Diaspora təşkilatları Xocalı faciəsi ilə bağlı tədbirlər keçirəcək

Dünyanın müxtəlif ölkələrində anım tədbirləri təşkil olunacaq

Xocalı faciəsinin 20-ci ildönümü ilə əlaqədar olaraq dünyanın müxtəlif ölkələrində fəaliyyət göstərən diaspora təşkilatlarımız anım tədbirləri, soyqırıma həsr olunmuş sərgi və konfranslar, kütləvi aksiyalar keçirməyi nəzərdə tutub. Müxtəlif ölkələrdə keçiriləcək anım tədbirlərinə həmin ölkələrdə fəaliyyət göstərən türk diaspora təşkilatı da yaxından dəstək verəcək. Rusiya Federasiyasının Moskva, Sankt-Peterburq, Yekaterinburq, Murmansk və digər şəhərlərində ÜmumRusiya Azərbaycanlıları Konqresi, Heydər Əliyev Fondunun Rusiya nümayəndəliyi və Rusiyanın Azərbaycanlı Gənclər Təçkilatının təşkilatçılığı ilə anım mərasimləri, dəyirmi masa və konfranslar keçiriləcək, Tədbirlər çərçivəsində Xocalıda dinc əhalinin qətlə yetirilməsini əks etdirən fotosərgilər, sənədli filmlər nümayiş etdiriləcək.

Fevralın 26-da isə Rusiyanın Azərbaycanlı Gənclər Təşkilatı tərəfindən Moskvada “Xocalıya Ədalət” kampaniyası çərçivəsində Rusiyanın ayrı-ayrı regionlarında Xocalı soyqırımının 20-ci ildönümünə həsr olunmuş tədbirlər təşkil olunacaq. Xocalı faciəsinin ildönümü münasibəti ilə tədbirlər Ukrayna, Belarus, Estoniya, Litva, Latviya və Kişinyovda da baş tutacaq. Onu da qeyd etmək yerinə düşər ki, İslam Konfransı Gənclər Forumunun və Ukrayna Azərbaycanlı Gənclər Birliyinin təşəbbüsü ilə Ukraynada fevral ayı “Xocalı ayı” elan olunub. Bu ölkədə elan olunmuş “Xocalı ayı” tədbirlərinə artıq Xarkov şəhərində start verilib. Xarkov vilayət administrasiyası rəsmilərinin, Azərbaycan diasporunun fəallarının, yerli KİV nümayəndələrinin iştirak etdikləri “Xocalı ayı” çərçivəsində ilk anma mərasimində 20 ilin keçməsinə baxmayaraq, beynəlxalq təşkilatlar tərəfindən Xocalı soyqırımına hüquqi siyasi qiymətin verilməməsi tarixi ədalətsizlik kimi qiymətləndirilib. Fevralın 25-də isə Ukrayna Azərbaycanlıları Konqresinin təşkilatçılığı ilə Kiyev şəhərində Xocalı soyqırımının 20-ci ildönümünə həsr olunmuş anım mərasimi keçiriləcək. Fevralın 26-da Minskdə Belarus Azərbaycan İcmaları Konqresi, fevralın 27-də isə Kişinyov şəhərində Moldova Azərbaycanlıları Konqresinin təşkilatçılığı ilə Xocalı soyqırımı qurbanlarının xatirəsinə həsr olunmuş tədbirlər təşkil olunacaq, yerli kütləvi informasiya vasitələrində Xocalı soyqırımı ilə bağlı materiallar dərc ediləcək. Fevralın 24-də Vülnüsdə Litva Azərbaycanlıları Cəmiyyəti, fevralın 25-də Tallində “Aydan” Estoniya-Azərbaycan Mədəniyyət Mərkəzi Azərbaycan Respublikasının bu ölkədəki səfirliyi ilə birgə Xocalı soyqırımı qurbanlarının xatirəsini anacaq. Avropanın ayrı-ayrı ölkələrində, o cümlədən Almaniya, Fransa, İtaliyada, habelə Danimarka, İsveç, Niderland Krallıqlarında, Polşa, Rumıniya, Macarıstan, Finlandiya, Çexiyada keçiriləcək tədbirlərdə bu ölkələrdəki Azərbaycan diasporu ilə yanaşı, türk, yəhudi icmalarının, eləcə də adı çəkilən ölkələrin ictimai-siyasi təşkilatlarının, həmçinin parlamentlərinin nümayəndələrinin qatılacağı gözlənilir.

Xocalı soyqırımının 20-ci ildönümü münasibəti ilə Azərbaycan Diasporunun Almaniyadakı Mərkəzi Şurası tərəfindən fevralın 10-dan başlayaraq Berlin şəhərində “Biz sülh istəyirik” adlı silsilə rəsm müsabiqələrinə start verilib. Ümumiyyətlə, faciənin ildönümü ilə bağlı genişmiqyaslı tədbirlərin keçirildiyi ölkələr sırasında Almaniya xüsusi yer tutur. Fevralın 11-də Almaniyanın Hamburq şəhərində Saksen-Anhalt Əyaləti üzrə Alman-Azərbaycan Mədəniyyət Cəmiyyəti təşkilatçılığı ilə Xocalı soyqırımının 20-ci ildönümünə həsr olunmuş boks turniri keçirilib. Yarışı izləyən 600-dən artıq tamaşaçıya Xocalı soyqırımı haqqında məlumat verilib. Fevralın 17-də Maqdeburq şəhərində Almaniya Sosial Demokrat Partiyasının toplantısında Xocalı soyqırımına dair məruzə təqdim olunub. Fevralın 18-də Xocalı soyqırımı qurbanlarının xatirəsinə həsr olunmuş avtomobil yürüşü, fevralın 26-da isə alman yazıçısı Rolf Kunşun alman dilində nəşr olunmuş “Xocalı” kitabının təqdimat mərasiminin keçirilməsi nəzərdə tutulub. Fevralın 24-də Berlində Almaniyadakı Azərbaycanlıların Koordinasiya Mərkəzinin və Atatürkçü Düşüncə Dərnəyi Berlin-Brandenburq Cəmiyyətinin təşkilatçılığı ilə Xocalı soyqırımının 20-ci ildönümünə həsr olunmuş “Qafqazda sülhün qorunması və Türk-Azərbaycan münasibətləri” mövzusunda konfrans keçiriləcək. Həmin ərəfədə Berlin-Bakı Qalereyası Bakı Pantomima teatrı ilə birgə Berlində Xocalı soyqırımına həsr olunmuş foto və rəsm sərgisi təşkil edəcək, tamaşaçıların diqqətinə Xocalı soyqırımından bəhs edən ədəbi-bədii kompozisiya təqdim edəcək. Fevralın 25-də Berlində Azərbaycan Evi, Alman-Azərbaycan Həmrəylik Cəmiyyəti, Almaniyadakı Azərbaycanlıların Koordinasiya Mərkəzinin birgə təşkilatçılığı ilə Xocalı soyqırımının 20-ci ildönümü münasibətilə etiraz aksiyası baş tutacaq. Xocalı soyqırımının 20-ci ildönümünə həsr olunmuş tədbirlər Almaniyanın Drezden, Kassel, Hannover və Mayns şəhərlərində də keçiriləcək.

Böyük Britaniya və Şimali İrlandiya Birləşmiş Krallığında fəaliyyət göstərən Avropa Azərbaycan Cəmiyyəti Xocalı soyqırımının 20-ci ildönümü münasibətilə silsilə tədbirlər keçirəcək, o cümlədən fevralın 22-də Londonda Xocalı soyqırımına həsr olunmuş rəsm əsərlərindən ibarət sərgi təşkil edəcək. Benilüks Azərbaycanlıları Konqresi tərəfindən fevralın 22-də Amsterdamda azərbaycanlı uşaqların Xocalıya aid əl işləri və rəsmlərindən ibarət sərgi, fevralın 23-də Haaqada “Uşaq rəsm sərgisi” təşkil edəcəkdir. Fevralın 28-də Benilüks Azərbaycanlıları Konqresinin təşkilatçılığı ilə Belçikanın paytaxtı Brüsseldə Xocalı soyqırımının 20-ci ildönümü münasibətilə mitinq keçiriləcək. Brüsseldəki Place Schuman meydanında Avropa Komissiyasının önündə təşkil olunacaq “İnsanlıq ayıbı Xocalıya ədalət” mitinqində “Hamımız Xocalılıyıq! Hamımız Türkük!” şüarlarının sədaları altında ölkədə fəaliyyət göstərən Azərbaycan və Türk diaspor təşkilatlarının, siyasi partiya və ictimai təşkilatların nümayəndələrinin iştirakı planlaşdırılıb. Fevralın 25-də İsveç Krallığının Malmö şəhərində İsveç Azərbaycanlıları Konqresinin təşkilatçılığı ilə Xocalı soyqırımına həsr olunmuş konfrans, fevralın 26-da Stokholm şəhərində Azərbaycan Federasiyası İsveçin təşkilatçılığı ilə seminar keçiriləcək. Fevralın 26-da həmçinin Azərbaycan Federasiyası İsveç tərəfindən Stokholmda Xocalı soyqırımının 20-ci ildönümünə həsr olunmuş kütləvi etiraz aksiyasının keçirilməsi nəzərdə tutulub. Fevralın 26-da Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumunun təşkilatçılığı ilə Böyük Britaniya və Şimali İrlandiya Birləşmiş Krallığında, Misir Ərəb Respublikasında, İtaliya, Fransa, Niderland Krallığında, Kanada da Xocalı soyqırımının 20-ci ildönümünə həsr olunmuş tədbirlər keçiriləcək. Fevralın 25-də Danimarkada, Rumıniyada, fevralın 26-da Finlandiya və Macarıstanda Xocalı soyqırımı qurbanlarının xatirəsinə həsr olunmuş anım mərasimləri təşkil ediləcək. Fevralın 25-də Çexiyanın paytaxtı Praqanın Sülh meydanında “Azər-Çex” Cəmiyyətinin təşkilatçılığı ilə “Xocalıya ədalət” kampaniyası çərçivəsində kütləvi etiraz aksiyasının keçirilməsi planlaşdırılıb.

Xocalı soyqırımının 20-ci ildönümü münasibətilə Gürcüstan, Qazaxıstan, Özbəkistan, Qırğızıstanda anım mərasimləri, konfrans və sərgilər təşkil olunacaq. Fevralın 26-da Qazaxıstanın Astana şəhərində Qazaxıstan Azərbaycanlıları Mədəniyyət Mərkəzləri İttifaqının təşkilatçılığı ilə “Xocalı soyqırımı – XX əsrin dəhşətli faciəsi” mövzusunda konfrans keçiriləcək. Xocalı soyqırımının 20-ci ildönümü münasibətilə tədbirlər Türkiyənin bir sıra şəhərlərində də keçiriləcək. Fevralın 26-da İstanbulun Taksim meydanında Türkiyədə təhsil alan azərbaycanlı tələbələrin, Xaricdə Təhsil Alan və Məzun Olmuş Azərbaycanlı Gənclərin Beynəlxalq Forumunun və İstanbul Türkiyə-Azərbaycan Dərnəyinin, Türkiyə-Azərbaycan Dərnəkləri Federasiyasının, Azərbaycan və Türkiyə qeyri-hökumət təşkilatlarının, KİV nümayəndələrinin iştirakı ilə “Türkiyə bunu tanı, unutma Xocalını” adı altında izdihamlı yürüş-mitinqin keçirilməsi planlaşdırılıb. Fevralın 26-da isə Misir Ərəb Respublikasının paytaxtı Qahirədəki Ayn-Şəms Universitetində Qahirə-Türk Araşdırmalar Mərkəzinin və Azərbaycan Respublikasının Misirdəki səfirliyinin birgə təşkilatçılığı ilə konfrans, Birləşmiş Ərəb Əmirliklərində fəaliyyət göstərən “Azərbaycan” Cəmiyyətinin təşkilatçılığı ilə Xocalı soyqırımının 20-ci ildönümünə həsr olunmuş elmi-praktiki konfrans, Küveytdə “Vətənsevər” Azərbaycan-Küveyt Mədəniyyət və Dostluq Cəmiyyətinin təşkilatçılığı ilə anım mərasimi keçiriləcək. Xocalı soyqırımının 20-ci ildönümü münasibətilə tədbirlər Birləşmiş Ştatların Nyu-York, Los-Anceles, San-Fransisko, Hyuston şəhərlərində də keçiriləcək. Amerika-Azərbaycan Şurası, Amerika-Azərbaycan Cəmiyyəti, Azərbaycan-Nyu-York Assosiasiyası, Hyuston-Bakı Qardaşlaşmış Şəhərlər Assosiasiyasının təşkilatçılığı ilə keçiriləcək anım mərasimlərində Amerikanın azərbaycanlı icması ilə yanaşı, türk, yəhudi və digər icmaların nümayəndələrinin iştirakı nəzərdə tutulub. Xocalı soyqırımı qurbanlarının xatirəsi Avstraliya, Yeni Zelandiya, Kanada və Meksikada da yad ediləcək. Fevralın 26-da Avstraliya-Azərbaycan-Türk Dostluq Birliyi təşkilatı tərəfindən Sidney sakinlərinə əvvəlcədən istehsal olunmuş və üzərində “Xocalı faciəsi – 1992-ci il” yazısı olan köynəklər paylanacaq, Həmçinin Azərbaycan-Yeni Zelandiya Dostluq Cəmiyyəti tərəfindən anım mərasimi keçiriləcək. Kanadanın Ottava, London və Kalqari şəhərlərində müvafiq olaraq Kanada-Azərbaycan Təşkilatlar Assambleyası, Kanada Azəri-Türk Assosiasiyası, Alberta Azərbaycan Mədəniyyət Mərkəzinin təşkilatçılığı ilə Xocalı soyqırımı ilə bağlı anım mərasimləri baş tutacaq. Fevralın 26-da Xocalı soyqırımı qurbanlarının xatirəsi Meksikada fəaliyyət göstərən Latın Amerikasındakı Azərbaycan Assosiasiyası tərəfindən təşkil olunmuş anım mərasimində anılacaq.

Süleyman İsmayılbəyli

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 18-20 fevral.- S.15.