İllərin manifesti - Əmir Pəhləvan

(2011- ci ildə "Elm və Təhsil" nəşriyyatında nəşr olunan "Qartal balası" kitabina sözardı)

Taleyinə mühacir həyatı düşən, Norveçin Oslo şəhərində yaşayıb yaradan istedadlı Azərbaycan yazıçısı Məmmədrza Təbrizlinin yeni kitabı "Qartal balası" adlanır. Kitab bir hekayə və iki öyükdən ibarətdir.

Azərbaycanın Güneyində dünyaya göz açan M.Təbrizlinin bu əsərini "İllərin manifesti" də adlandırmaq olar.

Əsər oxucu ilə elə təbii və elə ürəklə söhbət edir ki, keçmiş günlər bir kino lenti kimi göz önündə canlanır.

Dil və üslub, qrammatik qayda, zəngin folklor çəkisi ilə oxucunu valeh edən "Qartal balası"nı mən "ruhun qidası" da adlandırardım. Bəzən müəlliflər öz fantaziya manerası ilə təbiiliyi özləri də bilmədən komik vəziyyətə salaraq oxucuda əndirəbadi hisslər yaradırlar. Bu, ələlxüsus kitaba yeni marağı və həvəsi olanlar üçün daha da təhlükəlidir. Çünki oxucu ilk qarşılaşdığı belə bir bəsit və ağır nəfəsli əsərlə qidalanmalı olur.

Lakin M.Təbrizlinin bu əsərində Azərbaycanın yatmış, bəlkə də dilçi alimlərinin tədqiq etməmiş elə folklor söz birləşmələrindən istifadə olunub ki, hətta bəzi ləhcə deyimlərini bədii-ədəbi söz kimi də qəbul etmək mümkündür..

Müəllif Ərgün obrazı ilə əsl Vətənçiliyin müqəddəsliyini və Kim olmağımızı əsərin əsas leytmotivi hesab eləyir. Kimliyi bilinməməkdən başımıza gələn bəlaların ağırlığını və didərginliyini göstərir.

Əsərdə tariximiz və taleyimizin qaranlıq səhifələri bədii nəsrin və təfəkkürün gücü ilə oxucuya çox ustalıqla çatdırılır.

Yüksək və zövqlü çap üsulu - professionallıqla qələmə alınan "Qartal balası" əsəri böyük bir elmi publisistik, tədqiqat və folklor ensiklopediyası kimi də qəbul etmək mümkün olar.

Müəllifi böyük tərbiyəvi əhəmiyyət daşıyan bu sanballı əsərə görə ürəkdən təbrik edir, ona yeni - yeni yaradıcılıq uğurları arzulayırıq.

Əmir Pəhləvan

Olaylar.- 2012.- 25 may.- S.11.