Ukrayna Azərbaycanlı Gənclər Birliyi

Ukraynada Azərbaycan diasporunun gənc siması

Bu gün Azərbaycan diasporunun güclü olduğu ölkələrdən sayılan Ukraynada çoxsaylı diaspor təşkilatları fəaliyyət göstərməkdədir.

Düzdür, son illər ərzində Ukraynadakı Azərbaycan diasporu daxilində müəyyən problemlər yaransa və ziddiyətlər meydana çıxsa da, lakin əksər məsələlərdə, xüsusilə Azərbaycanın ümummilli problemləri ilə bağlı məsələdə Ukraynada yaşayan soydaşlarımız vahid mövqe nümayiş etdirirlər. Sevindirici hal isə ondan ibarətdir ki, Ukraynada yaşayan və diaspor işində fəallıq göstərən soydaşlarımız arasında gənclərimiz daha çox aktiv görünürlər. Bu ölkədə azərbaycanlı gənclərin yaratmış olduğu bir sıra təşkilatlar və onların diaspor işinə verdiyi dəstək belə deməyə əsas verir. Ukraynada fəaliyyət göstərən ən güclü və şəbəkələşmiş təşkilatlardan biri Ukrayna Azərbaycanlı Gənclər Birliyidir. Məlumat üçün qeyd edək ki, Ukrayna Azərbaycanlı Gənclər Birliyi 2010-cu il, aprel ayının 24-də bu ölkədə yaşayan bir qrup fəal gənc soydaşımız tərəfindən təsis edilib. Təsadüfi deyil ki, aprelin 24-ü tarixi həmin gündən etibarən Ukraynadakı azərbaycanlı gənclərin həmrəylik günü kimi tarixə düşüb. Ukrayna Azərbaycanlı Gənclər Birliyinin təsis toplantısında iştirak edən gənc soydaşlarımız əksəriyyət səs çoxluğu Anar Tahirovu sözügedən təşkilatın sədri seçiblər. Ukrayna Azərbaycanlı Gənclər Birliyinin fəaliyyətə başladığı zaman qarşısına qoyduğu məqsəd və vəzifələr sırasına Azərbaycan həqiqətlərinin Ukrayna ictimaiyyətinə çatdırılması, zəngin tarixi-mədəni irsimizin təbliği və diaspor işinə dəstək daxil edilib. Birmənalı olaraq eyd etmək olar ki, fəaliyyət göstərdiyi qısa vaxt ərzində Ukrayna Azərbaycanlı Gənclər Birliyi yarandığı zaman qarşısına qoyduğu məqsəd və vəzifələrin icrası istiqamətində məqsədyönlü şəkildə fəaliyyət göstərərək müxtəlif tədbirlər, layihələr həyata keçirib.

Ukrayna Azərbaycanlı Gənclər Birliyi fəaliyyətə başladığı gündən bu ölkədəki rəsmi qurumlar, eləcə də Azərbaycanın Ukraynadakı fövqəladə və səlahiyyətli səfirliyi ilə yaxından əməkdaşlıq edərək normal əlaqələr qurub. Belə ki, 2011-ci il, oktyabr ayının 17-də Ukrayna Azərbaycanlı Gənclər Birliyinin Gənclər Mərkəzində Azərbaycanın Ukraynadakı fövqəladə və səlahiyyətli səfiri Eynulla Mədətli, eləcə də Azərbaycan Ukrayna parlamentlərarası dostluq qrupunun uzvləri, millət vəkilləri Eldar İbrahimov, Elmira Axundova, Hüseynbala Mirələmov, Rüfət Quliyev, İqbal Məmmədovla görüş keçirilib. Ukrayna Azərbaycanlı Gənclər Birliyinin İdarə Heyətinin görüşü maraqli müzakirələr və gələcəkdə birgə layihələrin həyata keçirilməsi ilə yadda qalıb.

Ukrayna Azərbaycanlı Gənclər Birliyi fəaliyyət dövründə bu ölkənin siyasi həyatında da fəal rol oynamağa çalışıb. Belə ki, təşkilat Ukraynada keçirilən parlament seçkilərində öz namizədi ilə mübarizə aparıb. 2012-ci il, oktyabrın 28-də Ukrayna Ali Radasına keçirilən seçkilərdə yeganə azərbaycanlı namizəd məhz Ukrayna Azərbaycanlı Gənclər Birliyinin üzvü Rəna Nəzərova olub. Həmyerlimiz 15 namizəd arasında 2–ci yeri tutsa da, lakin Ali Radanın deputatı olmaq şansını qazana bilməyib. Buna baxmayaraq Rəna Nəzərova siyasi fəaliyyətini davam etdirməklə növbəti seçkilərdə uğur əldə edərək Azərbaycanla Ukrayna arasındakı tarixi dostluq əlaqələrinin inkşaf etdirilməsində öz sözünü deyəcəyinə əmindir.

Yarandığının ikinci ilində Ukrayna Azərbaycanlı Gənclər Birliyi növbəti forum keçirib. Forumda azərbaycanlı gənclərin milli mənəvi dəyərlərini qoruyub yaşatmaları şərti ilə Ukraynanın ictimai siyasi, elmi, mədəni həyatına inteqrasiya olunmaları istiqamətində irəli sürülən tövsiyələr, ermənilərin Azərbaycana qarşı həyata keçirdikləri ideoloji təxribatların qarşısının alınmasında birgə mübarizənin aparılması strategiyasının düzgün qurulması forumun uğurlu nəticələri kimi dəyərləndirilib. Ukrayna Azərbaycanlı Gənclər Birliyinin böyük inkişaf yolu keçdiyini bildirən gənclər və idman nazirinin müavini İntiqam Babayev, millət vəkili Ceyhun Osmanlı, Xarici İşlər Nazirliyinin rəsmi nümayəndəsi Azər Xudiyev, Birləşmiş Millətlər Təşkilatının Azərbaycandakı proqram rəhbəri Məzahir Əfəndiyev və digər panel moderatorları müzakirələrin çox aktiv və səmərəli təkliflərlə yadda qaldığını bildiriblər. 2 gün davam edən forumun yekun ziyafət mərasimində Ukrayna Azərbaycanlı Gənclər Birliyinin sədri Anar Tahirov çıxış edərək belə bir tarixi toplantıda Azərbaycanın rəsmi dövlət nümayəndələrinin iştirak etməsini, xüsusində Rusiyadakı Azərbaycan Gənclər Təşkilatının sədri Leyla Əliyevanın forum iştirakçılarına ünvanlandığı təbrik məktubunun Ukraynadakı azərbaycanlı gənclərin gələcək inkişafına stimul verəcəyini bildirib. Azərbaycan Dövlət Neft Şirkətinin Ukrayna Azərbaycanlı Gənclər Birliyini ofislə təmin etməsini ölkəmizdə bir çox sahələrlə yanaşı dövlət səviyyəsində gənclər hərəkatının inkişafına göstərilən diqqət və qayğının məntiqi nəticəsi kimi dəyərləndirib. Forumun uğurla başa çatmasına görə Ukrayna Azərbaycanlı Gənclər Birliyinin nümayəndələrini təbrik edən Azərbaycanın Ukraynadakı səfiri Eynulla Mədətli, gənclər və idman nazirinin müavini İntiqam Babayev və digər şəxslər siralarını günü gündən genişləndirən birliyin fəallarına gələcək işlərində uğurlar arzulayıblar. Forumun təşkil olunmasında xidmətləri olan bir qrup şəxsə birliyin fəxri diplomları təqdim olunub.

Azərbaycanın dövlət müstəqilliyinin 20-ci ildönümü də Ukrayna Azərbaycanlı Gənclər Birliyi tərəfindən yüksək səviyyədə qeyd olunub. Belə ki, bu münasibətilə Ukrayna Azərbaycanlı Gənclər Birliyi Odessa şəhərində bayram konserti təşkil edib. Azərbaycanla Ukraynanın dövlət himnlərinin sədaları altında başlayan bayram tədbirini Azərbaycanın Ukraynadakı səfirliyinin 2-ci katibi Sabir Rzayev açaraq, 1991-ci ildə dövlət müstəqilliyini əldə edən Azərbaycan Respublikasının ötən 20 il müddətidə qazandığı yüksək nailiyyətlərdən danışıb. Müstəqil dövlətimizin sürətlə inkişaf etdirilməsində ulu öndər Heydər Əliyevin həyata keçirdiyi neft strategiyasının müstəsna rolundan bəhs edən Azərbaycan Respublikası Dövlət Neft Şirkətinin Ukraynadakı nümayəndəliyinin rəhbəri Elçin Məmmədov bu gün ölkəmizdə aparılan uğurlu və məqsədyönlü siyasət nəticəsində xalqımızın milli mənəvi dəyərlərinə sahib çıxmasının fərəhləndirici hal olduğunu diqqətə çatdırıb. Tədbirə qatılanları Azərbaycanın dövət müstəqilliyinin 20-ci ildönümü münasibəti ilə təbrik edən Azərbaycan Xarici İşlər Nazirliyinin rəsmi nümayəndəsi Azər Xudiyev ötən 20 il müddətində dünyanın müxtəlif ölkələrində yaşayan 50 milyondan çox azərbaycanlının milli məfkurə atrafında birləşməsini müstəqillik tariximizin ən uğurlu strategiyalarından biri kimi dəyərləndirib.

Tədbirdə Dnepropetrovsk Azərbaycanlıları Konqresinin sədri Qüdrət Hacıyev, Ukrayna Azərbaycanlı Gənclər Birliyinin sədri Anar Tahirov, Birliyin Odessa vilayət təşkilatının sədri Samirə Əliyeva və digər çıxış edənlər təməli ulu öndər Heydər Əliyev tərəfindən qoyulmuş müstəqil Azərbaycan dövlətinin inkişaf etdirilməsində və xalqımızın haqq səsinin beynəlxalq ictimaiyyətə çatdırılmasında xaricdə yaşayan soydaşlarımızın üzərinə düşən öhdəliklərdən danışıblar. Tədbirdə gənc və istedadlı müğənni Aysel Teymurzadənin, Dnepropetrovsk şəhərində fəaliyyət göstərən 7 rəqs ansanblının, ö cümlədən bir sıra xalqların musiqi kollektivlərinin iştirakı ilə keçirilən konsert proqramı müstəqillik tariximizin 20 illik sevincini bölüşən soydaşlarımıza xoş və yadda qalan anlar yaşadıb. Tədbirin sonunda Ukraynada Azərbaycan dövlət müstəqilliyinin 20-ci ildönümü münasibətilə təşkil olunan ən yaxşı tədbirə görə Ukrayna Azərbaycanlı Gənclər Birliyinin Odessa vilayət təşkilatının sədri Samirə Əliyevaya fərqlənmə medalı təqdim olunub.

Dünya Azərbaycanlılarının Həmrəylik günü münasibəti ilə isə Ukrayna Azərbaycanlıları Gənclər Birliyinin və Dünya Azərbaycanlıları Konqresinin Ukrayna nümayəndəliyinin birgə təşkilatçılığı ilə Donetsk şəhərində möhtəşəm müğam konserti təşkil edilib.

Ukrayna Azərbaycanlı Gənclər Birliyi fəaliyyət göstərdiyi 3 il müddətində Azərbaycan həqiqətləri, Dağlıq Qarabağ problemi, eləcə də ermənilərin Xocalıda həyata keçirdikləri soyqırımın dünya ictimaiyyətinə çatdırılması prosesində aktiv iştirak edib. Adıçəkilən təşkilat hər il Xocalı soyqırımının ildönümü ərəfəsində bu ölkədə və onun müxtəlif şəhərlərində etiraz aksiyaları təşkil edib. Məhz Ukrayna Azərbaycanlı Gənclər Birliyinin təşəbbüsü ilə Ukraynada fevral ayı “Xocalı ayı” elan edilib. Leyla xanım Əliyevanın “Xocalıya ədalət” kampaniya çərçivəsində bu istiqamətdə müəyyən işlər görən UAGB "Xocalı ayı"na Odessa şəhərində start verib. Odessa vilayət dövlət admnistrasiyası rəsmilərinin, diplomatların, türk, tatar, yəhudi, alman, fələstin və digər xalqların diaspora təmsilçilərinin iştirak etdiyi anım mərasimində Ukrayna Azərbaycanlı Gənclər Birliyinin rəhbəri Anar Tahirov və birliyin Odessa vilayət təşkilatının sədri Samirə Əliyeva çıxış edərək son iki əsrdə ermənilərin Azərbaycanda həyata keçirdikləri işğalçılıq və soyqırım siyasətini tarixi faktlarla tədbir iştirakçılarının diqqətinə çatdırıblar. 1992-ci il fevral ayının 26-da erməni silahlı dəstələrinin Xocalı şəhərində uşaqlara, qadınlara, qocalara və dinc əhaliyə qarşı həyata keçirtdikləri misli görünməmiş vəhşilikləri zaman-zaman xalqımıza yönəlik soyqırım siyasətinin məntiqi davamı kimi səciyyələndiriblər. Mərasimə qatılanlar Azərbaycan və Ukrayna dövlət televiziyalarının birgə hazırladığı "Qarabağ tarixin burulğanında" filminə baxmaqla ermənilərin əsrlər boyu azərbaycanlılara qarşı həyata keçirtdikləri soyqırım siyasəti ilə tanış olublar. "Xocalı soyqırımında birbaşa əli olan rəsmi İrəvan və onun hazırkı rəhbərliyi beynəlxalq məhkəmə qarşısında cavab verməlidir" - filmə baxdıqdan sonra belə bir bəyanatla çıxış edən Türkiyənin Odessa şəhərindəki baş konsulunun müavini Məlik Dəmirdaş soqırımdan 21 il ötməsinə baxmayaraq dünya birliyinin belə bir bəşəri cinayətə hüquqi, siyasi qiymət verməmələrini tarixi ədalətsizlik kimi qiymətləndirib. Jurnalist Valeri Bulumenkrans isə Xocalı faciəsini dünyada baş verən ən amansız qətliamlardan biri kimi qiymətləndirərək indiyədək beynəlxalq təşkilatların belə bir bəşəri cinayətə hüquqi siyasi qiymət verməmələrindən təəssüfləndiyini qeyd edib. Anım mərasimində Odessa şəhərində yaşayan azərbaycanlı gənclərin Xocalı faciəsi ilə bağlı hazirladıqları ədəbii bədii kompozisya nümayiş etdirilib. Mərasimin sonunda tədbir iştirakçıları adından Xocalı soyqrımına hüquqi-siyasi qiymət verilməsi üçün beynəlxalq təşkilatlara müraciət qəbul olunub.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 13 iyun.- S.15.