"Korrupsiyaya qarşı mübarizə dövlətin həyata keçirdiyi şüurlu siyasətdir"

Vasif Mövsümov: “Bəzi məmurların da belə təbliğ etdiyi kimi korrupsiyaya qarşı mübarizə kompaniya xarakteri daşımır”

“Korrupsiyaya qarşı mübarizə nə qədər effektli həyata keçirilir və bu istiqamətdə müsbət addımlar atılırsa, bir o qədər bu mübarizəyə qarşı məmur müqaviməti başlayır”

Nazirlər Kabinetinin 2011-ci ilin sosial-iqtisadi yekunları və 2012-ci ildə qarşıda duran vəzifələrlə bağlı iclasında prezident İlham Əliyevin korrupsiya və rüşvətxorluğa qarşı mübarizənin bundan sonra da davam etdirilməsi barədə verdiyi tapşırıq və tövsiyyələrə əsasən sözügedən sahədə növbəti addımların atılacağı ümidi yaradıb. Məlum toplantıdan sonra bir neçə dövlət orqanında korrupsiya və rüşvətxorluq hallarına yol vermiş şəxslərin tutduqları vəzifələrdən kənarlaşdırılması da belə deməyə əsas verir. Korrupsiyaya Qarşı Mübarizə Fondunun icraçı direktoru Vasif Mövsümov da hesab edir ki, korrupsiya və rüşvətxorluğa qarşı mübarizə getdikcə daha effektli aparılacaq. Fondun icraçı direktorunun sözlərinə görə, bir çoxlarının qeyd etdiyi kimi korrupsiyaya qarşı mübarizə kampaniya xarakteri daşımır və bu dövlətin həyata keçirdiyi bir siyasətdir. Vasif Mövsümov Korrupsiyaya Qarşı Mübarizə Fondunun korrupsiya və rüşvətxorluq hallarına qarşı mübarizə istiqamətində həyata keçirdiyi tədbirlər və bu kimi neqativ hallara qarşı aparılan mübarizəyə cəmiyyətin nümayiş etdirdiyi mövqe barədə də danışıb.

-Vasif müəllim, keçən il korrupsiya və rüşvətxorluğa qarşı mübarizə istiqamətində həyata keçirilən tədbirlər, atılan addımları necə dəyərləndiririniz?

-Keçən ilin yanvar ayından etibarən Korrupsiyaya Qarşı Mübarizə Fonduna daxil olan şikayətlər artmağa başladı. Çünki dövlət səviyyəsində korrupsiyaya qarşı mübarizə istiqamətində atılan addımlar, həyata keçirilən tədbirlər öz nəticəsini verirdi. Təxminən keçən ilin ortalarına qədər vətəndaşlar tərəfindən fonda daxil olan şikayətlər artmağa başladı. Bu tendensiya keçən ilin yayına qədər davam etdi. Sonradan isə vətəndaşlar tərəfindən edilən şikayətlərin sayı azalmağa doğru getdi. Ümumiyyətlə, korrupsiyaya qarşı mübarizə nə qədər effektli həyata keçirilir və bu istiqamətdə müsbət addımlar atılırsa, bir o qədər bu mübarizəyə qarşı məmur müqaviməti başlayır. Məmur müqaviməti nəticəsində vətəndaşların şikayətlərinin baxılması işində hansısa süründürməçilik olduğu halda vətəndaşların şikayətlərin sayı da azalmağa doğru gedir. Bəlkə də bu artıq vətəndaşların problemlərinin olmaması ilə bağlıdır. Ancaq hesab edirəm ki, bu elə deyil. Problemlər var, qalmaqdadır. Korrupsiya və rüşvətxorluğa qarşı nə qədər çox mübarizə aparılırsa, bir o qədər müqavimət yaranır. Daha dəqiq desək dövlət orqanlarında yol verilən süründürməçilik halları, vətəndaşların ərizə və şikayətlərinə baxılmasında yaranan problemlər müraciətlərin azalmasına gətirib çıxarır.

-Ayrı-ayrı dövlət orqanlarında fəaliyyət göstərən qaynar xətlər vətəndaşların ərizə və şikayətlərinin həllində nə dərəcə də müsbət rol oynayır?

-Vətəndaşlar tərəfindən edilən ərizə və şikayətlərə baxılmasında qaynar xətlərin çox böyük rolu var. Ancaq təəssüflər olsun ki, korrupsiya və rüşvətxorluq halları ilə bağlı vətəndaşların şikayətlərinə baxılmasında bizdə yalnız 161 xidməti fəaliyyət göstərir. Digər bir tərəfdən vətəndaşlar çox zaman hara müraciət etməli olduqları yeri bilmirlər. Vətəndaş-məmur özbaşınalığı, sahibkarlıq fəaliyyətinə qeyri-qanuni müdaxilə halları ilə hara müraciət etməli olduğunu dəqiq bilmir. Bu da öz növbəsində cəmiyyətdə baş verən bu kimi neqativ hallarla bağlı müraciətlərin azalmasına səbəb olur.

-Sizcə korrupsiya və rüşvətxorluğa qarşı mübarizə istiqamətində daha çox nəyə fikir vermək lazımdır?

-Hesab edirəm ki, əsas diqqəti vətəndaşların ərizə və şikayətlərinə baxılması məsələsinə yönəltməliyik. Bu gün də həmin mənfi hallar qalmaqdadır ki, vətəndaşın şikayət ərizəsi yenidən onun şikayət etdiyi dövlət orqanına göndərilir. Təəssüflər olsun ki, yenə də bu cür mənfi hallarla rastlaşırıq. On görə də, şikayətlərin qəbul olunmasında təkmilləşməyə ehtiyac var. Həmçinin Azərbaycanda mərkəzləşdirilmiş qaynar xəttin olmasına çox böyük ehtiyac var. Daxili İşlər Nazirliyinin 102 xidməti kimi xidmətin olmasına ehtiyac var ki, operativ şəkildə şikayətlərə baxılsın. Bu məsələlərin həllində təkmilləşməyə çox böyük ehtiyac var. Hamımız bilirik ki, dövlət orqanlarında daxili nəzarət qurumları fəaliyyət göstərir. Lakin təəssüflər olsun ki, daxili nəzarət qurumları vətəndaş cəmiyyətinin nəzarətindən kənardır. Həmin daxili nəzarət qurumlarına vətəndaş nəzarətinin artırılması zəruridir.

-Prezident İlham Əliyev bu günlərdə Nazirlər Kabinetinin 2011-ci ilin yekunlarına dair iclasında bir daha korrupsiya və rüşvətxorluq hallarına qarşı mübarizənin zəruriliyini qeyd etdi. Sizcə, sözügedən istiqamətdə yaxın vaxtlarda yenidən ciddi addımlar atılacaqmı?

-Əvvəlcə onu qeyd edim ki, korrupsiyaya qarşı mübarizə heç də bir kampaniya deyil. Bəzi məmurların da belə təbliğ etdiyi kimi korrupsiyaya qarşı mübarizə kampaniya xarakteri daşımır və bu dövlətin həyata keçirdiyi şüurlu siyasətdir. Dövlət başçısı da dəfələrlə bunu qeyd edib. Ona görə də bu siyasət davam etdiriləcək. Korrupsiyaya qarşı mübarizənin davam etdirilməsi bizim dövlətimizə, vətəndaşların rifahına xeyirdir. İlk növbədə isə bu Azərbaycanın özünə lazımdır. Yəni, korrupsiyaya qarşı mübarizə davamlı olmalıdır. Çünki bu dövlətimizin inkişafı, daha da çiçəklənməsinə gətirib çıxara bilər. Ona görə də, hesab edirəm ki, korrupsiyaya qarşı mübarizə söylənildiyi kimi davamlı olacaq. Vətəndaşlarımız da buna inanmalıdırlar. Həmçinin onlar bu mübarizədə, korrupsiyaya qarşı müqavimətin yaranmasında yaxından iştirak etməli, dövlətin ortaya qoyduğu siyasi iradəyə dəstək verməlidirlər. Təəssüflər olsun ki, vətəndaşlarımız tərəfindən göstərilən müqavimət kifayət deyil. Ən böyük problemlərdən biri də budur. Dövlət orqanı rüşvət alan əməkdaşını cəzalandırır, ancaq ona rüşvət verən vətəndaş bu cəzadan kənar qalır. Əslində rüşvət verən vətəndaşa da cəza düşür. Ancaq vətəndaş bu cəzadan kənarda qalır. Hesab edirəm ki, bu məsələlərə də diqqət yetirilməlidir. Rüşvət verən də bir vətəndaş kimi öz məsuliyyətinin başa düşməlidir.

-Korrupsiyaya Qarşı Mübarizə Fondunun ali təhsil müəssisələrində apardığı qış imtahan sessiyasının monitorinqinin nəticələri barədə nə deyə bilərsiniz?

-Hər il olduğu kimi bu il də Korrupsiyaya Qarşı Mübarizə Fondu olaraq ali təhsil müəssisələrində qış imtahan sessiyasının monitorinqi ilə məşğuluq. Nəticədə təhsil sistemində əvvəlki illərə nisbətən müsbət məqamları hiss edirik. Onu nəzərə almaq lazımdır ki, təhsil sistemi cəmiyyətin bir hissəsidir. Əgər bizim cəmiyyətimizdə korrupsiya, rüşvətxorluq aradan qalxarsa bu tədricən təhsil sisteminə də sirayət edəcək. Bu sahəni digərlərindən ayırıb göstərmək əslində düzgün deyil. Çünki cəmiyyətdə qalan problemlər təhsil sistemində də özünü qabarıq şəkildə göstərəcək. Nədən ki, biz hamımız təhsil sisteminə daxilik, onunla əlaqədəyik. Ona görə də təhsildə qalan problemlər cəmiyyətdə qalan problemlərlə eynidir. Biz son illərdə təhsil sistemində atılan müsbət addımları da görürük. Son illərdə imtahan prosesi zamanı tələbə-müəllim təmaslarının aradan qaldırılması ilə bağlı bəzi ali təhsil müəssisələrində çox mühüm addımlar atılıb. Təəssüflər olsun ki, bəzi təhsil müəssisələrində isə bu proses hələlik ləng gedir. Ancaq hələ görüləsi də çox işlər var. Dövlət başçısının elektron hökumətə keçməklə bağlı fərmanı var ki, orada dövlət orqanları qarşısında qoyulan vəzifələr açıq göstərilir. Hesab edirəm ki, təhsil sistemində də buna çox böyük ehtiyac var. Yəni, müəllim-tələbə təması tamamilə aradan qaldırılmalıdır. Ona görə də təhsil sistemində də korrupsiyaya qarşı mübarizə getməlidir.

Süleyman İsmayılbəyli

Olaylar.- 2012.- 31 yanvar.- S.4.