Diaspor təşkilatları

Həmrəylik Gününə hazırlaşır

31 dekabr-Dünya Azərbaycanlılarının birlik şüarının simvolik günüdür. Bu bayram ayrı-ayrı ölkələrdə yaşayan azərbaycanlılarla əlaqələr qurmaq, onlar arasında birlik və həmrəylik yaratmaq işində mühüm rol oynayır. Dünya Azərbaycanlılarının Həmrəylik gününün qeyd edilməsi bütün dünya azərbaycanlıları tərəfindən artıq bir zərurətə və mənəvi ehtiyaca çevrilib.

Azərbaycanlıların yaşadıqları, fəaliyyət göstərdikləri və çoxluq təşkil etdikləri Avropa ölkələrində bu tendensiya özünü yüksək səviyyədə göstərir. Bu da ondan irəli gəlir ki, Avropadakı Azərbaycan diaspor təşkilatları öz qüvvələrini səfərbər etməkdə ardıcıldırlar və bu ayrı-ayrı cəmiyyət üzvləri üçün bir araya gəlmək, cəmiyyət və qurumlar halında birləşmək baxımından dünyanın sivil nöqtələrindən biri olan Avropada mühüm əhəmiyyət kəsb edir. 31 dekabr - Dünya Azərbaycanlılarının Həmrəylik Günü bayramı dünyanın 100-dən çox ölkəsində azərbaycanlılar tərəfindən qeyd olunur. Həmrəylik günü Azərbaycan diasporu üçün ən mühüm bayrama çevrilib, Yeni il isə ikinci plana keçib. Həmrəylik gününü hətta milliyyətcə azərbaycanlı olmayıb, lakin Azərbaycanda doğulub böyümüş, Azərbaycan əsilli diaspor nümayəndələri də qeyd edirlər. Dünya Azərbaycanlılarının Həmrəylik Gününün əsası 1989-cu il dekabrın axırlarında Naxçıvanda sərhədlərin (SSRİ-İran sərhədləri) dağılması zamanı qoyulub. Şimali və Cənubi Azərbaycan arasındakı sərhəd dirəkləri dağıdıldı. Bu vaxt İstanbulda türk dilli xalqların Konfransı keçirilirdi. Konfrans da dünya azərbaycanlılarının həmrəyliyinin qeyd olunmasına qərar verdi.1991-ci ilin 16 dekabrında Naxçıvan Muxtar Respublikası Ali Məclisinin sədri Heydər Əliyev dünya azərbaycanlılarının birliyini yaratmağın əhəmiyyətini nəzərə alaraq dekabrın 31-ni Dünya Azərbaycanlılarının Həmrəylik Günü elan etdi. Beləliklə, bütün azərbaycanlılar üçün əziz olan 31 dekabr Dünya Azərbaycanlılarının Həmrəylik Günü bayram edilir. Azərbaycanlılar bu gün ilə fəxr edir və onu qürurla qeyd edirlər.

Bu günlərdə Azərbaycandan kənarda müxtəlif ölkələrdə fəaliyyət göstərən fəaliyyət göstərən diaspor təşkilatları da 31 dekabr-Dünya Azəırbaycanlılarının Həmrəylik Gününə hazırlaşır. Artıq bu istiqamətdə xarici ölkələrdə müxtəlif tədbirlərə start da verilib.

Azərbaycan-Rumıniya Gənclər və Mədəniyyət Assosiasiyasının təşəbbüsü və Azərbaycan Respublikası Dövlət Neft Şirkətinin Rumıniya nümayəndəliyinin dəstəyi ilə Buxarestdə Dünya Azərbaycanlılarının Həmrəylik Günü münasibətilə geniş tədbir keçirilib. Tədbirdə Azərbaycan Respublikasının Rumıniyadakı səfirliyi, Heydər Əliyev Fondunun, Azərbaycan Respublikası Dövlət Neft Şirkətinin Rumıniya nümayəndəliklərinin əməkdaşları, Rumıniya-Azərbaycan Dostluq Cəmiyyəti, Rumıniya-Azərbaycan İkitərəfli Sənaye və Ticarət Palatası, Rumıniya-Azərbaycan Mədəniyyət və Gənclər Assosiasiyasının üzvləri, diasporun təmsilçiləri, Rumıniyada yaşayan, təhsil alan azərbaycanlılar və Azərbaycansevər rumınlar iştirak ediblər. Dövlət Neft Şirkətinin Rumıniya nümayəndəliyinin direktoru Həmzə Kərimov iştirakçıları salamlayaraq, tədbirin əhəmiyyətindən danışıb. Həmzə Kərimov bayramın Azərbaycan xalqının birlik rəmzi olması, bu günün ayrı-ayrı ölkələrdə yaşayan azərbaycanlılarla əlaqələr qurmaq, onlar arasında həmrəylik yaratmaq prosesində mühüm rol oynamasını vurğulayıb. O bildirib ki, Dünya Azərbaycanlılarının Həmrəylik gününün qeyd edilməsi dünya azərbaycanlıları tərəfindən bir zərurətə, mənəvi ehtiyaca çevrilib. Həmzə Kərimov Dövlət Neft Şirkətinin Azərbaycan diasporuna hər zaman dəstək olacağını qeyd edib. Azərbaycan Respublikasının Rumıniyadakı səfir Fərid Abdinbəyov ilk növbədə azərbaycanlıları həmrəylik günü münasibətilə təbrik edərək, xarici ölkələrdəki, eyni zamanda, Rumıniyadakı azərbaycanlılara, onların problemlərinin həllinə münasibətdə həmişə dövlət qayğısının olduğunu bildirib. O, Azərbaycanın gündən-günə inkişaf etdiyini, düşünülmüş iqtisadi siyasət nəticəsində dünya maliyyə və iqtisadi böhranının nəticələrinin ölkəmizdə minimuma endirildiyini diqqətə çatdırıb. Tədbir iştirakçılarına Ermənistan-Azərbaycan, Dağlıq Qarabağ münaqişəsinin həlli istiqamətində atılan addımlar, keçirilən görüşlər barədə məlumat verilib. Həmçinin, səfir Fərid Abdinbəyov Azərbaycan dövlətinin taleyüklü məsələsinin həllində icma nümayəndələrimizi sıx birliyə və həmrəyliyə çağırıb. Mərasimdə çıxış edən Azərbaycan-Rumıniya Gənclər və Mədəniyyət Assosiasiyasının sədri İqbal Hacıyev Rumıniyadakı Azərbaycan diasporu adından Azərbaycan Respublikası Dövlət Neft Şirkətinə tədbirin keçirilməsi üçün verdiyi dəstəyə görə təşəkkürünü bildirib. İqbal Hacıyev Dünya azərbaycanlılarının həmrəyliyi və birliyi üçün ümummilli lider Heydər Əliyevin böyük səylər göstərdiyini vurğulayıb. Sədr qeyd edib ki, hələ 1991-ci ildə Naxçıvanda ulu öndərin təşəbbüsü ilə 31 dekabr Dünya Azərbaycanlılarının Həmrəyliyi günü elan edilib, daha sonra 1993-cü ildə Azərbaycan Respublikasının Prezidenti Heydər Əliyevin Fərmanı ilə 31 dekabr tarixi rəsmi olaraq Dövlət bayramı kimi tarixiləşdirilib. Bununla da bütün azərbaycanlılar üçün əziz olan 31 Dekabr - Dünya Azərbaycanlılarının Həmrəylik Günü hər il bayram edilir. Çıxışlardan sonra tədbir Azərbaycan və rumın musiqisindən ibarət konsert proqramı və ziyafətlə davam edib.

Dnepropetrovskdakı Mədəniyyət sarayında Dünya Azərbaycanlılarının Həmrəyliyi Gününə həsr edilmiş festival keçirilib. “Azərbaycan! Vətənim, doğma yurdum!” devizi altında keçirilən II Ümumukrayna Festivalında yaradıcı kollektivlər iştirak edib. Tədbir Azərbaycan Respublikasının Ukraynadakı Səfirliyi,“Ukrayna Azərbaycanlılarının Birləşmiş Diasporu” Ümumukrayna İctimai Təşkilatı, Müslüm Maqomayev adına Azərbaycan Mədəniyyət Mərkəzi və “Dnepropetrovsk vilayəti Azərbaycanlılar Liqası” ictimai təşkilatı ilə birgə Ukraynanın Mədəniyyət Nazirliyinin və Dnepropetrovsk Regional Administrasiyasının dəstəyilə həyata keçirilib. Tədbirdə iştirak edən Azərbaycan Respublikasının Ukraynadakı fövqəladə və səlahiyyətli səfiri Eynulla Mədətli qonaqlara bildirib ki, bu əlamətdar günü hər il dünyanın müxtəlif ölkələrində yaşayan 50 milyona yaxın azərbaycanlı qeyd edir: “1991-ci ildə Ümummilli liderin təşəbbüsü ilə təsis edilmiş Dünya Azərbaycanlılarının Həmrəylik Günü hər bir azərbaycanlı da xeyirxah hissləri, doğma vətənə olana sədaqət və bağlılığı gücləndirir, onun tarixinə və mədəniyyətinə olan sevigisini artırır və gələcək nəslə bizi birləşdirən mənəvi-əxlaqi dəyərləri ötürülməsinə xidmət edir” deyə səfir qeyd edib. “Ukrayna Azərbaycanlılarının Birləşmiş Diasporu” Ümumukrayna İctimai Təşkilatının sədri Hikmət Cavadov isə öz çıxışında vurğulayıb ki, 31 dekabr tarixi dünyanın hansı hissəsində yaşamasından asılı olmayaraq Azərbaycanı öz ölkəsi hesab edən hər kəsi birliyə sövq edir. Dnepropetrovsk Regional Şurasının sədri Evqeniy Udod tədbir iştirakçılarını qarşıdan gələn bayramlar münasibətilə təbrik edərək Azərbaycana sonuncu səfərindən olan təəssüratlarını bölüşüb. “Dnepropetrovsk vilayəti Azərbaycanlılar Liqası” ictimai təşkilatının sədri Sərxoş İsmayılov isə çıxışında həyata keçirdikləri layihələr haqqında məlumat verib. Daha sonra diasporumuzun nümayəndələri il ərzində aktiv fəaliyyətlərinə görə təltif edilib. Tədbir çərçivəsində Ukrayna Azərbaycanlılar Diasporunun və Dnepropetrovsk vilayəti Milli-Mədəni Cəmiyyətlər Şurasının peşəkar və həvəskar kollektivlərinin iştirakı ilə bayram konserti olub. Sonda tədbir iştirakçıları Azərbaycan və Ukrayna ənənələrinin rəmzi birləşməsini nümayiş edən xalq yaradıcılığı sərgisinin ekspozisiyası ilə tanış olublar.

Qırğızıstanda fəaliyyət göstərən Türkdilli Dövlətlərin Siyasətinə Dəstək Fondu da 31 dekabr-Dünya Azərbaycanlılarının Həmrəylik Günü ilə bağlı tədbir keçirməyi nəzərdə tutub. Bu məqsədlə dekabrın 30-da paytaxt Bişkekdəki Aytmatov adına kitab evində Dünya Azərbaycanlılarının Həmrəylik Günü qeyd olunacaq. Həmrəylik Günü tədbiri ərəfəsində Türkdilli Dövlətlərin Siyasətinə Dəstək Fondunun təşəbbüsü ilə çap edilən “Azərbaycan-Qırğızıstan münasibətlərinin inkişafında Heydər Əliyevin rolu” kitabının təqdimat mərasimi keçiriləcək. Bayram tədbiri və təqdimat mərasimində Azərbaycandan bu ölkəyə səfər edəcək nümayəndə heyəti də iştirak edəcək.

Birləşmiş Ərəb Əmirliklərində fəaliyyət göstərən “Azərbaycan” Cəmiyyəti də Dünya Azərbaycanlılarının Həmrəylik Gününü qeyd edəcək. Bu məqsədlə Dubay Əmirliyinin rəsmiləri də bayram tədbirinə dəvət olunacaqlar. Bayram tədbirində Azərbaycanın keçdiyi inkişaf yolu və həmrəylik istiqamətində atılan addımlardan danışılacaq. Bundan başqa Dubayın KİV-lərində Azərbaycanla bağlı silsilə məqalələr dərc ediləcək.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 26 dekabr.- S.15.