Məhəmməd Əmin Rəsulzadə

haqqında film çəkiləcək

Cavanşir Feyziyev: “Sovet ideoloqları milli mətbuatın yaranmasında

əvəzssiz xidmətləri olmuş şəxsiyyətləri sıradan çıxarmağa çalışırdılar”

Dekabrın 18-də Mətbuat Şurasında millət vəkili Cavanşir Feyziyevin “Milli mətbuatımız, istiqlal yolumuz” adlı layihəsinin təqdimat mərasimi keçirilib.

Tədbiri giriş sözü ilə açan Mətbuat Şurasının sədri Əflatun Amaşov layihəni mətbuatın inkişafı və dəqiq öyrənilməsi üçün atılmış əhəmiyyətli addım adlandırdı. Ə.Amaşov bildirdi ki, layihə çərçivəsində Azərbaycan mətbuatının yaranması, həmçinin inkişafında xidmətləri olan şəxsiyyətlər haqqında 20-30 dəqiqəlik 12 filmin çəkilməsi nəzərdə tutulub. MŞ sədri qeyd etdi ki, layihənin əsas məqsədi həmin şəxsiyyətlərin mətbuat sahəsindəki fəaliyyətlərinin dəqiq araşdırılıb üzə çıxarılması və cəmiyyətə çatdırılmasıdır: “Həsən bəy Zərdabi, Məhəmməd Əmin Rəsulzadə, Əli bəy Hüseynzadə, Əhməd Ağaoğlu, İsmayıl bəy Qaspıralı, Xədicə Əlibəyova, Üzeyir Hacıbəyov və s. şəxsiyyətlərin fəaliyyətli filmləşdiriləcək”. 1-ci filmin M.Ə.Rəsulzadə haqqında çəkilməsi planlaşdırılır. Bildiyimiz ki, cənab prezident İlham Əliyev M.Ə.Rəsulzadənin 130 illik yubileyinin keçirilməsi haqqında sərəncam verib”. Ə.Amaşov sonra qeyd etdi ki, XIX əsrin sonları XX əsrin əvvəllərində ərəb dilində çıxan 30-a yaxın milli qəzet latın qrafikasına çevriləcək. MŞ sədrinin sözlərinə görə, bu Azərbaycan milli mətbuatının daha ətraflı öyrənilməsini asanlaşdıracaq. Daha sonra çıxış edən C.Feyziyev layihə haqqında tədbir iştirakçılarına məlumat verdi və bildirdi ki, layihənin həyata keçirilməsində əsas məqsəd sovet dönəmində və ayrı-ayrı vaxtlarda fəaliyyətləri qəsdən təhrif edilmiş mətbuat xadimlərini daha dəqiq faktlarla Azərbaycan cəmiyyətinə çatdırmaqdır: “Sovet ideoloqları milli mətbuatın yaranmasında əvəzssiz xidmətləri olmuş şəxsiyyətləri sıradan çıxarmağa çalışırdılar. Biz çalışacağıq ki, bu səhvləri aradan qaldıraq. Çünki mətbuatı yaradanların işi təkcə qəzet çıxarmaq olmayıb, onlar həm də dövlətçiliyin formalaşması və yaranması üçün çalışıblar”. Çıxış edən “OLAYLAR” qəzetinin baş redaktoru, yazıçı-publisist Yunus Oğuz Azərbaycan mətbuatı tarixi ərzində kiril əlifbası ilə çap edilmiş mətbu nəşrlərin latın qrafikasına çevrilməsini təklif etdi və çıxışına bu cür davam etdi: “Həmçinin həmin filimlərin nə üçün çəkilməsi müyyənləşdirilməlidir. Əvvəlcədən bəlli olmalıdır ki, biz bu filmləri özümüz deyib, özümüz eşitdiyimizə görəmi, yoxsa ki, gənc nəslin formalaşması üçün çəkirik? Əgər bu kriteriyalar müəyyənləşməsə, bunun yeni nəslin formalaşmasına o qədər də təsiri olmayacaq.

Çəkilən filmlərdə göstərməliyik ki, Cumhuriyyətin yaranma yollarlı məhz mətbuatdan gəldi. XIX əsrin sonu XX əsrin əvvəllərində yaranan mətbuat milli təfəkkürü formalaşdırıb. Bu da 1918-ci ildə Azərbaycan Xalq Cumhuriyyətinin yaranmasına gətirib çıxardı. Mətbuat insanların yerləşməsini, formalaşmasını, şüurların dəyişməsinə yönəldir. Hökmən çəkiləcək filmlərin əvvəlcədən auditoriyasını müəyyənləşdirməliyik. Elə-belə çəksək, bu heç bir effekt verməyəcək. Filmləri mətbuatın dövlətçiliyin formalaşmasında və yaranmasında rolu istiqamətində çəksək, bu daha əhəmiyyətli olacaq. Bir də qeyri-leqal mətbuata da toxunulmalıdır. Çünki indiki məqamda ölkədə qeyri-leqal mətbuat yox dərəcəsindədir. O vaxtı “Dirçəliş”, “Yeni Müsavat”, “Azad söz”, rus dilində “Svobodanya Mısli” və s. kimi qəzetlər çıxırdı. İndi bu tip mətbu orqanlardan əsər-əlamət yoxdur. İnsanların şüurunun formalaşması və təkmilləşməsi mətbuatdan keçir. Hər halda bu cür layihələrin həyata keçirilməsi milli mətbuatımızın inkişafı üçün təqdirəlayiq işdir”. Çıxışçılar “Xalq Cəbhəsi” qəzetinin baş redaktoru Elçin Mirzəbəyli, “Şərq” qəzetinin baş redaktoru Akif Aşırlı, “Paralel” qəzetinin baş redaktoru Tapdıq Abbas, “İki Sahil” qəzetinin baş redaktoru Vüqar Rəhimzadə, “Azərbaycan” qəzetinin baş redaktoru Bəxtiyar Sadıqov və digər iştirakçılar layihəni yüksək qiymətləndirərək, bu barədə öz təklif və fikirlərini bildirdilər. Yekun nitq söyləyən Ə. Amaşov bildirdi ki, layihə çərçivəsində türkdilli jurnalistlərin film festivalının keçirilməsi də planlara daxildir.

Mənsur Rəğbətoğlu

Olaylar.- 2013.- 19 oktyabr.- S.9.