Azərbaycan diasporu Arxangelskdə erməni yalanlarını ifşa edir

Yusif Süleymanov: “İmkan vermirik ki, erməni diasporu orada hansısa fəallıq nümayiş etdirsin”

“Biz fəaliyyətimizlə Azərbaycan və Rusiya arasında dostluq körpüsü yaradırıq”

Bu gün Azərbaycan diasporunun xüsusi fəallıq göstərdiyi ölkələr sırasında Rusiya Federasiyası öncül yerlərdən birini tutur. Təkcə şimal qonşumuzun paytaxtı Moskva və kifayət qədər iri şəhərlərində deyil, eləcə də bu ölkənin ayrı-ayrı subyektlərində fəaliyyət göstərən Azərbaycan diasporu ölkəmizin üzləşdiyi problemlər, Ermənistan-Azərbaycan, Dağlıq Qarabağ münaqişəsi, ermənilərin zaman-zaman soydaşlarımıza qarşı həyata keçirdiyi terror və soyqırım siyasəti barədə yerli ictimaiyyətə dolğun və operativ məlumat verir, yalançı erməni təbliğatının qarşısını alır. Rusiyanın Arxangelsk vilayətində fəaliyyət göstərən Azərbaycan diasporu da qeyd edilən istiqamətlərdə aktivlik nümayiş etdirir. Sözügedən vilayətdəki Azərbaycan diasporunun rəhbəri, ÜmumRusiya Azərbaycanlıları Konqresinin Arxangelsk vilayəti üzrə nümayəndəsi Yusif Süleymanov “OLAYLAR”-a verdiyi müsahibədə Azəbaycanın təbliği istiqamətində görülən işlər, eləcə də qarşıya qoyulan məqsəd və vəzifələr barədə məlumat verib.

-Yusif müəllim, ÜmumRusiya Azərbaycanlıları Konqresi Xocalı soyqırımının ildönümü ilə bağlı hansı tədbirlər keçirməyi nəzərdə tutulub?

-ÜmumRusiya Azərbaycanlıları Konqresi, eləcə də onun Arxangels regional təşkilatı olaraq təkcə Xocalı soyqırımı deyil, eyni zamanda Azərbaycan başına gətirilən digər müsibətlər, Dağlıq Qarabağ problemi ilə əlaqədar olaraq müntəzəm şəkildə tədbirlər təşkil edir, mətbuat səhifələrində bütün bunlarla bağlı materiallar dərc edirik. Bir neçə dəfə mənim özümün yerli mətbuatda müsahibəm, yazılarım çap edilib. Gördüyümüz işlərlə bağlı da mərkəzi strukturlara məlumat veririk. Xocalı soyqırımının 20-ci ildönümü ərəfəsində də Arxangelskdə yaşayan azərbaycanlılar bir yerə yığılaraq anım tədbiri keçirəcəklər.

-Arxangelskdə təxminən nə qədər azərbaycanlı yaşayır və soydaşlarımızın əsas məşğuliyyəti, nədən ibarətdir?

-Arxangelsk vilayətində təxminən 4 mindən artıq azərbaycanlı yaşayır. Burada müxtəlif sahələrdə çalışan soydaşlarımız var. Əsasən azərbaycanlılar bizneslə məşğul olurlar. Ancaq digər mühüm vəzifələrlə, hüquq-mühafizə orqanlarında çalışan azərbaycanlılar da var. Vilayətin Oktyabrski rayonun polis rəisinin müavini azərbaycanlıdır. Eyni zamanda Venişski şəhərindəki həbsxananın rəis müavini də bizim soydaşımız idi. Bir müddət əvvəl isə pensiyaya çıxdı. Arxangelsk vilayətindəki həbsxananın rəisi də azərbaycanlıdır. Həmçinin ayrı-ayrı sahələrdə yaşayan azərbaycanlılar da var.

-Bəs azərbaycanlıların üzləşdiyi hansısa problemlər varmı?

-Hər bir yerdə olduğu kimi Arxangelsk vilayətində yaşayan azərbaycanlıların da üzləşdikləri bəzi problemlər var. Lakin həmin vilayətdə fəaliyyət göstərən Azərbaycan diasporu yerli rəhbərliyin dəstəyi ilə soydaşlarımızın problemlərini həll etməyə çalışır və bu istiqamətdə fəaliyyət göstərir. Ancaq bir problem var ki, həmin problemin həlli ilə bağlı uzun zamandır ki, çalışırıq. Belə ki, orada yaşayan azərbaycanlı həmyerlimizin övladı dünyaya gələndə bir qayda olaraq Rusiya mühitinə alışır. Küçəyə çıxanda, bağça və ya məktəbə gedəndə yalnız rus dilini eşidir. Nəticədə həmin uşaq demək olar ki, Azərbaycan dilini bilmir. Ona görə də biz bu problemin həllinə çalışırıq və müəyyən fəaliyyətlərimiz var.

-Bu istiqamətdə konkret hansı addım atmağı düşünürsünüz?

-Biz bununla bağlı Arxangelsk vilayətinin müvafiq qurumları, eləcə də vilayətin təhsil üzrə rəhbərliyi ilə razılıq əldə etmişik ki, orada Azərbaycan uşaqları üçün ana dilində dərs keçirilsin. Çünki azərbaycanlı uşaqlar öz dilini, adət-ənənəsini yaddan çıxarmamalıdır. Məsələ ilə bağlı Diasporla İş üzrə Dövlət Komitəsinə də müraciət etmişəm. Dövlət Komitəsindən bildirilib ki, belə bir məktəb açılsa bütün lazımı materiallar, əyani vəsaitlər, kitablar komitə tərəfindən Arxangelskə göndəriləcək. Konkret olaraq biz bu istiqamətdə fəaliyyət göstəririk.

-Yəqin ki, Azərbaycan dili dərsləri yalnız həftə sonları keçirilər?

-Əlbəttə. Digər fənlər onsuz da orta məktəblərdə keçirilir. İstənilən dildə ikinin üzərinə iki gələndə nəticə dörd edir. Əsas odur ki, soydaşlarımızın dünyaya gələn övladları öz ana dilini unutmasınlar. Azərbaycanlı uşaqlar öz adət-ənənələrini, milli bayramları, mədəniyyətlərini bilməlidirlər.

-Azərbaycan dili məktəbinin açılması təxminən nə zaman mümkün olacaq?

-Arxangelsk vilayətinin təhsil komitəsinə artıq məktubla müraciət edilib. Həmçinin yaşadığımız rayonun meri də təhsil komitəsinə anoloji məktub göndərib. Artıq demək olar ki, şifahi razılıq əldə edilib. Onu da qeyd edim ki, bu sırf fakultetiv bir məktəb olacaq.

-Arxangelskdə digər Azərbaycan cəmiyyətləri və təşkilatları da fəaliyyət göstərirmi və həmin təşkilatlarla əməkdaşlığınız hansı səviyyədədir?

-Arxangelskdə diaspora fəaliyyəti ilə məşğul olan təşkilat var. Ancaq bizim təşkilat orada xüsusi fəallıq nümayiş etdirir.

-Təşkilat olaraq Azərbaycanla bağlı yaşadığınız vilayətin ictimaiyyətinə tam obyektiv məlumat çatdıra bilirsinizmi?

-Biz təşkilat olaraq Arxangelskdə çox fəalıq. Azərbaycan barədə kifayət qədər obyektiv məlumat veririk. Nəinki Azərbaycanın üzləşdiyi problemlər, Dağlıq Qarabağ münaqişəsi, ermənilərin təcavüzkar siyasəti, eləcə də ölkəmizin sürətli inkişafı, əldə etdiyi nailiyyətlər barədə yerli ictimaiyyətə mətbuat vasitəsilə məlumat veririk. Əgər əvvəllər Azərbaycan, Bakı barədə məlumatsız idilərsə, indi Rusiya Federasiyasının istənilən subyektində, hətta kəndlərdə belə Azərbaycanın harada yerləşdiyini, hansı uğurlar qazandığını gözəl bilirlər. Təbii ki, bütün bunlar aparılan düzgün işin nəticəsində mümkün olub.

-Bu fəaliyyət Azərbaycan həqiqətlərinin yaşadığınız vilayətin ictimaiyyətinə çatdırılmasına nə dərəcədə kömək olur?

-Heç şübhəsiz ki, müsbət təsir göstərir. Vilayətdə rəsmi səviyyələrdə təşkil edilən əksəriyyət tədbirlərdə iştirak edirəm. Çünki yaşadığım rayon merinin milli məsələlər üzrə köməkçisi vəzifəsində çalışıram. Həmin fürsətdən istifadə edərək əksəriyyət tədbirlərdə Azərbaycan həqiqətləri, Dağlıq Qarabağ problemi barədə iştirakçıları məlumatlandırıram. 1990-cı illərdə ermənilər bütün Rusiya Federasiyası ərazisində təbliğat aparırdılar ki, Dağlıq Qarabağ probleminin meydana çıxmasında Azərbaycan tərəfi günahkardır. Həmin illərdə ermənilərin yalanlarını ifşa etmək və əsl həqiqəti cəmiyyətə çatdırmaq üçün Azərbaycandan minlərlə qəzet aparıb vilayətin, eləcə də yaşadığım rayonun rəsmi dairələri, ictimaiyyət arasında yayırdım. Hazırda da cənab prezident İlham Əliyevin apardığı düzgün siyasət, Azərbaycanın sülh danışıqlarına sadiqliyi, Ermənistanın qeyri-konstruktiv mövqeyi səbəbindən Dağlıq Qarabağ probleminin həll edilmədiyini Arxangelsk vilayətinin rəsmi və qeyri-rəsmi dairələrinə çatdırırıq. Azərbaycanın 1 milyona yaxın sakininin qaçqın və məcburi köçkünə çevrildiyi, torpaqlarımızın 20 faizinin erməni işğalı altında qaldığı, hətta sadə insanların sərhəd rayonu kəndlərdə öz ölüsünü torpağa tapşıra bilmədiyini dəfələrlə bildirmişəm və yerli kütləvi informasiya vasitələrində bununla bağlı materiallar dərc edilib.

-Arxangelsk vilayətində erməni diasporunun gücü hansı səviyyədədir və ermənilər Azərbaycan diasporunun fəaliyyətinə hansısa maneçilik törədə bilərlərmi?

-Ümumiyyətlə biz imkan vermirik ki, erməni diasporu orada hansısa fəallıq nümayiş etdirsin və ya fəaliyyətimizə maneçilik törətsin.

-Yusif müəllim, ötən il Bakıda Dünya Azərbaycanlılarının üçüncü qurultayı keçirildi. Qurultayda çıxış edən prezident İlham Əliyev diaspora təşkilatlarının səfirliklər, eləcə də yaşadıqları ölkələrdə fəaliyyət göstərən azərbaycanlı iş adamları ilə yaxından əməkdaşlıq etməsini tövsiyyə etdi. Qurultaydan sonra Arxangelskdə qeyd edilən istiqamətlərdə hansısa addımlar atılıbmı?

-Bizim həm Diasporla İş üzrə Dövlət Komitəsi, həm də ÜmumRusiya Azərbaycanlıları Konqresinin rəhbərliyi ilə sıx münasibətlərimiz var. Ümumiyyətlə, bizim elə bir ciddi problemimiz yoxdur ki, həmin problemin həlli ilə bağlı hansısa qurumlara müraciət edək.

-Ümumiyyətlə, soydaşlarımızın ictimai-siyasi proseslərdə fəallığını necə qiymətləndirirsiniz və azərbaycanlılara münasibət hansı səviyyədədir?

-Azərbaycanlıların ictimai-siyasi proseslərdə fəallığını müsbət qiymətləndirmək olar. Bizim bu fəallığımız rəsmi dairələr tərəfindən də müsbət qarşılanır. Bir faktı qeyd etməklə bunu təsdiqləmiş olarıq. Keçən il noyabr ayının 25-də Moskvada Azərbaycan Rusiya Konqresinin qurultayı keçirildi. Həmin qurultaya Azərbaycan prezidenti İlham Əliyevlə yanaşı, Rusiya Federasiyasının dövlət başçısı Dmitri Medvedev də təbrik məktubu ünvanlamışdı. Bunun özü Rusiyanın rəsmi dairələrinin Azərbaycan diasporuna verdiyi qiymətin göstəricisidir. Onu da qeyd edim ki, həmin ərəfədə yaşadığım rayonun hazırkı və keçmiş meri Diasporla İş üzrə Dövlət Komitəsinə və konqresə məktub yazaraq bizim fəaliyyətimizi yüksək qiymətləndiriblər. Biz fəaliyyətimizlə Azərbaycan və Rusiya arasında dostluq körpüsü yaradırıq. Göründüyü kimi, bizim fəaliyyətimiz yerli dairələri qane edir və onlar tərəfindən yüksək qiymətləndirilir.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 21 fevral.- S.15.