"Bu gün üçün onunla görünməyi əsas bilmirəm"

İradə İbrahimova: "Belə bir layihə olarsa, sevə-sevə qatılaram".

Müğənni İradə İbrahimovanın Milli.Az xəbər portalına müsahibəsi.

- Qızınız İpək bir neçə həftədən sonra 1 yaşını tamamlayacaq. Amma ictimaiyyətə onu göstərmirsiniz. Şou-biznesdə ailə piarı deyilən kampaniya olduğu dönəmdə ona qoşulmursunuz?

- Qızımı kimlərdənsə fərqləndirmək kimi mövqeyim yoxdur. Sadəcə, bu gün üçün onunla görünməyi əsas bilmirəm. Əvvəla, o körpədir və kamera, ictimaiyyətin diqqəti kimi ehtiyac hiss etmir. Bu, tək mənim fikrim deyil, atası da bu dönəmdə onu özümlə ekrana çıxarmağımı istəmir. Bir az böyüsün, belə deyək, poz verməyi bacarsın (gülür), o zaman yanımda bəzi yerlərə apararam.

- Belə başa düşdüm ki, körpənin 1 yaşı qapalı mühitdə keçəcək?

- Yəqin ki. Mütləq deyil ki, bu yaşda onu göstərməliyəm. Amma dərgilərdən təkliflər alıram. Ola bilsin, hansınınsa üz qabığında ana-bala birlikdə görünərik. Məncə, bu kifayətdir.

- Doğum günü məclisini, eşitdiyimə görə, Bakıda təşkil edəcəksiniz. Türkiyədə yaşadığınız halda, Bakını seçməyinizin səbəbi nə oldu?

- Bu, bir ailə qərarıdır. Ceyhunun (həyat yoldaşı) ata, anası və bir neçə yaxın dostlarımız var ki, Bakıya onlarla birlikdə gələcəyik. Ad günü ilə yanaşı, bu, bir səfər proqramı olacaq. Qonaq siyahımıza qohumlar, dostlar və ailə üzvləri daxildir.

- İpəkin artıq xarakteri formalaşır. Hər zaman qəti qərarı, fərqli xarakteri ilə şou-biznesdə fərqlənən İradə İbrahimovanın qızı hansı xüsusiyyətdədir?

- Mehriban uşaqdır. Çünki dörd tərəfi sevgi ilə əhatə olunub. Amma inadkarlığı da var. Hərdən deyirik ki, atası inad, anası inad, qonşuya oxşamayacaq ki? (gülür)

- Son açıqlamalarınızda aldığınız kiloları azaltmaq üçün dietoloq yanına getdiyini demişdiniz. Artıq çəki səbəbindən Bakıya gəlişinizdə efirlərdən imtina edirdiniz. Son efirə çıxışınız yaz aylarında olub. O zamandan bəri xarici görünüşünüzdə dəyişiklik oldu?

- Əlbəttə. Əvvəlki çəkimə yaxınlaşmışam. Çəkim çox artmışdı deyə, azaltmaq da bir az zaman aldı. Sadəcə, İpəkə çox diqqət ayırdım, ilk iməkləməyini görüb, ilk qığıltısını eşitmək istədim, diqqətimi ondan ayırmadım. Yetərincə ana qayğısını göstərməyə çalışdım. Dayədən daha çox özüm ilgiləndim onunla. Artıq böyüyür və yüküm bir qədər azalır. Düşünürəm, onunla bərabər yaradıcılığıma da yetərincə zaman ayıra biləcəm. Bəzən deyirlər, ilkindir deyə, üzərində belə əsirsən. Amma ikinci övladım da belə olacaq. Konkret insanam, əgər uşaq filan saatda yeyib, filan saatda yatacaqsa mütləq bunu zamanında eləməliyəm.

- Sənətdə özünəməxsusluğunuz var. Söylədiyiniz kimi, konkret və kəskin. Barənizdə şayiələr də oldu, yad fikirlər də səsləndi. Amma mövqeyiniz, xarakteriniz heç zaman dəyişmədi. İpək necə, sizi bir az başqalaşdıra bildimi?

- İlk dəyişiklik ailə qurandan sonra oldu - susmağı, tez özundən çıxmamağı, səbirli olmağı öyrəndim. İpəkdən sonra rahatlığımdan keçdim. Yuxusuz gecələr, narahat günlər və s. Amma bu elə bir ülvi hissdir ki, af-uf eləmirsən. Bir də bəzən insanlara qarşı laqeyd olurdum, amma insanın dünyaya gəlməyinin nə qədər çətin olduğunu anlayınca, bir qədər başqalaşdım. İstər pis, istərsə də yaxşı insan olsun, hamısına qarşı mövqeyim dəyişməzdir, yumşaqdır. Bir də çox kövrək olmuşam. Hansısa televiziya xəbərinin təsirindən ağlaya bilirəm. Əsasən də uşaqlarla bağlı üzücü xəbər eşidəndə kövrəlirəm.

- Barənizdə müəyyən yaradıcılıq xəbərləri oxusaq da, hələ ki, uzun sürən fasiləni tam qıra bilməmisiniz. Ola bilərmi, ailə və uşaq mövzusunda böyük bir layihə ilə görünərsiniz? Bu zaman üçün təbii alına bilər.

- Son vaxtlar uşaq mövzusunda o qədər kitablar oxumuşam ki, eyni zamanda bir ilə yaxın olan təcrübəm hazırda bu sahədə mükəmməl ola biləcəyimin göstəricisidir. Belə bir layihə olarsa, sevə-sevə qatılaram. Məncə, övladı ilə və ya övladların valideynlə münasibəti pis olanları bura cəlb etmək və maraqlı bir iş ortaya çıxarmaq olar. Bizdə tərbiyə üsulu bir az fərqli olub - yəni "sən uşaqsan, otur yerində", "böyük olan yerdə sus, danışma" və s. Düzdür, uşaq, "başından yekə" danışmamalıdır. Amma mən valideynin uşaqla bir dost kimi olmasının tərəfdarıyam.

Məsələn, mən adi alış-verişə gedəndə, İpək nə qədər başa düşür bilmirəm, başa salmağa çalışıram, onunla söhbət edirəm. Onu tək ailə deyil, Vətən üçün yetişdirməyə çalışırıq. Bir az əvvəl dedim ki, səbirli olmağı öyrənmişəm. Uşağımı düzgün tərbiyə etməklə, həm də özümdə sevmədiyim məqamlardan azad olmağa çalışmışam. Bir də həyat hər zaman insanın üzünə gülmür ki. Onun şirini ilə acısı da var. Mən qızımı hər bir zaman üçün hazır etməyə çalışıram ki, bu gün sevgi ilə əhatə olunan övladın, sabah həyatın sərt üzünü görüb, dünyası dağılmasın.

- Türkiyəyə təzə köçdüyünüz dönəmdə türk şou-biznesinə qatılmayacağınızı bəyan etdiniz. Amma əksəriyyət həmkarınız məhz həmin şou-biznesdən bəhrələnir. Siz necə, kənardan özünüzə nə isə götürürsünüz?

- Mütləq. Yenilik üçün bu lazımdır. Hətta bəzi studiyalara gedirik, musiqiçilərlə tanışlığımız, şirkətlərlə danışıqlarımız olur. Bütün bunlar Azərbaycanda görəcəyim işlər üçündür. Çünki türk şou-biznesinə qatılmaq üçün çox böyük əmək sərfinə ehtiyac var. Mən isə bu etaplara başlamaq istəmirəm.

- Klip bazarında, bir ildən artıqdır çəkilən klipinizlə varsınız. Son aylar yeni mahnılar təqdim etdiniz, bunların ekran variantını düşünmüsünüz?

- TMB kanalından klip çəkilişi dəvəti almışdım və hələlik bunun üzərində dayanmışam. Bəlkə, başqa ideyalar da ola bilər.

Olaylar.- 2011.- 15-17 oktyabr.- S.13.