Benilüks Azərbaycanlıları Konqresi Avropa Birliyində lobbist təşkilat kimi akkreditə olub

Sahil Qasımov: “2012-ci illə bağlı hədəflər böyükdür”

“Xocalı soyqırımı aktını Benilüks ölkələrinin parlamentlərinə daşımaq istiqamətində calışırıq”

Dünyanın əksər ölkələrində olduğu kimi Benilüks ölkələrində də Azərbaycan diasporu öz aktivliyi ilə seçilir. Bu ölkədə fəaliyyət göstərən Benilüks Azərbaycanlıları Konqresi yarandığı gündən Azərbaycan həqiqətləri, Dağlıq Qarabağ probleminin Benilüks ölkələrinə çatdırılması istiqamətində aktiv fəaliyyət göstərir. Konqresin sədri Sahil Qasimov “OLAYLAR”-a verdiyi müsahibədə rəhbərlik etdiyi qurumun Xocalı soyqırımının 20-ci ildönümü ərəfəsində də Benilüks ölkələrində bir sıra tədbirlər təşkil edəcəyini söyləyib. BAK sədri Benilüks ölkələrində Azərbaycan diasporunun hazırkı durumu barədə də danışıb.

-Sahil müəllim, Dünya Azərbaycanlılarının üçüncü qurultayında prezident İlham Əliyevin diaspor təşkilatlarına ünvanladığı tapşırıq və tövsiyyələrə uyğun olaraq Benilüks Azərbaycanlıları Konqresi ötən müddət ərzində hansı işlər görüb və qurultayın qəbul etdiyi qərarların icrası istiqamətində konqres hansı addımlar atır?

-Dünya Azərbaycanlılarının üçüncü qurultayından sonra Beniluks Azərbaycanlıları Konqresi bir sıra tədbirlər həyata keçirib. Qurultayda cənab prezident İlham Əliyevin proqram xarakterli çıxışı, eləcə də diaspor təşkilatlarına ünvanladığı tapşırıq və tövsiyyələrə, eləcə də qurultayın qəbul etdiyi qərarların icrasına uyğun olaraq Benilüks Azərbaycanlıları Konqresi lobbiçilik istiqamətində uğurlu addımlar atır. Prezident İlham Əliyevin də qeyd etdiyi kimi artıq təşkilatlanmadan birbaşa lobbiçilik fəaliyyətinə keçmək istiqamətində addımlar atılmalıdır. Biz də konqres olaraq cənab prezidentin bu fikrini əlimizdə əsas tutaraq qeyd edilən istiqamətdə fəaliyyətimizi intensivləşdiririk. Ümumiyyətlə, prezidenti İlham Əliyevin Dünya Azərbaycanlılarının III qurultayındakı nitqindən irəli gələn vəzifələr xaricdəki Azərbaycan icmaları üçün əsas fəaliyyət proqramı olmalıdır.

-Ümumiyyətlə, Dünya Azərbaycanlılarının üçüncü qurultayının nəticələrini necə dəyərləndirərdiniz? Bu qurultay Azərbaycan diasporunun həyatında nə ilə yadda qaldı?

-Dünya Azərbaycanlılarının qurultaylarının hər biri Azərbaycanın diaspora həyatı üçün mühüm və əlamətdar hadisə olub. İlk dəfə ümummilli lider, mərhum prezident Heydər Əliyevin təşəbbüsü və bilavasitə iştirakı ilə keçirilən Dünya Azərbaycanlılarının birinci qurultayından sonra Azərbaycan diasporunun həyatında mühüm mərhələ başladı. Birinci qurultaydan sonra keçirilən qurultaylar isə bu sahədə görülən işləri təhlil etmək, yeni məqsəd və vəzifələri müəyyənləşdirməyi qarşıya məqsəd qoyurdu. Dünya Azərbaycanlılarının üçüncü qurultayı da ötən iki qurultay kimi Azərbaycan diaspora həyatında mühüm və əlamətdar hadisə idi. Cənab prezident İlham Əliyevin təşəbbüsü və iştirakı ilə keçirilən həmin qurultayda ötən illərdəki fəaliyyətin hesabatı verildi, yeni məqsəd və vəzifələr, qarşıya qoyulan hədəflər müəyyən edildi. Sonuncu qurultayda xüsusi yadda qalan məqamlardan biri də ondan ibarətdir ki, cənab prezident İlham Əliyev çıxışı zamanı lobbiçilik fəaliyyətinə keçmək istiqamətində müəyyən addımların atılmasının zəruriliyini vurğuladı. Hesab edirəm ki, həm Benilüks Azərbaycanlıları Konqresi, həm də digər Azərbaycan diaspor təşkilatları Dünya Azərbaycanlılarının üçüncü qurultayında prezident İlham Əliyevin verdiyi tapşırıq və tövsiyyələrə uyğun olaraq sözügedən istiqamətdə müvafiq addımlar atacaqlar. Dünya Azərbaycanlılarının üçüncü qurultayı bir məqamı ilə də yadda qaldı. Belə ki, prezident İlham Əliyevin imzaladığı sərəncamla Azərbaycan diasporunun inkişafında xidmətləri olan bir qrup şəxs təltif edildi ki, bu da diaspora üçün mühüm hadisə sayıla bilər. Prezident İlham Əliyevin imzalamış olduğu həmin sərəncam həm də dövləti diasporaya, bu sahədə çalışan insanlara göstərdiyi diqqət və qayğının bariz nümunəsi idi.

-Benilüks Azərbaycanlıları Konqresinin 2012-ci ildə qarşısına qoyduğu əsas hədəflər nədən ibarətdir?

-Benilüks Azərbaycanlıları Konqresinin 2012-ci illə bağlı hədəfləri böyükdür. Konqres olaraq artıq Avropa Birliyində lobbist təşkilatı kimi akkreditə olunmuşuq. Benilüks Azərbaycanlıları Konqresi olaraq Xocalı soyqırımı aktını Benilüks ölkələrinin parlamentlərinə daşımaq istiqamətində calışırıq. Ötən müddət ərzində Azərbaycan icmasını Niderlandda da etnik qrup kimi tanıda bilmişik. Hazırda isə digər Benilüks ölkələrində də bunu həyata keçirməyə səy göstəririk.

-Benilüks ölkələrində Azərbaycan diasporunun fəaliyyətini necə qiymətləndirirsiniz? Erməni diasporu ilə müqayisədə Azərbaycan diasporu bu regionda güclüdürmü?

- Benilüks ölkələrində Azərbaycan diasporası demək olar ki, güclüdür. Xüsusən də Niderland Krallığında və Belçikada Azərbaycan diasporunun gücü, aktiv fəaliyyəti özünü qabarıq şəkildə göstərir. Bu ölkələrdə erməni diasporası zəifdir. Benilüks ölkələrində erməni diasporunun göstərmək istədiyi həmlələrin qarşısı Azərbaycan diasporası tərəfindən qətiyyətlə dəf olunur. Buna misal kimi bir faktı qeyd etmək istərdim. Belə ki, ötən il erməni rejissoru Ovanesyanın "Hərb və sülh: İnsanların aqibəti" filmi Niderland Krallığının ikinci böyük şəhəri olan Rotterdam Beynəlxalq Film Festivalında Benilüks Azərbaycanlıları Konqresi tərəfindən nominasiyadan çıxarıldı. Həmin ərəfədə erməni rejissoru mənim telefon nömrəmi əldə edərək zəng vurub xahiş etdi ki, konqres olaraq belə bir addım atmayaq. Bu cür filmlər çox lazımlıdır. Təbii ki, biz erməni rejissorun xahişini yerinə yerinə biməzdik. Benilüks Azərbaycanlıları Konqresi öz gücünü göstərdi və ermənilərin çəkmiş olduğu həmin film müsabiqədən çıxarıldı. Bundan başqa Benilüks Azərbaycanlıları Konqresi Azərbaycan mədəniyyəti, tarixi, adət-ənənələrinin həmin ölkələrin ictimaiyyətinə çatdırılması istiqamətində də fəaliyyət göstərir. Belə ki, Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın təşəbbüsü ilə Amsterdam və Rotterdam şəhərlərində azərbaycanlı uşaqlar üçün həftəsonu məktəbləri açılıb, şagirdlər dərslik və dərs ləvazimatları ilə təmin olunub.

-Benilüks Azərbaycanlıları Konqresi olaraq Azərbaycan həqiqətləri, Dağlıq Qarabağ problemi, eləcə də ermənilərin zaman-zaman azərbaycanlılara qarşı həyata keçirdikləri soyqırım aktları barədə fəaliyyət göstərdiyiniz ölkələrə tam mənada məlumat çatdıra bilirsinizmi?

-Bu gün Benilüks Azərbaycanlıları Konqresi Azərbaycan həqiqətləri, Ermənistan-Azərbaycan, Dağlıq Qarabağ münaqişəsi və Xocalı faciəsinin əsl mahiyyətini bütün dünyaya çatdırmaq istiqamətində xüsusi rol oynayır. Benilüks Azərbaycanlıları Konqresi Azərbaycan həqiqətləri, Dağlıq Qarabağ problemi, ermənilərin azərbaycanlılara qarşı həyata keçirdikləri soyqırımlarla bağlı müntəzəm olaraq tədbirlər təşkil edir. Ötən illərdə Xocalı faciəsinin ildönümü, Dünya Azərbaycanlılarının Həmrəyliyi Günü, Rotterdamda Bakı küçəsinin açılışı tədbirlərində fəal iştirak etmişik. Həmçinin Benilüks Azərbaycanlıları Konqresinin dəvəti ilə Azərbaycan Milli Elmlər Akademiyasının tanınmış tarixçi alimləri ilə görüşlər keçirilib. Konqresimiz 20 Yanvar, Xocalı soyqırımı və 31 Mart Azərbaycanlıların Soyqırım Gününü hər il silsilə tədbirlərlə qeyd edir. Bu günlərdə konqresin üzvləri və digər təşkilatların nümayəndələri səssiz yürüş keçirir. Və yaxud yəhudilərin Tarixi Soyqırım Muzeyində tədbir keçiririk. Həmçinin Benilüks ölkələrindəki parlament önündə nümayiş təşkil edərək həm ictimaiyyət, həm də siyasilərə bu günlərin mahiyyətini çatdırırıq. Azərbaycanın Niderland Krallığındakı səfiri Fuad İsgəndərovun da qeyd etdiyi kimi, Benilüks Azərbaycanlıları Konqresi artıq Azərbaycanın xarici siyasətinin Avropada həyata keçirilməsinə öz dəstəyini göstərməyə başlayıb.

-Rəhbərlik etdiyiniz konqres Azərbaycanla Benilüks ölkələri arasında əlaqələrin daha da inkişaf etdirilməsi istiqamətində hansı layihələr həyata keçirməyi düşünür?

-Konqresimiz Benilüks ölkələri parlamentləri ilə Azərbaycan Milli Məclisi arasındakı Dostluq Qrupunun üzvlərinin mütəmadi görüşlərini təşkil edir. Bundan əlavə müxtəlif yerli siyasi partiyaların nümayəndələrinin Bakıya səfərlərini təşkil edərək onları mövcud vəziyyətlə bağlı yaxından tanış edirik.

-Sahil müəllim, qarşıdan Xocalı soyqırımının 20-ci ildönümü gəlir. Benilüks Azərbaycanlıları Konqresi Xocalı soyqırımının 20-ci ildönümü ilə bağlı hansı tədbirlər keçirməyi nəzərdə tutub?

-Benilüks Azərbaycanlıları Konqresi Xocalı soyqırımının 20-ci ildönümü ilə bağlı silsilə tədbirlər planı hazırlayıb. Soyqırımın ildönümü ilə bağlı tədbirlərin keçirilməsi üçün xüsusi komissiya təşkil olunub. Müəyyən edilmiş tədbirlər planına uyğun olaraq Benilüks ölkələrindəki parlamentlərdə Xocalı soyqırımına siyasi və hüquqi qiymətin verilməsi üçün fəaliyyətimizi bir qədər də genişləndirəcəyik. Bundan əlavə Haaqa və Amsterdam şəhərlərində "Xocalı azərbaycanlı uşaqların gözü ilə" adlı rəsm sərgisi təşkil ediləcək. Həmçinin Haaqa və Brüsseldəki Ermənistan səfirlikləri, eləcə də Avropa Parlamenti qarşısında kütləvi şəkildə nümayişlər keçiriləcək.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 15 fevral.- S.15.