Diaspora fəaliyyətində yeni eranın başlanğıcı

İsmayıl Ağayev: “Dünya Azərbaycanlılarının üçüncü qurultayından sonra konsulluq, səfirlik və diaspor təşkilatlarının birgə mübarizəsinin strukturu formalaşıb”

“Son dövrlərdə Türkiyə Azərbaycan diaspor təşkilatlarının birgə mübarizəsi daha effekli və təkmilləşdirilmiş formada özünü göstərir”

Azərbaycan diasporunun inkişaf etməsi, onun dünyada güc mərkəzi kimi formalaşması istiqamətində müvafiq dövlət qurumu olan Diasporla İş üzrə Dövlət Komitəsi ilə yanaşı bu sahədə fəaliyyət göstərən ayrı-ayrı qeyri-hökumət təşkilatları və ictimai birliklər də xüsusi fəallıq göstərir, diasporamızın inkişaf etməsinə öz töhfələrini verirlər. Belə təşkilatlardan biri olan Beynəlxalq Diaspora Mərkəzi də yarandığı gündən Azərbaycan diasporunun formalaşması, onun inkişaf edib lobbi fəaliyyətinə keçməsi üçün müvafiq işlər görüb, tədbirlər həyata keçirib. Bu gün də fəaliyyətini sözügedən istiqamətdə davam etdirən Beynəlxalq Diaspora Mərkəzi Azərbaycan həqiqətləri, Dağlıq Qarabağ problemi, eləcə də ermənilərin zaman-zaman azərbaycanlılara qarşı həyata keçirdikləri deportasiya və soyqırım siyasətinin dünya ictimaiyyətinə çatdırılması işində də fəallıq nümayiş etdirir.

Beynəlxalq Diaspora Mərkəzi Xocalı soyqırımının 20-ci ildönümü ərəfəsində də bir sıra Avropa ölkələrində tədbirlər keçirməyi planlaşdırıb. Bu barədə məlumat verən mərkəzin sədri İsmayıl Ağayev rəhbərlik etdiyi qurumun diaspora işinə verdiyi töhfələrdən də danışıb. Bildirib ki, digər diaspora təşkilatları kimi Beynəlxalq Diaspora Mərkəzi də Dünya Azərbaycanlılarının üçüncü qurultayında prezident İlham Əliyevin çıxışı zamanı diaspora təşkilatlarına ünvanladığı tapşırıq və tövsiyyələrin icrası sahəsində müəyyən addımlar atır, öz işini daha da təkmilləşdirir və beynəlxalq əlaqələrini gücləndirir.

-İsmayıl müəllim, Beynəlxalq Diaspora Mərkəzi olaraq Azərbaycan diasporunun hazırkı durumunu necə qiymətləndirirsiniz?

-Dünya Azərbaycanlılarının üçüncü qurultayında cənab prezident İlham Əliyevin diaspor təşkilatlarına verdiyi qiymət, eləcə də bildirdiyi iraddan sonra Diasporla İş üzrə Dövlət Komitəsinin sədri Nazim İbrahimovun rəhbərliyi altında diaspora quruculuğunda yeni proqramların həyata keçirilməsi ilə bağlı bir sıra mühüm addımlar atılıb. O, cümlədən həm ayrı-ayrı qeyri-hökumət təşkilatları ilə işlərin aparılması, həm Beynəlxalq Diaspora Mərkəzi ilə birgə tədbirlərin keçirilməsi, həm də ölkədən kənarda fəaliyyət göstərən diaspor təşkilatlarının birgə mübarizəsinin təşkil edilməsi istiqamətində işlər görülüb. Bütün bunları qarşımıza qoyduğumuz lobbiçilik fəaliyyətinin həyata keçirilməsi istiqamətində atılan təqdirəlayiq addımlar kimi qiymətləndirmək olar. Xarici İşlər Nazirliyinin Qars, Ankaradakı baş konsulluqları və Diasporla İş üzrə Dövlət Komitəsinin dəstəyi və köməkliyi ilə İrəvan xanlığı və onun tarixinə aid həqiqətlərin dünya ictimaiyyətinə çatdırılması məqsədilə keçirdiyimiz tədbirlər, həyata keçirilən layihələr onu deməyə əsas verir ki, Dünya Azərbaycanlılarının üçüncü qurultayından sonra konsulluq, səfirlik və diaspor təşkilatlarının birgə mübarizəsinin strukturu formalaşıb. Beynəlxalq Diaspora Mərkəzi qurultaydan sonrakı dövrdə görülən işləri təhlil edərək belə qənaətə gəlir ki, bu dövrü keçmiş illərlə müqayisədə diaspora fəaliyyətində yeni bir eranın başlanğıcı kimi dəyərləndirmək olar. Biz də Beynəlxalq Diaspora Mərkəzi olaraq ayrı-ayrı ölkələrdə fəaliyyət göstərən diaspora təşkilatları ilə birlikdə fəaliyyətimizi gücləndirərək Azərbaycan həqiqətlərinin dünyaya çatdırılması işinə öz töhfəmizi veririk. Həmçinin Türkiyə-Azərbaycan diasporlarının birgə mübarizəsi məqsədilə müəyyən edilmiş xətt və proqram üzrə işlərimizi davam etdiririk. Buna bir neçə misal göstərmək olar. Belə ki, Xarici İşlər Nazirliyi və Diasporla İş üzrə Dövlət Komitəsinin xətti ilə Türkiyədə təşkil etdiyimiz görüşlər, keçirdiyimiz tədbirlərin nəticəsi olaraq yaxın vaxtlarda Çanaqqalada Azərbaycan şəhidlərinin xatirəsinə abidənin ucaldılmasına nail ola biləcəyik. Son dövrlərdə Türkiyə Azərbaycan diaspor təşkilatlarının birgə mübarizəsi daha effekli və təkmilləşdirilmiş formada özünü göstərir. Xüsusilə, qondarma “erməni soyqırımı” ilə bağlı bu günlərdə Fransa Senatında gündəmə gələn məsələ Türkiyə-Azərbaycan diasporunun birgə mübarizəsinin zəruriliyini ortaya qoymuş oldu. Bu zərurəti dərindən dərk edən diaspora təşkilatları da sözügedən istiqamətdə birgə mübarizə apararaq güc və qüvvələrini nümayiş etdirdilər.

-Fransa Senatında qondarma “erməni soyqırımı”nı inkar edənlərə qarşı cəzanı nəzərdə tutan qanunun qəbul edilməsinə etiraz əlaməti olaraq Azərbaycan diaspor təşkilatlarının apardığı mübarizəni, keçirdiyi etiraz aksiyalarını yetərli saymaq olarmı?

-Azərbaycan diasporu Fransa ilə bağlı məsələdə öncül yerlərdən birini nümayiş etdirdi və bu istiqamətdəki fəaliyyətini birmənalı şəkildə ortaya qoydu. Diaspor təşkilatlarımız sözügedən məsələdə xüsusi diqqət cəlb etdilər. Biz də Beynəlxalq Diaspora Mərkəzi olaraq Fransa Senatının bədnam qərarına etiraz əlaməti olaraq bir sıra tədbirlər keçirdik, etiraz aksiyaları təşkil etdik. Azərbaycanın Sankt-Peterburqdakı baş konsulluğunun dəstəyi və Beynəlxalq Diaspora Mərkəzinin regional nümayəndəliyi, eləcə də digər diaspor təşkilatarının birgə təşkilatçılığı ilə Sankt-Peterburqdakı Fransa konsulluğu qarşısında böyük bir siyasi aksiya həyata keçirildi. Həmin aksiyada Azərbaycan cəmiyyət və təşkilatları ilə yanaşı türkdilli dövlətlərin diaspor təşkilatları da iştirak edirdi. Bu da onu deməyə əsas verir ki, Azərbaycan diasporu bu kimi məsələlərdə öncül yerlərdən birini tutur və türk diasporlarını belə öz arxasınca aparmağa nail olub. Konkret olaraq Fransa Senatının bədnam qərarına qarşı keçirilən bütün etiraz aksiyalarında Azərbaycan diasporu türk qardaşlarımızın yanında olub, onlara dəstək verib. Bizim də çoxdan gözlədiyimiz və arzu etdiyimiz odur ki, diaspor təşkilatlarının birgə fəaliyyəti və mübarizəsi tənzimlənsin, bu istiqamətdəki işlər davam etdirilsin. Düşünürəm ki, biz tədricən ona nail ola bilirik. Diasporla İş üzrə Dövlət Komitəsinin təşəbbüsü ilə Beynəlxalq Diaspora Mərkəzi və türk diasporunun bəzi təşkilatları artıq birgə müqavilələr imzalayıblar. Həmin müqavilələrdə birgə mübarizənin aparılması istiqamətləri, eləcə də digər məsələlər öz əksini tapıb. Beynəlxalq Əsilsiz Erməni İddialarına qarşı Mübarizə Dərnəyi ilə Beynəlxalq Diaspora Mərkəzi arasında imzalanmış müqaviləyə əsasən İqdırda keçirilən tədbirlərdə BDM, Azərbaycanda təşkil edilən tədbirlərdə isə adı çəkilən mərkəz rəhbərliyi iştirak edir. Bunun özü Azərbaycan və türk diasporlarının apardığı birgə mübarizənin bariz nümunəsidir.

-Xocalı soyqırımının 20-ci ildönümü ilə bağlı Beynəlxalq Diaspora Mərkəzi hansı tədbirlər keçirməyi nəzərdə tutub?

-Azərbaycan xalqının tarixinə ən qanlı və yaralı bir səhifə kimi daxil olan Xocalı faciəsinin ildönümü ilə bağlı Beynəlxalq Diaspora Mərkəzi də bir sıra tədbirlər keçirməyi nəzərdə tutub. Heydər Əliyev Fondunun Rusiya nümayəndəliyinin rəhbəri Leyla xanım Əliyevanın təşəbbüsü ilə həyata keçirilən “Xocalıya ədalət” kampaniyasına dəstək olaraq BDM-in regional nümayəndəlikləri bir sıra tədbirlər nəzərdə tutublar. Xocalı faciəsinin 20-ci ildönümü ərəfəsində Avropa ölkələrində və Türkiyədə bir sıra silsilə tədbirlər təşkil olunacaq. Keçiriləcək tədbirlərdə həmin ölkələrdə fəaliyyət göstərən türk diaspora təşkilatları da yaxından iştirak edəcək. Biz də Beynəlxalq Diaspora Mərkəzinin rəhbərliyi olaraq Xocalı faciəsi ilə bağlı keçiriləcək tədbirlərdə iştirak etmək üçün Avropa ölkələrinə səfər edəcəyik.

-Beynəlxalq Diaspora Mərkəzinin təşkilatçılığı ilə faciənin ildönümü ilə bağlı tədbirlər konkret hansı ölkələrdə reallaşdırılacaq?

-Fevralın 20-dək Rusiyanın Sankt-Peterburq şəhərində Xocalı soyqırımı ilə bağlı müxtəlif tədbirlər keçiriləcək və biz də həmin tədbirlərdə iştirak edəcəyik. Fevralın 25-də Fransanın Strasburq şəhərində Azərbaycanlıların və digər Türkdilli Xalqların Əməkdaşlıq Mərkəzi ilə “Strasburq Azərbaycan Evi”nin keçirəcəyi etiraz aksiyasında, eləcə də İsveç və Almaniyadakı Azərbaycan səfirliklərinin keçirəcəyi tədbirlər, Çex-Azərbaycan Cəmiyyətinin Praqadakı təşkil edəcəyi anım tədbirlərində də iştirakımız nəzərdə tutulub. Nəhayət, fevralın 26-da İstanbulun Taksim meydanında Beynəlxalq Əsilsiz Erməni İddialarına qarşı Mübarizə Dərnəyi ilə Beynəlxalq Diaspora Mərkəzinin Türkiyə təmsilçiliyinin təşkil edəcəyi tədbirlərə qatılacaq. Etiraz aksiyasında iştirak etmək üçün Azərbaycandan geniş tərkibdə nümayəndə heyəti qardaş ölkəyə səfər edəcək. Türkiyəyə səfər edəcək nümayəndə heyətinin tərkibinə hökumət rəsmiləri, millət vəkilləri, qeyri-hökumət təşkilatlarının rəhbərləri, eləcə də tanınmış ziyalılar daxildir. Onu da qeyd edim ki, Taksim meydanında etiraz aksiyası ilə yanaşı Xocalı soyqırımını əks etdirən foto-sərginin keçirilməsi də planlaşdırılıb.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 16 fevral.- S.15.