Diaspor təşkilatlarımız Azərbaycan həqiqətlərini dünya ictimaiyyətinə necə çatdırır?

Əksər mütəxəssislər Azərbaycan diasporunun bu istiqamətdəki fəaliyyətindən razıdır

Azərbaycan həqiqətləri, ölkəmizin üzləşdiyi problemlər, Ermənistan-Azərbaycan, Dağlıq Qarabağ münaqişəsinin dünya ictimaiyyətinə çatdırılması prosesində dövlətlə yanaşı ölkəmizdən kənarda fəaliyyət göstərən diaspor təşkilatları da aktiv rol oynayır, müxtəlif ölkələrdə keçirilən tədbirlərdə Azərbaycanın haqq səsini dünyaya çatdırmağa çalışırlar.

Sevindrici hal ondan ibarətdir ki, son illər diaspor təşkilatlarımız tərəfindən bu istiqamətdə həyata keçirilən tədbirlər öz müsbət nəticəsini göstərir. Bir sıra ekspertlər də hesab edirlər ki, dünyanın müxtəlif ölkələrində fəaliyyət göstərən Azərbaycan diasporunun bu istiqamətdəki fəaliyyəti təqdir edilməlidir.

Milli Qeyri Hökumət Təşkilatları Forumunun prezidenti Rauf Zeyni deyir ki, son illər Azərbaycan diasporu qürbətdəki fəaliyyətini xeyli gücləndirib və diasporamızın son iyirmi ildəki fəaliyyəti kifayət qədər aktiv olub: “Azərbaycan diasporu bu illər ərzində ölkəmizin həqiqətləri, Dağlıq Qarabağ probleminin dünya ictimaiyyətinə çatdırılması, eləcə də Azərbaycan əleyhinə yönəlmiş antierməni təbliğatının ifşa olunması istiqamətində xeyli işlər görüb. Bu istiqamətdəki işlər hazırda da davam etdirilir”. Milli Qeyri Hökumət Təşkilatları Forumunun prezidenti qeyd edir ki, hazırda Azərbaycan diasporu 50-dən artıq ölkədə formalaşmış, kifayət qədər təşkilatlanmış, müxtəlif kütləvi informasiya vasitələri, eləcə də regional televiziyaları olan mütəşəkkil bir quruma çevrilib: “Azərbaycan diaspor təşkilatları artıq bir neçə konqresdə birləşib ki, bu da aparılan ümumi işin xeyrinə, Azərbaycan həqiqətlərinin dünya ictimaiyyətinə çatdırılması, antierməni təbliğatının sürətləndirilməsinə gətirib çıxarır. Müstəqillik əldə edənə qədər Azərbaycan diasporu yalnız ermənilərin apardığı antiAzərbaycan təbliğatına cavab verməklə məşğul olurdu. İndi isə vəziyyət müsbət istiqamətə doğru xeyli dəyişib. Artıq belə demək mümkündür ki, Azərbaycan diasporu kifayət qədər öz sözünü deməyə malikdir. Azərbaycan diasporu fəaliyyət göstərdiyi ölkələrdə o qədər ciddi işlərlə məşğuldur ki, onu erməni diasporunun gündəmə gətirdiyi hər hansı bir problem maraqlandırmır. Artıq Azərbaycan diasporu öz işi ilə məşğuldur. Məhz həyata keçirilən uğurlu fəaliyyət nəticəsində istər “Xocalıya Ədalət” kampaniyası, istərsə də Xocalı soyqırımı, 31 mart azərbaycanlıların soyqırım tarixi ərəfəsində əsl həqiqətlər dünya ictimaiyyətinin diqqətinə çatdırılır, ermənilərin zaman-zaman azərbaycanlılara qarşı soyqırım siyasəti həyata keçirdikləri ayrı-ayrı ölkələrin rəsmi və qeyri-rəsmi dairələri, ictimaiyyətinin diqqətinə çatdırılır. Xüsusi qeyd edilməlidir ki, artıq ermənilərin azərbaycanlılara qarşı həyata keçirdikləri soyqırımlar ayrı-ayrı ölkələrin parlamentləri səviyyəsinə qaldırılır”. Rauf Zeyninin sözlərinə görə, Xocalı soyqırımının 20-ci ildönümü ərəfəsində diaspor təşkilatlarımızın dünyanın müxtəlif ölkələrində aksiyalar, elmi-praktik konfranslar və simpoziumlar keçirməklə ermənilərin hansı vəhşiliklərə əl atdıqlarını dünyaya anlatmışlar: “Bu da Azərbaycan diasporunun erməni yalanlarını ifşa etmək, Azərbaycan həqiqətlərini dünya ictimaiyyətinə çatdırmaq istiqamətində apardığı uğurlu fəaliyyətin bir hissəsidir”. Milli QHT Forumunun prezidenti deyir ki, bütün halda əldə edilən nailiyyətlərlə kifayətlənmək olmaz, daha böyük uğurlara imza atmaq üçün bir qədər də aktiv olmaq lazımdır.

“Diaspor və Lobbi” Strateji Araşdırmalar Mərkəzinin rəhbəri Zaur Əliyev isə hesab edir ki, Azərbaycan diasporu ölkəmizin həqiqətləri, Dağlıq Qarabağ probleminin dünya ictimaiyyətinə çatdırılması istiqamətində pis yaxşı işləyir və bunu etiraf etmək lazımdır: “Bu istiqamətdə Diasporla İş üzrə Dövlət Komitəsinin diasporumuzun güclənməsi istiqamətində işlərini də unutmaq olmaz. Məhz Diasporla İş üzrə Dövlət Komitəsinin sayəsində Birləşmiş Ştatlar, Avropa, Asiya və Şimali Afrikanın ayrı-ayrı ölkələrində yeni-yeni azərbaycanlı icmaları yaradılıb ki, həmin icmaların tərkibində həmin ölkələrdə yaşayan soydaşlarımızın birləşməsini uğur saymaq olar”. Mərkəz rəhbəri onu da bildirir ki, bütün halda tam olaraq birlik göstərə bilmirik: “Bunun səbəblərini isə diasporun özündə də axtarmaq lazımdır. Çünki diasporumuzun özünün strukturu fərqlidir, müxtəlif dövlətləri təmsil edir və ümumi razılıq çox zaman çətinliklə əldə olunur. Bir çox hallarda diasporun bəzi nümayəndələri zəif işləmələrini maliyyə problemləri ilə əlaqələndirirlər. Ancaq mən deyərdim ki, diasporun maliyyə imkanları o qədər də zəif deyil. Digər bir tərəfdən onların işləməsi üçün heç də külli miqdarda vəsaitə ehtiyac yoxdur. Məgər hər hansı bir dövlət rəsmisi ilə görüşməyə pul lazımdır? Vətən hər şeydən öndə olmalıdır və bu yolda hamı canını qoymağa hazırlığını sübut etməlidir. Məhz belə olduğu təqdirdə bizim qarşımızda heç kim dayana bilməz. Diaspor bunu anlamalıdır. Adi və görülməsi asan olan işlər üçün maddi vəsait yox ürək lazımdır. Lobbiçilik məqamında isə biznes diasporun formalaşdırmaq lazımdır. İqtisadi imkanlar yaradıb siyasi uğurlar tələb etmək də dövlətin vəzifəsi olmalıdır. Buna görə də biz həqiqətləri ilk öncə dünya səviyyəsinə qaldırmalıyıq”. Zaur Əliyevin sözlərinə görə, Dağlıq Qarabağ problemini yetərincə lazımı qurumların müzakirəsinə qaldırmaq imkanlarından hələlik məhrumuq: “Çünki bu iş üçün maliyyə ilə yanaşı bu işi görəcək insanların milli hisslərinin daha yüksək olması tələb edilir. Sevindirici haldır ki, bu gün Heydər Əliyev Fondunun Rusiya nümayəndəliyinin rəhbəri, Rusiyanın Azərbaycanlı Gənclər Təşkilatının sədri Leyla xanım Əliyevanın başladığı “Xocalıya Ədalət” kampaniyası dünyada yüksək səviyyədə aparılır. Eləcə də Birləşmiş Ştatlarda Adil Bağırovun həyata keçirdiyi işlər mühüm əhəmiyyət kəsb edir. Düşünürəm ki, əgər fəaliyyətimizi bu cür davam etdirsək yaxın gələcəkdə daha böyük nəticələr əldə edə bilərik. Həm Ermənistan-Azərbaycan, Dağlıq Qarabağ münaqişəsində təcavüzə məruz qaldığımızı, həm də əsrlər boyu erməni zülmündən əziyyət çəkdiyimizi dünya ictimaiyyətinə anlata bilərik. Mərkəz rəhbəri hesab edir ki, bu istiqamətdə əlavə tədbirlərin keçirilməsi də olduqca zəruridir: “Hesab edirəm ki, bu gün ”Qarabağ mədəniyyəti günləri” adı altında dünya ölkələrinin bir çoxunda eyni vaxtda tədbirlərin keçirilməsi Qarabağ haqqında ermənilərin bu vaxta qədər yaydığı uydurma təbliğatın alt-üst olunması üçün əhəmiyyətli effekt verə bilər. Bu tədbirlərin həyata keçirilməsi üçün diasporumuzun gücündən geniş istifadə etmək mümkündür. Həmin tədbirlərdə əslən qarabağlı olan mədəniyyət xadimlərimizin əsərləri, bu bölgədən olan müğənnilərimizin ifaları səsləndirilər, ”Qarabağ bülbülləri” kimi musiqi qrupları, işğal olunmuş rayon və səhər mədəniyyət evlərinin ansamblları və aktyorlarının iştirakı təmin olunar ki, bununla da mədəniyyətimizi dünya ictimaiyyətinə təqdim edə bilərik. Belə bir addımın atılması həm də Qarabağın Azərbaycana məxsus olmasının əleyhinə aparılmış yalançı erməni təbliğatını asanlıqla alt-üst etməyə imkan yaradar. Hesab edirəm ki, bu kimi tədbirlər həm də dövlətlə diasporun əlaqələrinin daha sıx qurulmasına gətirib çıxara bilər.

“Birlik” jurnalının baş redaktoru İlqar İlkin isə hesab edir ki, Azərbaycan diasporu ölkəmizin haqq səsi, Dağlıq Qarabağ probleminin dünya ictimaiyyətinə çatdırılması prosesində aktivlik nümayiş etdirir: “Xüsusilə, diaspor təşkilatlarımızın bütün dünyada Xocalı soyqırımının tanıdılması istiqamətində apardıqları işlər yüksək qiymətləndirilməlidir. Bütün bu tədbirlər Azərbaycan dövlətinin xarici siyasət kursuna uyğun olaraq həyata keçirilir və biz hər ötən il ərzində bu tədbirlərin daha effektli və mütəşəkkil alındığını görməkdəyik. Bu məsələdə diaspora təşkilatlarımıza lazımı dəstək vermək üçün dövlət strukturları, qeyri-hökumət təşkilatları və mətbuatın da üzərinə böyük məsuliyyət düşür”. İlqar İlkinin sözlərinə görə, Dağlıq Qarabağ problemi yalnız dövlətin deyil, bütün ictimaiyyətin, eləcə də bütün Türk xalqlarının problemi olaraq dəyərləndirilməlidir: “Yəni biz bu problemin bütün dünyada tanıdılmasında diaspora təşkilatlarının birgə fəaliyyət göstərməsinin daha effektli olduğuna inanmalıyıq. Təmsil etdiyim “Azərbaycanlıların və digər Türkdilli Xalqların Əməkdaşlıq Mərkəzi də Dağlıq Qarabağ probleminin aparıcı Avropa dövlətlərində gündəmə gətirilməsi üçün də diaspora təşkilatları ilə birlikdə layihələr həyata keçirməkdə davam edir”.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 17 aprel.- S.15.