Bakı Eurovisiona hazırlaşır

Məlum olduğu kimi, ötən il ölkəmiz “Eurovision-2011” beynəlxalq mahnı müsabiqəsində qalib oldu və biz növbəti yarışmaya ev sahibliyi edəcəyik. Bu müsabiqənin önəmindən danışmağa ehtiyac yoxdu. Amma deməliyik ki, “Eurovision” sadəcə bir musiqi yarışı deyil, bu həm də ölkənin tanıdılması, onun gücünün, mədəniyyətinin göstəricisi, turizm imkanlarının genişlənməsi və.s deməkdir. Elə buna görə də, hər dəfə qalib gələn ölkə qalibiyyətin sabahı günündən növbəti yarış üçün hazırlıq işlərinə başlayır. Bu il ev sahibi olduğumuzdan paytaxtda da artıq hazırlıq işlərinə çoxdan başlanılıb. Demək olar ki, sadə vətəndaşlardan tutmuş, bu işin təşkilatçılarına qədər hər kəs bu işin öhdəsindən necə gələcəyimizlə bağlı narahatdır.

Ölkəmizə gələn hər bir turistin bizdən razı qalması çox önəmlidir, çünki turistlər ən yaxşı reklam agentləridir. Bəs narahatlığa əsas varmı? Hazırlıq işləri necə gedir?

Öncəliklə ondan başlayaq ki, may ayında Azərbaycan Prezidenti İlham Əliyev Bakıda “Eurovision-2012” mahnı müsabiqəsinin keçirilməsi ilə bağlı Təşkilat Komitəsinin yaradılması haqqında Sərəncam imzaladı. Sərəncama əsasən, təşkilat komitəsinin sədri YUNESKO-nun xoşməramlı səfiri, Heydər Əliyev Fondunun prezidenti Mehriban Əliyeva təyin olunub. Təşkilat komitəsi “Eurovision–2012” mahnı müsabiqəsinin təşkili və keçirilməsi ilə bağlı tədbirlər planı hazırlayıb həyata keçirməlidir. Təşkilat komitəsi ilk iclasını iyul ayında keçirib və yaxın günlərdə növbəti iclasın keçiriləcəyi də planlaşdırılır. Bununla yanaşı Məşvərət Qrupu da görülən işlərlə bağlı tədbirlər keçirir. Qrupun ilk iclası Bakıda keçirilsə də, budəfəki iclas oktyabrın 7-də İsveçrənin Cenevrə şəhərində keçiriləcək. İclasda "Eurovision 2012" mahnı müsabiqəsinin keçirilməsi ilə bağlı təşkilati məsələlər müzakirə ediləcək.

Məkan dəqiq deyil

Görülən hazırlıq işləri içərisində ən önəmlisi müsabiqənin keçiriləcəyi yerdir. Qeyd edək ki, bununla bağlı müxtəlif təkliflər olsa hələ ki, bu tam dəqiqləşməyib. Müsabiqənin keçirilməsi üçün mümkün yerlərdən biri də “Alpine BAU Deutschland AG" şirkəti tərəfindən tikiləcək kompleksdir. Bu 23 mindən çox tamaşaçı tutumuna malik ən iri idman-konsert kompleksi olacaq. Qeyd edək ki, Osloda müsabiqəsinin keçirildiyi stadion dörd min, Drüsseldorfdakı stadion 10 min nəfər tuturdusa, "Alpine"nin Azərbaycanda tikəcəyi kompleksin 23 mindən çox tamaşaçı tutumuna malik olacağı da bir üstünlükdür. Tikinti işlərinin tez bir zamanda tamamlanması planlaşdırılır. Müqaviləyə əsasən, "Alpine" 31 mart 2012-ci ilədək arenanın tikintisini başa çatdırmağı öhdəliyinə götürüb. Həmçinin, layihənin tərkib hissələrindən biri kompleksin yaxınlığında bütün müasir avadanlıqlarla təchiz ediləcək 1500 nəfərlik media mərkəzinin inşa edilməsidir. Kompleks beynəlxalq standartlara uyğun olacaq, onun kifayət qədər giriş-çıxışı gələnləri maneəsiz qəbul etməyə imkan verəcək. Standartlara uyğun olaraq, hər hansı bir fövqəladə hal baş verərsə, stadionun bütün qonaqları 8 dəqiqə ərzində təxliyyə oluna bilər.

Qonaqpərvər Bakı

Müsabiqə ərəfəsində ölkəmizə gələcək turistlərin sayı ilə bağlı müxtəlif proqnozlar var. Kimisi 50, kimisi 60 min və daha çox gələcəyini deyir. Gələcək qonaqların rahatlığını təmin etmək heç də asan məsələ deyil. Paytaxtda fəaliyyət göstərən otellərdəki yer sayı bu qədər turistin yerləşməsinə imkan vermir. Ona görə də, yeni otellər tikintisinə başlamaq qaçılmazdır. Qonaqpərvər ölkə olduğumuzdan gələcək turistlərin rahatlığı üçün ciddi hazırlaşırıq. Müsabiqəyə qədər yeni otellərin fəaliyyətə başlayacağı planlaşdırırlır. Bu gün ölkədə fəaliyyət göstərən 2, 3, 4 və 5 ulduzlu otellərdə hazırlıq işlərinə başlanılıb. Artıq bu otellərin saytları, onlayn brounlaşdırılması sistemi də hazırdır. Hazırda paytaxtda otellərin tikintisi davam edir və hazır olduqdan sonra da onlar da turistlərin istifadəsinə veriləcək. Bununla yanaşı Mədəniyyət və turizm naziri Əbülfəs Qarayevin otellərdəki durumla bağlı açıqlamasında bildirmişdi ki, müsabiqəyə hazırlıqla bağlı sentyabrın 1-dən otellərdə yer satışları dayandırılmalıdır. Yalnız, “Eurovision-2012” müsabiqəsinə gələn qonaqlar və iştirakçılar yerləşdirildikdən sonra yerlər azad şəkildə satışa buraxılacaq deyə nazir bildirmişdi. Qeyd edək ki, Bakıda 6 yeni 5 ulduzlu mehmanxana tikilib, 6 hotel tipli motelin isə istifadəsi nəzərdə tutulur.

Yüksək xidmət

Yarışma ilə əlaqədar turistlərə göstəriləcək xidmətin səviyyəsinin yüksəldilməsi üçün otellərə “on-line” qeydiyyat sisteminin yaradılması və xidmət personalının peşəkarlığının artırılması məqsədilə işlərə də başlanılıb. Bununla yanaşı gələn qonaqlar milli mətbəximizin ləziz yeməklərindən dada biləcəklər. Belə ki, Bakıdakı restoranlarda Azərbaycan milli mətbəxin nümunələri ilə tanış olmaq imkanları yaradılacaq. Turistlərin informasiya ehtiyaclarını da müasir tələblərə uyğun təşkil etmək üçün yeni xidmətlər yaradılır. Bakı şəhərinin ictimai yerlərində informasiya köşklərinin və internet köşklərin quraşdırılması ilə bağlı da müxtəlif şirkətlər tərəfindən təkliflər irəli sürülüb. Bu xidmət sayəsində turistlər internet köşklər vasitəsilə hər yerdə internet şəbəkəsindən, eləcə də informasiya köşkləri vasitəsilə elektron xidmətlərdən istifadə edə biləcəklər. Həmçinin informasiya köşklərində istənilən sorğu baza məlumatları, elektron bələdçilər, xəritələr, keçidlərin sxemləri, nəqliyyatın cədvəlini quraşdırmaq, kommersiya reklamını və digər çox şeyləri yerləşdirmək mümkün olacaq. İnternet köşklər şəbəkəsinin qurulmasında Wi-Fi-dan istifadə nəzərdə tutulur. Yüksəksürətli internet xəttinə qoşulan qurğu arzu edənləri sürətli rabitə ilə təmin edəcək.

İngilisdilli polislər

İlham Əliyevin "Eurovision-2012" mahnı müsabiqəsinin keçirilməsi ilə bağlı imzaladığı sərəncama əsasən müsabiqənin keçirildiyi zaman ölkəmizdə, o cümlədən Bakıda ictimai asayişin daha nümunəvi, daha etibarlı mühafizəsini təmin etmək və xaricdən gələcək çoxsaylı qonaqlarda və turistlərdə ölkəmiz, onun tarixi və mədəniyyəti haqqında ətraflı məlumat vermək məqsədilə ictimai asayişin mühafizəsinə cəlb olunacaq əməkdaşlara xarici dilin öyrədilməsinin əhəmiyyətini nəzərə alaraq polislər üçün ingilis dili kursları təşkil olunub. “Kaspi" Təhsil Mərkəzi ilə imzalanmış müqaviləyə əsasən, avqustun 1-dən başlayaraq DİN-in Çevik Polis Alayının 300 əməkdaşı 6 aylıq ingilis dili kurslarına cəlb edilib. Paytaxt rayonlarının polis idarələrinin 120 əməkdaşı üçün isə Azərbaycan Dillər Universitetində oktyabrın 1-dən 4 aylıq kurslar təşkil olunması nəzərdə tutulub.

Taksilər də hazırlaşır

Müsabiqəyə hazırlıq işləri hər yerdə hiss olunur. Yollar təmir olunur, ölkəyə müasir tələblərə cavab verən avtobus, taksilər gətirilir. Yol mədəniyyətdir və hər şey yoldan başlanır prinsipinı uyğun olaraq paytaxt yollarında təmir işləri daha da gücləndirilir. Yeni dayanacaqlar quraşdırılır. Əlbəttə, bütün bu təmir işləri birbaşa müsabiqə ilə bağlı olmasa da, hər halda atılan bütün addımlarda bir neçə aydan sonra ölkəmizə dünyanın müxtəlif ölkələrindən minlərlə turistin gələcəyi nəzərə alınır. Yeni dayanacaqlar müasir tələblərə cavab verir, yeni texnoloji imkanlara uyğun olaraq hazırlanır. bununla yanaşı nəqliyyat sektorunda da işlər görülür. Bu vaxta qədər ölkəyə 300 yeni taksi gətirilib, ilin sonunda bu rəqəmin 1000-ə çatacağı proqnozlaşdırılır. Üstəlik, bu taksilər bir çox yeni imkanların, hətta WI-FI xidmətinin olması, sürücülərin ingilis dili bilmələri işlərin bir hissəsidir.

Turistlər rahat-rahat gəzəcək

Dənizkənarı Milli Park da “Eurovision-2012” yarışması ərəfəsində bir sıra yeniliklər edəcək. Heç şübhəsiz ki, Bakı şəhərinin ən gözəl, turistlər üçün ən maraqlı məkanlarından biri Dənizkənarı bulvar ərazisidir. Müsabiqəyə qədər Dənizkənarı Bulvar ərazisi daha 2 kilometr genişlənəcək. Bayraq meydanına qədər olan məsafədə genişlənmə işləri aparılır. Paytaxtımıza gələn qonaqlar artıq 4 yox, 6 kilometr ərazini rahat gəzəcəklər. Bununla yanaşı, piyadalar üçün də, velosiped sürənlər üçün də xüsusi xətt tikilir. Həmçinin müsabiqəyə qədər yeni velosipedlər, gəzinti taksiləri, hətta dəniz gəzintisi üçün gəmi də alınacaq.

Bütün bu görülən işlərlə yanaşı bu gün də işlər davam etdirilir

İctimai Televiziyanın ictimaiyyətlə əlaqələr şöbəsinin rəhbəri Tahir Məmmədov müsabiqə ilə bağlı görülən son işlər haqqında danışarkən yer məsələsinin hələ tam həll olunmadığını, yaxın bir neçə ay ərzində isə məsələnin həllini tapacağını dedi. T.Məmmədov həmçinin hələ hansı ölkələrin iştirak edəcəyinin də dəqiqləşmədiyini, yanvara qədər isə bütün ölkələrin iştirakla bağlı açıqlamaları Avropa Yayımlar Birliyində təsdiqini tapacağını bildirdi. Hansı ölkələrdə ki, hazırlıq görülür, onlar məlumatları mediada yerləşdirirlər. O, müsabiqənin aparıcılar məsələsinin də hələ dəqiqləşdirilmədiyini deyir. Aparıcıların seçim məsələsinə gəlincə isə, layihənin tələblərinə uyğun olacağını, ingilis dili bilgisi olan və müsabiqənin formatına uyğun birinin olacağını dedi. T.Məmmədov biletlərin qiyməti məsələsinin də hələ dəqiqləşmədiyini bildirdi. Xatırladaq ki, “Eurovision 2012” mahnı müsabiqəsi Bakıda mayın 22-si, 24-ü və 26-sı keçiriləcək.

Gülxar Şərif

Olaylar.- 2011.- 6 oktyabr.- S.12.