Azərbaycan elitar turist ölkəsinə çevrilməlidir

Eldar Aslanov: “Xidmət səviyyəsinin artırılması üçün daha kompleks tədbirlər gərəkdir”

“Yəni turizm müəssisələrinin insan resursları üzrə strategiyası olmalı, heyətə və onun inkişafına müntəzəm sərmayə qoyulmalı, işə qəbul təbii ki, peşəkar tələblərə uyğun həyata keçirilməlidir”

Bir müddət sonra Azərbaycanda yay turizm mövsümünə start veriləcək. Keçən illə müqayisədə bu il ölkəmizə daha çox turistlərin gələcəyi proqnozlaşdırılır. Bu ərəfədə respublikanın müxtəlif səfalı bölgələrində yeni turizm istirahət mərkəzləri, otellərin istifadəyə verilməsi turizm mövsümünün uğurlu olacağından xəbər verir. Bəs görəsən turizm müəssisələrindəki xidmət səviyyəsi, eləcə də bu sahədə çalışanların bilik və bacarıqları qanedicidirmi? Eləcə də bu sahədə daha ciddi uğurlar əldə etmək üçün hansı addımları atmaq zəruridir? Azərbaycan Turizm İnstitutunun tədris işləri üzrə prorektoru Eldar Aslanov “OLAYLAR”-a müsahibəsində qeyd olunan məsələlərə aydınlıq gətirib. O, çalışdığı Azərbaycan Turizm İnstitutunda bu sahədə daha peşəkar kadrların hazırlanması istiqamətində görülən işlərdən də danışıb.

-Eldar müəllim, Azərbaycan Turizm İnstitutunun prorektoru kimi necə hesab edirsiniz, ölkəmizin turizm potensialından yetərincə istifadə edə bilirikmi?

-Azərbaycan dünya turizm xəritəsində yeni parlayan ulduzdur. Bu günlərdə Bakı dünyada turistlərin ən çox tərcih etdiyi şəhərlər sıralarındadır. Sözsüz ki, ölkəmizin turizm sektorunun inkişafı üçün təbiət, tarix, mədəniyyət, qonaqpərvərlik, mətbəxt və s. potensialı vardır. Son 10-12 ildə turizm sahəsində həyata keçirilən siyasətin mahiyyətində də bu potensialı imkana çevirmək fikri, niyyəti durur. Ölkənin tanıdılmasından tutmuş, tikilən yeni otellərə, açılan yeni peşə məktəbinə qədər bütün bu işlər Azərbaycanın turizm ölkəsi kimi də brend edilməsinə xidmət edir. Amma etiraf etməliyəm ki, bu sahədə görüləcək işlər də çoxdur. Heç təsadüfi deyil ki, Azərbaycan 2020-Gələcəyə Baxış Konsepsiyasında məhz qarşıda duran vəzifələrə xüsusi yer ayrılıb. Azərbaycan yaxın 10 ildə öz turizm potensialını rəqabətədavamlı iqtisadiyyat sahəsinə çevirməyi planlaşdırır. Bunun üçün də 2010-2014-ci illər dövlət proqramı icra edilir. Azərbaycan Turizm İnstitutu təhsilin bütün pillələrində kadr hazırlayır və bu kadrların keyfiyyətinin və sayının artılması üçün müxtəlif işlər, layihələr həyata keçirir. Azərbaycan 365 gün turizmin mövcud olduğu, turizmin fərqli növlərinin bir arada olduğu elitar turizm ölkəsinə çevrilməlidir və bu tapşırığın icrası ən ümdə vəzifəmizdir.

-Bir neçə ay sonra turizm mövsümü başlanacaq. Bu ilki turizm mövsümündə Azərbaycana gələcək turistləri hansı yeniliklər gözləyir?

-Bilirsiz ki, qış turizm mövsümü martın 31-də Şahdağ Yay-Qış Turizm Kompleksinin timsalında belə demək olar ki, bağlandı. Hələlik qismən istifadəyə verilmiş bu kompleksdə artıq 10 minlərlə yerli turist istirahət etmişdir. Məlumatlara görə, əgər kompleks daha çox yer təklif etsəydi, bu rəqəm daha da çox olardı. Həmçinin Novruz turizmi dediyimiz Novruz bayramı vaxtı daxili və xüsusilə qonşu ölkələrdən gələn turistlər də azlıq təşkil etməmişdir. Məncə qış mövsümü uğurla başa çatmışdır. Qarşıdan isə ənənəvi yay turizm mövsümü gəlir və buna hazırlıqlar da artıq başlayıb. Həm sahil bölgələri, həm çimərliklər buna ciddi hazırlaşmalıdırlar. Bildiyim qədərilə Mədəniyyət və Turizm Nazirliyinin turizm bölgələrində müvafiq monitorinqləri də olacaq. Bu mövsümün xüsusi yenilikləri olmayacaq. Amma əmin edə bilərəm ki, əvvəlki illərlə müqayisədə daha maraqlı, daha peşəkar və daha münasib qiymətlərlə turistlər qəbul ediləcəkdi. Görülən işlər də bunu deməyə əsas verir. Xüsusilə otellərdə asudə vaxtın səmərəli təşkili üçün yeni səylərin olduğunu deyə bilərəm.

-Bir sıra hallarda Azərbaycan Turizm İnstitutunda təhsil alan tələbələrin bu sahədə bilik və bacarıqlarının kifayətqədər olmadığı bildirilir. Bu kimi iddialara qarşı nə deyərdiniz? Ümumiyyətlə, yaxın vaxtlarda Turizm İnstitutunun tələbələrini bu sahədə daha qabaqcıl ölkələrin təcrübəsi ilə tanış etmək üçün hansısa tədbirlər nəzərdə tutulurmu?

-Azərbaycan Turizm İnstitutu 2006-cı ildə fəaliyyətə başlamış ali məktəb olaraq artıq 3 ildir ki, öz məzunlarını əmək bazarına təqdim edir. İndiyədək 563 nəfər məzunumuz olub və Azərbaycan Turizm İnstitutu Məzunlar Assosiasiyasının verdiyi məlumata görə, onların içərisində iş tapmayan tələbələr demək olar ki, yoxdur. Əsasən də məzunlarımız daha çox 4 və ya 5 ulduzlu otellərdə işləyirlər. Deyə bilmirəm kim harda necə yoxlayıb ki, bizim məzunların bilik bacarıqları kifayət qədər deyil. Amma onu deyə bilərəm ki, Azərbaycan Turizm İnstitutu ölkədə ilk dəfə olaraq ikili diplom proqramı (Avstriyanın Krems Universiteti ilə ) və bu proqram üzrə məzunları olan ali məktəbdir. Artıq 57 nəfər gənc həm Azərbaycan Turizm İnstitutunun, həm də Krems Universitetinin diplomunu alıb. Həmçinin Azərbaycan Turizm İnstitutu ölkədə praktika semestri tətbiq etməklə də yeniliyə imza atıb. Belə ki, Azərbaycan Turizm İnstitutu tələbələri 6-cı semestri (təxminən 20-22 həftə) praktikada keçirlər və bununla peşəkar bacarıqlar toplayırlar. Bura hər il xarici ölkələr yay tanışlıq təcrübələrinə gedən tələbələri, Ümumdünya Turizm Təşkilatının turizm təhsil keyfiyyət sertifikatını, aparılan tətbiqi tədqiqatları, onların nəticələrini, təhsilin bütün pillələrində kadr hazırlığına nail olmağımızı (100-dək magistr, 39 doktorant), bu ildən ikili diplom magistr proqramına başlamasını, bir ildir fəaliyyətə başlayan Bakı Turizm Peşə Məktəbində 500 şagirdin müxtəlif turizm sahəsi üzrə peşələrə yiyələnmələrini də əlavə etsək, o zaman məncə hazırlanan kadrların mövcud tələblərə nə qədər cavab verdiyi ortaya çıxmış olar. Amma bu o demək deyil ki, keyfiyyət bizi tam qane edir. Təbii ki, bizim əsas işimiz keyfiyyətin davamlı olaraq artmasını təmin etmək və dünyanın qabaqcıl turizm təhsili müəssisələri ilə eyni səviyyəyə çıxmasını təmin etmək, hətta region ölkələri üçün kadr hazırlığını belə həyata keçirməkdir.

-Turizm müəssisələrindəki xidmət səviyyəsi sizi qane edirmi və bununla bağlı konkret nələri təklif edərdiniz?

-Turizm müəssisələrindəki xidmət səviyyəsi təbii ki, qismən qane edir. Ona görə ki, xidmət səviyyəsi sonsuz prosesdir. Bəzilərində qanedici, bəzilərində isə təəssüflər olsun ki, bəzən səviyyə aşağı olur. Bunun üçün təklifimin ilk növbədə həmin müəssisələrin öz işçilərini təşkil olunan sertifikat kurslarına cəlb edilməsində görürəm. Hər bir işçi də maraqlı olmalıdır ki, öz bilik və bacarıqlarını daima yeniləsin və irəliyə doğru aparsın. Təhsil və treninqlər də bilik və bacarıqlarının daha artırılmasında əsas vasitələrdən biridir. Amma xidmət səviyyəsinin artırılması üçün daha kompleks tədbirlər gərəklidir. Yəni turizm müəssisələrinin insan resursları üzrə strategiyası olmalı, heyətə və onun inkişafına müntəzəm sərmayə qoyulmalı, işə qəbul təbii ki, peşəkar tələblərə uyğun həyata keçirilməlidir. Bütün bu işlər ilə xidməti personalın peşəkarlığı artırılmalı və nəticədə xidmət səviyyəsinin yüksəldilməsinə nail olunmalıdır.

Süleyman İsmayılbəyli

Olaylar.- 2013.- 9 aprel.- S.13.