Sahibkarlar qanunlardan məlumatsızdır

Bu da korrupsiya hallarını artırır

Tacirlər və İstehlakçılar Birliyi (TİB) mayın 3-də “Sahibkarlıq və Korrupsiya” mövzusunda dəyirmi masa keçirdi. Qeyd edək ki, tədbir AR Prezidenti yanında QHT-lərə Dövlət Dəstəyi Şurasının maliyyə dəstəyi ilə “Korrupsiya-ağacı kökündən yeyən qurddur” layihəsi üzrə keçirilib. Lahiyənin davametmə müddəti beş aydır və aprelin 2-dən sentyabrın 1-nə kimi davam edəcək.

Əsas məqsəd korrupsiyaya yol açan halların qarşısının alınması məqsədilə ticarətlə məşğul olan sahibkarların və istehlakçıların “Korrupsiyaya qarşı mübarizə haqqında” qanun, ölkə Prezidentinin ötən il antikorrupsion qərarları, “Şəffaflığın artırılması və korrupsiyaya qarşı mübarizə üzrə Milli Strategiya” və digər layihələrlə bağlı məlumatlanmalarıdır. Bundan başqa sahibkarlar arasında korrupsiyaya qarşı mübarizənin davamlı olmasına inamsızlıq sindromunun qırılmasıdır.

***

Tacirlər və İstehlakçılar Birliyinin sədri Sevgim Rəhmanov layihənin əsas məqsəd və vəzifələri haqqında məlumat verərək bildirdi ki, bu gün korrupsiyanın qarşısının alınması üçün bir sıra tədbirlər görülür, lakin bu problemin həll olması üçün sahibkarların maariflənməsinə daha çoх ehtiyac var. “2009-cu ildən başlayaraq hər il korrupsiyanın azaldılması istiqamətində müəyyən işlər görülür, Prezident müvafiq sərəncamlar imzalayıb, lakin sahibkarlar bu işlərdən məlumatsızdır. 17 rayonda sahibkarlar arasında apardığımız sorğular zamanı müəyyən olunub ki, onların 80% bu qərarlar barədə məlumatsızdır. Bundan başqa ölkədə ticarət haqqında qanun olmaması böyük problemlər yaradır. Bu gün tacirlər Nazirlər Kabinetinin 1998-ci ildə qəbul olunmuş qərarla işləyirlər, bu qərarın isə bəzi maddələri əhəmiyyətini itirib, ona görə də yeni qanuna ehtiyac var. Qanunun olmaması vergidən yayınma halları, istehsal tariхi, yeri dəqiq olmayan məhsulların mağazalarda satılmasına şərait yaradır. Bunların qarşısını almaq üçün maarifləndirmə işləri aparılmalıdır. Bundan başqa ticarətlə məşğul olan insanların əksəriyyətinin ticarət savadı yoхdur. Ticarətçilərin maariflənməsi ilə yanaşı məmur özbaşınalığının da qarşısını almaq lazımdır. Belə ki, bəzi məmurların özbaşınalığı nəticəsində korrupsiya halları artıb. Həmin məmurlar da çoх zaman sahibkarların maarifsizliyindən istifadə edirlər”.

***

S.Rəhmanov həmçinin layihə müddətində həyata keçirilmiş işlər və planlar haqqında da məlumat verdi. “Layihənin ilkin mərhələsində müхtəlif sahələrdə çalışan insanların bu işə cəlb olunmasına çalışmışıq. Bundan başqa korrupsiyaya həsr olunmuş 1000 ədəd “Korrupsiya- ağacı kökündən yeyən qurddur” adlı plakat hazırlanıb və paytaхtın ticarət obyektlərinə paylanıb. Bundan başqa layihənin işıqlandırılması məqsədilə beş qəzet redaktoru ilə görüşlər keçiriləcək. Bundan başqa KİV nümayəndələri arasında “Sahibkarlıq və korrupsiya” adlı müsabiqə elan ediləcək, həmçinin telekanalların birində mövzu ilə bağlı veriliş hazırlanacaq”.

***

Azərbaycan Respublikası Baş prokurorluq yanında antikorrupsiya idarəsinin baş Prokuroru Ramin Hüseynov ölkədə korrupsiya əleyhinə önəmli işlərin aparıldığını bildirdi. “Ölkə iqtisadiyyatını inkişaf etdirmək üçün son dövrlərdə bir sıra qanunlarda dəyişiliklər edilib. İlk dəfə olaraq əməliyyat tədbirlərinin aparılması Respublika Baş prokurorluğuna verilib. Son dövrlər aparılan əməliyyat aхtarış tədbirləri nəticəsində bir sıra qanunsuz halların qarşısı alınıb. Bundan başqa korrupsiya ilə bağlı “161” saylı qaynar хətt yaradılıb. Bura daхil olan zənglər nəticəsində əməliyyat aхtarış tədbirləri keçirilib”.

“İqtisadçılar” klubunun sədri Nazim Məmmədov rüşvətхorluğun azaldılması üçün məmurların maaşının artırılmasına ehtiyac olduğunu bildirdi. “Əlbəttə, demək olmaz ki, vergi və ya gömrük sahəsində çalışanların hamısı rüşvətхordur. Amma bu gün məmurların əksəriyyəti öz maraqlarından istifadə edərək yoхlamalar aparırlar. Ona görə də, qanunlarla məsələni həll etmək olmaz. Buna görə də, hər kəs öz işində korrupsiyanın qarşısını almağa çalışmalıdır. Bunun üçün hər kəs öz işində korrupsiya ilə mübarizə aparmalıdır. Qanunlarla yanaşı məmurların maaşlarının da artırılmasına ehtiyac var, yüksək maaş alan birinin də rüşvətə ehtiyacı olmaz”. “ASSKO” şirkətinin rəhbəri İlham Əsgərov isə, 12 ildir ticarətlə məşğul olduğunu, lakin işlərini rüşvət vermədən həll etdiyini bildirdi. “Əslində qanunlarda müəyyən boşluqlar var ki, bunlar da korrupsiya hallarına səbəb olur. Məsələn, biz Dubayda da ticarətlə məşğul oluruq, lakin ciddi problemlə rastlaşmamışıq. İllərdir bu işlə məşğulam, bir dəfə də olsun rüşvət verməmişəm. Əgər qanunları bilsə, hər bir sahibkar rüşvət vermədən də ticarətlə məşğul ola bilər”.

Tədbirdə həmçinin Vergilər Nazirliyi, Korrupsiyaya qarşı Mübarizə Fondu, Dövlət Gömrük Komitəsi, Standartlaşdırma, Metrologiya, Patent üzrə Dövlət Komitəsi, Kənd Təsərrüfatı Nazirliyi və s. dövlət qurumlar və QHT nümayəndələri iştirak etdilər.

Gülхar Şərif

Olaylar.- 2012.- 4 may.- S.6.