“Ölkədən kənarda gənclərin fəaliyyəti...”

Samir Musayev: “Dövlətimizin təbliği, xalqımızın tarixi həqiqətlərinin dünya ictimaiyyətinə düzgün çatdırılması üçün görülən işlərdən ibarətdir”

Litva Azərbaycanlı Gənclər Təşkilatının sədri Samir Musayevin “OLAYLAR”-a müsahibəsi

-Samir bəy, Litva Azərbaycanlı Gənclər Təşkilatı olaraq bu il üçün fəaliyyət proqramınızda nələr nəzərdə tutulub və cari ildə əsas fəaliyyət istiqamətləriniz nədən ibarət olacaq?

-Ümumiyyətlə ölkədən kənarda gənclərin fəaliyyəti dövlətimizin təbliği, xalqımızın tarixi həqiqətlərinin dünya ictimaiyyətinə düzgün çatdırılması üçün görülən işlərdən ibarətdir. Bu işin tərkib hissələrindən biri də təqvimimizdə xalqımız və dövlətimiz üçün mühüm olan günlərin qeyd edilməsidir. Bundan əlavə bir Litva Azərbaycanlı Gənclər Təşkilatı olaraq yaradıcılığımızdan irəli gələn yenilikçi ideyaları reallaşdırmaq üçün digər tədbirlərin təşkilini nəzərdə tuturuq.

-Yaxın aylarda təşkilat olaraq Litvada hansısa tədbirlər və ya layihələr keçirməyi nəzərdə tutursunuzmu və bu tədbirlər hansılardır?

-Litva Azərbaycanlı Gənclər Təşkilatının həyata keçirəcəyi tədbirlərin siyahısına Litvanın 6 şəhərində Azərbaycan istehsalı olan qısametrajlı və ingilis dilli alt yazılı filmlərdən ibarət film gecələrinin keçirilməsi daxildir. Həmçinin Azərbaycanın turizm potensialını, mətbəxini, mədəniyyətini əks etdirən foto şəkillərdən ibarət sərgi, orta təhsil müəssisələrində isə “məktəblilərdən ibarət baza hazırlanması üçün uzunmüddətli tədbirlərin həyata keçirilməsi bu ilki icra planımızda əsas yer tutur. Ümid edirəm ki, qeyd etdiyim tədbirləri cari il ərzində Azərbaycan Respublikasının Litva Respublikasındakı fövqəladə və səlahiyyətli səfirliyi başda olmaqla, tələbələrimizin birgə iştirakı və dəstəyi ilə uğurla həyata keçirəcəyik.

-Bir müddət öncə sizin də iştirak etdiyiniz Dünya Azərbaycanlı Gənclər Birliyinin bir ili tamam oldu. Azərbaycan kənarda diaspora fəaliyyəti ilə məşğul olan bir təşkilat rəhbəri olaraq Dünya Azərbaycanlı Gənclər Birliyinin bir illik fəaliyyətini necə qiymətləndirirsiniz?

- Öncədən onu nəzərinizə çatdırım ki, sizin vurğuladığınız həmin birliyin yaradılması ilə nəticələnən qurultayın mən də iştirakçılarından idim və müzakirə olunan məsələlər, qəbul edilən qərarların şahidi və iştirakçısı oldum. Dəyər vermək baxımından isə, ölkə xaricində Azərbaycanı təbliğ edən bir gənc kimi qurultayı və nəticələrini yüksək qiymətləndirdim. Tədbirdə Azərbaycanda və xaricdə fəaliyyət göstərən gənclər təşkilatlarının nümayəndələrindən, dünyanın nüfuzlu ali təhsil müəssisələrində təhsil alan fəal azərbaycanlı gənclərdən, həmçinin Azərbaycan diaspor təşkilatlarının rəhbərlərindən ibarət 500-dək nümayəndə və qonaq iştirak edirdi. Qurultayda xaricdəki diaspor təşkilatlarının işi və Azərbaycanın lobbiçilik fəaliyyətinə dair məsələlər müzakirə edildi və müvafiq qərarlar qəbul olundu. Dünyanın müxtəlif ölkələrində yaşayan və fəaliyyət göstərən azərbaycanlı gəncləri vahid mərkəzdən koordinasiya etmək və onları bir-biri ilə sıx əlaqələndirmək üçün Dünya Azərbaycanlı Gənclər Birliyinin Nizamnaməsi qəbul edildi, rəhbər orqanlar seçildi. Həmçinin, azərbaycanlı gənclərin yaşadıqları cəmiyyətə inteqrasiyası məsələləri, Azərbaycan həqiqətlərinin dünya ictimaiyyətinə çatdırılmasında yeni təbliğat üsullarından istifadə və müasir informasiya texnologiyalarının tətbiqi, Azərbaycan gənclərinin lobbi quruculuğu və digər məsələlər qurultayda geniş müzakirə edildi. Nəticədə sadaladığım bu məsələlər Azərbaycan gənclərinin xaricdəki uğurlu fəaliyyətlərinin qurulmasında və davamlı fəaliyyətində özünü göstərdi. Bütünlüklə bunları Dünya Azərbaycanlı Gənclər Birliyinin illik fəaliyyəti kimi qiymətləndirmək olar. Ümumiyyətlə, Dünya Azərbaycanlı Gənclər Birliyinin təsis edilməsi Azərbaycandan kənarda təhsil alan və ya yaşayan gənclərimizin diaspora işinə daha yaxından cəlb edilməsi, onların potensialından səmərəli istifadə olunması baxımından mühüm əhəmiyyət daşıyan bir hadisə sayıla bilərdi.

-Litva Azərbaycanlı Gənclər Təşkilatının ümummilli lider Heydər Əliyevin anadan olmasının 90 illiyi və Respublika Günü ilə bağlı hansısa tədbirləri nəzərdə tutulurmu?

- Vurğuladığınız mühüm günlərlə əlaqədar olaraq Litva Azərbaycanlı Gənclər Təşkilatı tərəfindən silsilə tədbirlər, icra planı hazırlanıb və plana uyğun olaraq tədbirlərə hazırlıq işləri yüksək səviyyədə həyata keçirilir. Ümummilli lider Heydər Əliyevin anadan olmasının 90 illik yubileyi ilə əlaqədar olaraq Litvanın uşaq simfonik orkestri Azərbaycanın klassik, simfonik mahnılarından ibarət böyük bir konsert planı hazırlayır. Həmçinin, Heydər Əliyevin uşaqlıq, gənclik ve siyasi xadimliyi dövrlərini əks etdirən şəkillərdən ibarət Litvanın Kaunas ve Vilnius şəhərlərində sərgi təşkil ediləcək. Respublika günü üçün, musiqi xadimlərimizin iştirakı ilə daha bir konsert proqramı nəzərdə tutulub. Qeyd edilən tədbirlər səfirliyimizin təskilati dəstəyi ilə həyata keçirildiyindən, ümid edirəm ki, hər bir tədbirdə olduğu kimi sonrakı ayda olacaq tədbirlərimizdə də istədiyimiz nəticəni əldə etmiş olacağıq.

-Son aylar Azərbaycan diasporunu parçalamağa cəhdlər göstərilir. Siz Litva Azərbaycanlı Gənclər Təşkilatının sədri olaraq bunu necə qarşılayırsınız?

-Bu təbii qarşılana bilən bir məsələdir. Uğurla addımlayan, öndə olan insanın, hətta dövlətin arxasınca həmişə danışılır, yalan ifadələr işlədilir və ya yolunu əngəlləməyə çalışırlar. Bu bir insan psixologiyasıdır ki, çox təəssüf öz əksini dövlətlərarası münasibətlərdə də tapır. Çünki Azərbaycan qürurla addımlayan, sürətlə yüksələn bir yol keçən və təbii sərvətlərlə bol bir ölkə olduğu üçün, bunu həzm edə bilməyənlər sözsüz ki olacaq. Bunların da əksəriyyəti kənar qüvvələrdir. Və onlar da hər vəchlə ölkənin daxilində, regionda və beynəlxalq aləmdə, həmçinin xalq diplomatiyamız olan diasporanın işlərini əngəlləməyə çalışırlar. Amma inanın ki, ciddi nəticə əldə edə bilməyəcəklər. Çünki işimizi düzgün qurulmuş və hazırlanmış bir fəaliyyətlə davam edirik. Ona görə şairin qəzəlində də deyildiyi kimi, “düşmən olan dünya qədəri bizlərə batmaz, əgər ki bizlərin arası möhkəm olanda.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 20-22 aprel.- S.15.