Qarşıya qoyulan hədəf Azərbaycanın haqlı mövqeyini Avropa ictimaiyyətinə çatdırmaqdır

Ağahüseyn Babayev: “Saksoniya parlamentinə Xocalı soyqırımına siyasi qiymət verilməsi ilə əlaqədar məktub göndəriləcək”

Dünyanın əksər ölkələrində olduğu kimi Almaniyada da Azərbaycan diasporu öz fəallığı ilə seçilir. Bu ölkədə fəaliyyət göstərən onlarla Azərbaycan cəmiyyəti, birlik və təşkilatları ölkəmizin haqq işi, Azərbaycan həqiqətləri, Dağlıq Qarabağ probleminin alman ictimaiyyətinə çatdırılması istiqamətində səmərəli fəaliyyət göstərir, bu işə öz töhfəsini verir. Belə təşkilatlardan biri də Almaniyada fəaliyyət göstərən “Alm.Az” Cəmiyyətidir. Cəmiyyətin sədri Ağahüseyn Babayev “OLAYLAR”-a verdiyi müsahibədə sözügedən ölkədə Azərbaycan diasporunun vəziyyəti, Azərbaycan həqiqətlərinin alman ictimaiyyətinə çatdırılması istiqamətində rəhbərlik etdiyi qurumun gördüyü işlər, eləcə də Xocalı soyqırımının 20-ci ildönümü ərəfəsində “Alm.Az” Cəmiyyətinin keçirəcəyi tədbirlər barədə məlumat verib.

-Ağahüseyn müəllim, keçən ilin yayında Bakıda Dünya Azərbaycanlılarının üçüncü qurultayı keçirildi. Qurultay Azərbaycan diasporunda nə ilə yadda qaldı və Dünya Azərbaycanlılarının III qurultayından keçən dövr ərzində “Alm.Az” Cəmiyyəti olaraq qurultayda qəbul edilən qərarların icrası istiqamətində rəhbərlik etdiyiniz cəmiyyət hansı addımlar atıb? Qarşıdakı zaman ərzində cəmiyyət olaraq nə kimi tədbirlər həyata keçirməyi nəzərdə tutmusunuz?

-Dünya Azərbaycanlılarının üçüncü Qurultayı Azərbaycan diasporasının həyatında mühüm hadisələrdən biridir. Bu qurultaylar diaspora fəaliyyətinin keyfiyyətcə yeni mərhələyə qədəm qoyması, yeni hədəf və strategiyaların müəyyənləşdirilməsi, ən əsası isə diaspora ilə Azərbaycan dövləti arasında bağlılığın artmasına müsbət təsir göstərir. Dünya Azərbaycanlılarının üçüncü Qurultayında qəbul edilən qərarların icrası istiqamətində Almaniyanın Drezden şəhərində fəaliyyət göstərən „Alm.Az“ Drezden Cəmiyyəti bir sıra tədbirlər həyata keçirib. Bunların hər biri Azərbaycan həqiqətlərini, respublikamızın həyatında bütün sahələrdə baş verən yenilikləri alman ictimaiyyətinə çatdırmağa xidmət edib. Həmçinin Azərbaycanın 20 faiz ərazilərinin xəyanətkar SSRİ ordusunun köməyi ilə erməni millətçiləri tərəfindən işğalı , ermənilər tərəfindən Xocalıda törədilən faciə, 20 Yanvar hadisələrini yaşadığımız ölkənin ictimaiyyətinə çatdırmağa çalışırıq. Keçirdiyimiz bu və ya digər tədbirlərdə Azərbaycan xalqının tolerantlığı, tarixi abidələrimiz, adət və ənənələrimiz, İncəsənətimiz, ləziz mətbəximiz barədə də Almaniya ictimaiyyəti, həmçinin bu ölkədə yaşayan digər yahudi, rus , qazax, Ukrayna və s. xalqların nümayəndələrinə dolğun və ətraflı şəkildə məlumat veririk. Bütün bunların məntiqi nəticəsidir ki, Azərbaycan Respublikasının müstəqilliyinin bərpasının 20-ci İldönümü ilə bağlı Drezden şəhərində Diasporla İş üzrə Dövlət Komitəsinin dəstəyi ilə keçirdiyimiz tədbirdə Saksoniyanın bir çox siyasi xadimləri ilə yanaşı Drezdendə fəaliyyət göstərən Qazaxıstan, Rusiya, Bolqarıstan, İsveç, Litva və digər ölkələrin konsulluqlarının nümayəndələri də qatılmış və çıxışlar etmişlər.

-“Alm.Az” Cəmiyyətinin 2012-ci ildə qarşısına qoyduğu əsas hədəflər nədən ibarətdir?

-„Alm.Az“ Cəmiyyətinin 2012-ci ildə qarşısına qoyduğu əsas hədəf hər zaman olduğu kimi respublikamızın haqlı mövqeyini Avropa ictimaiyyətinə çatdırmaqdır. Həmçinin Azərbaycanın Almaniya ictimaiyyətində, siyasi qurumlarında və mətbuat orqanlarında dostlarını daha da artırmaqdır.

-Ümumiyyətlə, Almaniyada Azərbaycan diasporunun fəaliyyətini necə qiymətləndirirsiniz və erməni diasporası ilə müqayisədə diasporamızın fəaliyyətini qaneedici saymaq olarmı?

-Almaniyada Azərbaycan diasporunun fəaliyyətini yüksək qiymətləndirərdim. Bu ölkədə fəaliyyət göstərən çoxsaylı Azərbaycan təşkilatları, cəmiyyət və birliklərin birgə fəaliyyəti nəticəsində Almaniyada Azərbaycan diasporu daha da aktivləşir, Azərbaycanı layiqincə təmsil edir.

-“Alm.Az” Cəmiyyəti Azərbaycan həqiqətləri, Dağlıq Qarabağ problemi, eləcə də ermənilərin zaman-zaman azərbaycanlılara qarşı həyata keçirdikləri deportasiya və soyqırım siyasətini bu ölkə ictimaiyyətinə tam mənada çatdıra bilirmi?

-Ötən müddət ərzində „Alm. Az“ Cəmiyyəti qeyd etdiyiniz istiqamətlərdə bir sıra tədbirlər həyata keçirib. 2012-ci il, yanvarın 18-də Almaniyanın Drezden şəhərində “Alm.Az” Cəmiyyətinin təşkilatçılığı ilə Azərbaycan xalqının tarixinə Qanlı Yanvar faciəsi və eyni zamanda şanlı qəhrəmanlıq salnaməsi kimi daxil olmuş 1990-cı il 20 Yanvar hadisələrinin 22-ci ildönümünə həsr olunmuş tədbir keçirilib. Həmin tədbirdə soydaşlarımızla yanaşı alman ictimaiyyətinin, o cümlədən Saksoniya parlamentinin nümayəndələri, Drezdendə fəaliyyət göstərən konsulluqların, eləcə də rus, yəhudi, ukrayna, qazax icmalarının təmsilçiləri iştirak edib. Tədbir zamanı iştirakçılara keçmiş SSRİ rəhbərliyi tərəfindən Azərbaycan xalqına qarşı törədilən görünməmiş terror aktı barədə məlumat verdim. Daha sonra “Azadlığa aparan yollar” sənədli filmi nümayiş olundu. Keçən il dekabrın 11-də isə Almaniyanın Drezden şəhərində Azərbaycan xalqının ümummilli lideri, dünya şöhrətli siyasətçi Heydər Əliyevin xatirəsinə həsr olunmuş anım mərasimi keçirilib. Həmin tədbirdə cəmiyyət sədri olaraq ulu öndər Heydər Əliyevin şərəfli həyat yolu, dahi şəxsiyyətin Azərbaycan xalqı və dövləti qarşısındakı əvəzsiz xidmətləri barədə iştirakçılara məlumat verdim. Sonra tədbir iştirakçılarına ümummilli lider Heydər Əliyevin zəngin həyat yolundan bəhs edən sənədli film nümayiş etdirildi.

-Rəhbərlik etdiyiniz cəmiyyət Azərbaycan mədəniyyəti, adət-ənənələrinin təbliğinə hansı töhfəni verir?

-„Alm.Az“ Cəmiyyəti olaraq Azərbaycan mədəniyyəti, adət-ənənələri, xalqımızın zəngin mədəni irsi barədə də müntəzəm olaraq alman ictimaiyyətinə məlumat verir, bu istiqamətdə müxtəlif tədbirlər, layihələr həyata keçiririk. Belə ki, „AlmşAz“ Cəmiyyəti Drezdenin ən böyük konsert salonlarından birində Azərbaycan mədəniyyəti, incəsənətinin təbliği məqsədilə böyük bir tədbir keçirib. Həmçinin cəmiyyətin təşəbbüsü ilə Drezdendə Azərbaycan filmlərinin nümayişi təşkil olunub. Sözügedən layihənin proqramına Qarabağa həsr olunmuş filmlər də daxil edilir. Ümumiyyətlə, fəaliyyətə başladığımız gündən Azərbaycan mədəniyyətinin təbliğatı üçün çalışırıq. Bu məqsədlə qarşıdakı zaman ərzində bir neçə layihənin həyata keçirilməsini qarşımıza məqsəd qoymuşuq. Burada keçirilən sərgilərdə Azərbaycanın milli geyimləri və qədim xalçaları da Drezdendə sərgilənir. Mədəniyyət və Turizm Nazirliyinin yardımı ilə həyata keçirilən bu kimi tədbirlərlə Azərbaycan mədəniyyətinin bütün istiqamətlərini Almaniyada yüksək səviyyədə tanıtmağa çalışırıq.

-Cəmiyyətiniz Almaniya ilə Azərbaycan arasında müxtəlif sahələrdə əlaqələrin inkişaf etdirilməsi məqsədilə hansısa qarşılıqlı layihələr həyata keçirməyi düşünürmü?

-Qeyd etdiyiniz istiqamətlərdə də müəyyən fəaliyyətlərimiz olacaq. Biz Saksoniyanın hökumət və qeyri-hökumət təşkilatları, həmçinin digər xalqların təmsil etdiyi icmalarla il ərzində bir çox müxtəlif tədbirlər kecirməyi nəzərdə tutmuşuq.

-Almaniya eyni zamanda türklərin daha çox yaşadığı bir ölkə kimi tanınır. Bu baxımdan „Alm. Az“ Cəmiyyətinin Almaniyada fəaliyyət göstərən türki diasporu ilə əlaqələri hansı səviyyədədir?

-Ümummilli lider, mərhum prezident Heydər Əliyevin dediyi kimi biz bir millət, iki dövlətik və cəmiyyətimiz bu prinsipi hər zaman əsas tutaraq Almaniyada fəaliyyət göstərən türk diaspor təşkilatları, cəmiyyət və birlikləri ilə yaxından əməkdaşlıq edir, qarşılıqlı şəkildə keçirilən tədbirlərdə iştirak edirik. Bu əməkdaşlıq yüksələn xətlə inkişaf edir və bundan sonra da davam edəcək. Deyilənlərin bariz nümunəsi olaraq „Alm.Az“ Cəmiyyətinin Fransa Senatına göndərdiyi etiraz məktubunu göstərmək olar. Belə ki, rəhbərlik etdiyim cəmiyyət bu günlərdə Fransa Senatında qondarma „erməni soyqırımı“nı tanımayanların cinayət məsuliyyətinə cəlb edilməsini nəzərdə tutan qanunun müzakirəyə çıxarılması və qəbul edilməsinə etiraz əlaməti olaraq bu ölkə parlamentinə etiraz məktubu ünvanladı.

-Qarşıdan 26 fevral-Xocalı faciəsinin 20-ci ildönümü gəlir. “Alm. Az” Cəmiyyəti Xocalı faciəsinin 20 illiyi ilə əlaqədar olaraq bu ölkədə hansı tədbirlər keçirməyi nəzərdə tutub?

-Qarşıdan gələn Xocalı faciəsinin 20 –ci ildönümü ilə əlaqədar olaraq „Alm.Az“ Cəmiyyəti tərəfindən Drezden şəhərində fevral ayının 24 –də anım mərasimi keçiriləcək. Həmin tədbirə Saksoniyanın siyasi xadimləri, ziyalılar, həmçinin bu ölkədə fəaliyyət göstərən bütün icmaların nümayəndələri dəvət edilib. Tədbirin sonunda Saksoniya parlamentinə Xocalı soyqırımına siyasi qiymət verilməsi ilə əlaqədar iştirakçılar tərəfdən imzalanmış məktub göndəriləcək.

Süleyman İsmayılbəyli

Olaylar.- 2012.- 4-6 fevral.- S.15.