“Məhkumlar” peşəkar və uğurlu layihədir

Kazım Abdullayev: “Mövzuları seçərkən ehtiyatlı olmaq lazımdır”

Müsahibimiz Əməkdar artist Kazım Abdullayevdir

- Kazım müəllim, necə oldu ki, hazırda Tahir obrazına çəkildiyiniz “Məhkumlar” bədii televiziya serialına dəvət aldınız?

- İlk öncə onu qeyd edim ki, “Məhkumlar” serialının rejissoru, istedadlı, gənc dostumuz olan Yaşar Əhmədovla çoxdan tanışam. Bu, bizim ilk işimiz deyil. Biz onunla birinci dəfə ANS televiziyasının istehsalı olan “Qaydasız döyüş” serialında da işləmişik. Xüsusi vurğulamaq istəyirəm ki, “Qaydasız döyüş” ümumiyyətlə, Azərbaycan teleməkanında ilk serial olub. Bu serialı yarıya qədər məhz Yaşar Əhmədov çəkib. Sonra o, müəyyən səbəblərə görə bu işdən uzaqlaşdı. Ondan sonra Yaşar müəllim məni “Oscar production”un istehsalı olan “Nəfs” filminə dəvət etdi. Və o filmdə də biz bir yerdə işlədik. O ki qaldı “Məhkumlar”a, bu layihə başlayanda, sözün düzü, mən ilk gündən Yaşar müəllimdən təklif gözləyirdim. Hər halda, bu təklif gec də olsa, oldu. Görünür, qismət bu günəymiş. Və o məni dəvət edəndə iş üslubuna, iş xüsusiyyətinə bələd olduğum üçün çox da fikirləşmədən razılığımı verdim. Baxmayaraq ki, hal-hazırda mən paralel olaraq daha iki serialda da çəkilirəm. Onlardan biri “Qarabağnamə”di, digərininsə hələlik adı tam dəqiqləşməyib. Etik cəhətdən doğru olmadığı üçün şərti adını demək istəmirəm. Yeri gəlmişkən, teatrda da işlərim çoxdu. Tamaşalar, məşqlər... Amma bütün bunlara rəğmən Yaşar Əhmədovla işləmək mənə xoş olduğundan onun dəvətini qəbul etdim. Ssenarini oxuduqdan sonra oynayacağım obraz da ilk baxışdan çox xoşuma gəldi. Görək, sonrası necə olacaq. Bilirsiniz, serial tamaşadan, tammetrajlı filmdən fərqlənir. Hər hansı pyesdə, tammetrajlı film ssenarisində oynayacağı obraz xarakterinə görə, bütün xüsusiyyətlərinə, incəliklərinə qədər aktyora tam bəlli olur. Serialda isə məsələ bir az başqa cürdür. Cünki ssenari tədricən yazılır və hadisələrin necə nəticələnəcəyi oyunçuya demək olar ki, məlum olmur. Və bu da istər-istəməz müəyyən çətinliklər yaradır. Hər halda, çalışacağıq ki, bizə göstərilən etimadı doğruldaq, ortaya tamaşaçının rəğbətini qazanan, adımıza layiq bir iş qoyaq.

- Hal-hazırda dövlətin maddi dəstəyi ilə ölkədə bir-birinin ardınca seriallar çəkilməkdədir. Artıq bu prosesin ikinci mərhələsinə də start verilib. Bildiyiniz kimi bu günlərdə dövlət başçısı bu işə yardım məqsədilə 6 milyon manat ayrılması üçün sərəncam verdi. Dövlətin diqqəti, qayğısı göz önündədir. Bir peşəkar kimi bu prosesə, ümumilikdə, çəkilən seriallara münasibətinizi bilmək maraqlı olardı. Sizcə, hazırda yayımlanan seriallar cəmiyyətə nə dərəcədə təsir göstərə bilir?

- Bütün hallarda dövlətin göstərdiyi bu diqqət, qayğı təqdirəlayiqdi. Şəxsən mən bu məsələylə bağlı ortaya qoyduğu mövqeyə görə cənab prezidenti alqışlayıram. Dünənə qədər bizdə xarici seriallar yayımlanırdı. O seriallar nə qədər istər texniki, istər yaradıcı baxımdan yüksək keyfiyyətə malik olsalar da, unutmaq lazım deyil ki, onlar başqa, bizə tanış olmayan, bir az da yad olan mədəniyyətlərin təzahürləri, nümunələridir. Amma öz seriallarımız nə olursa-olsun məhz bizim haqqımızda olacaq. Ya belə, ya elə, fərqi yoxdur, sonucda bizim mentaletitimizə, bizim mədəniyyətimizə uyğun olacaq. Elə bu amilin özünün cəmiyyətimizin inkişafında, adət-ənənələrimizin təbliğində rolu əvəzedilməz olacaq. Əlbəttə, heç nə birdən yaranmır, hər yeni yaranan mükəmməl olmur. Bütün bunlar üçün zamana ehtiyac var. Nəzərə almaq lazımdır ki, bu gün bu işlə əsasən gənclər məşğul olur. Unutmaq olmaz ki, kinoyla serial arasında çox böyük fərqlər var. Demək olar ki, bunlar tamamilə ayrı-ayrı sahələrdir. Mən bir tərəfdən bu prosesə əsasən gənclərin cəlb olunmasına görə sevinirəm. Digər tərəfdən isə bizim gənc rejissorlara tövsiyyə edirəm ki, peşəkarların xidmətindən, xüsusilə də professional aktyorlardan yararlansınlar. Bu, ümumi işə yalnız xeyir verə bilər. İnkişafın təməlində peşəkarlıq və təcrübə dayanır. Mən başa düşürəm, maddi sıxıntılara görə çox vaxt qeyri-peşəkarlara üstünlük verilir. Amma beş-üç manatdan ötrü bütöv prosesi zərbə altında qoymaq düzgün deyil. Hər hansı serialın baxımlılığını təmin etmək üçün ilk növbədə professional aktyorlara müraciət etmək lazımdır. Digər mühüm problem isə seriallardakı dil və süjet qüsurlarıyla bağlıdır. Və bir də mövzuları seçərkən ehtiyatlı olmaq lazımdır. Əgər bu catışmazlıqlar aradan qaldırılsa, inanıram ki, tezliklə bizim serialların reytinqi ən yüksək həddə olacaq. Bir sözlə, nə qədər çox serial çəkilsə, o qədər də böyük təcrübə əldə olunacaq. Məsələn, mən çox istərdim ki, tariximizi əks etdirən bir nümunə ortaya qoyulsun. Başa düşürəm, tarixi mövzuya müraciət etmək üçün böyük maddi vəsaitə ehtiyac var. Ancaq bu heç də o demək deyil ki, bizim tarixi film çəkməyə gücümüz çatmırsa, bayağı kriminal süjet xəttiylə başımızı qatmalıyıq. Bəzən bir ailənin timsalında bütün cəmiyyətin yaşam tərzinə güzgü tutmaq olar.

- Kazım müəllim, konkret olaraq “Məhkumlar” haqqında – çatışmayan cəhətləri, üstün tərəfləriylə bağlı nə deyə bilərsiniz?

- İlk növbədə məni ən çox sevindirən odur ki, “Məhkumlar”da bir sıra professsionallar, özünü sənətdə çoxdan təsdiq etmiş sənətçilər fəaliyyət göstərir. Mənim Yaşar Əhmədovun təkilifini tərəddüdsüz qəbul etməyimin başlıca səbəblərindən biri də budur. Çünki sən bilirsən ki, getdiyin yerdə peşəkarlarla işləyəcəksən. Bu, çox mühüm şərtdir. “Məhkumlar”da bir sıra tanınmış sənətçilər, Xalq artistləri, Əməkdar artistlər iştirak edir. Elə bu faktın özü “Məhkumlar”ın səviyyəsindən xəbər verir. Arzu edirəm ki, digər rejissorlar da Yaşar Əhmədov kimi işlərinə bu cür diqqət və məsuliyyətlə yanaşsınlar. “Məhkumlar”ın digər seriallardan fərqli və üstün cəhətlərindən biri də odur ki, mətbuatla sıx və ardıcıl şəkildə işləyir. Bu, çox təqdirəlayiq, mühüm amildir. Ümumilikdə, “Məhkumlar” peşəkar və uğurlu layihədir.

- Bu günlərdə - aprelin altısında 60 yaşınızı - yibileyinizi qeyd etdiniz. Bu münasibətlə Sizi təbrik edir, uzun ömür, can sağlığı arzulayırıq. Maraqlıdır, Kazım müəllim, 60 yaşında insan, xüsusilə də sənət adamı, görəsən, özünü necə hiss edir?

- Təbrikə və xoş sözlərə görə təşəkkür edirəm. Belə deyək də, 60 yaş yeni bir mərhələnin başlanğıcıdır. Düşünürəm ki, irəlidə məni vacib bir sınaq, imtahan gözləyir. Çünki arxada qalmış illər ərzində həm həyatda, həm də sənətdə böyük bir təcrübə qazanmışam. Artıq bu təcrübədən layiqincə yararlanmaq zamanıdır. Etiraf edim ki, hal-hazırda özümü heç də 60 yaşında hiss etmirəm. Mənə elə gəlir ki, gəncəm, həm də çox gəncəm. Ləyaqətlə yaşamaq, yaratmaq, sənətə, ən başlıcası isə xalqıma xidmət etmək istəyirəm.

- Siz hazırda “Məhkumlar”da mafiya başçısı olan Tahir obrazını canlandırırsınız. Yeri gəlmişkən, 60 yaşında bir mafiya başçısı rolunu oynamaq Sizdə hansı təəssüratları yaratdı?

- Bu barədə danışmaq istəmirəm. Hər şeyi tamaşaçının öhdəsinə buraxıram. Qoy qiyməti tamaşaçı versin. Tahir bir obrazdır. Xarakter baxımından məndən tamamilə fərqlənir. Mənim borcum işimi peşəkarcasına görməkdən ibarətdir. Şəxsən mənə gəldik də isə, düşünürəm ki, həyatda ləyaqətlə yaşamaqdan qiymətli heç nə yoxdur.

Yağmur

Olaylar.- 2013.- 24 aprel.- S.12.