“Azərbaycanın haqq səsini Belarus ictimaiyyətinə çatdırırıq”

Sərdar Hüseynov: “Azərbaycanın böyük gələcəyi var”

“Bizim istəyimiz yalnız ondan ibarətdir ki, biliyimizi, ağlımızı, varlığımızı ancaq Azərbaycan üçün sərf edək”

Azərbaycan diasporunun inkişaf etdirilməsi, onun dünyada söz sahibinə çevrilməsi istiqamətində dövlətlə yanaşı qeyri-hökumət təşkilatları da uğurlu fəaliyyət göstərərək ölkəmizin haqq səsinin dünya birliyinə çatdırılmasında yaxından iştirak edirlər. Belə qeyri-hökumət təşkilatlarından biri də Beynəlxalq Diaspor Mərkəzidir.

Mərkəzin son illərdə müxtəlif ölkələrdə yaradılan nümayəndəlikləri də bu mənada aktiv fəaliyyət göstərirlər. Beynəlxalq Diaspor Mərkəzinin Belarus nümayəndəliyi də fəaliyyət göstərdiyi müddət ərzində sözügedən istiqamətlərdə bir sıra işlər görüb, uğurlu layihələr həyata keçirib. Beynəlxalq Diaspor Mərkəzinin Belarusun Qrodnı şəhərində yerləşən nümayəndəliyinin rəhbəri Sərdar Hüseynov Azərbaycan diasporunun mövcud durumu, bu günə qədər əldə edilən nailiyyətlər, eləcə də digər məsələlər barədə danışıb. Sərdar Hüseynov bu ölkədə yaşayan soydaşlarımızın sayı və onların başlıca məşğuliyyəti barədə də danışıb: “Məlumat üçün qeyd edim ki, Belarusun Qrodnı vilayətində 700-ə yaxın azərbaycanlı ailə yaşayır. Ümumilikdə isə, Belarusda 6 vilayət var ki, həmin vilayətlərdə qeydiyyatdan keçmiş 5 mindən artıq azərbaycanlı yaşayır”. Sərdar Hüseynovun sözlərinə görə, Belarusda yaşayan azərbaycanlıların ən ciddi problemlərindən biri ondan ibarətdir ki, bu ölkədə yaşayan soydaşlarımız konsulluqlarda qeydiyyatdan keçmirlər. Nəticə etibarilə hansı vilayətdə nə qədər azərbaycanlının yaşadığı dəqiq bilinmir. Bu problemi bir müddət əvvəl diaspor təşkilatları olaraq müzakirə də etmişik”. Azərbaycan həqiqətləri, Dağlıq Qarabağ probleminin Belarus ictimaiyyətinə çatdırılması prosesinə gəlincə BDM-in Belarus nümayəndəliyinin rəhbəri deyib ki, Belarusda yaşayan azərbaycanlılar olaraq Azərbaycanın bayram günləri və hüznlü tarixləri həmişə qeyd edilir: “Ötən ilin sonunda 31 dekabr - Azərbaycanlıların Həmrəylik Günü, 20 Yanvar faciəsinin ildönümü, Xocalı soyqırmının 20-ci ildönümünü geniş şəkildə qeyd etmişik. Ümumiyyətlə, çalışırıq ki, Azərbaycan həqiqətləri, Dağlıq Qarabağ problemi, ölkəmizin üzləşdiyi problemlər barədə Belarus ictimaiyyətini ətraflı şəkildə məlumatlandıraq. Ümumiyyətlə, Belarusda yaşayan azərbaycanlılar olaraq Şuşanın işğalının ildönümü, 20 Yanvar, Xocalı faciələrini hər zaman anır, bununla bağlı tədbirlər keçiririk: “Mütəmadi olaraq yaşadığımız ölkələrdə müəyyən tədbirlər keçirir, torpaqlarımızın hələ də erməni işğalı altında saxlanıldığını Belarus ictimaiyyətinə çatdırırıq. Ümumiyyətlə, hər bir rayonun işğalı tarixlərini qeyd edir, bu barədə yerli ictimaiyyətə məlumat veririk”. Sərdar Hüseynov Azərbaycan diasporunun qarşısında duran vəzifələr barədə də danışıb: “Bu gün bizim qarşımızda duran əsas vəzifələr Azərbaycanın tarixi, qarşılaşdığı problemləri həm yaşadığımız ölkə, həm də dünya ictimaiyyətinə çatdıraq. Xaricdə yaşamığımıza baxmayaraq biz Azərbaycanla nəfəs alırıq. İstənilən zaman Azərbaycanla əlaqədə olur, hər ötən gün əldə edilən uğurlarla fəxr edirik. Məqsədimiz odur ki, hər şey Azərbaycan və azərbaycanlılar üçün olsun. Azərbaycanın böyük gələcəyi var. Bizim istəyimiz yalnız ondan ibarətdir ki, biliyimizi, ağlımızı, varlığımızı ancaq Azərbaycan üçün sərf edək. Məlumat üçün qeyd edim ki, mart ayının 20-də biz Belarusun Qrodnı şəhərində fəaliyyət göstərən diasporamıza yeni rəhbər seçdik. Əvvəki diaspor rəhbəri son iki-üç ildə Azərbaycanın mədəniyyəti, irsini yetərincə təbliğ etmirdi. Biz də Belarusda yaşayan azərbaycanlılar olaraq xahiş etdik ki, münasib bir şəxsi diaspora rəhbəri seçək və kifayət qədər vətənpərvər, iş adamı Namiq Vəliyev diasporamıza yeni sədr seçildi. Onu da qeyd edim ki, Belarusda yaşayan xalqların iki ildən bir festivalı keçirilir. Əvvəlki diasporamız çox zəif olduğu üçün Azərbaycan olaraq həmin festivalda yüksək səviyyədə təmsil olunmurduq. Çünki həmin tədbirlərdə daha geniş spektrdə iştirak etmək üçün müəyyən dərəcədə maliyyə vəsaitinə də ehtiyac duyulur. Əvvəlki illərdə festivalda iştirak etmək üçün kifayət qədər vəsait ayrılmırdı. Hazırda isə Belarusda yaşayan azərbaycanlılar olaraq bu işi öz üzərimizə götürmüşük və festivalda iştirak üçün lazım olan vəsait dəyərli soydaşlarımız tərəfindən ayrılacaq. Əsas məqsədimiz odur ki, Belarusda yaşayan azərbaycanlıların tarixi, irsi, adət-ənənələri mədəniyyəti, mətbəxi barədə festivalda ətraflı məlumat verək, həmin tədbirdə ölkəmizi layiqincə təmsil edək. Ümumilikdə Azərbaycan diasporunun Avropa məkanındakı fəaliyyətinə nəzər salsaq bu fəaliyyətin ürəkaçan olduğunu söyləmək mümkündür. Etiraf etmək lazımdır ki, Azərbaycan diasporu bu gün kifayət qədər fəaldır. İstər Avropa məkanında, istər keçmiş SSRİ məkanına daxil olan respublikalarda Azərbaycan diasporu tam formalaşıb, güc mərkəzinə çevrilib. Eyni zamanda Azərbaycan diasporu birlik və bərabərliyə də nail olub. Bu gün ayrı-ayrı ölkələrdə fəaliyyət göstərən konqres və federasiyalarda, assambleyalarda onlarla Azərbaycan diaspor təşkilatı birləşib ki, bu da Azərbaycan diasporunun birlik və bərabərliyinin təcəssümüdür. Sevindirici hal ondan ibarətdir ki, Azərbaycan dövləti də diaspor fəaliyyətinə yaxından dəstək olur. Müntəzəm olaraq keçirilən dünya azərbaycanlılarının qurultayları bu prosesə təkan verir, diasporumuzun daha aktiv olması, fəaliyyət göstərdiyi ölkələrdə Azərbaycanı layiqincə təmsil etməsinə yardım göstərir. Məlumat üçün qeyd edim ki, 2012-ci il, iyunun 1-dən 3-dək keçirilən həmin festivalda Azərbaycanı yüksək səviyyədə həm Belarus ictimaiyyəti, həm də bu ölkədə yaşayan digər xalqların nəzərinə çatdırdıq, Festivalda Azərbaycandan da nümayəndə heyəti iştirak edirdi. Beynəlxalq Diaspora Mərkəzinin sədri İsmayıl Ağayevin rəhbərliyi altında Azərbaycandan Belarusa nümayəndə heyəti gəlmişdi. Nümayəndə heyətinin tərkibinə millət vəkilləri, kütləvi informasiya vasitələrinin nümayəndələri və sənət adamları da daxil idi. Qeyd edim ki, hazırda Belarusda 50-yə yaxın xalq yaşayır. Həmin festival respublikadaxili festival olduğu üçün tədbirdə yalnız Belarusda yaşayan xalqlar iştirak edirdi. Ancaq eyni zamanda, bu ölkədə yaşayan xalqların mənsub olduğu dövlətlərdən də nümayəndələr gəlib festivala qatılır”. Beynəlxalq Diaspora Mərkəzinin Belarus nümayəndəliyinin rəhbəri Dünya Azərbaycanlılarının üçüncü qurultayında prezident İlham Əliyev diaspor təşkilatlarına səfirlik və iş adamları ilə yaxından əməkdaşlıq etmək barədə verdiyi tövsiyyələrdən sonra bu sahədə müşahidə edilən irəliləyiş barədə də söhbət açıb: “İlk növbədə qeyd etmək istərdim ki, Dünya Azərbaycanlılarının üçüncü qurultayı Azərbaycan diaspor həyatı üçün mühüm əhəmiyyətə malik bir hadisə idi. Bu qurultaylar dünyanın müxtəlif ölkələrində fəaliyyət göstərən Azərbaycan diaspor təşkilatlarının bir araya gəlməsi, onların dövlətlə əlaqələrinin möhkəmləndirilməsinə xidmət edən mühüm toplantılardır. Sonuncu, Dünya Azərbaycanlılarının üçüncü qurultayını da məhz belə xarakterizə etmək olar. Qurultayda cənab prezident İlham Əliyev geniş və əhatəli nitqi ilə diaspor təşkilatları qarşısında yeni vəzifələr qoydu, onlara öz tapşırıq və tövsiyyələrini verdi. Biz də bir azərbaycanlı olaraq cənab prezidentin bizə verdiyi tapşırıq və tövsiyyələrin icrası istiqamətində əlimizdən gələni əsirgəmir, fəaliyyətimizlə millətə, Vətənə xidmət etməyə çalışırıq. O ki, qaldı, dövlət başçısının diaspor təşkilatlarına səfirlik və iş adamları ilə yaxından əməkdaşlıq etmək tövsiyyəsinə, biz müntəzəm olmasa da, mütəmadi şəkildə Azərbaycanın Belarusdakı səfirliyi ilə telefon əlaqəsi yaradır, müəyyən məsləhətləşmələr aparırıq”. Sərdar Hüseynov qeyd edib ki, Belarusda yaşayan azərbaycanlı ailələrin üzləşdiyi hər hansı bir problem barədə müntəzəm olaraq Azərbaycanın bu ölkədəki fövqəladə və səlahiyyətli səfirliyinə məlumat verilir: Sərdar Hüseynov Belarusdakı azərbaycanlı iş adamları ilə mərkəzin nümayəndəliyinin əlaqələrinin yüksək səviyyədə olduğunu da söyləyib: “Onu da qeyd etmək yerinə düşər ki, azərbaycanlı iş adamları Belarusda kifayət qədər nüfuz qazanıb, bu ölkədə müxtəlif sahələrə sərmayələr yatırıblar. İş adamı olan soydaşlarımız tərəfindən Belarusda şadlıq evləri, restoranlar tikilir, müxtəlif iaşə obyektləri inşa edilir. Bir sözlə Belarusda fəaliyyət göstərən azərbaycanlı iş adamları bir-biri ilə sıx əlaqəlidir. Həmçinin azərbaycanlılar yerli iş adamları ilə də birgə bir sıra işlər görürlər. İri yaşayış binalarının tikintisi zamanı müştərək fəaliyyət göstərilir”. BDM-in Belarus nümayəndəliyinin rəhbəri yaxın günlərdə bu ölkədə Azərbaycanla bağlı daha bir neçə tədbirin keçiriləcəyini diqqətə çatdırıb. Bildirib ki, Azərbaycandan gələn nümayəndə heyətinin iştirakı ilə keçirilən tədbirlərdə Belarus ictimaiyyətinə Ermənistan-Azərbaycan, Dağlıq Qarabağ münaqişəsi və ermənilərin işğalçılıq siyasəti barədə ətraflı məlumat veriləcək.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 4 iyun.- S.15.