanda
milli mətbuat bildiyiniz kimi, ilk olaraq insanların maariflənməsinə
xidmət edirdi, daha sonra operativ məlumatlandırılmasında,
cəmiyyətdə plüralizm və tolerantlıq
ideyalarının formalaşmasında böyük rol
oynayıb. Mətbuat cəmiyyətin güzgüsüdür,
artıq onsuz bir toplumu təsəvvür belə etmirik.
Milli
mətbuatımız təbii ki inkişaf edir, Azərbaycanda
mindən çox kütləvi informasiya vasitəsi qeydiyyatdan
keçib. Onların bir hissəsi daimi nəşr olunan
dövrü mətbuatdır. Gündəlik çap olunan qəzetlərin
sayı kifayət qədərdir. Mətbuat orqanları
sırasına mütəmadi olaraq yeni nəşrlər
qoşulur.
Azərbaycan artıq qlobal informasiya
sisteminə qoşulub. Bir çox demokratik ölkələrdə
olduğu kimi, Azərbaycanda da Mətbuat Şurası
yaradılıb, "Mətbuat haqqında" Qanun qəbul
edilib, Prezident Yanında KİV-in İnkişafına Dövlət
Dəstəyi Fondu yaradılıb, hər il dövlət
büdcəsindən mətbuata birdəfəlik yardımlar
ayrılır. Bu işlər də mətbuatın
inkişafına və dəstəklənməsinə köməklik
edir.
- Çap mətbuatının
öz yerini internet mediasına verməsi firki getdikcə
möhkəmlənir. Mətbuatı bu gedişlə nə
gözləyir?
- Bu
fikir tək bizdə deyil, bütün dünyada
formalaşıb. “Çap mətbuatı oxucularını
itirirmi”, “internetə uduzurmu” sualları çox aktualdır.
Doğrudur, internet demək olar ki, dünyanı öz cənginə alıb. Hər bir şey, bütün yaşam
internet məkanına köçürülür,
orda özünə yer eləyir, möhkəmlənir və
insanlar da bu virtual həyatın içinə düşüb
bu axınla gedirlər. Mətbuat da virtual axına
qoşulub. Daha doğrusu,
mətbuatın internet forması
- internet media formalaşıb. Necə deyərlər, “özünü
tutub” və xeyli də populyarlaşıb.
Amma bu, o demək deyil ki, özündən
əvvəlki, ənənəvi
mətbuatı tamamilə
sıradan çıxarıb.
Ümumiyyətlə, dünyada əksər
ölkələr çap
mətbuatını qoruyub
saxlamağa çalışırlar.
Dünyaca tanınmış, nüfuzlu qəzetlər var ki, hətta
elektron KİV-lə rəqabətdə heç
də uduzmur, bu gün də
çox böyük gücə malikdirlər və ictimai fikri formalaşdırmağa
qadirdirlər. Həmin nüfuzlu
qəzetlər öz peşəkarlıqlarını qorumaqla və müasir tendensiyalara doğru inkişaf etməklə öz mövcudluqlarını saxlayırlar.
İnformasiya texnologiyaları hər
nə qədər inkişaf etsə də, klassik mətbuata bağlı insanlar var və
o auditoriya gündəlik
olaraq qəzetləri izləmək vərdişini
saxlayır.
- Milli mətbuatımız yeniləşir,
yoxsa ənənəvi
simasını saxlayır?
- Yeniləşərək ənənəvi
funksiyasına sadiq qalmalıdır. Müasir tələblərə cavab vermədən inkişaf etmək mümkün deyil. Bizdə də mətbuat orqanları yeni inkişaf tendensiyalarına
qoşulmalıdır. Həm də düşünürəm
ki, ana funksiyasını
mütləq saxlamalıdır.
Mətbuat yalnız tərəfsiz
olaraq cəmiyyətin
məlumatlanması, maariflənməsi,
mütərəqqi ideologiyaların
cəmiyyətə ixracı
kimi təməl prinsiplərdən uzaqlaşmamalıdır.
Yenilikçilik də lazımdır. Ümumiyyətlə, qəzetçilik işinin
oturaq və arxaik üslubdan çıxarılması lazımdır.
Çevik, daim yeniləşən,
cəmiyyətdəki inkişafla
ayaqlaşa bilən struktur olmalıdır mətbuat. Özünün reklam bazarını,
biznesini formalaşdırmaq
da mətbuatın özünü inkişaf
təbdirlərindən biri
olmalıdır. Bir sözlə,
mətbuat canlı orqanizm kimi diri,
daim hərəkətdə
olmalı və cəmiyyətin önündə
getməlidir.
- Yeni standartlara uyğunlaşmaq
üçün nələr
çatmır, nə
etmək lazımdır?
- Dünya təcrübəsindən
nümunələr götürmək
olar. Məsələn,
baxın Böyük Britaniyanın məşhur
“The İndependent”, “The Telegraph”, “The
Guardian”, ABŞ-ın “The Vashington
Post” qəzetlərinə. Bu
nəşrlər o qədər
inkişaf ediblər ki, bu gün
onların hər biri bir media institutudur. Bu qəzetlərin internet səhifəsi
böyük bir portaldır, ən məşhur xəbər saytları ilə, agentliklərlə rəqabətə
girməyə qadirdir.
Hər gün yenilənirlər,
“on-line” rejimdə işləyirlər
və hər bir məlumatı orda tapmaq mümkündür.
Analoji olaraq ticarət təsisatı ilə müqayisə etsək, sanki böyük bir meqa-marketdirlər, siz istədiyiniz hər bir şeyi
o saytlarda tapa bilərsiniz. Yəni, bu
qəzetlər öz ölkəsinin əhalisinin
məlumat almaq təlabatını ödəyirsə,
onların internet versiyalarını
isə bütün dünya oxuyur. Orada bütün dünyanı əhatə
edən çox böyük informasiya bazasına, geniş
multimedia məhsullarına, fotoarxivə, videolara, musiqiyə belə rast gəlirsiniz, geniş sosial şəbəkəyə çıxırlar,
yorucu olmayan maraqlı reklam təqdimatları var və s. Bir sözlə, öyrəniləsi
məqamları çoxdur.
Bir də dünyada qəzetçilik
anlayışının yerini
xəbərçilik funksiyası
tutur. Və sürətlə sosiallaşma prosesi gedir. İndi bütün dünyada
sosial media formalaşır.
Xüsusilə də internet məkanında
sosial xəbər şəbəkəsi getdikcə
yerini möhkəmləndirir
və bu da ənənəvi mətbuatı kölgədə
saxlaya bilər. Sosiumun internetləşməsinin qarşısını
almaq mümkün deyil. Üstəgəl də, informasiya
texnologiyalarının günü-gündən
inkişafı. Məsələn, peşəkar olmasa da, həvəskar, şəxsi məlumatlandırma
şəbəkəsi yaranır.
İndi hər bir kəs
istədiyi məlumatı,
foto və video görüntünü, audio səsi,
yazılı informasiyanı
sosial şəbəkələrdə,
bloqlarda, saytlarda yaya bilir. Bunlar bir növ KİV-lərin alternativi də sayıla bilər.
Bu qədər yeniliklər
və müasirləşmələr
içərisində çap
mətbuatı sadəcə
klassik model kimi qalacaq - əgər bu axına düşməsə
və özünü
inkişaf etdirməsə. Odur ki, çap mətbuatı mütləq şəkildə
müasir media texnologiyalarına
qoşulmalıdır. Təbii ki, özünün çap versiyası da təkmilləşməlidir.
Azərbaycanda mediaşünaslar çox
azdır, demək olar ki, yoxdur. Amma qəzetçilər
var və onlar bu məsələlər
barədə ciddi düşünməlidirlər.
Olaylar.-2011.- 20 iyul.-S.14.