Övladlarınızı
ana südü ilə
qidalandırın
Bu həm övladınızın, həm
də sizin sağlamlığınız
üçündür
Sevda Rzayeva: “İndi bir çox qadın
xəstəliklərinin, süd vəzi xərçənginin
artmasının da əsas səbəbi...”
Eyyub Hüseynov: “... ona görə də, analar
körpə qidalarından istifadə qaydaları haqqında
düzgün informasiyaya sahib olmurlar”
Ana südü Allahın analara və
dolayısı ilə onu qəbul edən bütün insanlara
bəxş etdiyi ən gözəl nemətdir. Tərkibi
heç nə ilə əvəzlənə bilinməyən,
qarşılığı heç vaxt ödənilməyən,
analarımızın damarların, ruhundan süzülüb gələn
bu qida uşaqların inkişafı, gələcəyi
üçün çox önəmlidir. Ana
südünün məlhəm olması “Kitabi Dədə-Qorqud”
dastanında da göstərilir. Yaralı igidin yarasını
ana südü ilə dağ çiçəyindən
hazırlanmış məlhəm sağaldır. Mütəxəssislər
də hər zaman körpələrin ana südü ilə
qidalanmasını məsləhət görürlər. Amma təəssüf
ki, son zamanlar analar ana südündən imtina edib hazır
qidalara meyl edirlər. Onlar imtinanın səbəbini ana
südü verməyin daha əziyyətli olması və ya bədən
ölçülərinin dəyişməsi, bəziləri
isə vaxtının olmaması ilə əsaslandırırlar.
Amma analıq övladı üçün əziyyətlərə
qatlaşmaq deyilmi? Üstəlik bu həm ananın, həm də
uşağın öz sağlamlığı
üçün əvəzolunmazdır. Mütəxəssislər
də deyir ki, nə qədər keyfiyyətli uşaq qida olursa-olsun
bu təbii qidanı heç vaxt əvəzləyə bilməz.
M.Qəmbərov adına 5 saylı
Uşaq poliklinikasının şöbə müdiri, pediatr
Sevda Rzayeva deyir: “Ana südü əvəzolunmaz bir
qidadır. Onun tərkibində uşaq üçün
lazım olan vitamin, amin turşuları, yağlar, karbohidrat,
şəkər ideal formadadır. O həm də,
uşağın 6 aya qədər su ehtiyacını belə
qarşılayır. Həm də ana südündən
heç vaxt alergik reaksiya olmur.”
Neçə
yaşa qədər
Pediatr deyir ki, ana südü nə qədər
çox verilsə, uşaq üçün o qədər
xeyirlidir. “Ümumiyyətlə isə, uşaqların iki
yaşa qədər ana südü qəbul etmələri daha
məsləhətlidir. Bəzən olur ki, işləyən
analar, hansısa xəstəliyi olanlar, südü yetərli
olmayanlar uşaq qidalarından istifadə edirlər. Amma istənilən
halda ən azı bir yaşa qədər ana südü verilməsi
vacibdir”.
Nə vaxt əlavə qidaya ehtiyac
yaranır?
S.Rzayeva əlavə qidalar ən tez
6 aydan sonra başlamağı məsləhət görür.
“Ümumdünya Səhiyyə Təşkilatının son məlumatına
görə, 6 aya qədər uşağa heç bir əlavə
qida, hətta maye belə qəbuledilməsi belə təyin
olunmamalıdır. Çünki ana südündə hər
şey yetərincə var. Yalnız 6 aydan sonra uşaq fiziki cəhətdən
inkişaf edib çəkisi, boyu artdığını nəzərə
alaraq əlavə qidalar məsləhət olunur. Bunlar meyvə
şirəsi, püresi, sıyıqlar, şorbalar ola bilər”.
Özünüz hazırlayın
Amma bir şey də məlumdur ki, bəzi
anaların südü yetərli olmur və ya heç olmur,
ona görə də onlar hazır qidalardan istifadə edirlər.
Mağazalarda satılan və hər yerdə reklam olunan ana
südü qədər faydalıdır deyilən hazır
uşaq qidaları görəsən, uşaqlar
üçün nə qədər faydalıdır ümumiyyətlə
faydalıdırmı? Pediatr analara hazır qidalardan istifadə
etməməyi məsləhət görür. “Mən bunu bir
pediatr kimi məsləhət görürəm. Hətta deyim
ki, əgər mən özüm də övladıma verməli
olsaydım hazır qidalar yox, evdə özümün hazırladığım
qidalara üstünlük verərdim. Çünki nə qədər
yaxşı hazırlansa da, uzun müddət saxlamaq
üçün onların tərkibinə müxtəlif
konservant maddələr qatılır. Düzdür, ideal dərəcədə,
tərkibi maksimum ana südünə yaxın qidalar
hazırlanır, amma onları da müəyyənləşdirmək
çətindir. Ona görə də, yaxşı olardı
ki, analar təzə-təzə evdə özlərinin
hazırladıqları qidalara üstünlük versinlər”.
Analar üçün də
faydalıdır
Araşdırmalara
zamanı, cəmi 2 il körpə əmizdirən
qadınların sinə xərçənginə tutulma
riskinin 25 % azaldığı göstərilir. Pediatr bəzi
anaların süd vermək istəməməsinin səbəbini
belə əsaslandırdı: “Bəzi analar “fiquram pozulur, bədən
ölçülərim dəyişir” düşüncəsi
ilə süd verməkdən imtina edir. Amma onlar bilməlidirlər
ki, doğum prosesində süd əmələ gəlir və
o axmalıdır. Südü qaytarmağa çalışmaq
süd axarlarında durğunluq əmələ gətirə
bilər. Bu qadınlarda süd vəzi xərçəngi,
mestopatiya əmələ gəlmə riski artır. İndi
bir çox qadın xəstəliklərinin, süd vəzi xərçənginin
artmasının da əsas səbəbi
qadınlarımızın süd verməkdən imtina etmələridir.
Amma son zamanlar müəyyən qədər tendensiyanın dəyişdiyini
görürəm, artıq maarifləndirmə işlərinin
güclənməsi ilə əlaqədar olaraq
qadınlarımız ana südü verməyə meyllənirlər.
Əlbəttə ki, mən bunu bizim xəstəxanaya
müraciət edən xəstələrə əsasən
deyirəm”.
Ana südü yeyənlərin
üstünlüyü
Həkim
ana südü ilə qidalanmayan uşaqların daha çox
aqressiv olduqlarını, hətta valideynlərinə
qarşı belə məhəbbətləri az olduğunu
bildirdi. “Ana südü ilə qidalanan uşaqlar normal
inkişaf edir, onların çox az-az hallarda mədə-bağırsaq
problemi olur, amma süni qida qəbul edən uşaqların isə
70%-də bu xəstəliklərə rast gəlinir. Bununla
yanaşı həmin uşaqların 90%-də qəbzliyə
meyllilik olur. Çünki onlarda qidalanmadan dolayı
düzgün həzm prosesi getmir. Əgər uşaq
vaxtlarında həzm prosesi, mədə-bağırsağı
normaldırsa, gələcəkdə həmin uşaqda qastrit
və digər bağırsaq problemləri olmayacaq. Həmçinin
ana südü ilə qidalanan uşaqların zehni qabiliyyəti
də güclü inkişaf edir”.
Hazır
qidalar...
Azad İstehlakçılar
Birliyinin sədri Eyyub Hüseynov uşaq qidaları ilə
bağlı beynəlxalq standartların olduğunu, həmçinin
Ümumdünya Səhiyyə Təşkilatının ana
südü ilə qidalanmaya dair kodekslər
hazırladığını, buna əsaslanaraq da ölkəmizdə
“Erkən yaşlı körpə qidaları” ilə
bağlı qanunun qəbul olunduğunu deyir. “Bu qanunda körpə
qidalarının marketinqi, satışı, reklamı ilə
bağlı tənzimləmələr nəzərdə
tutulub, həmçinin bu qidaların 3-cü ölkədən
də idxalı qadağan olunur. Amma təəssüf ki, Azərbaycanda
ana südü ilə qidalanma ilə bağlı vəziyyət
heç də ürək açan deyil. Səhiyyə
nazirliyi, YUNİCEF bununla bağı işlər aparır,
amma vəziyyət hələ də yaxşı deyil. Bu
qidaların 50%-i milli dildə markalanmır, ona görə də,
analar körpə qidalarından istifadə qaydaları ilə
haqqda düzgün informasiyaya sahib olmurlar. Həmçinin
onları reklam edərkən deyirlər ki, ana südünə
bərabərdir, amma bununla həm qanunun tələblərini
pourlar, həm də istehlakçını aldadırlar.
Maksimum çalışırlar ki, ana südünə
yaxın olsun, amma istənilən halda süni qida ana südünü
əvəz edə bilməz”.
Ancaq ana südü
S.Rzayeva da
istənilən halda anaların ana südünə önəm
vermələrini vacib sayır. “Analar
çalışmalıdırlar ki, körpələrinə
ancaq ana südü versinlər, dediyimiz kimi bu həm özlərinin,
həm də övladlarının sağlamlığı
üçü vacibdir. Bəzən analar deyir, uşaq istəmir,
amma onlar çalışmalıdırlar uşaqları
öyrətsinlər. 3-5 gün dalbadal versələr uşaq
sonda qəbul edəcək. Analar tənbəllik etməyib,
süd verməyə çalışmalıdırlar. Həmçinin
süd verən analar da normal qidalanmalı, əsəb sistemlərinə
nəzarət etməlidirlər, çünki əsəblər
normal olmayanda süd də azalır, həmçinin onlar
çoxlu maye qəbul etməlidirlər”.
Analar nə düşünür?
Mövzu ilə bağlı
anaların da fikrini öyrəndik. Fidan Mirzəyeva: “İki uşağım var. Birinci
yeddi aylıq olanda elə fikirləşdim ki, südlə doymur ona görə də hazır yeməklərdən aldım,
amma nə qədər versəm də uşaq istəmədi. İkinci hələ beş
aylıqdır, ona hələ ki, ana
südündən başqa heç nə verməmişəm”.
Aytən Həsənova: “Böyük oğluma iki
yaşına kimi ana südü vermişəm, ikinci hələ
altı aylıqdı ona da verirəm, nəinki əlavə
qida heç su belə verirəm istəmir. Ümumiyyətlə,
“Qurani-Kərim”də də var ki, oğlan uşaqları iki
yaşına, qız uşaqları isə bir yaş səkkiz
ayına kimi ana südü qəbul etməlidir. Ona görə də, mən belə edirəm, əlavə də ancaq özün
hazırladığım yeməkləri
verirəm”.
Deməli, mütəxəssislərin ümumi qənaəti ana südü tərəfdə oldu.
Əgər siz də ağıllı, sağlam
övlad böyütmək,
həm də özünüz sağlam
qalmaq istəyirsinizsə,
körpələrinizi hazır
qidalarla yox ana südü ilə qidalandırın.
Gülxar Şərif
Olaylar.- 2011.- 20 oktyabr.- S.6.