Gülə qərq olan Bakı...

Mayın 10-da ümummilli lider Heydər Əliyevin 90 illik yubileyi münasibətilə keçirilən Gül Bayramı paytaxtda böyük rəğbətlə qarşılanıb.

Saat 10.30 radələrində ölkə prezidenti İlham Əliyev bayram mərasiminin keçirildiyi parka gələrək bir-birindən əlvan güllərlə bəzədilən məkanın yeni görkəmi ilə tanış olub. Daha sonra şəhər əhli Heydər Əliyev adına Respublika Sarayının önündə düzülən müxtəlif çeşidli gülləri izləmək üçün sarayın qarşısına axışıb. Müxtəlif ölkələrdən gətirilən “exmeniya”, “kusmaniya” kimi müxtəlif çeşidli güllərdən milli folklorumuzun “Cırtdan”, “Tık-tık xanım”, “Qırmızı papaq” kimi maraqlı və bənzərsiz obrazlar yaradılmışdı. Bundan başqa Şirvanşahlar Saray Kompleksinin, Qız Qalası və Azərbaycanın bir sıra tarixi abidələrinin güllərlə bəzədilmiş maketi şəhər sakinləri tərəfindən böyük maraqla qarşılanıb. Heydər Əliyev adına Respublika Sarayının qarşısında keçirilən bayram tədbirinə xüsusi rəng qatan isə güllərlə bəzədilən al-əlvan geyimli balacalar olub. Onlar da öz sevinclərini gizlətməyərək çox əyləndiklərini, Gül bayramını hər zaman səbirsizliklə gözlədiklərini deyiblər. Balacalarla yanaşı valideynləri bayramla əlqədar uşaqlarını da əyləndirə bildikləri üçün sevincli olduqlarını deyiblər. Azyaşlı qızı ilə Gül bayramını izləyən Bakı sakini Mehriban xanım bu münasibətlə Prezident İlham Əliyevə minnətdarlığını bildirib: “Cənab prezidentimizə bu cür gözəl bayramın keçirilməsinə görə minnətdarlığımızı bildiririk. Nə yaxşı ki, belə bayramlar qeyd olunur. Çox sağ olsun İlham Əliyev, o həmişə bizim başımızı uca edib. Həqiqətən belə bayramların qeyd olunmasını çox bəyənirəm. Bu gün şəhər bayram əhval-ruhiyyəsindədir. Bundan gözəl nə ola bilər ki”. 70 yaşlı təqaüdçü Mustafa bəy də Gül bayramını çox sevdiyini, şəhərin məhz bu bayramla hər zaman yüksək əhval-ruhiyyəyə büründüyünü deyərək təəssüratlarını bizimlə bölüşüb: “Çox gözəl bayramdır. Bu gün həm də ulu öndərimiz, Azərbaycan xalqının ümummilli lideri olan Heydər Əliyevin anadan olmasının 90 illiyidir. Bu xalqımız üçün ikiqat bayram hesab olunmalıdır. Azyaşlıdan qocayadək hər kəs bayramı xüsusi sevinclə qarşılayır. Bu diqqət və qayğıya görə İlham Əliyevə minnətdarıq”. Qeyd edək ki, Gül Bayramı ilə əlaqədar şəhərin bir sıra mərkəzi meydanlarında, həmçinin Sahil bağında xüsusi tədbirlər həyata keçirilib. Şəhər əhli burda da bir-birindən maraqlı, zövqlə bəzədilmiş güllərin önündə şəkil çəkdirərək bayram əhval-ruhiyyəsində olduqlarını deyiblər. Qeyd edək ki, Heydər Əliyev adına Respublika Sarayının qarşısında Gül Bayramı hələ də davam edir. Axşam saatlarında isə dənizkənarı Milli Parkda bayram tədbiri konsert proqramı ilə baş tutacaq. Şəhərin mərkəzi küçələrində güclü iş rejimi ilə çalışan polislər lazımi təhlükəsizlik tədbirləri görərək sıxlığın qarşısını almağa çalışırlar.

Nigar Məhərrəm

Olaylar.- 2013.- 11-13 may.- S.8.