Gənc Tamaşaçılar Teatrında

Kiçik Səhnənin açılışı olub

Azərbaycan Dövlət Gənc Tamaşaçılar Teatrında kiçik səhnənin açılışı olub. Bununla əlaqədar olaraq Bekketin “Sözsüz” tamaşası aktyor Şövqi Hüseynovun təqdimatında ilk dəfə olaraq nümayiş edilib.

Monotamaşanın sujet xəttinə görə, səhralıqda yaşayan, ibtidai insan təfəkkürlü qəhrəman həyat uğrunda mübarizə aparır. Öncə uşaqtək atılıb-düşən qəhrəmana Allahdan müxtəlif işarətlər göndərilir. Allah ona su göndərir, amma bunu çox sadə bir yolla ona vermək istəmir. Bacardığı qədər qəhrəmanı sınağa çəkir. Ondan nisbətən yüksəklikdə olan su ilə dolu qaba əli çatmaq üçün Allah tərəfindən ona göndərilən müxtəlif dördkünc fiqurların üzərinə çıxır. Əli çatdıqca qab bir az da yuxarı qalxır. Daha sonra kəndir göndərilir. İbtidai şüurlu qəhrəman həmin kəndirlə yuxarıya qalxdıqca yenidən həmin proseslər təkrarlanır. Su bir az da yuxarı qalxır. Amma nədənsə qəhrəman belə qərara gəlir ki, kəndiri kəssin. Kəsir, kəndirin bir ucunu düyünləyib başına salır. Amma intihar etmir. Allah, belə desək həyat onu dəfələrlə yıxır, şillələyir. Dözümlü olmağa vadar edir. Həyatda hər şeyi əldə etmək üçün mübarizə aparmağın gərəkli olduğunu çatdıran tamaşada hər mübarizənin də müsbət sonluqla bitmədiyini göstərir. Oşonun əsərlərində yazıldığı kimi desək hər an axtarışda olduğumuz üçün xoşbəxtlik qapımızı döyəndə evdə olmuruq. Tamaşanın sonu da belə yekunlaşdı. Sonda yorularaq haldan düşən qəhrəman yuxuya gedir. Elə bu zaman uğrunda mübarizə apardığı su ilə dolu qab yerə enir. Hər zaman göyə əl açan, ümidi tək Allaha bağlı olan qəhrəman yatmış vəziyyətdə olduğu üçün susuz qalır.

Kiçik səhnədə nümayiş edilən tamaşa izləyicilər tərəfindən də böyük rəğbətlə qarşılandı. Tamaşanın sonunda tər-qan içində olan aktyorumuza yaxınlaşdıq. Çox uğurlu alınan premyera ilə əlaqədar aktyor fikirlərini “OLAYLAR”la bölüşdü: “Kiçik Səhnənin açılışı bütün aktyorlar üçün böyük hədiyyədi. Səhnənin açılışında ilk dəfə mən rol aldığım üçün özümü xoşbəxt hiss edirəm. Bu mənim üçün böyük məsuliyyət, həm də şərəfdi ki, ilk işi mənə həvalə ediblər”. 18 il kamera teatrının aktoru olduğunu deyən Ş.Hüseynov bu səbəbdən tamaşaçıya yaxın olmağın çətin olmadığını söyləyir: “Mənim üçün yox. Çünki 18 il kamera teatrının aktyoru olmuşam. Yardıcılığım belə səhnədən başlayıb. İlk dəfə olmadığı üçün mənə görə çətin deyil”. Tamaşanın bu qədər maraq oyadacağını gözlədiyini deyən aktyorumuz kiçik səhnənin aktyor üçün faydalı tərəflərindən söz açıb. Aktyor yanvarda olacaq yeniliklər haqda məlumat verərək gələn ildən etibarən mütəmadi olaraq kiçik səhnədə tamaşaların nümayiş etdiriləcəyini söyləyir. O, deyir ki, istənilən aktyor, o cümlədən gənc aktyorlar gərək ki, fəaliyyətlərinə belə səhnələrdən başlasın: “Yanvarın ortalarından etibarən mütəmadi olaraq kiçik səhnədə tamaşalar olacaq. Yanvarda nümayişi olacaq altı tamaşadan dördü mono tipli olacaq. Mono tamaşa oynamaq çox çətindi. Amma bir aktyor kimi mən bu cür tamaşalarda mənəvi rahatlıq tapıram. Əsas çətinliyi tamaşaçı ilə sənin bir yerdə nəfəs almağındı. Mono tamaşada ya oynaya bilirsən, ya da ki əksinə. Böyük səhnədən fərqli olaraq kiçik səhnədə nəyisə gizlətmək mümkün deyil. Kiçik səhnədən keçmək hər bir aktyor üçün böyük məktəbdi. Məncə gənc aktyorlar kiçik səhnədə püxtələşərək böyük səhnəyə can atmalıdırlar”. Böyüz səhnədə Şekspirin “lll Riçard” əsəri əsasında hazırlanan tamaşasının məşqlərinin getdiyini deyən Ş.Hüseynov film və serial sahəsindəki fəaliyyətindən də söz açıb: “Son olaraq Eldar Quliyevin “Dərvişin qeydləri” filmində çəkilmişəm. Bu il də yəqin ki yeni filmlər çəkiləcək. Eldar Qüuliyev yeni film çəkəcək, ola bilər ki, filmdə rol alım”. “Sonuncu Fəsil” serialında çəkilişlərimiz davam edir”.

Nigar Məhərrəm

Olaylar.- 2013.- 26 dekabr.- S.11.