Vaqif Mustafayevin pedaqoq kimi uğuru

Bir semestrdə dörd ilin tədris planını yerinə yetirən birinci kurs tələbələri

Dunya şöhrətli kinorejissor, çəkdiyi dəyərli filmləri ilə dünya rejissorlarını heyrətləndirən, hər bir filmində yeni rejissor elementləri kəşf edən Vaqif Mustafayev bir pedaqoq kimi yetirdiyi tələbələri geniş kütləyə təqdim etdi.

ADİMU-nun “SƏDA” Tədris teatrında V.Mustafayevin tələbələri hazırladıqları musiqili komediya ilə yaradıcılıq hesabatı verdilər. Cəmi bir semestr təhsil alan birinci kurs tələbələri aktyor oyunları ilə hamını heyrətə saldılar.Tək və kütləvi etüdlər, rəngarəng improvizasiyalar, sözün hərəkət vasitəsi ilə tamaşıçıya çatdırılması, plastika və xoreoqrafiya, musiqi, bütövlükdə aktyora aid olan bütün səhnə detalları professional aktyor oyununda cəmləşmişdi. Onu qeyd edək ki, sadaladıqlarımız bir semestrə sığmayan sənət uğurudur. Bir semestrdə dörd ilin tədris planını yerinə yetirən birinci kurs tələbələri həqiqətən tamaşaya gələnləri öz heyrətamiz oyunları ilə heyrətləndirdilər. Açığını deyək ki, tələbələr bəzi fəxri adları daşıyan aktyor və aktrisalardan da güclü oynadılar. Nəhayət ki, biz əsl düşündürücü musiqili komediyanın şahidi olduq. Bu tələbələrin ustadı kino-rejissor Vaqif Mustafayevin bir pedaqoq kimi uğuru və digər pedaqoqlara nümunə olacaq əməyinin nəticəsi idi.

Əməkdar incəsənət xadimi Əliqismət Lalayev – Bir semestrdə belə istedadlı tələbələr yetişdirmək hər bir pedaqoqa nəsib olmur. Bu uğur yox, bir sənət inqilabı idi. Deməli, teatr və kinomuz bu beş tələbənin simasında sübut etdi ki, gələcəyimiz etibarlı və istedadlı əllərdədir. Tələbələrinə belə can yandıran, onların hər bir uğurundan pərvazlanan ustad rejissor-pedaqoqa əhsən!

Əməkdar artist Ruhəngiz Musəvi – Belə istedadlı tələbələri görəndə ürəyim dağa dönür. Bu gün mən zövq aldım, ruhum təzələndi. Bir pedaqoqun yetişdirdiyi tələbələrin ilk sənət uğuru sənət inqilabı ilə nəticələndi, bu pedaqoq Vaqif müəllimin çəkdiyi əməyin parlaq nəticəsi idi.

Tələbələrin hər səhnəyə çıxışı, hərəkətləri, sözləri susmaq bilməyən alqışlarla müşaiyət olunurdu. İllərlə səhnəmizdəki gülüş boşluğunu professionallıqla dolduran gənclər bir daha sübut etdilər ki, əgər pedaqoq güclü olarsa, tədrisə məsuliyyətlə yanaşarsa, öz ziyalı borcunu şərəflə yerinə yetirərsə, hər bir uğura imza atmaq olar. Bu gün dünya şohrətli rejissor, milli kinomuzun cəfakeşi, ziyalı kanalımızın rəhbəri Vaqif Mustafayev bir pedaqoq kimi nümunə imzası ataraq nəyə qadir olduğunu bir daha əyani şəkildə təsdiqlədi. Bəli, Vaqif Mustafayevin tələbəsi olmaq, vətənpərvər azəri oğlundan dərs almaq özü tələbələrə Tanrının bəxş etdiyi ən böyük səadətdir. Həmin səadətli anlardan lazımınca bəhrələnin, əziz tələbələr.

Alim Nəbioğlu

Olaylar.- 2012.- 22 fevral.- S.13.