"Azərbaycanda uşaq mahnıları yazan bəstəkarlar yoxdur"

"Uşaqlar ağzını açan kimi Aygün Kazımova, Röya və Aygün Bəylərin mahnılarını oxuyurlar"

"Azərbaycanda uşaq mahnılarını imkanlı adamlar pul müqabilində nəvələrinə, övladlarına yazdırırlar. Amma ümumilikdə uşaqlara, onların tərbiyəsinə aid mahnılar yazılmır”. Bunu əməkdar İncəsənət xadimi, "Şöhrət" ordenli, "Muğam" teatrının direktoru və baş rejissoru Arif Qaziyev deyib. O bunu ölkədə uşaq mahnıları yazan bəstəkarların yoxluğu ilə əsaslandırıb. Onun sözlərinə görə, hazırda uşaq mahnıları yazan bəstəkarların hamısı rəhmətə gedib: "O vaxtlar Fikrət Əmirov, Qəmbər Hüseynli, Səid Rüstəmov da uşaq mahnıları yazıb. Hətta Qara Qarayevin də uşaq mahnıları var idi. O vaxt uşaq mahnılarına maraq var idi. Sovet dövrünün təbliğatı bəstəkarları da uşaq mahnıları yazmağa təhrik edirdi. Necə ki, pambıqçılar, neftçilər haqda mahnılar bəstələyirdilər. İndiki bəstəkarlar isə mahnını ona-buna satmaq üçün yazırlar".

A.Qazıyev qeyd etdi ki, hazırda uşaqlarımızın özəl proqramları, musiqiləri yoxdur: “Uşaqlar ağzını açan kimi Aygün Kazımova, Röya və Aygün Bəylərin mahnısını oxuyurlar. Uşaqlarımız hazırda proqramsız qalıblar. Uşaqları tərbiyə etmək üçün gərək verilişlər hazırlansın, onlara uşaq mahnıları öyrətmək lazımdır. Əvvəllər uşaq xoru vardı, hətta məktəblərdə də belə uşaq xorları təşkil olunurdu. İndi uşaqlar 10 yaşından başlayırlar ara mahnıları oxumağa və qulaq asmağa".

Muğam Teatrının direktoru hesab edir ki, uşaqlar musiqisiz qalanda, öz yaşına uyğun olmayan musiqiyə qulaq asanda, vaxtından əvvəl qocalırlar. "Hazırda uşaqlar vaxtından əvvəl yaşlarına uyğun gəlməyən mahnılara qulaq asırlar, oxuyurlar, 10 ildən sonra həmin mahnılar onları boğaza yığır. Axı mahnıların davamı gəlmir. Çünki yaxşı mahnı az yazılır, yazılan mahnıların əksəriyyəti ara mahnılarıdır, toyxanalarda ifa olunur". Əməkdar incəsənət xadimi təklif edir ki, problemi həll etmək üçün dövlət səviyyəsində uşaqlar üçün repertuar hazırlanmalıdır: "Şairlərə uşaqlar haqda şeirlər yazması, bəstəkarlara isə uşaq mahnısı bəstələməsini tapşırmaq lazımdır. Bu mahnıları dövlət almalıdır. Belə olan halda bəstəkarlar yazarlar".

Olaylar.- 2011.- 5-7 mart.- S.16.