Qızların Beynəlxalq İKT günü

Aprelin 26-da İREX təşkilatının dəstəyi ilə Beynəlxalq İKT qızlar günü adlı tədbir keçirildi. Tədbiri giriş sözü ilə təşkilatın rəhbəri Angela Nicoara açdı. O, bildirdi ki, artıq bir neçə ildir ki, dünyada aprel ayının son günləri İKT qızlar günü kimi qeyd olunur.

Həmin günlər qızlar bir araya gəlir ikt, onun perspektivləri və bu sahədəki karyera imkanları haqqında məlumatlandırılır, və qadınlar bir daha bu istiqamətdə düşünürlər. “Bundan başqa bu tip tədbirlərin əsas mahiyyəti qızları, qadınları informasiya texnologiyalarının onların güclənməsində bir alət olduğu barədə məlumatlandırmaq, eyni zamanda bu sahədə karyera qurmağın həm çətin, həm də maraqlı və mükafatlı olduğunu başa salmaqdır. Təəssüf ki, bu gün cəmiyyətdə tipik qadın və kişi peşələri deyə bir ayrı seçkilik var, bizim məqsədimiz bu standartları aradan qaldırmaqdır. Məhz bu gün qızlara ikt sahəsində karyera qurmaq imkanı barədə düşünməyə imkan yaradır”.

Rabitə və informasiya Nazirliyinin dövlət müəssisələrinin fəaliyyətini əlaqələndirmə şöbəsinin müdir müavini Novruz Məmmədov bu gün münasibətilə bütün qadınları təbrik etdi. O bildirdi ki, bu gün dünyanın inkişaf etmiş ölkələrində ikt sahəsində çalışanların əsas hissəsi qadınlardır. “Ölkəmizdə də bu sahədə çalışan qadınların sayı heç də az deyil, xüsusən son dövrlərdə rəqəm bir az da artıb. Ümumiyyətlə isə, ikt sahəsində çalışanların demək olar ki, 50%-i qadınlardır. Biz həmçinin qadınların bu sahəyə marağını daha da artırmağa çalışırıq, bu istiqamətdə İREX təşkilatı ilə əməkdaşlıq edirik. Çalışırıq ki, daha çox regionlarda bu işləri inkişaf etdirək. Respublikanın 30 kəndində poçt şöbələrində pulsuz internet təşkil olunması layihəsi üzərində işləyirik. Lakin işlər bununla bitməyəcək, daha çox bölgəni əhatə etməyə, qadınların marağını artıqmağa çalışacayıq”.

İREX-in Azərbaycanda Yeni Media layihəsinin rəhbər müavini Ələsgər Məmmədli artıq dünyada 5-6 ildir ki, bu günün qızların ikt-də iştirakına dair beynəlxalq gün kimi qeyd olunduğunu bildirdi. “İREX təşkilatı olaraq bu tədbiri keçirməklə biz də həm media, həm cəmiyyətin bu sahəyə marağını artırmaq istəyirik. Bu işlərin bir hissəsi olaraq internetdə regionlardakı orta məktəblərin 9-11-ci sinif qızları arasında “İKT-nin mənim həyatımda rolu” mövzusunda inşa müsabiqə keçirdik. Həmin yazılarda perspektivi daha aydın şəkildən göstərən 18 qız seçdik. Seçilən qızlar 10 regionu təmsil edir. Dünən onlar bir çox önəmli tədbirlərdə iştirak etdilər. İnformasiya Texnologiyaları Nazirliyində, “Azərpoçt”da olublar, həmin qurumlarda onlara ikt-nin inkişafı barədə məlumat verilib. Həmçinin “Bakcell” provayderinin kommunikasiyanı necə istifadə etmələri ilə bağlı məlumatlandırılıblar. Slavyan Universitetinin jurnalistika fakültəsində ikt-nin tətbiqi ilə bağlı formalaşdırılmış laboratoriyada olublar, Qafqaz universitetinin ikt laboratoriyalarında, həmçinin İctimai televiziyanın informasiyanın toplanmasında ikt-dən necə istifadə olunması ilə tanış oldular. Bu günkü konfrans da həmin işlərin davamıdır. Konfransın məqsədi ikt-də qadınların rolu, onların uğurlarına yönəltməkdir. Regionda olan xanımların ikt-nin inkişafına ayaqlaşmaq imkanlarını genişləndirməkdir. Qadınlarımızın bu sahəyə marağını artıqmar üçün İREX təşkilatı artıq 19 regionda internetə pulsuz çıxış imkanları yaradıb, belə layihələri davam etdirmək istəyirik”.

Tədbirdə BBC Azərbaycan xidmətinin nümayəndəsi Xanım Cavadova “Rəqəmsal medianın dəyişdirdiyi qadınlar. Nədən başlamalı?” mövzusunda çıxış etdi. O, ikt-nin gətirdiyi yeniliklərlə həyatı dəyişən qadınlar haqında məlumat verdi. Daha sonra İREX-in sahə kordinatoru Günel Həsənovanın “Qadınların ictimai-sosial həyatında İKT-nin rolu” mövzusunda hazırladığı təqdimatda ölkəmizdə ikt səhəsində qadınların rolunun çox zəif olduğunu bildirdi. O qeyd etdi ki, bir çox ölkələrdə qadınların internetdən istifadə yaşı 25-65 olsa da, bizdə bu rəqəm 15-25 yaş arasında dəyişir. “Bu gün ikt-dən media, müəyyən QHT-lərdə çalışan qadınlar daha çox istifadə edir. Bölgələrdəki qadınların isə demək olar ki, ikt sahəsində heç məlumatı da yoxdur. 2010-cu ilin statistik rəqəmlərinə görə, ikt sahəsindən istifadə də 60.8% kişilər, 39.2% isə qadınlardır. İnternetdən istifadə yaşına gəldikdə isə, ən çox 7-24 yaş (60.5%), ən az isə 64 yaşdan yuxarı 0.3 % təşkil edir”.

Qeyd edək ki, tədbirin sonunda “Camera as Voise” layihəsinin qalibləri məktəbli qızların filmləri nümayiş olundu. Həmçinin məktəbli qızlar “Mənim üçün İKT nə deməkdir” mövzusunda çıxış etdilər.

Gülxar Şərif

Olaylar.- 2012.- 27 aprel.- S.5.