“Sirləri açmağa hazır deyiləm...”

-Səbinə Babayeva: “Hamını təəccübləndirməyi bacaracağam”

Azərbaycanın “Eurovision-2012”dəki təmsilçisi Səbinə Babayevanın Lent.az-a müsahibəsi

- Səbinə xanım, artıq şouya hazırlıq işlərinə başlamısınız. Tamaşaçını necə bir şou gözləyir? Bizi nə ilə təəccübləndirəcəksiniz?

- Mən komandamla birlikdə indi tamamən səhnə qoyuluşu, məşqlər, promoturlarla məşğuluq, bütün gücümü bunlara sərf edirəm. Sirlərimizi açmağa hələ hazır deyiləm, lakin inanın ki, mən hamını təəccübləndirməyi bacaracağam.

- Hər il müsabiqədə mahnımızın ingilis dilində səslənməsi də narazılıqlara səbəb olur. Bu il “Eurovision” müsabiqəsindəki mahnımızın Azərbaycan dilindəki versiyası da hazırlanmışdır. Müsabiqə günü bu versiyanı səsləndirməyi düşünürsünüzmü? Belə bir təklif almısınızmı?

- Mən artıq Azərbaycan dilində olan versiyasını tamaşaçıların və ictimaiyyətin mühakiməsinə təqdim etmişəm və mahnını eşitdiyim ilk andan mən onu azərbaycan dilində ifa etməyi arzulamışam. Mənim arzum həyata keçdi. Lakin bu, hələ mahnının pərəstişkarlarım üçün hazırladığım son versiyaları deyil, bir qədər səbrli olun.

- Bu vaxtadək Azərbaycanı “Eurovision” müsabiqəsində təmsil edən hər üç iştirakçının geyimi eyni üslubda olub. Bəs Sizin geyiminiz nə cür olacaq?

- Mənim səhnə kostyumum üzərində hazırda iş gedir, hələ yekun versiyanı görməmişəm, buna görə də indi nəsə demək çətindir. Düşünürəm ki, geyimim heç bir geyimə bənzəməyəcək.

- Geyiminizdə hansısa milli ornamentlərdən istifadə olunacaqmı?

- Mənim səhnəyə çıxmağımı gözləyin, mən indi bütün sirləri açmağa hazır deyiləm.

- “Eurovision” müsabiqəsinin iştirakçılarından kimi dinləyirsiniz və kimi öz rəqibiniz hesab edirsiniz?

- Bu il müsabiqədə çox güclü iştirakçılar var, məsələn, mənimlə bir səhnədə Engelbert Hamperdink kimi məşhur estrada ifaçısı olacaq. Buna görə də bütün iştirakçılar birlikdə və ayrı-ayrılıqda mənim üçün potensial rəqibdirlər. Başlıcası – layiqincə çıxış etməkdir, bizlərdən hər birimiz buna çalışırıq.

- Siz müsabiqə iştirakçılarının ifa edəcəkləri mahnıları dinləmisiniz. Necə hesab edirsiniz, hansı ifa Sizinki ilə rəqabət apara bilər?

- Mən başqalarını mühakimə etməyi sevmirəm. Hər bir iştirakçı güclüdür və özünə görə yaxşıdır, mən çox ümid edirəm ki, müsabiqə maraqlı və zəngin olacaq.

- Bu müsabiqədə nailiyyət əldə etməyin resepti necədir?

- “Eurovision”, ilk növbədə - mahnı müsabiqəsidir. Ən başlıcası – musiqidir, lakin mən hesab edirəm ki, artistin vokal qabiliyyətindən, onun səhnə davranışından, bütünlükdə səhnə quruluşundan da çox şey asılıdır. Bu elə bir kompleksdir ki, onun bütün tərkib hissələri ahəngdar çalışmalıdır.

- Müsabiqədən başqa hansı maraqlarınız var? Nə ilə məşğul olmağı sevirsiniz?

- Mən oxuyuram və ən başlıcası budur. Musiqini çox sevirəm, onunla yaşayır və nəfəs alıram. Boş vaxtım olan kimi doğma şəhərimizi gəzməyi sevirəm, qohumlarıma vaxt ayırmağa çalışıram.

- Müsabiqədən sonra hansı planlarınız var?

- Hələlik gələcək üçün uzaq planlar qurmuram. Ümid edirəm ki, oxumağa davam edəcəyəm. Muğam sənətini öyrənməyi çox istəyirəm – bu mənim çoxdankı arzumdur, müsabiqədə ifa edəcəyim mahnıda muğamın son dərəcə gözəl səslənişindən sonra isə bu arzum daha da artdı.

- Hansı ölkələrdən 12 xal gözləyirsiniz?

- Oh, heç bilmirəm, düşünürəm ki, mayın 26-sı biz hamımız bunun şahidi olacağıq.

- Avropa ölkələrində artıq kifayət qədər tanınmısınız. Xarici ölkələrdən birgə işləmək təklifləri alırsınızmı?

- Hələ ki müsabiqə ilə məşğulam, buna görə də təkliflərə çox diqqət ayıra bilmirəm, amma əgər hansısa yeniliklər olsa, mütləq xəbər edəcəyəm.

- Müsabiqə öncəsi Azərbaycan tamaşaçısına nə demək istərdiniz?

- İnanılmaz dəstək və səmimi sözlərə görə hamınıza təşəkkür edirəm! Siz – mənim enerjimsiniz, mənim daimi ilham mənbəyimsiniz. Mən ölkəmizi müsabiqədə layiqincə təmsil etmək üçün əlimdən gələni edəcəyəm və çalışacağam ki, siz Azərbaycanla və mənimlə fəxr edəsiniz!

Olaylar.- 2012.- 1 may.- S.13.