Fəxriyyə Xələfovanın «Xəzər gülü”

Modelyer: “Hələ bu günə kimi bu cür kolleksiyalar təqdim etməmişəm”

Tanınmış modelyer, Azərbaycanın əməkdar incəsənət xadimi Fəxriyyə Xələfovanın mayın 13-də H.Əliyev adına sarayda Xələfovanın yeni “Caspian rose” adlı kolleksiyasının nümayişi olacaq. “Olaylar”a verdiyi eksklüziv açıqlamada modelyer gecədə tamaşaçıları gözləyəcək yeniliklərdən danışdı:

-Mayın 13-də Heydər Əliyev adına Sarayda çox maraqlı moda şousu hazırlayıram. Bu moda nümayişində üç kolleksiya göstəriləcək. Əsas yenilik isə gəlinliklərin kolleksiyası olacaq. Hələ bu günə kimi mən bu cür kolleksiyalar təqdim etməmişəm. Bu təqdimat “Eurovision Mədəni Proqramı” siyahısına daxildir. Deməli, 5-30 may tarixlərində paytaxtımızın mədəniyyət mərkəzlərində müxtəlif yaradıcılıq növləri nümayiş etdiriləcək. Bunlardan biri də moda nümayişi olmalıdır. Mən fikirləşdim ki, kolleksiyaya yenilik gətirmək üçün ona gəlinliklər də əlavə edim. Bizim adətimizə uyğun olan kəmərlər var. Onlar qırmızı rəngdə olurlar. Mən düşündüm ki, nədən bu kəmərlərdən olmasın? Şou zamanı tamaşaçılar çox yeniliklər görəcəklər. Həmin gün eyni zamanda xanımlar üçün yaratdığım yeni ətrimin təqdimatı olacaq. Həm kolleksiya, həm də yeni ətrimin adı “Caspian rose”dur -Xəzər qızılgülü. Bu, real çiçəkdir, təbiətdə belə bir gül var. Fikirləşirəm ki, Azərbaycan xanımları hamımız gözəl bir çiçəyik. Demək olar ki, heç kimin məlumatı yoxdur ki, Xəzərin sahili boyunca gözəl Xəzər qızılgülü bitir. Mən biologiya fakültəsini bitirdiyimə görə bu gül barədə məlumatım var idi. Artıq ətriyyatçı olduğumdan sonra fikirləşdim ki, bu fürsətdən istifadə etməliyəm. Bu özümüzə məxsus bir güldür. Belə bir nadir çiçəklərin istifadəsi həmişə, populyarlıq, uğur gətirir. Ətir həm beynəlxalq xarakter daşıyır, həm də ki, ətrin istehsalı üçün çox əlverişlidir. Maraqlı təqdimat olacaq. Mən kolleksiyalarım üçün musiqini xüsusi olaraq hazırlayıram. Zalda ekranlar olacaq. Mənim kolleksiyalarımdan ibarət eksklüziv nadir kadrlar nümayiş olunacaq. 60 geyim, 3 kolleksiya göstəriləcək.

- Ətirlər satışa çıxarılacaq?

- Təqdimatdan sonra bu ətirlər satışa çıxarılacaq. Bu mənim qadınlar üçün hazırladığım ikinci ətrim olacaq. Birinci “Nuray” idi. Mən həmişə həm geyimlərimə, həm də ətirlərimə münasib qiymətlər təqdim edirəm. Onların qiymətlərini süni şəkildə artırmıram. Ona görə ki, mən yerli istehsalçıyam. Ona görə də mən istəyirəm ki, məhsullarım öz vətəndaşlarım həm sevilsin, həm də alınsın. Mən demək olar ki, 2009-cu ildən ətirlər kolleksiyasına başlamışam. 2010-cu ildə “Nuray” ətirlər kolleksiyası satışa çıxarılıb. 4 ildə mənim yetərincə özümə qarşı inamım artıb və bu işdə daha da peşəkarlaşmışam. Arzum var ki, bundan sonra dünya şöhrətli ətir hazırlayım, onun formuladını tapım. Burada məqsədim sadəcə məşhurluq və populyarlıq qazanmaq deyil. Mən bu ətirləri hamı ilə bölüşmək istəyirəm. Hamıya bu ətirləri bəxş etmək istəyirəm. Bu gələcəyin layihəsidir. Bu həm də beynəlxalq layihə olmalıdır. Bu arzumu yaxın üç il ərzində gerçəkləşdirmək istəyirəm. İstənilən xanımı və bəyi öz icad etdiyim ətirlərin ətrinə bürümək istəyirəm.

- Yəqin ki, şou da özünəməxsusluğu ilə seçiləcək?

- Nümayiş ssenariləşmiş, teatrlaşdırılmış şəkildə olacaq. Təbii ki, moda nümayişində bir kolleksiyadan o birisinə keçmək üçün geyimləri dəyişmək lazımdır. İstəyirəm ki, bu anlarda mənim dostluq etdiyim sənət dostlarım, müğənnilər səhnəyə çıxsınlar. Amma onların kimliyini tam dəqiqləşdirməmişəm. Bir sözlə, musiqili qonaqlarım da olacaq.

- Xaricdən dəvət olunmuş qonaqlarınız olacaq?

- Xaricdən qonaq dəvət etməmişəm. Həm ətirin təqdimatı, həm də kolleksiyaların nümayişi olduğundan onsuz da şounun təşkilati məsələləri çox çətindir. Belə olan halda hər hansı xarici qonaqla məşğul olmağa nə vaxtım, nə də imkanım olacaq. Həm də düşünürəm ki, o ərəfədə artıq ölkəmizdə o qədər qonaq olacaq ki, otellərdə bəlkə heç yer də olmayacaq. Bir sözlə, hansısa xarici ulduzu və ya qonağı dəvət etmək planım yoxdur. Bəlkə sonra, yeni ətrimin ikinci promo-aksiyası üçün nə isə etdim.

-Biletlərin qiyməti gələn qonaqların büdcəsinə uyğun olacaq?

-Həmişə fikirləşmişəm ki, kolleksiyalarımın təqdimatında biletlərin qiyməti münasib olmalıdır. Biletlərin qiymətini bahalı etməyəcəyəm.

Nisə Rafiqqızı

Olaylar.- 2012.- 2 may.- S.9.