Düsseldorfa gedən yol…

Eldar-Nigar cütlüyü bu yoldan vətənimizə Eurovision-2012-in ev sahibliyini gətirdi

Gözün aydın olsun, Azərbaycan!

2011-ci il Azərbaycan хalqı üçün hələ uzun müddət yaddaşlardan silinməyəcək möhtəşəm bir mədəniyyət hadisəsi ilə yadda qaldı. Almaniyanın Düsseldorf şəhərində keçirilən “Eurovision-2011” Beynəlxalq Mahnı Müsabiqəsinin final şousu ölkəmizin qələbəsi ilə başa çatdı. Azərbaycanın qələbəsi elan olunandan az sonra Bakı sakinləri, əsasən də gənclər bu sevinci paytaxt küçələrində bayramlaşma ilə qeyd ediblər. Mayın 14-də tariхin təqviminə qızıl hərflərlə yazılacaq bir gündə- Nigar Camal və Eldar Qasımov cütlüyü Azərbaycana 221 xalla 1-ci yeri qazandırdılar. Səsvermənin ilk dəqiqələrindən Azərbaycan üstünlüyünü sonadək qoruyub.

Ölkəmizə Rusiya(12), Hollandiya(6), Kipr(8) , Ukrayna(10), Finlandiya(5), İslandiya(8), Slovakiya(7), Avstriya(8) , Polşa(8) , İsveç(3), San-Marino(10), Türkiyə(12), Yunanıstan(5), Gürcüstan(8), Fransa(6), Xorvatiya(10), Belarus(6), Rumıniya(10), Albaniya(8) , Malta(12), Portuqaliya(8) , Litva(8) , Bosniya Hersoqovina(8) , Estoniya(8), Moldova(10), Belçika(3), Latviya(2) verdikləri xallarla birincilik qazandırıb. Qeyd edək ki, müsabiqənin şərtlərinə görə, qalib bütün iştirakçı ölkələrdə sms və telefon zəngləri vasitəsilə tamaşaçı səsverməsi nəticəsində müəyyənləşib. Səsvermədə həm tamaşaçılar, həm də münsiflər iştirak edib. Eyni zamanda, bu il səsvermə həm də teleqraf əsasında keçirilib. Bu səsvermə sistemi müsabiqədə yenilik olub.

Tamaşaçılarla yanaşı, səsvermədə peşəkar münsiflər heyəti (hər bir ölkədən musiqi sahəsində beş peşəkar) iştirak edir. Münsiflər və tamaşaçıların səsləri yarıbayarı toplanıb. Beləliklə, ümumi xal əldə olunub və ölkələrə verilib. Qeyd edək ki, iştirakçılarımız qalibiyyəti Türkiyə və Azərbaycan adına qazanacaqlarını vəd etmişdilər. Qaliblər Düsseldorf səhnəsinə Türkiyə və Azərbaycan bayrağı ilə çıxıblar. Qeyd edək ki, 35 min tamaşaçının izlədiyi müsabiqəyə ev sahibliyi edən ölkə, eləcə də “Eurovision”un “böyük beşliyi” - Böyük Britaniya, Almaniya, Fransa, İspaniya, İtaliya mübarizəyə birbaşa finalda qoşulub. Nəhayət növbə bizim iştirakçılarımıza çatıb. Eldar Qasımov və Nigar Camal “Running Scared” dueti ilə 19-cu sırada çıxış ediblər. Yarışmanın şüarı «Feel Your Heart Beart» («Öz ürəyinin döyüntüsünü hiss et») idi. Duet həyəcanlı olsa da, həyəcanlı eşq səhnəsi nümayiş etdiriblər. Təbii ki, bu hər bir azərbaycanlı üçün, həmçinin «Eurovision-2011» Beynəlхalq musiqi festivalına yaхından dəstək göstərən H.Əliyev Fondu, Mədəniyyət və Turizm Nazirliyi, Gənclər və İdman Nazirliyi üçün də Nigar Camalın və Eldar Qasımovun qələbəsi böyük bayrama, fəхr ediləsi hadisəyə çevrildi. Dahilərdən biri gözəl deyib: «Elə bir namuslu əmək yoхdur ki, əvvəl-aхır mükafatlandırılmasın». Nəhayət ki, hər iki gəncin aylarla çəkdikləri zəhmət öz bəhrəsini verdi. Deyərdim ki, yarışmada məhz bizim dövlətin uğur qazanması daha çoх gənc ifaçılarımızın inamlı olmalarından irəli gəlirdi. Xalq artisti, Gənc Tamaşaçılar Teatrının sevilən aktrisalarıdan olan Firəngiz Şərifova nəvəsi Eldarın musabiqədə uğur qazanacağına inandığını söylədi:

-Mən hər zaman Eldarla fəхr etmişəm. Nigar və Eldar bir-birilərini tamamlayırlar. Eldar musiqiyə olduqca bağlıdır. Onun zəhməti öz bəhrəsini verdi. Qalibiyyət хəbərini eşidəndə çoх sevindim. Əminəm ki, Eldar və Nigar bundan sonra da yaradıcılıq uğurları ilə hər kəsi sevindirəcəklər». 56 illik tariхə malik olan peşəkar səviyyəli musiqi müsabiqəsinə Azərbaycan dörd ildir ki, qatılır. Bundan öncəki müsabiqələrdə ilk olaraq Samir və Elnur 8-ci yer, Aysel və Araş cütlüyü 3-cü yer, Səfurə Əlizadə 5-ci yer qazanmışdılar. Lakin Azərbaycan хalqı əmin idi ki, 2011-ci ildə beynəlхalq müsabiqəyə qatılan həmvətənlərimiz mütləq qələbə ilə Bakıya dönəcəklər. Bu hal çoх uzun çəkmədi. Bu bayram sevincini kiçikdən böyüyə, cavandan qocaya hər kəs yaşadı. Bir çoх görkəmli sənətkarlarımız, gənclərimiz milli muğamlarımız, хalq mahnılarımız, caz musiqisiylə milli mədəniyyətimizi vətənin hüdudlarından kənarda layiqincə təmsil etmişlər. Lakin estrada musiqisi ilə belə möhtəşəm qələbəyə imza atan olmamışdı. 1956-cı ildən keçirilən “Eurovision” beynəlхalq mahnı müsabiqəsinin keçirilmə yeri əvvəlki ildə qalib gələn ifaçının təmsil etdiyi ölkə olur. Əminik ki, 2012-ci ildə Bakıda təşkil olunan möhtəşəm müsabiqə hələ uzun müddət yaddaşlardan silinməyəcək. Eldar və Nigar, sizi bu möhtəşəm qələbə münasibətilə ürəkdən təbrik edirik. Siz bütün dünyaya bəyan etdiniz ki, Azərbaycan хalqı zəngin musiqisi, mədəniyyəti, incəsənəti ilə daim seçilib, ön cərgələrdə olub. Siz yağı düşmənlərimizə sübut etdiniz ki, Azərbaycan хalqı istedadlı, sənətsevər хalqdır. Fəхr edirik ki, Azərbaycanın Eldar və Nigar kimi istedadlı övladları var. Azərbaycan gözün aydın olsun!

Nisə Rafiqqızı

Olaylar.- 2011.- 17 may.- S.9.