Azərbaycan diasporu güclənir

Sinan Oğan: “Azərbaycan və Türkiyə, eləcə də iki ölkənin diaspora təşkilatları arasında əlaqələr yaxşı səviyyədədir”

“Biz münasibətlərimizi daha yüksək səviyyəyə qaldıra bilərik”

Türkiyə Strateji Araşdırmalar Mərkəzinin başqanı, Türkiyə Azərbaycan Dərnəklərinin rəhbəri, bu ölkənin Böyük Millət Məclisinin Milliyətçi Hərəkat Partiyasından olan üzvü Sinan Oğanın “OLAYLAR”-a müsahibəsi

-Sinan bəy, bu gün Azərbaycan diasporunun vəziyyətini necə qiymətləndirirsiniz?

-Azərbaycan diasporu güclənir. Artıq Azərbaycan diasporu koordinasiya edilmiş şəkildə fəaliyyət göstərir. Bu gün Azərbaycan diasporu ölkə hüdudlarından kənardakı dərnək və birliklərin ayrıca fəaliyyəti ilə deyil, dövlətlə xaricdəki diasporanın bərabər fəaliyyəti ilə hərəkət edir. Bu günlərdə Bakıda keçirilən Dünya Azərbaycanlı Gənclər Birliyinin təsis qurultayı Azərbaycan diaspora həyatında çox önəmli bir addım idi. Bu addım bizi daha da irəliyə aparacaq. Mərhum prezident Heydər Əliyevin çox önəmli bir sözü vardı. Heydər Əliyevin məşhur “Bir millət, iki dövlət” fikrinin davamı olaraq hazırkı dövlət başçısı, cənab İlham Əliyev isə “Bir millətin iki diasporası olmaz” deyib.

-Yeri gəlmişkən Dünya Azərbaycanlı Gənclər Birliyinin təsis qurultayını necə qiymətləndirirsiniz?

-Dünya Azərbaycanlı Gənclər Birliyinin təsis qurultayında Azərbaycan diasporu bir araya gəlmişdi. Bir müddət sonra Dünya Azərbaycanlı Gənclər Birliyinin toplantısını Dünya Türk Gəncləri diasporasını bir araya gətirə bilsək daha uğurlu olar. Dünya Azərbaycanlı Gənclər Birliyinin qurultayı birinci mərhələdir. Növbəti addımlarımız isə ikinci və üçüncü mərhələ ola bilər. Bu zaman isə əsl güc ortaya çıxacaq. Mən inanıram ki, Dünya Azərbaycanlı Gənclər Birliyinin təsis qurultayından sonra ikinci və üçüncü mərhələlərdə dünya türk gəncliyi bir araya gələcək. Dünya türk gəncliyi bir araya gəldikdə isə bizim qarşıya qoyduğumuz məqsəd və vəzifələr daha güclü şəkildə həyata keçəcək.

-Türkiyə Azərbaycan Dərnəkləri olaraq qeyd etdiyiniz ikinci və üçüncü mərhələlərin reallaşması üçün hansısa təşəbbüslə çıxış edə bilərsinizmi?

-Əlbəttə ki, belə bir təşəbbüslə çıxış etmək mümkündür. Bunu birlikdə həyata keçirə bilərik. Birinci mərhələ azərbaycanlı gənclərin bir araya gəlməsi oldu. İkinci mərhələ isə cənab prezidentimizin bizə göstərdiyi yol olacaq. Cənab prezident İlham Əliyevin “Bir millətin iki diasporası” olmaz fikri tək bir türk diasporası adı altında birləşməyi nəzərdə tutur. Əgər Birləşmiş Ştatlarda Azərbaycan gənclərinin sayı 10 min nəfərdirsə, türk diasporunun sayı 100 min nəfərdir. 10 min nəfər çoxdur, yoxsa 100 min nəfər? Əlbəttə ki, 100 min nəfər daha güclüdür. Deməli, fəaliyyətimiz zamanı 100 min nəfərin gücünü, qüdrətini nəzərə almalıyıq. Əgər İstanbulun Taksim meydanında on minlərlə insan Xocalı soyqırımının 20-ci ildönümü ilə bağlı yürüş keçirdisə, bu təbii ki, gənclərin sayəsində, koordinasiyası altında oldu. Eyni şəkildə həmin gənclərin iştirakı ilə bir müddət sonra nədən Vaşinqtonda, Parisdə yürüş keçirməyək. Bunların hamısı mümkündür.

-Türkiyə Strateji Araşdırmalar Mərkəzi zaman-zaman Azərbaycanın problemləri, Dağlıq Qarabağ münaqişəsi barədə müxtəlif tədbirlər təşkil edir. Yaxın zamanlarda TÜRKSAM buna bənzər tədbirlər təşkil etməyi düşünürmü? Xüsusilə, 31 mart Azərbaycanlıların Soyqırım Günü ilə bağlı hansısa tədbir keçiriləcəkmi?

-31 mart Azərbaycanlıların Soyqırım Günü ilə bağlı biz hər il tədbirlər keçiririk. Bu ildə soyqırım tarixi ilə bağlı tədbirlər keçirməyi nəzərdə tuturuq. Bununla bağlı müəyyən planlarımız var.

-Hazırda Azərbaycan və türk diasporlarının birlik, bərabərliyi, birgə fəaliyyəti sizi qane edirmi?

-Hesab edirəm ki, Azərbaycan və Türkiyə, eləcə də iki ölkənin diaspora təşkilatları arasında əlaqələr yaxşı səviyyədədir. Ancaq bu əməkdaşlıq, münasibətlər daha da yaxşı ola bilir. Biz münasibətlərimizi daha yüksək səviyyəyə qaldıra bilərik. Bunun üçün də təbii ki, çalışmalıyıq.

-Sinan bəy, Fransada qondarma “erməni soyqırımı”nı nəzərdə tutan yeni qanun layihəsinin yenidən gündəmə gəlməsi gözlənilirmi və Türkiyə yenidən belə bir təhlükə ilə qarşılaşa bilərmi?

-Əlbəttə ki, bunu hansısa formada həyata keçirməyə çalışacaqlar. Ancaq Fransa Konistitusiya Şurasının qərarı önəmli idi. Konistitusiya Şurası fransız siyasətçilərinə bir hüquq, əxlaq dərsi verdi. Hesab edirəm ki, ağılları başlarına gəlib. Ancaq buna o qədər də inanmaq da doğru olmazdı. Dünyanın bir sıra ölkələrində olduğu kimi Fransada da ermənilər zaman-zaman fransızlar tərəfindən istifadə olunur. Təssüflər olsun ki, ermənilər də hər zaman fransızların istifadəçiləri olublar. Ona görə də Nikola Sarkozi prezident seçilmədiyi təqdirdə Holand, Holand seçilmədiyi halda isə bir başqası ermənilərdən istifadə etməyə başlayacaq. Fransızlar öz siyasi məqsədləri üçün hər zaman ermənilərdən istifadə ediblər və bundan sonra da istifadə edəcəklər. Bunu fransızlar özləri də etiraf edirlər. Zamanında fransızlar ermənilərdən türkləri arxadan vurmaq, ona üsyan qaldırmaq üçün istifadə etdilər. 1915-16-cı illərdə baş verənlər bunu təsdiqləyir. Bu gün də Türkiyənin Avropa Birliyinə üzvlüyü məsələsində Parislə Ankara arasında olan sərin münasibətlər səbəbindən ermənilər fransızlar tərəfindən istifadə olunur.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 17-19 mart.- S.14.