“Azərbaycan təhsil tarixi” kitabının təqdimatı keçirilib

Mayın 3-də Yeni Azərbaycan Partiyasının təşəbbüsü ilə təhsil naziri Misir Mərdanovun 3 cildlik «Azərbaycan təhsil tarixi» kitabının təqdimatı keçirilib. Mərasimdə çıxış edən Yeni Azərbaycan Partiyasının sədr müavini Əli Əhmədov bildirib ki, Azərbaycanın sürətli inkişafı həyatımızın bütün sferalarında özünü göstərməkdədir.

Bu inkişaf eyni zamanda elm, təhsil, mədəni yüksəliş proseslərini də əhatə etdiyini deyən YAP rəsmisi təqdimatı keçirilən kitabın mühüm əhəmiyyətli bir əsər olduğunu vurğulayıb: “Təbii ki, Azərbaycanın inkişafının çox vacib istiqamətlərindən və bu inkişafın kökündə dayanan amillərdən biri təhsil sahəsində həyata keçirilən islahatlar və bu islahatlar nəticəsində əldə olunan nailiyyətlərdir. Azərbaycan təhsili ölkəmizin bu günkü və gələcək inkişafının əsasını təşkil edən sistemə çevrilib. Məmnunluq hissi ilə demək lazımdır ki, bu gün Azərbaycanda yüksək təhsilli, bilikli, müasir dünyanı dərk edən və bu dünyanın fəal üzvünə çevrilməyə layiq olan gənclərimiz formalaşıb. Bu gənclərin formalaşmasında təhsilimizin müstəsna rolu var və bu rol getdikcə artır. Biz əminik ki, təhsilimiz əsası Ulu öndər Heydər Əliyev tərəfindən qoyulmuş siyasət nəticəsində bundan sonra da inkişaf edəcək, daha da müasirləşəcək, Azərbaycanın inkişafının fundamental amillərindən və əsaslarından biri kimi daha böyük faydalar gətirəcək”.

***

YAP sədrinin müavini Azərbaycan təhsilinin tarixinin öyrənilməsinə böyük ehtiyacın olduğunu deyib. Onun sözlərinə görə, tarixin araşdırılması nə qədər keçmişə hörmət və ehtiramı ifadə edirsə, gələcək üçün də mühüm əhəmiyyət kəsb edir. Tədbirdə çıxış edən Milli Məclisin sədr müavini, YAP İdarə Heyətinin üzvü Bahar Muradova bu nəşrlərin təhsilin bütün dövrlərini əhatə etdiyini və bunun böyük əhəmiyyət kəsb etdiyini bildirib. Azərbaycan Yazıçılar Birliyinin sədri, Xalq yazıçısı Anar, Azərbaycan Tibb Universitetinin rektoru, Milli Məclisin deputatı Əhliman Əmiraslanov, Bakı Slavyan Universitetinin rektoru Kamal Abdulla, AMEA-nın Tarix İnstitutunun direktoru, Milli Məclisin deputatı Yaqub Mahmudov, «Təhsil» Nəşriyyat-Poliqrafiya Birliyinin baş direktoru Bəhruz Axundov və digərləri çıxış edərək Misir Mərdanovun müəllifi olduğu «Azərbaycan təhsil tarixi» üçcildlik kitabının ölkə ictimaiyyəti üçün əhəmiyyətini vurğulayıblar.

Sonda təhsil naziri Misir Mərdanov çıxış edərək bu nəşrə verilən qiymətə və onun ərsəyə gəlməsində zəhməti olan hər kəsə təşəkkürünü bildirib. Bu kitabların Ulu öndər Heydər Əliyevin əziz xatirəsinə həsr olunduğunu deyən təhsil naziri Azərbaycanın təhsil tarixinin yazılmasının məhz Ümummilli liderimizin tövsiyəsi olduğunu diqqətə çatdırıb. “10 il ərzində bu kitabların üzərində işləmişəm. Prezidentin razılığı və Yeni Azərbaycan Partiyasının dəstəyi ilə həmin kitabların təqdimatına toplaşmışıq. Kitabın 3 cildi hazırdır, 4-cü cildi isə artıq mətbəədə yığılır. Kitabın 1-ci cildində 1920-ci ilədək Azərbaycanın təhsil tarixi ilə bağlı məlumatlar əks olunub. Kitabın II cildində sovet dövründəki təhsil tarixi ilə bağlıdır. Kitabın III cildində Azərbaycanın müstəqillik illərində ölkəmizin təhsil tarixi, keçdiyi yollar, görülən işlər barədə geniş məlumatlar verilib”. Nazir təəssüflə qeyd edib ki, I cild digərlərindən az səhifəli və az məlumatlıdır: “Çünki arxivdə o qədər də ciddi məlumatlar tapa bilmədik. Əgər gələcəkdə bizim və digər naşirlərin, yaxud müəlliflərin imkanı olarsa, daha geniş tədqiqat apara bilərlər”. Misir Mərdanov bildirib ki, kitablar Azərbaycanın bütün kitabxanalarına, o cümlədən ali və orta məktəblərin kitabxanalarına göndərilib və bu iş davam etdirilir.

Süleyman İsmayılbəyli

Olaylar.- 2012.- 4 may.- S.9.