“Xaricdə yaşamağımıza baxmayaraq biz Azərbaycanla nəfəs alırıq”

Sərdar Hüseynov: “Bizim istəyimiz yalnız ondan ibarətdir ki, biliyimizi, ağlımızı, varlığımızı ancaq Azərbaycan üçün sərf edək”

“Məqsədimiz odur ki, hər şey Azərbaycan və azərbaycanlılar üçün olsun”

Beynəlxalq Diaspora Mərkəzinin Avropa üzrə nümayəndəliklərinin koordinatoru, mərkəzin Belarusun Qrodnı şəhərində fəaliyyət göstərən ofisinin rəhbəri Sərdar Hüseynovun “OLAYLAR”-a müsahibəsi

-Sərdar müəllim, Beynəlxalq Diaspora Mərkəzinin Avropa üzrə koordinatoru olaraq hazırda Azərbaycan diasporunun Avropa məkanındakı fəaliyyətini necə dəyərləndirirsiniz?

-Mən fəaliyyət göstərdiyim Belarus respublikasındakı Azərbaycan diasporunun fəaliyyətinə nəzər yetirməklə bunu dəyərləndirmək istərdim. Məlumat üçün qeyd edim ki, mart ayının 20-də biz Belarusun Qrodnı şəhərində fəaliyyət göstərən diasporamıza yeni rəhbər seçdik. Əvvəlki diaspor rəhbəri son iki-üç ildə Azərbaycanın mədəniyyəti, irsini yetərincə təbliğ etmirdi. Biz də Belarusda yaşayan azərbaycanlılar olaraq xahiş etdik ki, münasib bir şəxsi diaspora rəhbəri seçək və kifayət qədər vətənpərvər, iş adamı Namiq Vəliyev diasporamıza yeni sədr seçildi. Onu da qeyd edim ki, Belarusda yaşayan xalqların iki ildən bir festivalı keçirilir. Əvvəlki diasporamız çox zəif olduğu üçün Azərbaycan olaraq həmin festivalda yüksək səviyyədə təmsil olunmurduq. Çünki həmin tədbirlərdə daha geniş spektrdə iştirak etmək üçün müəyyən dərəcədə maliyyə vəsaitinə də ehtiyac duyulur. Əvvəlki illərdə festivalda iştirak etmək üçün kifayət qədər vəsait ayrılmırdı. Hazırda isə Belarusda yaşayan azərbaycanlılar olaraq bu işi öz üzərimizə götürmüşük və festivalda iştirak üçün lazım olan vəsait dəyərli soydaşlarımız tərəfindən ayrılacaq. Əsas məqsədimiz odur ki, Belarusda yaşayan azərbaycanlıların tarixi, irsi, adət-ənənələri mədəniyyəti, mətbəxi barədə festivalda ətraflı məlumat verək, həmin tədbirdə ölkəmizi layiqincə təmsil edək. Ümumilikdə Azərbaycan diasporunun Avropa məkanındakı fəaliyyətinə nəzər salsaq bu fəaliyyətin ürəkaçan olduğunu söyləmək mümkündür. Etiraf etmək lazımdır ki, Azərbaycan diasporu bu gün kifayət qədər fəaldır. İstər Avropa məkanında, istər keçmiş SSRİ məkanına daxil olan respublikalarda Azərbaycan diasporu tam formalaşıb, güc mərkəzinə çevrilib. Eyni zamanda Azərbaycan diasporu birlik və bərabərliyə də nail olub. Bu gün ayrı-ayrı ölkələrdə fəaliyyət göstərən konqres və federasiyalarda, assambleyalarda onlarla Azərbaycan diaspor təşkilatı birləşib ki, bu da Azərbaycan diasporunun birlik və bərabərliyinin təcəssümüdür. Sevindirici hal ondan ibarətdir ki, Azərbaycan dövləti də diaspor fəaliyyətinə yaxından dəstək olur. Müntəzəm olaraq keçirilən dünya azərbaycanlılarının qurultayları bu prosesə təkan verir, diasporumuzun daha aktiv olması, fəaliyyət göstərdiyi ölkələrdə Azərbaycanı layiqincə təmsil etməsinə yardım göstərir.

-Festivalın keçirilməsi nə vaxta təsadüf edəcək?

-İyunun 1-dən 3-dək həmin festival keçiriləcək. Ona görə də qarşımıza məqsəd qoymuşuq ki, bu ilki festivalda Azərbaycanı yüksək səviyyədə həm Belarus ictimaiyyəti, həm də bu ölkədə yaşayan digər xalqların nəzərinə çatdıraq, təbliğ edək.

-Festivalda iştirak etmək üçün Azərbaycandan da Belarusa nümayəndə heyəti gedəcək?

-Bəli. Həmin festivalda Azərbaycandan da nümayəndə heyətinin iştirakı nəzərdə tutulub. Beynəlxalq Diaspora Mərkəzinin sədri İsmayıl Ağayevin rəhbərliyi altında Azərbaycandan Belarusa nümayəndə heyəti gedəcək. Nümayəndə heyətinin tərkibinə millət vəkilləri, kütləvi informasiya vasitələrinin nümayəndələri və sənət adamlarının da daxil edilməsi nəzərdə tutulub.

-Ümumilikdə həmin festivalda neçə ölkədən nümayəndə iştirak edəcək?

-Hazırda Belarusda 50-yə yaxın xalq yaşayır. Həmin festival respublikadaxili festival olduğu üçün tədbirdə yalnız Belarusda yaşayan xalqlar iştirak edir. Ancaq eyni zamanda, bu ölkədə yaşayan xalqların mənsub olduğu dövlətlərdən də nümayəndələr gələ bilər.

-Dünya Azərbaycanlılarının üçüncü qurultayında prezident İlham Əliyev diaspor təşkilatlarına səfirlik və iş adamları ilə yaxından əməkdaşlıq etmək barədə tövsiyyələr verdi. Belarusda bu istiqamətdə vəziyyət necədir və bu ölkədəki Azərbaycan səfirliyi ilə əlaqələriniz hansı səviyyədədir?

-İlk növbədə qeyd etmək istərdim ki, Dünya Azərbaycanlılarının üçüncü qurultayı Azərbaycan diaspor həyatı üçün mühüm əhəmiyyətə malik bir hadisə idi. Bu qurultaylar dünyanın müxtəlif ölkələrində fəaliyyət göstərən Azərbaycan diaspor təşkilatlarının bir araya gəlməsi, onların dövlətlə əlaqələrinin möhkəmləndirilməsinə xidmət edən mühüm toplantılardır. Sonuncu, Dünya Azərbaycanlılarının üçüncü qurultayını da məhz belə xarakterizə etmək olar. Qurultayda cənab prezident İlham Əliyev geniş və əhatəli nitqi ilə diaspor təşkilatları qarşısında yeni vəzifələr qoydu, onlara öz tapşırıq və tövsiyyələrini verdi. Biz də bir azərbaycanlı olaraq cənab prezidentin bizə verdiyi tapşırıq və tövsiyyələrin icrası istiqamətində əlimizdən gələni əsirgəmir, fəaliyyətimizlə millətə, Vətənə xidmət etməyə çalışırıq. O ki, qaldı, dövlət başçısının diaspor təşkilatlarına səfirlik və iş adamları ilə yaxından əməkdaşlıq etmək tövsiyyəsinə, biz müntəzəm olmasa da, mütəmadi şəkildə Azərbaycanın Belarusdakı səfirliyi ilə telefon əlaqəsi yaradır, müəyyən məsləhətləşmələr aparırıq. Həmçinin Belarusda yaşayan azərbaycanlı ailələrin üzləşdiyi hər hansı bir problem barədə səfirliyə məlumat veririk. Belarusdakı iş adamları ilə əlaqələrimiz yüksək səviyyədədir. Onu da qeyd etmək yerinə düşər ki, azərbaycanlı iş adamları Belarusda kifayət qədər nüfuz qazanıb, bu ölkədə müxtəlif sahələrə sərmayələr yatırıblar. İş adamı olan soydaşlarımız tərəfindən Belarusda şadlıq evləri, restoranlar tikilir, müxtəlif iaşə obyektləri inşa edilir. Bir sözlə Belarusda fəaliyyət göstərən azərbaycanlı iş adamları bir-biri ilə sıx əlaqəlidir. Həmçinin azərbaycanlılar yerli iş adamları ilə də birgə bir sıra işlər görürlər. İri yaşayış binalarının tikintisi zamanı müştərək fəaliyyət göstərilir.

-Ümumilikdə Belarusda nə qədər azərbaycanlı yaşayır və bu ölkədə yaşayan soydaşlarımızın üzləşdiyi əsas problemlər nədən ibarətdir?

-Təkcə Belarusun Qrodnı vilayətində 700-ə yaxın azərbaycanlı ailə yaşayır. Ümumilikdə isə, Belarusda 6 vilayət var ki, həmin vilayətlərdə qeydiyyatdan keçmiş 5 mindən artıq azərbaycanlı yaşayır. Belarusda yaşayan azərbaycanlıların ən ciddi problemlərindən biri ondan ibarətdir ki, bu ölkədə yaşayan soydaşlarımız konsulluqlarda qeydiyyatdan keçmirlər. Nəticə etibarilə hansı vilayətdə nə qədər azərbaycanlının yaşadığı dəqiq bilinmir. Bu problemi bir müddət əvvəl diaspor təşkilatları olaraq müzakirə də etdik.

-Azərbaycan həqiqətləri, Dağlıq Qarabağ problemini diaspor nümayəndəsi olaraq Belarus ictimaiyyətinə nə dərəcədə çatdıra bilirsiniz?

-Belarusda yaşayan azərbaycanlılar olaraq Azərbaycanın bayram günləri və hüznlü tarixlərini həmişə qeyd edirik. Ötən ilin sonunda 31 dekabr-Azərbaycanlıların Həmrəylik Günü, 20 Yanvar faciəsinin ildönümü, Xocalı soyqırımının 20-ci ildönümünü geniş şəkildə qeyd etmişik. Ümumiyyətlə, çalışırıq ki, Azərbaycan həqiqətləri, Dağlıq Qarabağ problemi, ölkəmizin üzləşdiyi problemlər barədə Belarus ictimaiyyətini ətraflı şəkildə məlumatlandıraq.

-Qarşıdan gələn Şuşanın işğalının 20-ci ildönümü ilə bağlı tədbir keçirməyi nəzərdə tutmusunuzmu?

-Belarusda yaşayan azərbaycanlılar olaraq cənab prezidentin belə bir sərəncam imzalamasından çox razıyıq. Çünki bu bizə imkan verir ki, Şuşanın işğalının 20-ci ildönümü ilə əlaqədar yaşadığımız ölkələrdə müəyyən tədbirlər keçirək, torpaqlarımızın hələ də erməni işğalı altında saxlanıldığını Belarus ictimaiyyətinə çatdıraq. Ümumiyyətlə, hər bir rayonun işğalı tarixlərini qeyd edir, bu barədə yerli ictimaiyyətə məlumat veririk.

-Ümumiyyətlə, diaspor nümayəndəsi olaraq qarşınızda duran əsas vəzifələr nədən ibarətdir?

-Bu gün bizim qarşımızda duran əsas vəzifələr Azərbaycanın tarixi, qarşılaşdığı problemləri həm yaşadığımız ölkə, həm də dünya ictimaiyyətinə çatdıraq Azərbaycanın böyük gələcəyi var. Bizim istəyimiz yalnız ondan ibarətdir ki, biliyimizi, ağlımızı, varlığımızı ancaq Azərbaycan üçün sərf edək. Xaricdə yaşamağımıza baxmayaraq biz Azərbaycanla nəfəs alırıq. İstənilən zaman Azərbaycanla əlaqədə olur, hər ötən gün əldə edilən uğurlarla fəxr edirik. Məqsədimiz odur ki, hər şey Azərbaycan və azərbaycanlılar üçün olsun..

Süleyman İsmayılbəyli

Olaylar.- 2012.- 19 aprel.- S.15.