Azərbaycan diasporu inamla inkişaf edir

Rauf Zeyni: “Biz mütləq yeni texnologiyalar işləyib hazırlamalı, onu həyata keçirməliyik”

Dünya Azərbaycanlılarının Əlaqələndirmə Şurasının üzvü Rauf Zeyninin “OLAYLAR”-a müsahibəsi

-Rauf müəllim, bu günlərdə Bakıda prezident İlham Əliyevin iştirakı ilə diplomatik nümayəndəlik rəhbərlərinin dördüncü müşavirəsi keçirildi. Bu müşavirə Azərbaycanın xarici siyasətində yeni hədəflərin müəyyən edilməsi ilə yanaşı diaspora həyatı üçün də əhəmiyyətli hesab edilir. Dünya Azərbaycanlılarının Əlaqələndirmə Şurasının üzvü kimi bu toplantını və onun diaspora həyatında əhəmiyyətini necə qiymətləndirirsiniz?

-Ölkə prezidenti cənab İlham Əliyevin həm Azərbaycan Diplomatik Akademiyasının yeni binasının açılış mərasimində iştirakı, həm də diplomatların dördüncü müşavirəsi zamanı etdiyi çıxış geniş təhlil olunmalıdır. Çünki ölkə prezidenti xarici və daxili siyasətə, Azərbaycanın dünya üçün açıq, şəffaf bir məmləkət olmasına, dövlət olaraq həyata keçirdiyimiz siyasətimizin bütün məqamlarına öz çıxışında geniş, əhatəli şəkildə toxundu. Dövlət başçısı ölkəmizə qarşı aparılan təcavüzkar siyasətin, bütövlükdə Azərbaycan Respublikasının beynəlxalq aləmdə apardığı və gələcəkdə aparmaq niyyətində olduğu siyasətin bütün aspektlərini açıq şəkildə səfirlərə, diplomatlara, eləcə də orada iştirak edən digər qonaqlara bəyan etdi. Dövlət başçısının çıxışına diqqətlə qulaq asdım. Həmin çıxışda prezident səfirlərin xarici ölkələrdə hansı işləri aparmaqlarının vacibliyi, eyni zamanda diaspora sahəsində, xüsusilə xarici ölkələrin kütləvi informasiya vasitələri ilə iş sahəsində hansı işlərin görülməsi əksini tapırdı. Həmçinin qeyri hökumət təşkilatları ilə sıx əməkdaşlığın edilməsi məsələsi cənab prezident İlham Əliyevin çıxışında xüsusi vurğulandı. Ümumiyyətlə, dövlət başçısının çıxışında Azərbaycan Respublikasının azad, müstəqil, demokratik bir dövlət olduğu, onun siyasətinin yalnız Azərbaycan rəhbərliyi tərəfindən formalaşdırıldığı, heç bir kənar qüvvənin Azərbaycanın siyasətinə təsir göstərmək imkanı olmaması, hansısa təsir olacağı təqdirdə adekvat cavabın veriləcəyi bir daha təsdiqini tapdı. Həmin istiqamətlərdə qeyd edilən məsələlərdən hər kəs, dövlət qurumları, ictimai sektor və media lazım olan məqamları götürüb gələcək planlarını, fəaliyyət proqramını müəyyən etməlidir.

-Dünya Azərbaycanlılarının üçüncü qurultayı zamanı çıxışında da prezident İlham Əliyev səfirliklərə diaspora ilə yaxından əməkdaşlıq etməyi tapşırmışdı. Diplomatların dördüncü müşavirəsi zamanı da eyni tövsiyyələr səsləndirildi. Sizcə bundan sonra səfirliklərlə diaspora arasında sıx əməkdaşlıq daha sağlam şəkildə qurulacaqmı?

-Diplomatik nümayəndəlık rəhbərlərinin dördüncü müşavirəsində çıxışı zamanı cənab prezident İlham Əliyev qeyd etdi ki, Azərbaycan diasporu inamla inkişaf edir, formalaşır, güclənir. Eyni zamanda dövlət başçısı qurultayda çıxışı zamanı vurğuladı ki, yeni dövr, mühit yaranır. Hər yeni dövr üçün də yeni çağırışlar meydana çıxır. Bu yeni çağırışları isə biz dinləməli, fəaliyyətimizdə tətbiq etməliyik. Nəticə etibarilə hər bir məqamda Azərbaycan inkişaf etməlidir. Yəni bir yerdə dayanmaq qeyri-mümkündür. Bizim də siyasətimiz yenilənməli, hər bir məsələ ilə əlaqədar olaraq yeni münasibətlərimiz formalaşmalıdır. Bütün bunlardan irəli gələrək inkişaf etməliyik. Həmçinin prezident İlham Əliyev Azərbaycan diasporunun fəaliyyətini, çox böyük əhəmiyyətli rolunu qeyd etdi. Eyni zamanda xarici ölkələrdə çox böyük bir qüvvə olan media orqanları, səfirlik, diaspora, qeyri hökumət təşkilatlarının bir vəhdətdə fəaliyyət göstərməsi, Azərbaycanın milli, dövlətçilik maraqlarının hər şeydən üstün tutulmasının vacibliyi qeyd edildi. Azərbaycan həqiqətləri, Dağlıq Qarabağ problemi və Xocalı soyqırımının dünya ictimaiyyətinə çatdırılmasında birgə fəaliyyət göstərməyin xüsusi əhəmiyyət daşıdığı vurğulandı. İndiyə qədər əldə edilən nəticələri də prezident İlham Əliyevin dilindən eşitdik. Ancaq o da qeyd olundu ki, bizim ildən-ilə gücümüz artır və gücümüz artdıqca da biz daha böyük işlər görməyə malik oluruq. Dövlət başçısı dedi ki, biz bu işləri görməliyik. Bütün bunları nəzərə alaraq qeyd etmək istərdim ki, səsləndirilən bütün fikirləri təhlil etməli, öz imkanlarımız, potensialımıza yenidən baxmalıyıq. Baxmalıyıq ki, Milli Qeyri Hökumət Təşkilatları Forumu olaraq daha nələr edə bilərik, daha hansı beynəlxalq təşkilatlarla əməkdaşlıq qura bilərik. Xüsusilə beynəlxalq media ilə hansı istiqamətlərdə əməkdaşlığı inkişaf etdirmək mümkündür. Bu günlərdə Bakıda “Neft, qaz və media” adlı beynəlxalq konfrans keçirildi. Qeyd edim ki, Bakıda belə bir mötəbər konfransın keçirilməsi çox təqdirəlayiq bir məsələdir. Çünki 27 ölkədən neft və qaz haqqında yazan media nümayəndələri Azərbaycana gəldi, real vəziyyəti görərək onunla tanış oldular. Səfərdən sonra isə onlar gedib öz ölkələrində Azərbaycanla bağlı məqalələr dərc edəcəklər. Hesab edirəm ki, həm daxildə, həm də ölkədən kənarda dünya siyasətinə, dünya birliyinə Azərbaycan gerçəkliklərini daha yüksək səviyyədə çatdıra bilən tədbirlər görülməlidir. Xüsusi qeyd etmək istərdim ki, Fransanın paytaxtı Parisdə Azərbaycan Mədəniyyət Mərkəzinin açılması çox böyük bir hadisədir. Həmin Mədəniyyət Mərkəzində hər hansı bir tədbirlərin keçirilməsi, Azərbaycan mədəniyyətinin təqdim edilməsi üçün bütün şərait var. Ona görə də biz bunların hamısını təhlil edərək özümüz üçün nəticə çıxarmalıyıq ki, bundan sonra daha geniş miqyasda hansı işlər görə bilərik. Eyni zamanda hansı beynəlxalq təşkilatlarla əlaqələr yarada bilərik. Bütün bunların hamısını fəaliyyət proqramlarımıza əlavə etməliyik.

-Dünya Azərbaycanlılarının Əlaqələndirmə Şurasının üzvü kimi sizin təklifləriniz nədən ibarətdir? Bundan sonra daha hansı addımları atmaq lazımdır ki, keyfiyyət baxımından yüksək nəticələr əldə edək.

-Həm Dünya Azərbaycanlılarının üçüncü qurultayı, həm də diplomatik nümayəndəlik rəhbərləri ilə görüşdə dövlət başçısı tərəfindən bir çox məsələlər vurğulanıb. Səmimi olaraq qeyd edərdim ki, ölkə prezidenti çox açıq və aydın bir çıxış etdi və həmin çıxış zamanı bütün məqamları əhatə etdi. Mənim isə Dünya Azərbaycanlılarının Əlaqələndirmə Şurasının üzvü kimi təklifim ondan ibarətdir ki, ilk növbədə dövlət başçısının çıxışını daha diqqətlə oxumalı və oradakı bütün məqamları özümüz üçün əğz etməliyik. Təbii ki, paralel olaraq indiyə qədər görülmüş işləri, fəaliyyətimizi təhlil etməliyik. Bu gün dünyaca tanınan aparıcı diaspor təşkilatları, beynəlxalq təşkilatlar, aparıcı ölkələr hansı metodlardan istifadə edib öz ölkəsi, millətini, diasporasını qabağa aparıbsa, biz də həmin imkanlardan istifadə etməliyik. Hansı ölkələrdə imkan varsa orada Azərbaycan televiziyası, radiosu açmalıyıq. Eyni zamanda cənab prezident göstəriş verib ki, hansı ölkələrdə mümkündür Azərbaycan Mədəniyyət Mərkəzi açmalıyıq. Bütün bunlar bizim üçün geniş imkanlar yaradır. Biz də yaradılmış imkanlardan istifadə edib həmin ölkələrin müvafiq təşkilatları, tanınmış kütləvi informasiya vasitələri, qeyri hökumət təşkilatları ilə geniş əlaqələr qurmalıyıq. Həmin əlaqələrdən istifadə edib Azərbaycan həqiqətləri, Azərbaycan Respublikasının bu günkü real inkişafını, eləcə də üzləşdiyi problemləri dünya ictimaiyyətinə çatdırmağı bacarmalıyıq. Dünyada mövcud olan elektron imkanlar, kütləvi informasiya vasitələrindən istifadəni dəyərləndirsək görərik ki, bu gün erməni diasporu az xərc qoymaqla ondan səmərəli istifadə etməyi bacarır. Düşmənimiz olsa da bunu etiraf etmək lazımdır. Azərbaycan diasporunun potensialı erməni diasporunun potensialından qat-qat çox olsa da, biz elektron imkanlar, dünyada fəaliyyət göstərən nüfuzlu kütləvi informasiya vasitələri və televiziyalardan lazımı səviyyədə bəhrələnə bilmirik. Bunun üçün aparılan işlərə, həyata keçirilən fəaliyyətə qısa nəzər salmaq lazımdır ki, Qarabağ problemi, ermənilərin azərbaycanlılara qarşı həyata keçirdiyi soyqırımların dünya ictimaiyyətinə çatdırılması istiqamətində apardığımız işlər nə dərəcədə böyük nəticə verib. Təbii ki, malik olduğumuz imkanlar və potensial qarşılığında əldə edilən nəticələr qaneedici səviyyədə deyil. İstər Qarabağın tarixi, istər Ermənistan-Azərbaycan münaqişəsi, istərsə də bu günkü gerçəkliklər və ermənilərin azərbaycanlılara qarşı zaman-zaman həyata keçirdikləri soyqırımlarla bağlı elə texnologiyalar işləyib hazırlamalıyıq ki, diasporamızın həmin ölkələrdə apardığı işlər, antierməni təbliğatı yalnız bayram və matəm günlərində həyata keçirdikləri tədbirlərdən ibarət olmasın. Diasporamızın fəaliyyəti nəticəsində il ərzində bütün internet resursları bu məsələyə cəlb edilsin. Ona görə də biz mütləq yeni texnologiyalar işləyib hazırlamalı, onu həyata keçirməliyik.

-Azərbaycan diasporunun hazırkı fəaliyyətindən razısınızmı?

-Son illər Azərbaycan diasporu qürbətdəki fəaliyyətini xeyli gücləndirib. Əgər ölkəmiz müstəqillik əldə etdikdən sonrakı 20 ilə nəzər yetirsək görərik ki, diasporamızın son iyirmi ildəki fəaliyyəti kifayət qədər aktiv olub. Azərbaycan diasporu bu illər ərzində antierməni təbliğatının aparılması istiqamətində xeyli işlər görüb və bu işlər hazırda da davam etdirilir. İndi artıq Azərbaycan diasporu 50-fən artıq ölkədə formalaşmış, kifayət qədər təşkilatlanmış, müxtəlif kütləvi informasiya vasitələri, eləcə də regional televiziyaları olan mütəşəkkil bir quruma çevrilib. Azərbaycan diaspor təşkilatları artıq bir neçə konqresdə birləşib ki, bu da aparılan ümumi işin xeyrinə, antierməni təbliğatının sürətləndirilməsinə gətirib çıxarır.

Azərbaycan Respublikası Prezidenti yanında KİV-in İnkişafınamDövlət Dəstəyi Fondunun maliyyə dəstəyilə çap edilmişdir

Olaylar.- 2012.- 25 sentyabr.- S.15.