Dəyişib inkişaf edən Salyan

Rayonda Dövlət Proqramları uğurla icra olunur

Son illər ərzində ölkədə həyata keçirilən uğurlu islahatlar, iqtisadi sahədə əldə edilən nailiyyətlər, qəbul edilən Dövlət Proqramlarının icrası istiqamətində görülən işlər paytaxtla yanaşı regionların da simasını müsbət mənada dəyişir, əyalətlərdə yaşayan əhalinin sosial rifah halının yaxşılaşmasına öz təsirini göstərir. Bu gün respublikanın əksər regionları kimi Salyan rayonu da öz inkişaf dövrünü yaşayır.

Tikinti meydanına çevrilən Salyan

Dövlət başçısının müvafiq fərmanı ilə təsdiq edilmiş “Azərbaycan Respublikası Regionlarının 2009-2013-cü illərdə sosial-iqtisadi inkişafı Dövlət Proqramı”nın icrası istiqamətində ötən müddət ərzində Salyan rayonunda kifayət qədər işlər görülüb. Salyanda olduğum bir neçə saat ərzində yerli rəsmi qurumlardan heç bir bələdçim olmadan apardığım müşahidələr və gəldiyim qənaət belə deməyə əsas verir. Sonuncu dəfə 2010-cu ilin parlament seçkiləri zamanı müşahidəçi qismində olduğum Salyanın iki il əvvəlki vəziyyətindən əsər-əlamət belə qalmadığının apardığım müşahidələr zamanı əyani şahidi oldum. Əgər iki il əvvəl Salyan inkişaf, quruculuq-abadlıq işləri, yeni-yeni infrastruktur layihələrinin həyata keçirilməsi baxımından digər rayonlardan geri qalırdısa, indi əksinə olaraq Salyan qeyd edilən istiqamətlərdə digər rayonları geridə qoyub. İstər rayonda həyata keçirilən quruculuq-abadlıq işləri, istər əhalinin kommunal problemlərinin həllinə yönəlik tədbirlər, istərsə də yeni fabrik və zavodların fəaliyyətə başlaması ilə rayonda yeni iş yerlərinin açılması yerli əhalinin sosial rifah halının yaxşılaşmasına əsaslı dərəcədə təsir göstərib. Xüsusilə, prezident İlham Əliyevin sərəncamı ilə Tahir Kərimovun Salyan rayon İcra Hakimiyyətinin başçısı təyin edilməsindən sonra qeyd edilən istiqamətlərdə işlər bir qədər də sürətlənib. İcra hakimiyyəti kimi fəaliyyətə başladığı gündən rayonun sürətli inkişafı, infrastrukturun yenilənməsi, əhalinin sosial rifah halının yüksəldilməsi istiqamətində gərgin əmək sərf edən Tahir Kərimov görülən işlərlə kifayətlənməyərək dövlət başçısı və salyanlıların ona olan etimadını daha yüksək səviyyədə doğrultmağa çalışır. Hazırda Salyan digər infrastruktur, quruculuq-abadlıq işlərinin həyata keçirildiyi rayonlar kimi tikinti meydanını xatırladır. Xüsusilə, 2011-ci ildə rayonda tikinti-quruculuq və abadlıq işləri geniş vüsət alıb. Şəhərin giriş hissəsindən başlayaraq Ələt-Astara yolunun şəhər ərazisindən keçən hissəsində, Dövlət Bayrağı meydanında, Y.Qasımov, X.R.Ulutürk, T.Xəlilbəyli, Heydər Əliyev və Nizami küçələrində geniş miqyaslı quruculuq-abadlıq işləri aparılıb. Eni 8 metr, hündürlüyü 11 metr olan “Salyan şəhəri” göstəricisi milli memarlıq üslubunda tikilib, ətrafı abadlaşdırılıb, yaşıllıqlar salınıb. Şəhərə giriş istiqamətində 2034 metr uzunluqda istinad divarı tikilıb və 3254 kvadrat metr “Gülbaxt” ağ lay daşı ilə üzlənıb. Şəhərin bütün bina və küçələrində işıqlandırma sistemi əsaslı surətdə yenidən qurulub. Bu günə qədər şəhər ərazisində 630 müasir işıqlanma dirəyi quraşdırılıb, şəhərin kommunal binaları, ticarət şəbəkələri və digər sosial obyektlərin fasadlarının gecə işıqlandırılması təmin edilib. Şəhərin gecə həyatına xüsusi gözəllik verən işıqlandırma sistemi Salyana qonaq gələn xarici ölkə vətəndaşları tərəfindən də heyrətlə qarşılanır.

Tarixi abidələr diqqət mərkəzində

Salyanda yeni inzibati və yaşayış binalarının da tikintisi uğurla davam etdirilir. Belə ki, ötən il Qarabağ müharibəsi əlilləri və şəhid ailələri üçün 16 mənzilli yaşayış binası, 8 saylı Ərazi Dövlət Nəzarəti idarəsinin inzibati binası, Abadkənd və Parça Xələc kəndlərində yeni poçt şöbəsi, şəhər əhalisinə mədəni xidmət etmək məqsədilə Heydər Əliyev Fondunun təşəbbüsü ilə 4 ədəd “Xeyir-Şər” obyekti tikilib istifadəyə verilib. Həmçinin yararsız vəziyyətə düşmüş XIX əsrin tarixi abidəsi olan Cümə məscidində təmir-bərpa işləri, Heydər Əliyev Fondunun dəstəyi ilə Uşaqların Texniki Yaradıcılıq Mərkəzi və Uşaq Kitabxanası üçün yeni binanın tikintisi başa çatıb. Şəhərin Ə.Qasımzadə küçəsində yerləşən “Kür” mehmanxanasında, Y.Qasımov küçəsində yerləşən “Muğan” şadlıq evində və Salyan Olimpiya İdman Kompleksinin stadionunda yenidənqurma işləri aparılaraq müasir tələblərə cavab verən vəziyyətə gətirilib. Prezident İlham Əliyevin “Astara, Masallı və Salyan rayonlarının sosial-iqtisadi inkişafının sürətləndirilməsi ilə bağlı tədbirlər haqqında” sərəncamına əsasən dövlət büdcəsində nəzərdə tutulmuş prezidentin ehtiyat fondundan Salyan rayon İcra hakimiyyətinə 2 milyon manat, həmçinin Nazirlər Kabinetinin sərəncamı ilə Salyan rayon İcra Hakimiyyətinin inzibati binasının tikintisi üçün 2 milyon manat vəsait ayrılıb və binanın tikintisinə başlanıb. Azərbaycan Müəllimlər İnstitutunun Salyan filialının inzibati binası və yataqxana binasının əsaslı təmiri üçün 500 min manat, şəhər ərazisində evlərin dam örtüyünün dəyişdirilməsi üçün isə 500 min manat vəsait ayrılıb və həmin işlər başa çatdırılıb. Ümumilikdə ayrılmış vəsait hesabına 17 kommunal hündür mərtəbəli binaların dam örtükləri dəyişdirilib.

Kür daşqınlarının qurbanlarının problemləri həllini tapır

Ötən ilin yay aylarında Kür çayında baş verən daşqın zamanı Kürətrafı rayonlardan olan digər rayonlar kimi Salyan rayonunda da müəyyən problemlər yaranmış və daşqınlar yerli əhalinin mənzillərinə, eləcə də təsərrüfatına ciddi ziyan vurmuşdu. Bunu nəzərə alan Rayon İcra Hakimiyyəti müvafiq dövlət qurumlarının dəstəyi ilə ötən müddət ərzində Kür daşqınlarından zərər görmüş sakinlərə köməklik göstərib, onlar üçün yeni mənzillər inşa edib. Belə ki, Fövqaladə Hallar Nazirliyinin xətti ilə Kür çayının daşqını zamanı ziyan çəkmiş ailələr üçün şəhər ərazisində 42, Qaraçala qəsəbəsində, Çuxanlı, Kərimbəyli və Qarabağlı kəndlərində isə 15 evin tikintisi başa çatdırılıb.

Əhalinin işlə təmin olunması istiqamətində də Salyanda müvafiq tədbirlər həyata keçirilir. Ümumilikdə, bu istiqamətdə həyata keçirilən tədbirlərin nəticəsində son səkkiz ildə Salyanda 16844 iş yeri açılıb. O cümlədən 2011-ci ildə 3050 iş yerləri yaradılıb ki, bunun da 523–ü daimi, qalanları isə mövsümü iş yerləridir. Rayonda yeni iş yerlərinin yaradılması, eləcə də işaxtaran və işsiz vətəndaşların, xüsusilə gənclərin, sosial müdafiəyə daha çox ehtiyacı olan insanların məşğulluğunun gücləndirilməsi işi rayon İcra hakimiyyəti tərəfindən daim nəzarətdə saxlanılır. Bunun nəticəsi olaraq rayonda hər il yeni emal müəssisələri, xidmət sahələri yaradılır və fəaliyyət göstərir. Rayonda fəaliyyət göstərən idarə, müəssisə, təşkilat və özəl strukturların rəhbərləri ilə müntəzəm olaraq əlaqə saxlanılır, boş iş yerləri barədə məlumatlar toplanır, vətəndaşlara təklif olunur.

Sahibkarlar üçün münbit şəraitin yaradıldığı rayon

Ölkə başçısının sahibkarlara yerlərdə lazımı şəraitin yaradılması, iş adamlarına qarşı olan qanunsuz müdaxilələrin aradan qaldırılması ilə bağlı tapşırıq və tövsiyyələrinə müvafiq olaraq Salyanda yerli sahibkarlar üçün normal iş mühiti yaradılıb. Məhz bunun nəticəsidir ki, Salyanda iş adamları və sahibkarların vəsaiti hesabına yeni-yeni emal müəssələri yaradılır, iş yerləri açılır. Hazırda da İqtisadi İnkişaf Nazirliyi Sahibkarlığa Kömək Milli Fondunun kreditləri və sahibkarların vəsaiti hesabına yeni istehsal və emal sənayesi sahələrinin yaradılması istiqamətində işlər aparılır. Ötən müddət ərzində isə rayonun Qaraçala qəsəbəsi ərazisində fəaliyyət göstərən «Hacı-Camalxan» kəndli fermer təsərrüfatı tərəfindən 10 min tonluq taxıl anbarının tikintisi başa çatdırılıb. «Ələddin Fermer» MMC tərəfindən meyvə, tərəvəz məhsullarının saxlanması üçün 6000 ton tutumu olan soyuducu anbar kompleksi və illik istehsal gücü 580 ton olan meyvə qurutma müəssisəsinin, “NNEM Kəndli-Fermer təsərrüfatı” tərəfindən Kürsəngi kəndi ərazisində istehsal gücü 100 min dekalitr olan şərab zavodunun tikintisi davam etdirilir. Salyan şəhəri ərazisində 2 sahibkar tərəfindən 2 iri ticarət mərkəzinin tikintisi aparılır. Ümumilikdə rayonda sahibkarlara və iş adamlarına son illər ərzində 5 milyon 992 min manat kredit verilib. Əgər 2010-cu ildə Salyanda ümumi məhsul buraxılışında qeyri-dövlət sektorunun xüsusi çəkisi 94,8 faiz təşkil edirdisə, 2011-ci ildə bu göstərici 95,8 faizə çatıb.

Rayon İcra Hakimiyyəti Salyandakı ictimai–siyasi vəziyyəti daim diqqət mərkəzində saxlayır. Rayonda fəaliyyət göstərən siyasi partiyalar, Qeyri-Hökumət Təşkilatlarının və dini qurumların öz işlərini Azərbaycan qanunlarına müvafiq surətdə qurmalarına İcra hakimiyyəti tərəfindən ciddi nəzarət edilir və əməli köməkliklər göstərilir. Rayonda 19 siyasi partiya, 28 QHT fəaliyyət göstərir. Salyan rayon icra hakimiyyəti yerli sakinlərlə mütəmadi olaraq açıq görüşlər keçirməklə də digər rayonlardan fərqlənir. Maraqlı məqam ondan ibarətdir ki, həmin görüşlərdə birbaşa rayon icra hakimiyyətinin başçısı Tahir Kərimov iştirak edərək yerli sakinlərlə yaxından təmasda olur, onların problemləri ilə maraqlanır və sakinlərin təklif, istəklərini dinləyir. Belə görüşlərdən biri də ötən həftə reallaşıb. Rayon sakinləri ilə Salyanın mərkəzi meydanlarından birində açıq hava şəraitində bir araya gələn icra başçısı Tahir Kərimov salyanlıların problemləri ilə maraqlanıb, onların təklif və istəklərini dinləyib. Qısa müddətdə həlli vacib olan problemlərin həlli ilə bağlı həmin anda müvafiq tapşırıq və tövsiyyə verən Salyan rayon İcra Hakimiyyətinin başçısı görüşdə qaldırılan digər problemlərin həlli istiqamətində də tezliklə lazımi tədbirlərin həyata keçiriləcəyi və zəruri addımların atılacağına söz verib.

Süleyman İsmayılbəyli

Bakı-Salyan-Bakı

Olaylar.- 2012.- 15 mart.- S.13.