Azərbaycan diasporu Danimarkada ölkəmizi layiqincə təmsil edir

Səfər Sadiqi: ”Vətən” Cəmiyyəti tərəfindən keçirilən bütün tədbirlərdə bu ölkə ictimaiyyətinə Azərbaycanın ərazisinin işğalına, azərbaycanlıların zaman-zaman öz doğma torpaqlarından qovulmasına aid kitablar, broşürlər və sənədli filmlər nümayiş etdirilir”

”Çalışırıq ki, tək Avropada deyil, bütün dünyada olan Azərbaycan cəmiyyətləri ilə əlaqələrimiz olsun”

Xocalı soyqırımının 20-ci ildönümü ilə bağlı dünyanın bir sıra ölkələrində olduğu kimi Danimarkada da anım tədbirlərinin keçirilməsi nəzərdə tutulub. Bu barədə məlumat verən bu ölkədəki ”Vətən” Cəmiyyətinin sədri Sadiq Səfəri rəhbərlik etdiyi qurumun yaxın vaxtlarda həyata keçirəcəyi digər tədbirlər barədə də danışıb. ”OLAYLAR”-a verdiyi müsahibədə Sadiq Səfəri Dünya Azərbaycanlılarının III Qurultayında qəbul edilən qərarların icrası istiqamətində ”Vətən” Cəmiyyətinin fəaliyyət göstərdiyi ölkədə gördüyü işlər barədə də məlumat verib.

-Səfər müəllim, Dünya Azərbaycanlılarının III qurultayında qəbul edilən qərarların icrası istiqamətində “Vətən” Cəmiyyəti olaraq hansı addımlar atır və tədbirlər həyata keçirməyi düşünürsünüz?

- Əvvəlcə onu qeyd edim ki, Dünya Azərbaycanlılarının III Qurultayı Azərbaycan diasporasının həyatında mühüm əhəmiyyət daşıyan hadisələrdən biri idi. Bu qurultay bir növ əvvəlki iki qurultaydan sonra bu sahədə görülən işlər, həyata keçirilən tədbirlərin hesabatı xarakteri daşıyırdı. Dünya Azərbaycanlılarının III Qurultayını Azərbaycan diasporasının həyatında yeni bir mərhələnin başlanğıcı kimi də qeyd etmək olar. Dünya Azərbaycanlılarının III Qurultayında dövlət başçısının qeyd etdiyi kimi əsas məqsəd xaricdə yaşayan azərbaycanlıların Vətənlə əlaqələrinin möhkəmləndirilməsi, dünya azərbaycanlıları arasinda birliyin və həmrəyliyin təmin olunması, cəmiyyət və birliklərin fəaliyyətinin gücləndirilməsi, səfirliklərlə bir komanda kimi işləmək, bütün gücləri səfərbər edib bir istiqamətə yönəltmək idi. Bütün bunlar Azərbaycan diasporasının güclü fəaliyyəti üçün bir təkandır. ”Vətən” Cəmiyyətinin Danimarkada fəaliyyət göstərən Azəri Türk Qadınlar Birliyi”, İsveçdən “Xəzər“ Cəmiyyəti, Küveytdən “Vətənsevər“ Cəmiyyəti və bir çox başqa cəmiyyətlərlə sıx əlaqələri var. Əsas fəaliyyətimiz ondan ibarətdir ki, yaşadığımız ölkədə Azərbaycanı layiqincə təmsil edək, ölkəmizin tarixi, mədəniyyəti, adət-ənənələrini, ən əsası isə üzləşdiyimiz problemlər, xüsusilə Ermənistan-Azərbaycan, Dağlıq Qarabağ münaqişəsini, ermənilərin Azərbaycana qarşı həyata keçirdikləri deportasiya və soyqırım siyasətini Danimarka ictimaiyyətinə, beynəlxalq aləmə çatdıra bilək. Sadaladığım istiqamətlərdə ”Vətən” Cəmiyyəti olaraq bu müddət ərzində bir çox layihələr keçirib, tədbirlər təşkil etmişik. Bir müddət əvvəl cəmiyyətimiz tərəfindən Azərbaycanın görkəmli yazıçısı Hüseynbala Mirələmovun həyat və yaradıcılığına aid ədəbi bədii gecə təşkil olundu. Bu cür tədbirlər həm Kopenhagen şəhərində, həm də “Xəzər“ Cəmiyyətinin təşkilatçılığı ilə İsveçin Malmo şəhərində keçirildi. Bundan başqa ”Vətən” Cəmiyyəti Diasporla İş üzrə Dövlət Komitəsi və Böyük Britaniyada fəaliyyət göstərən Azərbaycan səfirliyi ilə birgə tədbirlər keçirir. Həmin tədbirlər zamanı iştirakçılara Azərbaycanın tarixi, mədəniyyəti, ərazisinin işğalı, iqtisadiyyatının yüksəlişi haqqında kitablar, broşürlər, və sənədli filmlər təqdim olunur. Bu məqsədlə Diasporla İş üzrə Dövlət Komitəsi tərəfindən daima zəruri əyani vəsaitlərlə təmin olunuruq. Azərbaycanın Böyük Britaniyadakı səfirliyi tərəfindən isə cəmiyyətimizə Azərbaycanın milli paltarları verilib. Bütün bunlar Azərbaycanın danimarkalılara və başqa millətlərə tanıdılmasında yüksək nəticə əldə etməyimizə zəmin yaradır. Çalışırıq ki, tək Avropada deyil, bütün dünyada olan Azərbaycan cəmiyyətləri ilə əlaqələrimiz olsun.

-2012-ci ildə ”Vətən” Cəmiyyəti olaraq qarşınıza qoyduğunuz əsas hədəflər nədən ibarətdir?

-Cəmiyyətimiz 2012-ci ildə iki mühüm layihə həyata kecirməyi qarşısına məqsəd qoyub. Birinci layihə çərçivəsində Danimarkanı Avropa Parlamentində təmsil edən deputatlardan ibarət işçi qrupu təşkil edib onları Azərbaycana dəvət etmək nəzərdə tutulub. Həmin layihənin başlıca məqsədi odur ki, danimarkalı parlamentarilər Azərbaycana gələrək Azərbaycan torpaqlarının işğalı, bir milyona yaxın qaçqın və məcburi köçkünün öz doğma torpaqlarından qovulmasını öz gözləri ilə görsünlər. Həmçinin Azərbaycanın tarixini və mədəniyyətini onlara nümayiş etdirib, Azərbaycan tarixinin və mədəniyyətinin min illərə dayandığını sübut edək. Nəhayət gələcəkdə həmin işçi qrupu tərəfindən Azərbaycan torpaqlarının işğalı barədə məsələni Danimarka Parlamentində müzakirəyə çıxaraq. İkinci layihəyə isə Danimarkada Türk dilli cəmiyyətlərin birliyinin yaradılması daxildir. Artıq cəmiyyət olaraq keçirdiyimiz tədbirlərimizdə türk, uyğur və türkmən cəmiyyətləri də iştirak edir. Hazırda ”Türk dilli cəmiyyətlərin birlik qurultayını” təşkil etməyi qarşımıza məqsəd qoymuşuq və bu istiqamətdə iş aparırıq. Aprel ayında isə Danimarkada ”Azərbaycan bu gün” adlı konfrans təşkil edəcəyik. Bu məqsədlə yaradılmış təşkilat komitəsi də artıq öz işinə başlayıb.

-Ümumiyyətlə, Danimarkada Azərbaycan diasporunun fəaliyyətini necə qiymətləndirirsiniz və erməni diasporası ilə müqayisədə diasporamızın fəaliyyətini qəneedici saymaq olarmı?

-Azərbaycan diasporu Danimarkada ölkəmizi layiqincə təmsil edir. Bunu keçirdiyimiz bir sıra tədbirlərlə də təsdiqləmək olar. Ötən il Kopenhagenin ən böyük meydanı sayılan ”Rod husplads”da Respublika Günü ilə bağlı böyük bir tədbir keçirildi. Həmin tədbirin təşkilində ” Vətən ” Cəmiyyəti ilə yanaşı Arhus şəhərində fəaliyyət göstərən ”Dostluq” Cəmiyyəti, ” Danimarkada Azəri Türk Qadınlar Birliyi” İsveçin Malmo şəhərindən gəlmiş ”Xəzər” Cəmiyyəti iştirak edirdi. Tədbirin konsert proqramı hissəsində Azərbaycan dövlət rəqs qrupu və Azərbaycanın əməkdar artisti Azərin xanım iştirak edirdi. Tədbir Böyük Britaniyadakı Azərbaycan səfirliyinin dəstəyi və səfir Fəxrəddin Qurbanovun bilavasitə iştirakı ilə baş tutdu. Tədbir zamanı meydanda hər hansı təxribatın olmaması üçün türk cəmiyyətindən yardım almışdıq. Tədbir zamanı danimarkalılara və şəhərin qonaqlarına Qarabağa, Azərbaycanın tarixinə aid kitablar, broşürlər və Azərbaycan şirniyyatları təqdim olundu. Çox yüksək şəkildə baş tutan tədbiri ermənilər ancaq kənardan muşayət etməklə kifayətləndilər. Bu da öz-özlüyündə Danimarkada Azərbaycan diasporunun güclü olduğunun göstəricisidir. Cəmiyyətimizin fəaliyyəti səfirimiz Fəxrəddin Qurbanov və Diasporla İş üzrə Dövlət Komitəsi tərəfindən yüksək qiymətləndirilib. Amma biz bununla arxayınlaşmırıq. Çünki cəmiyyətimizin qarşısında görüləcək çox işlər var. Ermənilərin cəmiyyətləri barədə heç nə deyə bilmərəm. Onların meydanlarda, kücələrdə tədbir kecirdiklərin görməmişik və eşitməmişik. Hesab edirəm ki, düşməni zəif saymaq, uduzmaq deməkdir.

-Cəmiyyət olaraq Azərbaycan həqiqətləri, Dağlıq Qarabağ problemi, eləcə də ermənilərin zaman-zaman azərbaycanlılara qarşı həyata keçirdikləri deportasiya və soyqırım siyasətini bu ölkə ictimaiyyətinə tam mənada çatdıra bilmisinizmi?

- Danimarkadakı ”Vətən” Cəmiyyəti tərəfindən kecirilən bütün tədbirlərdə bu ölkə ictimaiyyətinə Azərbaycanın ərazisinin işğalına, azərbaycanlıların zaman-zaman öz doğma torpaqlarından qovulmasına aid kitablar, broşürlər və sənədli filmlər nümayiş etdirilir. Cəmiyyətimiz tərəfindən Kopenhagen kitabxanalarına 20 Yanvar, Xocali, 31 mart azərbaycanlıların soyqrımına aid kitabların geniş oxucu kütləsinə çatdırılması ücün müntəzəm olaraq paylanır.

-Rəhbərlik etdiyiniz cəmiyyət Danimarka ilə Azərbaycan arasında müxtəlif sahələrdə əlaqələrin inkişaf etdirilməsinə töhfə vermək üçün əlavə hansı layihələr keçirməyi nəzərdə tutur?

-Bizim ailədən mən və qızım Mehriban Əliyeva Danimarka Sosial Demokrat Partiyasının üzvləriyik. Sevindirici haldır ki, bu ölkədə keçirilən sonuncu seçkilərdə Sosial Demokrat Partiyası qalib gəldi. Bu qələbənin qazanılmasında az da olsa bizim ailənin, azərbaycanlıların zəhməti var. Sosial Demokrat Partiyasının nümayəndələrinin seçki təbliğatı zamanı mən və qızım Mehriban Əliyeva fürsətdən istifadə edərək seçicilərə Azərbaycan barədə, torpaqlarımızın ermənilər tərəfindən işğalı haqqında məlumat verirdik. Partiyanın toplantıları zamanı da Mehriban Əliyeva hər zaman Azərbaycan haqqında, azərbaycanlıların sülhsevər xalq olduğu barədə, eləcə də Bakının Eurovisiona yüksək səviyyədə hazırlaşması ilə bağlı ətraflı məlumat verir. Gələcək tədbirlərimizdə Sosial Demokrat Partiyasının nümayəndələrinin də iştirakı nəzərdə tutulub. Cəmiyyətimiz Azərbaycana maraqların artması və turizmin inkişafı ilə əlaqədar bəzi maraqlı layihələri həyata keçirməyi nəzərdə tutub.

-Səfər bəy, qarşıdan 26 fevral-Xocalı faciəsinin 20-ci ildönümü gəlir. “Vətən” Cəmiyyəti faciənin 20 illiyi ilə bağlı bu ölkədə hansı tədbirlər keçirməyi nəzərdə tutub?

-Xocalı soyqrımı Azərbaycan tarixinə ən kədərli, qanlı bir gün kimi yazılıb. Bununla bağlı fevralın 25-də Kopenhagendə tədbirimiz olacaq. Bununla bağlı yaradılmış təşkilat komitəsi artıq öz işinə başlayıb. Tədbirdə Kopenhagen Universitetinin professoru Karl Erik Fredeskov, Beynəlxalq siyasətçi, politoloq Vetslav Kicilenko, danimarkalılarla yanaşı, türk, çeçen, uyğur və türkmən cəmiyyətlərinin nümayəndələrinin də iştirakı nəzərdə tutulub. Tədbir iştirakçılarına Xocalı soyqrımına aid kitablar, broşürlər və sənədli filmlər nümayiş etdiriləcək. Kopenhagenin mərkəzi küçələrində danimarkalılara, eləcə də bu şəhərin qonaqlarına Xocalı soyqırımına aid broşürlər və vərəqələr paylanacaq.

Süleyman İsmayılbəyli

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 1 fevral.- S.15.