Lobbiçilik fəaliyyətinə keçməyin zamanı yetişib

Ayrı-ayrı ölkələrdə fəaliyyət göstərən diaspora təşkilatlarımız artıq bu istiqamətdə əməli addımlar atırlar

Azərbaycan diasporunun artan nüfuzu, dünyanın əksər ölkələrində nümayiş etdirdiyi real güc artıq lobbi fəaliyyətinə keçməyin zamanının yetişdiyini deməyə əsas verir. Artıq bu sahə ilə yaxından məşğul olan müvafiq dövlət qurumları, həmçinin dünyanın müxtəlif ölkələrində fəaliyyət göstərən Azərbaycan diaspor təşkilatlarının rəhbərləri də açıq şəkildə qeyd edirlər ki, Azərbaycan diasporu lobbi fəaliyyətinə keçməlidir. Bunun nəticəsidir ki, zaman-zaman Azərbaycan diasporunun lobbi fəaliyyətinə keçməsinin zamanının yetişdiyi bildirilir və bu istiqamətdə əməli addımların atılmasının zəruriliyi qeyd olunur. Prezident Administrasiyasının ictimai-siyasi məsələlər şöbəsinin dünyada yaşayan azərbaycanlılarla iş sektorunun müdiri Qafar Əliyev də Azərbaycan diasporunun lobbi fəaliyyətinə keçməsinin zamanının yetişdiyi qənaətindədir. Bununla yanaşı Prezident Administrasiyasının rəsmisi hesab edir ki, bu məsələdə tələskənliyə yol vermək doğru olmazdı:

“Düzdür Azərbaycan diasporunun lobbi fəaliyyətinə keçməsinin zamanı yetişib. Bu doğrudur. Ancaq bu elə bir prosesdir ki, biz bu gün tamamilə lobbiçilik fəaliyyəti ilə məşğul olduğumuzu deyə bilmərik. Lobbiçilik fəaliyyəti gündəlik tələbatda olan bir məsələ kimi Azərbaycan dövlətinin daxili və xarici siyasətində, diaspora qarşısında dayanan mühüm vəzifələr içərisində ümumi nəzərdə tutulmuş məsələlərdir”. Qafar Əliyev deyir ki, Azərbaycan diasporu ildən-ilə fəaliyyətini zənginləşdirir, inkişaf etdirir, strukturlarını təkmilləşdirir: “Daxili və xarici siyasət sahəsində əldə etdiyimiz uğurlar, ölkəmizin dünya miqyasında əldə etdiyi nailiyyətlər, Azərbaycanın haqq səsinin dünyada eşidilməyə başlanması, bizim mənafelərimizi müdafiə edən müxtəlif dövlətlərin siyahısının artması ona deməyə əsas verir ki, biz lobbiçilik fəaliyyətini gücləndirməliyik. Azərbaycan müstəqillik əldə etdiyi ilk gündən lobbiçilik fəaliyyətinə başlamağın zamanı gəlib və ötən illər ərzində bu istiqamətdə müfaviq işlər həyata keçirilib. Bu gün isə bizim malik olduğumuz imkanlar kifayət qədər yetərlidir ki, sözügedən istiqamətdə daha da keyfiyyətli, mükəmməl və təcrübəli şəkildə işlər aparaq”. Qafar Əliyev Azərbaycan diasporunun erməni diasporu ilə müqayisədə son illər xeyli inkişaf etdiyini də vurğulayıb: “Güc mənasında müqayisə etsək konkret demək olmaz ki, dünyanın bir sıra ölkələrində Azərbaycan və ya erməni diasporu güclüdür. Bu məsələ əsasən ayrı-ayrı dövlətlərin mövqeyindən asılıdır. Etiraf etmək lazımdır ki, Fransada erməni diasporu güclüdür. Ermənilərin bu ölkədə kompakt yaşaması, lobbiçilik fəaliyyəti ilə məşğul olması, bir sıra məsələlərdə rəsmi qurumlara təsir göstərə bilməsi onu deməyə əsas verir ki, Fransada erməni diasporu Azərbaycan diasporundan güclüdür. Lakin digər dövlətlərlə müqayisədə bu fikri söyləmək olmaz. Rusiya Federasiyasında fəaliyyət göstərən ÜmumRusiya Azərbaycanlıları Konqresi, Rusiyanın Azərbaycanlı Gənclər Təşkilatı və digər cəmiyyətlərin gücü erməni diasporundan heç də zəif deyil. Eyni şeyi Orta Asiya respublikaları, Ukrayna və digər ölkələr üçün də söyləmək olar. Həmçinin bir sıra Avropa ölkələrində Azərbaycan diasporu erməni diasporunu tam üstələyir. Birləşmiş Ştatlarda da erməni diasporunun gücü müəyyən mənada artıqdır. Ancaq hansısa ölkədə erməni diasporunun güclü olması onu deməyə əsas vermir ki, həmin ölkədə Azərbaycan diasporunun fəaliyyəti məhdudlaşır. Həmin dövlətlərin əksəriyyəti demokratik ölkədir və orada öz fikrini açıq şəkildə söyləmək üçün lazımı imkan və şərait var”. Prezident Administrasiyasının rəsmisi qeyd edib ki, erməni diasporunun güclü olduğu Fransanın Strasburq şəhərinin Klever meydanında hər il fevral ayının 25-26-da Azərbaycanlıların və digər Türkdilli Xalqların Əməkdaşlıq Mərkəzi və “Strasburq Azərbaycan Evi”nin təşkilatçılığı ilə Xocalı soyqırımının ildönümü ilə bağlı mitinqlər təşkil edilir: “Bu il də Xocalı soyqırımının 20-ci ildönümü ilə əlaqədar Strasburqda anoloji tədbir təşkil olunacaq. Onu da qeyd edim ki, həmin mitinqlər çox möhtəşəm təşkil edilir və keçirdiyimiz aksiyada mindən artıq adam iştirak edir. Həm yerli, həm də burada yaşayan qeyri millətlərin nümayəndələri bizim keçirdiyimiz mitinqlərdə iştirak edir, ölkəmizin həqiqətləri, Dağlıq Qarabağ problemi, ermənilərin Xocalıda törətdikləri vəhşiliklər barədə məlumatlandırılırlar. Eyni zamanda yerli kütləvi informasiya vasitələri də bu barədə məlumatlar dərc edirlər. Bütün bunları nəzərə alaraq belə demək mümkündür ki, hansısa dövlətdə erməni diasporunun güclü olması bizi çəkindirməməli, qorxutmamalıdır. Əksinə həmin ölkələrdə daha güclü diaspora işi aparmaq üçün fəallıq nümayiş etdirməliyik. Həmin ölkələrdə fəaliyyətimizi artırmaq zərurətə çevrilir”.

Benilüks Azərbaycanlıları Konqresi də Azərbaycan diasporunun lobbiçilik fəaliyyətinə keçməsinin zamanının yetişdiyi qənaətindədir. Hətta sözügedən konqres ötən müddət ərzində artıq bu istiqamətdə əməli addımlar da atıb. Benilüks Azərbaycanlıları Konqresinin sədri Sahil Qasımov bildirib ki, keçən ilin yayında Bakıda keçirilən Dünya Azərbaycanlılarının üçüncü qurultayından sonra Beniluks Azərbaycanlıları Konqresi lobbiçilik fəaliyyətinə keçmək istiqamətində bir sıra tədbirlər həyata keçirib. Sahil Qasımovun sözlərinə görə, qurultayda Azərbaycan Respublikasının prezidenti cənab İlham Əliyevin proqram xarakterli çıxışı, eləcə də diaspor təşkilatlarına ünvanladığı tapşırıq və tövsiyyələrə, həmçinin Dünya Azərbaycanlılarının üçüncü qurultayının qəbul etdiyi qərarların icrasına uyğun olaraq Benilüks Azərbaycanlıları Konqresi lobbiçilik fəaliyyəti istiqamətində uğurlu addımlar atır: “ Cənab prezident İlham Əliyevin də qeyd etdiyi kimi artıq təşkilatlanmadan birbaşa lobbiçilik fəaliyyətinə keçmək istiqamətində addımlar atılmalıdır. Biz də Benilüks Azərbaycanlıları Konqresi olaraq cənab prezidentin bu fikrini əlimizdə əsas tutaraq lobbiçilik fəaliyyəti istiqamətində çalışmalarımızı intensivləşdiririk. Məlumat üçün qeyd edim ki, Benilüks Azərbaycanlıları Konqresi olaraq Avropa Birliyində artıq lobbist təşkilatı kimi akkreditə olunmuşuq. Eyni zamanda ötən müddət ərzində Azərbaycan icmasını Niderlandda da etnik qrup kimi tanıda bilmişik. Qarşıdakı məqsəd isə ondan ibarətdir ki, digər Benilüks ölkələrində də bunu həyata keçirək və sözügedən istiqamətdə də səy göstəririk”. Konqres sədri hesab edir ki, prezidenti İlham Əliyevin Dünya Azərbaycanlılarının III qurultayındakı nitqindən irəli gələn vəzifələr xaricdəki Azərbaycan icmaları üçün əsas fəaliyyət proqramı olmalıdır.

Beynəlxalq Diaspora Mərkəzinin sədri İsmayıl Ağayev də hesab edir ki, Azərbaycan diasporu artıq lobbi fəaliyyətinə keçməlidir. Bu istiqamətdə artıq müəyyən addımların atıldığını da qeyd edən İsmayıl Ağayev rəhbərlik etdiyi mərkəzin lobbiçilik fəaliyyəti ilə bağlı ötən müddət ərzində müvafiq addımlar atdığını diqqətə çatdırıb. Bildirib ki, Beynəlxalq Diaspora Mərkəzinin Avropa nümayəndəliklərinin fəaliyəti nəticəsində Çexiya, Avstriya kimi nüfuzlu Avropa dövlətlərinin ali təhsil müəssisələri ilə yaradılan əlaqələr, eləcə də həmin ali təhsil müəssisələrinin professor və müəllim heyətinin Azərbaycana səfərinin təşkil edilməsi, onlara ölkəmizin həqiqətləri, Dağlıq Qarabağ problemi, Ermənistanın xalqımıza qarşı zaman-zaman həyata keçirdiyi deportasiya və soyqırım siyasətinin avropalı elm adamlarına çatdırılması lobbiçilik fəaliyyəti istiqamətində atılan ilkin addımlardan sayıla bilər. Beynəlxalq Diaspora Mərkəzinin sədri Azərbaycan diasporunun Türk diasporu ilə birlikdə lobbi fəaliyyəti göstəməsini zəruri sayıb. Onun sözlərinə görə, son aylarda iki qardaş ölkə ətrafında baş verən proseslər bu zərurəti bir daha ortaya qoymuş oldu: “Fransa Senatında qondarma erməni soyqırımını inkar edənlərə qarşı cinayət məsuliyyətini nəzərdə tutan qanunun qəbulundan sonra yaranmış vəziyyət, eləcə də Azərbaycan diasporunun fəaliyyət göstərdiyi ölkələrdə Türkiyə diasporu ilə birlikdə rəsmi Parisin bu addımına qarşı kəskin etiraz bildirməsi bunu deməyə əsas verir. Artıq həm Azərbaycan, həm də Türk diasporu bir həqiqəti dərindən dərk edir ki, istər Azərbaycan, istərsə də Türkiyənin qarşısına çıxan əngəlləri dəf etməyin yeganə yolu hər iki ölkə diasporunun birgə fəaliyyət göstərməsindən keçir. Hesab edirəm ki, Azərbaycan və Türk diasporlarının birgə fəaliyyəti güclü lobbiçilik işinin təşkilinə gətirib çıxara bilər”. Beynəlxalq Diaspora Mərkəzinin sədri bu prosesdə digər türkdilli ölkələrin diasporlarının da fəallıq nümayiş etdirməsini vacib hesab edib: “Təssüflər olsun ki, hələlik digər türkdilli ölkələrin diasporları bu məsələdə istədiyimiz səviyyədə aktivlik göstərmirlər. Ona görə də Azərbaycan diasporu olaraq Türk diasporu ilə yanaşı digər türkdilli ölkələrin diaspora təşkilatları ilə də yaxından işləməli, ümumi bir amal, məqsəd ətrafında birləşib lobbiçilik fəaliyyəti ilə məşğul olmalıdırlar”

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 24 fevral.- S.15.