“Heydər Əliyev-xatirə zalı” kitabı çap olunub

Milli Məclisdə nəşrin təqdimatı keçirilib

Milli Məclisdə “Heydər Əliyev-xatirə zalı” adlı kitabının təqdimatı keçirilib. Kitabın Milli Məclisdə Heydər Əliyevin xatirə zalının yaradılmasının beş illiyinə həsr olunduğunu diqqətə çatdıran spiker Oktay Əsədov qeyd etdi ki, bu kitab parlament adından ulu öndərin xatirəsinə bir töhvə olacaq.

Heydər Əliyev müstəqil Azərbaycan dövlətinin banisidir. Onun hakimiyyətə qayıdışı olduqca mürəkkəb bir situasiyaya təsadüf edirdi. Məhz həmin dövrdə ümummilli lider parlamentə rəhbərlik edib, bununla da Azərbaycanda parlamentarizmin əsasını qoyub: “Beş il əvvəl parlamentdə Heydər Əliyevin xatirə zalı yaradıldı. Ötən müddət ərzində xatirə zalını 150 nümayəndə heyəti ziyarət edib, ulu öndərin həyat və fəaliyyəti ilə tanış olub”. H.Əliyevin Azərbaycan dövlətini, xalqını, millətini düşünən bir şəxsiyyət olduğunu diqqətə çatdıran millət vəkili Fəttah Heydərov əlavə edib ki, onun siyasi fəaliyyəti Azərbaycan tarixinə həkk olunacaq: “Heydər Əliyev müstəqil Azərbaycan dövlətini qurdu və onun əbədi yaşamasının təməlini qoydu. Əgər o təməl olmasaydı, Azərbaycanın müstəqilliyi davam edə bilməzdi”. Millət vəkili Eldar İbrahimov isə qeyd edib ki, Heydər Əliyev Azərbaycana nəinki sabitlik, əmin-amanlıq gətirdi, ölkənin sosial-iqtisadi inkişafı da onun adı ilə bağlıdır: “Heydər Əliyev Azərbaycan parlamentinə siyasi mədəniyyət gətirdi. O, parlamentə qısa müddətdəki rəhbərliyi dövründə qanunverici orqana böyük töhvələr verib”. Deputat Bəxtiyar Əliyev isə qeyd etdi ki, H.Əliyevin siyasi fəaliyyəti parlamentdən başlasa da, onun gördüyü işlər siyasi mədəniyyət nümunəsi idi: “O, müxalifətdə olan Yeni Azərbaycan Partiyasını yaratdı. Ona qarşı olan bütün təzyiqlərə baxmayaraq, siyasi mədəniyyət nümayiş etdirdi və hakimiyyətə gəldi. Bununla da müxalifətdə olan YAP-in Azərbaycan dövlətinə necə bağlı olduğunu sübut etdi”. Millət vəkili Rəfael Hüseynov təklif etdi ki, parlament ulu öndərin 90 illik yubileyi ilə əlaqədar onun spikerlik fəaliyyəti ilə bağlı sənədli film hazırlasın.

Alim

Olaylar.- 2012.- 11 may.- S.9.