Diaspor təşkilatları 20 Yanvar faciəsini qeyd edirlər

Soydaşlarımız yaşadıqları ölkələrin ictimaiyyətinə sovet qoşunlarının Azərbaycanda törətdikləri vəhşilikləri təfərrüatları ilə çatdırırlar

20 Yanvar faciəsinin 22-ci ildönümü xarici ölkələrdə fəaliyyət göstərən diaspor təşkilatları tərəfindən də qeyd ediləcək, dünyanın müxtəlif ölkələrində anım tədbirləri təşkil olunacaq. Diasporla İş üzrə Dövlət Komitəsindən verilən məlumatda bildirilib ki, Avropanın ayrı-ayrı ölkələrində yaşayan soydaşlarımız da 20 yanvar faciəsi qurbanlarının xatirəsini yad edəcəklər. Almaniyanın Berlin, Maqdeburq, Drezden şəhərlərində fəaliyyət göstərən Almaniyadakı Azərbaycanlıların Koordinasiya Mərkəzi, Azərbaycan Evi, “Xəzər” Hannover cəmiyyəti, “Alm.Az“ Cəmiyyəti, tərəfindən keçirilmiş tədbirlərdə şəhidlərin ruhu anılıb, 20 yanvar hadisələrinin Azərbaycan tarixindəki yeri və rolu ətrafında yerli ictimaiyyətə, eləcə də digər millətlərin diasporlarının nümayəndələrinə ətraflı məlumat verilib.

Yanvarın 14-də Maqdeburq şəhərində “Demokratiya yolları” adlı tədbirdə Saksen-Anhalt vilayəti üzrə Alman-Azərbaycan Mədəniyyət Cəmiyyətinin sədri Yaşar Niftəliyev, Hannover şəhərində fəaliyyət göstərən Xəzər Cəmiyyətinin sədri Etibar Qəniyev 20 yanvar faciəsinə dair toplaşanlara ətraflı məlumat vermiblər. Tədbirin sonunda Almaniyadakı Azərbaycanlıların Koordinasiya Mərkəzinin təqdim etdiyi 20 yanvar faciəsinə dair sənədli film nümayiş etdirilib. Yanvarın 18-də Almaniyanın Drezden şəhərində „Alm.az“ cəmiyyətinin təşkilatçılığı ilə baş tutmuş tədbirdə cəmiyyətin sədri Ağahüseyn Babayev toplaşanlara keçmiş SSRİ rəhbərliyi tərəfindən Azərbaycan xalqına qarşı törədilən görünməmiş terror aktı barədə məlumat verib, daha sonra „Azadlığa aparan yollar“ sənədli filmi nümayiş etdirilib. Tədbirdə soydaşlarımızla yanaşı alman ictimaiyyətinin, o cümlədən Saksoniya parlamentinin nümayəndələri, Drezdendə fəaliyyət göstərən konsulluqların, eləcə də rus, yəhudi, ukrayna, qazax icmalarının təmsilçiləri də iştirak ediblər. 20 yanvar hadisələrinin 22-ci ildönümü ilə bağlı tədbirlər Almaniyanın Kassel, Marburq, Höttingen şəhərlərində fəaliyyət göstərən Azərbaycan diaspor təşkilatları tərəfindən də təşkil olunacaq.

İsveç Krallığında fəaliyyət göstərən “Durna” dərnəyi, Azərbaycan Federasiyası İsveç, “Xəzər” Azərbaycan-İsveç Dostluq Cəmiyyəti tərəfindən müvafiq olaraq Stokholm, Yöteborq, Malmö şəhərlərində 20 yanvar şəhidlərinin ruhu yad ediləcək, sovet hərb maşınının Azərbaycan xalqına qarşı törətdiyi misli görünməmiş cinayət barədə məlumat veriləcək. Tədbir zamanı faciəni əks etdirən foto və video materiallar da nümayiş etdiriləcək. 20 yanvar faciəsinin 22-ci ildönümünə həsr olunmuş tədbirlər Fransa, Danimarka, Niderland, İtaliya, Böyük Britaniyada da keçiriləcək. Norveç Krallığında Norveç Azərbaycanlıları Gənclər Təşkilatı tərəfindən “20 Yanvar – Qan Yaddaşımız” adlı konfrans, Finlandiyada “Azəri-Fin” Dostluq Cəmiyyəti tərəfindən “Qara Yanvar” adlı ədəbi-bədii kompozisiya nümayiş etdiriləcək. 20 yanvar Ümumxalq hüzn günü Gürcüstan, Qazaxıstan, Özbəkistan, Qırğızıstanda yaşayan azərbaycanlılar tərəfindən də qeyd olunacaq. Türkiyənin Ankara, İstanbul, İzmir, Kocaeli, Balıkesir, Adana, Antalya, Edirne və digər şəhərlərində 20 yanvar hadisələrinə həsr olunmuş konfrans və dəyirmi masalar keçiriləcək, fotosərgilər təşkil ediləcək. 20 Yanvar faciəsinin 22-ci ildönümü ərəfəsində Birləşmiş Ərəb Əmirliklərində fəaliyyət göstərən “Azərbaycan” Cəmiyyətinin sədri Samir İmanov Dubay Əmirliyinin hökumət nümayəndələri ilə görüşərək onlara 20 yanvar faciəsi barədə ətraflı məlumat verib. Cəmiyyət sədri həmçinin Birləşmiş Ərəb Əmirliklərinin hökumət nümayəndələrinə kitab və jurnallar təqdim edib. Misir Ərəb Respublikasında da fəaliyyət göstərən Azərbaycan diasporunun nümayəndələri tərəfindən bu ölkənin ictimaiyyətinə, həmin ölkələrdə məskunlaşmış digər millətlərin diaspor nümayəndələrinə 20 yanvar faciəsi barədə məlumat veriləcək, Küveytdə isə faciənin ildönümü ilə əlaqədar “20 Yanvar Şəhidləri” adlı foto sərgi təşkil olunacaq. Birləşmiş Ştatlarda fəaliyyət göstərən Hyuston-Bakı Qardaşlaşmış Şəhərlər Assosiasiyası yanvarın 14-də 20 yanvar faciəsi barədə yerli ictimaiyyəti məlumatlandırmaq məqsədi ilə tədbir keçirib. İsveç Krallığında fəaliyyət göstərən “Yeni Azərbaycan” Cəmiyyəti də 20 yanvar hadisələrinin 22-ci ildönümünə həsr olunmuş tədbir keçirəcək. Tədbirdə 20 yanvar şəhidlərinin xatirəsi yad olunacaq, sənədli film nümayiş etdiriləcək, 22 il əvvəl baş vermiş qanlı hadisələrin canlı şahidləri xatirələrini danışacaqlar. “Yeni Azərbaycan” cəmiyyətinin sədri Tahir Əsədullayevin təşkilatçılığı ilə baş tutacaq tədbirdə İsveç Krallığında fəaliyyət göstərən digər Azərbaycan diaspor təşkilatlarının, o cümlədən Azərbaycan Federasiyası İsveç, İsveç Azərbaycanlıları Konqresinin nümayəndələri də iştirak edəcəklər. ABŞ azərbaycanlıları şəbəkəsi eyni zamanda 20 Yanvar hadisələrinin 22-ci ildönümü ilə bağlı yeni kampaniyaya – məktub göndərmə kampaniyasına start verib. Birləşmiş Ştatların rəsmi şəxslərinə ünvanlanan məktublarda deyilir ki, 1990-cı il yanvarın 19-dan 20-nə keçən gecə sovet qoşunlarının Bakıya hücumu nəticəsində 170 dinc sakin qətlə yetirilib, 321 nəfər itkin düşüb, 700-dən çox adam yaralanıb, yüzlərlə insan həbs edilib. Kanadada fəaliyyət göstərən Alberta-Azərbaycan Mədəniyyət Mərkəzi və Kanada-Azərbaycan Təşkilatlar Assambleyasına daxil olan təşkilatlar tərəfindən müvafiq olaraq ölkənin Kalqari və Ottava şəhərlərində 20 yanvar faciəsi qurbanlarının xatirəsi yad ediləcək. Latın Amerikasındakı Azərbaycan Assosiasiyası Azərbaycanın Meksikadakı səfirliyi ilə birlikdə 20 yanvar şəhidlərinin xatirəsini yad etmək məqsədilə anım mərasimi keçirəcək. 20 Yanvar faciəsinin 22-ci ildönümü Avstraliyada da qeyd ediləcək. Belə ki, Avstraliyada fəaliyyət göstərən Avstraliya Dostluq Cəmiyyəti 20 yanvar hadisələrinin 22-ci ildönümünə həsr olunmuş konfrans keçirəcək, ictimaiyyətə sovet hərb maşınının Azərbaycan xalqına qarşı xüsusi amansızlıqla törətdiyi terror aktı barədə məlumat verəcək. 20 Yanvar faciəsinin 22-ci ildönümü ilə bağlı Rusiya Federasiyası və onun subyektlərində də genişmiqyaslı tədbirlərin keçirilməsi nəzərdə tutulub. Belə ki, Rusiya Federasiyasının Moskva, Sankt-Peterburq, Yakaterinburq və digər şəhərlərində faciənin ildönümü qeyd olunacaq, şəhidlərin ruhu ehtiramla yad ediləcək. Ümumrusiya Azərbaycan Konqresi, Rusiyanın Azərbaycanlı Gənclər Təşkilatı və digər Azərbaycan təşkilatlarının iştirakı ilə keçiriləcək konfrans, dəyirmi masa və seminarlarda Azərbaycan tarixinə faciə ilə yanaşı həmçinin qəhrəmanlıq salnaməsi kimi həkk olunmuş 22 il əvvəl baş vermiş hadisələr təhlil olunacaq. Murmanskda isə Azərbaycan tələbələri, Ümumrusiya Azərbaycan Konqresinin regional şöbəsinin və Rusiyanın Azərbaycanlı Gənclər Təşkilatının fəalları tərəfindən 20 Yanvar faciəsinə həsr olunmuş elmi-praktik konfransın keçirilməsi nəzərdə tutulub, Tədbir zamanı 20 Yanvar faciəsini özündə əks etdirən sənədli film nümayiş etdiriləcək, fotosərgi təşkil olunacaq. Ukrayna, Belarus və Moldovada da 20 yanvar faciəsinin 22-ci ildönümünə həsr olunmuş tədbirlər keçiriləcək, şəhidlərin əziz xatirəsi böyük ehtiramla anılacaq.. Ümumiyyətlə, dünyanın müxtəlif ölkələrində yaşayan azərbaycanlıların 20 yanvar hadisələrinin 22-ci ildönümünə və şəhidlərimizin xatirəsinə həsr olunmuş tədbirləri yanvar ayının sonunadək davam edəcək.

Süleyman İsmayılbəyli

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2012.- 20-23 yanvar.- S.15.