Azərbaycanlıların Gürcüstanda özlərini sərbəst hiss etməsi soydaşlarımızın mənəvi haqqıdır

İsmayıl Ağayev: “Çox təəssüflər olsun ki, bu sahədə böyük sıxıntılarımız var”

“Gürcüstandakı Azərbaycan icmaları, birliklər Quram Marxulinin müdafiəsi məsələsində mütəşəkkillik nümayiş etdirməlidirlər”

Gürcüstanda öz ata-baba torpaqlarında məskunlaşmış azərbaycanlılar zaman-zaman bu ölkənin müvafiq qurumları tərəfindən təzyiqlərlə üzləşir, bir çox hallarda soydaşlarımızın haqq və hüquqları kobud şəkildə pozulur. İstər torpaq bölgüsü zamanı Gürcüstandakı azərbaycanlıların bu prosesdən kənarda qalması, istər tarixi yer adlarının sürətlə gürcüləşdirilməsi bütün bunların əyani sübutudur.

Gürcüstanda yaşayan azərbaycanlılara göstərilən təzyiqlər azmış kimi bu ölkədə Azərbaycanın haqq işini müdafiə edən, ölkəmizin apardığı haqlı mübarizədə ona dəstək verən ayrı-ayrı gürcü alim və professorlara qarşı da zaman-zaman təzyiqlər göstərilir. Bir müddət əvvəl Suxumi Universitetinin professoru Quram Marxulinin Azərbaycanın haqlı mövqeyini müdafiə etdiyinə görə işdən azad edilməsi buna misal göstərilə bilər. Beynəlxalq Diaspora Mərkəzinin sədri İsmayıl Ağayev deyir ki, Gürcüstanda Azərbaycanın haqq işini müdafiə edən insanlara qarşı təzyiqlərin arxasında bu ölkə rəhbərliyində təmsil olunan erməni məmurlar dayanır. İsmayıl Ağayev Gürcüstan hakimiyyətinə qonşuluq münasibətlərinə sadiq qalaraq Azərbaycana qarşı səmimi münasibət bəsləməsini, ermənipərəst qüvvələrin təsiri altına düşməməsini tövsiyyə edib.

-İsmayıl müəllim, son vaxtlar Azərbaycanla Gürcüstan arasında münasibətlərə zərbə vurmağa çalışan qüvvələr xeyli fəallaşıb. Maraqlısı odur ki, həmin qüvvələr hətta Gürcüstanın rəsmi dairələrinə belə təsir etmək gücündədirlər. Siz bu kimi hadisələri necə dəyərləndirirsiniz?

-Qeyd etdiyiniz məsələlər bir həqiqətdir. Son vaxtlar Azərbaycan və Gürcüstan arasında münasibətlərə zərbə vurmaq istəyən qüvvələr xeyli fəallaşıb. Təəssüf doğuran hal ondan ibarətdir ki, həmin qüvvələr hətta Gürcüstanın rəsmi qurumlarında belə özlərinə mövqe tuta biliblər və Gürcüstanın dövlət strukturlarına müəyyən mənada təsir göstərə bilirlər. Keçən ayın sonlarında Gürcüstanın Suxumi Universitetinin professoru Quram Marxuli ilə bağlı baş vermiş hadisə bunu bir daha sübuta yetirir. Məlum olduğu kimi Suxumi Universitetinin professoru Quram Marxuli Beynəlxalq Qafqazşünaslıq Tədqiqat Mərkəzinin prezidenti kimi fevral ayında “Qafqazda separatçılıq və konfiliktlər” mövzusunda konfrans təşkil edib. Konfransda Quram Marxuli ermənilərin rusların əli ilə Azərbaycan torpaqlarını işğal etməsi, Xocalıda ermənilər tərəfindən soyqırım aktının həyata keçirilməsi, Azərbaycan ərazilərinin erməni işğalı altında saxlanması ilə bağlı fikirlər səsləndirib. Professor ədalətli mövqe ortaya qoyaraq birmənalı şəkildə Azərbaycanın haqq işini dəstəklədiyini vurğulayıb. Quram Marxulinin belə bir konfrans təşkil etməsi və həmin konfransda Azərbaycanın maraqlarına cavab verən fikirlər səsləndirməsi Gürcüstandakı bəzi ermənipərəst qüvvələri ciddi narahat edib. Xüsusilə, Gürcüstan prezidenti Mixail Saakaşvilinin müşaviri, erməni Van Bayburt Quram Marxulinin belə bir mövqeyindən hiddətlənərək Suxumi Universitetinin professoru Quram Marxulinin işdən azad edilməsinə nail olub. Quram Marxulinin işdən azad edilməsində həmin universitetin erməni prorektoru da xüsusi fəallıq nümayiş etdirib. Gürcüstan prezidentinin müşaviri Van Bayburtun göstərişi ilə işdən azad olunan Quram Marxuli eyni zamanda ev dustağı edilib.

-Beynəlxalq Diaspora Mərkəzi olaraq Quram Marxuli ilə əlaqə saxlaya bilmisinizmi?

-Biz bu barədə məlumat əldə etdikdən dərhal sonra Quram Marxuli ilə əlaqə saxlamağa cəhd göstərdik. Ancaq bir neçə gün idi ki, onun telefonu bağlıydı. Nəhayət ki, Beynəlxalq Diaspora Mərkəzi olaraq Quram Marxuli ilə əlaqə saxlamağa nail olduq. O, öz ərizəsi ilə işdən çıxdığını bildirsə də, əslində Quram Marxuli erməni Van Bayburtun təzyiqi ilə işdən azad olunub. Açığı Quram Marxuli Gürcüstandakı erməni diasporundan çox qorxur. Professor bundan ciddi narahatçılıq keçirir.

-Bu məsələ ilə bağlı hansı addımların atılması məqsədəuyğundur?

-Artıq məsələ ilə bağlı Azərbaycan Milli Elmlər Akademiyasının Tarix İnstitutu tərəfindən Gürcüstan prezidenti Mixail Saakaşviliyə müraciət edilib. Həmin müraciəti başda Tarix İnstitutunun direktoru, millət vəkili Yaqub Mahmudov olmaqla 40-a yaxın alim və professor imzalayıb. Həmin müraciətdə Quram Marxulinin Van Bayburtun təzyiqi altında işdən azad edilməsi pislənilir və bunun qəbuledilməz olduğu vurğulanır. Quram Marxulinin Xocalı soyqırımının ildönümü ərəfəsində işdən azad edilməsi Azərbaycan tarixçilərinin haqlı narazılığına səbəb olub. Biz də Beynəlxalq Diaspora Mərkəzi olaraq başda Yaqub Mahmudov olmaqla Azərbaycan tarixçilərinin müraciətini dəstəkləyir, Gürcüstanda yaşayan soydaşlarımız, bu ölkədə fəaliyyət göstərən Azərbaycan cəmiyyətləri və birliklərini, eləcə də Gürcüstandakı Azərbaycan səfirliyini bu məsələyə müdaxilə etməyə çağırırıq. Qeyd etdiyim bütün qurumlar, ən əsası isə Gürcüstandakı Azərbaycan icmaları Quram Marxulinin müdafiəsinə qalxmalıdırlar. Həmçinin Gürcüstan-Azərbaycan Parlamentlərarası Dostluq Qrupunun Azərbaycandan olan millət vəkilləri bu məsələdə fəallıq nümayiş etdirməli, Quram Marxulinin müdafiəsi istiqamətində zəruri addımlar atmalıdırlar. Çünki Quram Marxuli məhz Azərbaycanın haqq işini müdafiə etdiyi, ölkəmizin haqq səsini qaldırdığı üçün işdən azad olunub. Biz də diaspora təmsilçiləri, millət vəkilləri, səfirlik olaraq dəyərli gürcü ziyalısını müdafiə etməliyik. Bu bizim bir lobbiçilik işimizdir. Çünki Quram Marxuli Gürcüstanda Azərbaycanın sözünü deyən, ölkəmizin haqq işini müdafiə edən dəyərli bir insandır. Xüsusilə, Gürcüstandakı Azərbaycan icmaları, birliklər, diaspor nümayəndələri Quram Marxulinin müdafiəsi məsələsində mütəşəkkillik nümayiş etdirməlidirlər. Gürcüstandakı diaspor nümayəndələrimiz bu ölkənin prezidenti Mixail Saakaşvili, parlament sədri, o cümlədən təhsil nazirinə müraciət göndərməlidirlər ki, Quram Marxuli öz işinə bərpa olunsun. Hesab edirəm ki, bu məsələ ictimailəşməlidir. Əgər biz bu gün diaspora təmsilçiləri, millət vəkilləri və səfirlik olaraq Quram Marxulinin müdafiəsinə qalxmasaq bu bizim ümumi işimizin ziyanına olacaq və Quram Marxuli kimi ayrı-ayrı ölkələrdə Azərbaycanın haqq işi uğrunda fəaliyyət göstərən insanlar bizi müdafiə etməyəcək, haqq səsimizə qoşulmayacaqlar. Bu bir ciddi savaşdır və bu savaşda hamı öz sözünü deməlidir.

-Beynəlxalq Diaspora Mərkəzi sözügedən məsələ ilə əlaqədar Gürcüstan prezidenti Mixail Saakaşviliyə müraciət etməyi düşünürmü?

-Biz Beynəlxalq Diaspora Mərkəzi olaraq Gürcüstan prezidenti Mixail Saakaşviliyə ayrıca bir müraciət ünvanlayacağıq. Həmin müraciətdə Azərbaycanın həmişə Gürcüstanın yanında olduğu, bu ölkəyə dəstək verdiyi xüsusi qeyd olunacaq. Həmçinin Gürcüstan dövlətinin də Azərbaycana qarşı səmimi olması istəniləcək. Biz istəyirik ki, Gürcüstan prezidenti də Azərbaycana qarşı səmimi olsun. Biz gürcüləri nə qədər xoşlayır, onları seviriksə, onların da borcudur ki, həm Azərbaycan dövləti, həm də Gürcüstanda yaşayan azərbaycanlılara hörmətlə yanaşsınlar. Gürcüstanın çətin anlarında ümummilli lider Heydər Əliyevin bu ölkəyə göstərdiyi yardım, Azərbaycan dövlətinin bu ölkəyə olan isti münasibətinin qarşılığında təəssüf ki, biz Gürcüstandan kifayət qədər müsbət enerji ala bilmirik. Gürcüstanda erməni əsilli çoxlu sayda vəzifə sahibləri var ki, onlar da zaman-zaman bu ölkədə Azərbaycan əleyhinə iş aparırlar. Suxumi Universitetinin professoru Quram Marxulinin ermənilərin təsiri ilə işdən azad edilməsi də bunun bariz nümunəsidir.

-Ancaq reallıq ondan ibarətdir ki, Gürcüstanda yaşayan soydaşlarımız bu ölkədə sıxışdırılır, onların haqq və hüquqları qorunmur. Sizcə, bu problemə qarşı hansı zəruri addımlar atılmalıdır?

-Gürcüstandakı azərbaycanlılar orada diaspora şəklində yaşamırlar. Soydaşlarımızın Gürcüstanda yaşadığı həmin ərazilər azərbaycanlıların dədə-baba torpaqlarıdır. Həmin torpaqlarda zamanında azərbaycanlılar yaşayıb Ona görə də azərbaycanlılar öz ata-baba torpaqlarında çətin bir vəziyyətdə, başı aşağı, gözü qıpıq halda yaşamamalıdırlar. Azərbaycanlıların Gürcüstanda özlərini sərbəst hiss etməsi soydaşlarımızın mənəvi haqqıdır. Çox təssüflər olsun ki, bu sahədə böyük sıxıntılarımız var. Gürcüstanda torpaqların bölüşdürülməsi, əkin sahələrinin azərbaycanlılara verilməsində çox ciddi problemlər mövcuddur. Bu məsələ ilə bağlı da Beynəlxalq Diaspora Mərkəzi olaraq Gürcüstan prezidenti Mixail Saakaşviliyə müraciət etməyi nəzərdə tuturuq.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 15 mart.- S.15.