"Türk əsgəri xilaskardır"

Qüdrət Həsənquliyev: "Türk əsgərinin xilaskar obrazının sübutlarından biri də Qafqaz İslam Ordusunun şərəfinə ucaldılmış abidə və bu abidənin ucaldılmasına zəmin yaradan gerçək tarixdir"

Bütöv Azərbaycan Xalq Cəbhəsi Partiyasının (BAXCP) rəhbərliyinə daxil olan şəxslər Xilaskar Türk Əsgərinin Anım Günü münasibətilə Şəhidlər Xiyabanını ziyarət ediblər.

Partiyanın mətbuat xidmətindən “OLAYLAR”a verilən məlumata görə, anım tədbirində çıxış edən BAXCP sədri Qüdrət Həsənquliyev türk əsgərinin heç bir vaxt soyqırım törətmədiyini, əksinə soyqırımına məruz qalan xalqların müdafiəsində dayandığını bəyan edib: "Uzun illərdir ki, erməni diasporu, daha sonra isə Ermənistan Türkiyəyə və qardaş türk xalqına qarşı əsassız soyqırım ittihamlarıyla çıxış edir. Türkiyənin və Türk Dünyasının birliyini, bütövlüyünü və güclənməsini istəməyən qüvvələr isə ermənilərin saxta iddialarına dəstək verir, erməni yalanlarından öz mənafeləri və maraqları üçün yararlanmağa çalışırlar. Tarix isə erməni iddialarının əksini sübuta yetirir. Türk əsgərinin xilaskar obrazının sübutlarından biri də Qafqaz İslam Ordusunun şərəfinə ucaldılmış abidə və bu abidənin ucaldılmasına zəmin yaradan gerçək tarixdir. Biz bu gün növbəti dəfə gerçək tarixdən qaynaqlanan bir mərasimi, anım gününü qeyd edirik. Dünyanı erməni yalanlarına uymamağa, tarixə həqiqətlərin üzərinə kölgə salınmasına imkan verməməyə, haqqın, ədalətin keşiyində dayanmağa çağırırıq. İnanırıq ki, vaxt gələcək 24 aprel tarixini Xilaskar Türk Əsgərinin Anım Günü kimi qeyd edən insanların sıraları daha da genişlənəcəkdir".

Olaylar.- 2012.- 25 aprel.- S.7.