İşığın, rəqsin və jestin oyunu

Mayın 18-də Polşa Respublikasının Bakıdakı Səfirliyinin təşəbbüsü ilə Akademik Milli Dram Teatrında polyak Lyublin Rəqs Teatrı əməkdaşlarının mətbuat nümayəndələri ilə görüşü keçirildi. Konfransın əsas mövzusu teatr sahəsində polyak-Azərbaycan əməkdaşlığına start verilməsi və Azərbaycanda ilk dəfə mayın 18-də «Nano» tamaşası ilə çıxış edən Lyublin Rəqs Teatrının təqdimatı ilə bağlı idi.

Lyublin Rəqs Teatrının Azərbaycana səfəri Polşa-Azərbaycan teatr münasibətlərinin inkişaf etdirilməsinə və sıх qarşılıqlı əlaqələrin qurulmasına yönəldilib. Konfransı giriş sözü ilə açan Akademik Milli Dram Teatrının direktor müavini Azər Mirzəyev Polşa teatrının yaradıcı heyətini Akademik Milli Dram Teatrında görməkdən qurur duyduğunu söylədi və Lyublin teatrının tariхinə qısaca olaraq nəzər saldı: «Bu yaхınlarda Azərbaycan teatr icmasının bir qrup nümayəndəsi Lyublin şəhərində səfərdə olmuşlar. Bu görüş Polşa səfirliyinin təşəbbüsü ilə keçirilib. Hesab edirəm ki, bu görüş gələcək Azərbaycan-Polşa tədbirlərinin başlancığı olacaq. Gələcəkdə bir-birimizlə qarşılıqlı təcrübə mübadiləsi, dərslər keçmək və dərslər almaqdır. Artıq dünən bizim qonaqlarımızın iştirakı ilə Yuğ Teatrında ustad dərsləri keçirilib. Bu görüşlər çərçivəsində olan tədbirlərin bir başlanğıcı oldu. Azərbaycan teatr icmasının nümayəndələri cari ilin aprel ayında Polşada tədris səfərində olmuşdular. Orada Azərbaycan teatr xadimlərinin Polşada aktyorluq peşəsi sahəsində təhsil sistemi və Polşanın teatr xadimləri ilə tanış olmaq və Varşava Teatr Görüşləri festivalında iştirak etmək fürsəti olmuşdur. Bu gün Akademik Milli Dram Teatrı Lyublin Teatrını öz divarları arasında qəbul edir. Lyublin Rəqs Teatrı 2001-ci ildə yaradılmışdır. Teatr dəfələrlə Polşada və xaricdə, o cümlədən ABŞ-da, İsveçrədə, Fransa, Macarıstan, Finlandiya, İspaniya, Litva, Rusiya, Almaniya, Avstriya, Tunis, Hollandiya, Belorusiya və Ukraynada keçirilmiş beynəlxalq festivalların və təqdimatların iştirakçısı olmuşdur. Lyublin Rəqs Teatrının Bakıya qastrol səfəri bu il Polşa Respublikasının Bakıdakı Səfirliyinin və Akademik Milli Dram Teatrının təşəbbüsü ilə start verilən teatr sahəsində Polşa-Azərbaycan əməkşdaşlığının nəticəsidir. »

Konfransda iştirak edən Azərbaycandakı Polşa səfirliyinin nümayəndəsi Danis Sekeviç Azərbaycanda atılan ilk addımların uğurlu olacağına inandığını söylədi. Lyublin teatrının aparıcı aktyoru Rışard Kalinvoski isə öz səfər təssüratlarını jurnalistlərlə bölüşdü:

-«Mən çoх şadam ki, bu gün gözəl şəhərlərdən sayılan Bakıdayam. Bakının möhtəşəm Teatrlarından olan Akademik Milli Dram Teatrının səhnəsində tamaşada oynamaq mənim üçün böyük sevincdir. Tamaşa haqqında onu deyə bilərəm ki, dünyada insanların 2 tipi var: 2 tipinin mövcud olduğunu düşünənlər və bunu düşünməyənlər. «Nano» adi gözlə görünə bilməyən bir şey deməkdir. Əhəmiyyətsiz, хırda bir şey deməkdir. Nəhəng səylər, yaşanan emosiyalar və Günəş altında öz yeri uğrunda mübarizə ilə yanaşı, insan həmçinin də öz məhdudluğu ilə qarşılaşır, «divarın qabağında durur və zəifliyini dərk edərək başını divarlara vurur». Qeyd edək ki, mayın 18-də saat 20-00 da Azərbaycan Dövlət Akademik Milli Dram Teatrının səhnəsində polyak Lyublin Rəqs Teatrının tamaşası keçiriləcəkdir. Polşadan olan 5-nəfərlik aktyor qrupu insanların şübhələrindən, həyat problemlərindən, fərq və oxşarlıqlardan bəhs edən “Nano” adlı tamaşanı təqdim edəcəkdir. Tamaşanın adında öz əksini tapmış “nano” incəsənət naminə yaradılmış, özündə həm qadın, həm kişi keyfiyyətlərini birləşdirən insan vücududur. Artistlərin yeganə ifadə vasitələri rəqs, jestlər və işığın oyunudur.

Nisə Rafiqqızı

Olaylar.- 2011.- 19 may.- S.13.