"İnternetin imkanlarından diaspora işində daha artıq istifadə etmək lazımdır”

Raif Kırkul: “Qarabağ bizim də yaramızdır”

“ Hər bir Azərbaycan vətəndaşının acısı bizim də acımızdır”

Azərbaycanın hər ötən gün əldə etdiyi yeni-yeni uğurlar, qazandığı nailiyyətlər, eləcə də ölkəmizdə həyata keçirilən quruculuq-abadlıq işləri təkcə Azərbaycan vətəndaşları deyil, həmçinin müxtəlif beynəlxlaq konfrans və forumlarda iştirak etmək üçün Bakıya gələn xarici ölkə vətəndaşlarını valeh edir. Həmin insanların öz ölkələrinə qayıtdıqdan sonra Azərbaycan barədə söylədiyi fikirlər də bunu deməyə əsas verir. Belə insanlardan biri də Kosovada yaşayan və bu ölkədə fəxri azərbaycanlı kimi ölkəmizi təmsil edən Raif Kırkuldur. Kosova radiosu və Kosova Xəbər Agentliyində çalışan Raif Kırkul çalışdığı media vasitələrinin imkanlarından istifadə edərək Azərbaycanın haqq səsini dünyaya çatdırmağa çalışır. Onun Azərbaycana sonuncu səfərindən sonra isə Kosova radiosunda Qubadakı kütləvi məzarlıq və ermənilərin orada törətdikləri vəhşiliklər barədə məlumat verilib.

Raif Kırkul “OLAYLAR”-a verdiyi müsahibədə Azərbaycan barədə təssüratlarını bölüşüb və fəxri azərbaycanlı kimi Kosovada ölkəmizə olan diqqətdən danışıb.

-Raif bəy, bir müddət əvvəl Bakıda mətbuatla bağlı keçirilən beynəlxalq əhəmiyyətli toplantıda iştirak etmək üçün Azərbaycanda səfərdə oldunuz. Bu Azərbaycana ilk səfəriniz idimi?

-Xeyir, bu mənim Azərbaycana ilk səfərim deyildi. Ümumiyyətlə, Azərbaycana son 6 il ərzində 3 dəfə səfər etmişəm.

-Bəs Azərbaycandan hansı təssüratla ayrıldınız?

- Hər dəfə sizin ölkəyə səfər edəndə Azərbaycanın bir qədər də inkişaf etdiyinin, Bakının daha da gözəlləşdiyinin şahidi oluram. Xüsusilə, sonuncu dəfə səfərim zamanı Bakının yeni siması hamımızı heyran etdi.

-Azərbaycanda səfərdə olarkən Qubadakı kütləvi məzarlığı da ziyarət eetdiniz. Kosovaya qayıtdıqdan sonra bu barədə çalışdığınız Kosova radiosunda və ya Kosova xəbər agentliyində hansısa məlumatlar verdinizmi?

-Azərbaycana sonuncu dəfə səfərim zamanı ilk dəfə paytaxt Bakıdan kənara çıxma fürsətim oldu. Getdiyimiz Qubadakı kütləvi məzarlıqda olduqca kədərləndik. Təbii ki, Kosovaya qayıtdıqdan sonra işlədiyim radio və xəbər agnetliyində Qubada həyata keçirilən erməni zülmünün ictimaiyyətə daha geniş mənada çatdırılması məqsədilə xəbərlər yaydım. Eyni zamanda Bakıda keçirilən toplantı barədə də reportaj hazırladım.

-Sizcə media sahəsində Azərbaycanla Kosova arasında hansısa layihələr həyata keçirmək olarmı?

-Media sahəsində hansısa layihələri həyata keçirmək çün hesab edirəm ki, əvvəlcə Kosova və Azərbaycan arasında diplomatik əlaqələr qurulmalıdır. Məlumat üçün qeyd edim ki, sonuncu dəfə Azərbaycana səfərim böyük bir problemlə baş tutdu. Azərbaycan Kosovanı hələlik müstəqil bir ölkə olaraq tanımadığı kimi Kosova pasportunu da tanımır. Lakin mən ssrar edərək ilk dəfə Azərbaycana Kosova pasportu ilə gəldim. Mənim bu niyyətimə xoş münasibət bəsləyən Azərbaycanın müvafiq qurumlarına Bakıda keçirilən toplantı zamanı çıxışımda təşəkkür etdim. İndi də sizin mətbu orqan vasitəsilə bir daha bu fürsətdən istifadə edərək təşəkkrümü çatdırıram. Düzdür, Avropa Birliyi ölkələrindən Yunanıstan, İspaniya, Slovakiya Kosovanın müstəqilliyini tanımasalar da, lakin Kosova pasportunu tanıyırlar. Ancaq Azərbaycanda Kosovanın və onun pasportunun tanınmaması iki ölkə arasındakı əlaqələrdə ən böyük əngəli təşkil edir. Hesab edirəm ki, Azərbaycanla Kosova arasında media sahəsində əlaqələrin inkişaf etdirilməsi çox önəmlidir. Xüsusilə, də iki ölkə vətəndaşlarının bir-birilərinə daha yaxınlaşması üçün media arasında əməkdaşlıq çox mühümdür.

-İki ölkə arasında hansı sahələrdə əlaqələrin inkişaf etdirilməsini zəruri sayırsınız?

- Azərbaycanla Kosova arasında siyasi sahə başda olmaqla qeyri-hökumət təşkilatları, media sahəsində əlaqələrin inkişaf etdirilməsi zəruridir. Kosovadakı Türk toplumu Türkiyə ilə əlaqələrin inkişaf etdirilməsində köprü rolunu oynadığı üçün Azərbaycan da bundan istifadə edə bilər. Məlumat üçün qeyd edim ki, Kosovada təxminən 20 minə yaxın türk yaşayır. Azərbaycandan olan qardaşlarımız arasında coğrafi və sərhəd məsafəsi olsa da, qardaşlığımız daimidir. Çünki qardaşlıq sərhəd tanımaz. Qarabağ bizim də yaramızdır. Hər bir Azərbaycan vətəndaşının acısı bizim də acımızdır.

-Dağlıq Qarabağ problemi, ermənilərin Azərbaycan ərazilərini işğal etməsi ilə bağlı Kosova ictimaiyyətində kifayət qədər məlumat varmı?

-Çox təssüflər ki, yoxdu. Bu məsələdə daha artıq fəaliyyət göstərilməsi lazımdır. Hesab edirəm ki, iki ölkənin mediası arasındakı əməkdaşlıq və siyasətçilərin qarşılıqlı şəkildə səfərləri Dağlıq Qarabağ probleminin Kosovada daha artıq dərəcədə tanıdılmasına gətirib çıxara bilər.

-Kosovada azərbaycanlılar yaşayırmı və onların sayı təxminən nə qədərdi?

-Təssüflər olsun ki, Kosovada Azərbaycan cəmiyyəti və ya təşkilatı yoxdu. 5-6 il əvvəl Kosova Türk Taboru çərçivəsində Draqaş (Prizren yaxınlığında) bələdiyyəsində bir Azərbaycan birliyi xidmət keçmişdi. Həmin Azərbaycan birliyi Kosova xalqı tərəfindən çox böyük hörmət və sevgi görmüşdü.

-Kosovada qarşılaşdığınız hansısa problemlər varmı və əsas problemləriniz nədən ibarətdir?

-Kosovada etnik problem hələ də həll edilməmiş qalır. Ölkənin cənubunda çoxluq təşkil edən serblər hələ də inteqrasiya olunmayıblar. Aprelin 19-da Avropa Birliyinin təşəbbüsü ilə Brüsseldə Kosova və Serbiya arasında anlaşma əldə edildi. Həmin anlaşmanın həyata keçməsi gözlənilir. Digər bir problem işsizlikdir. Kosovada işsizlik təxminən 40 fazi təşkil edir. Bununla yanaşı korrupsiya halları da ölkənin ən böyük problemlərini təşkil edir.

-Siz eyni zamanda Kosovada Azərbaycan diasporunun bir təmsilçisi olaraq da tanınırsınız. Sizcə diaspor işində hansı yeni texnologiyalardan istifadə etmək faydalıdır?

-Azərbaycan diasporasının Kosovadakı təmsilçisi olaraq indiyə qədər sadəcə bir toplantıda iştirak edə bilmişəm. Almanyada ikinci dəfə təşkil edilən Azərbaycan diaspor təşkilatlarının forumunda iştirak etməyi çox istəsəm də, lakin viza problemi səbəbindən iştirak edə bilmədim. Hesab edirəm ki, bu kimi toplantılar fikir mübadiləsi üçün çox önəmlidir. Həmçinin internetin imkanlarından diaspora işində daha artıq istifadə etmək lazımdır. Kosovada fəxri azərbaycanlı olaraq bu istiqamətdə əlimdən gələni etməyə hazıram.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 7 iyun.- S.15.