Diaspor sahəsində mütəşəkkillik artır

Son illərdə dünyanın müxtəlif ölkələrində diaspor təşkilatlarımız tərəfindən Azərbaycana həsr olunmuş tədbirlərin keçirilməsi bu sahədə nailiyyətlərin artmasına öz müsbət təsirini göstərir. Təbii ki, bu sahədə Diasporla İş üzrə Dövlət Komitəsinin də üzərinə böyük bir iş düşür və adı çəkilən dövlət qurumu həmin tədbirlərin keçirilməsinə dəstək nümayiş etdirməklə Azərbaycan dövlətinin diasporumuzun arxasında olduğunu bir daha təsdiqləyir. Təkcə, keçən il ərzində keçirilən tədbirlərə diqqət yetirdikdə bunu aydın şəkildə görmək mümkündür.

Diasporla İş üzrə Dövlət Komitəsinin də verdiyi məlumata görə, keçən il ərzində xarici ölkələrdə yaşayan azərbaycanlıların təşkilatlanması, cəmiyyətə inteqrasiyası, soydaşlarımızın ictimai-siyasi həyatda iştirak səviyyəsinin artırılması, tarixi Vətənlə əlaqələrinin genişləndirilməsi, habelə diaspor təşkilatları arasında əməkdaşlığın gücləndirilməsi istiqamətində bir sıra tədbirlər həyata keçirmişdir. Belə ki, göstərilən müddət ərzində Azərbaycan diaspor təşkilatları tərəfindən 330 tədbir keçirilmişdir. Bu tədbirlərin bəzisində, o cümlədən Dünya Azərbaycanlı Gənclər Birliyinin Təsis Qurultayı, Avropa Azərbaycanlıları Konqresinin IV Qurultayı, “Azİz” - Azərbaycan-İsrail Beynəlxalq Assosiasiyasının II Qurultayı, Türkiyə Azərbaycan Dərnəkləri Federasiyasının III Qurultayı, İsveç Azərbaycanlıları Konqresinin II Qurultayı və digər beynəlxalq əhəmiyyətli tədbirlərdə müxtəlif ölkələrin dövlət və hökumət nümayəndələri, parlament üzvləri iştirak etmişdir. Azərbaycan dövlətinin dəstəyi ilə keçirilmiş bu tədbirlər ölkəmizin beynəlxalq aləmdə təbliğinə mühüm töhfələr vermiş, dünyanın bir sıra nüfuzlu beynəlxalq təşkilatları ilə əməkdaşlığın inkişafında önəmli rol oynamışdır.

2012-ci il 5 iyul tarixində Diasporla İş üzrə Dövlət Komitəsində Komitənin yaradılmasının 10-cu ildönümünə həsr olunmuş tədbir keçirilmişdir. Tədbir zamanı Azərbaycan xalqının ümummilli lideri Heydər Əliyevin 5 iyul 2002-ci il tarixli sərəncamı ilə yaradılmış Dövlət Komitəsinin ötən 10 il ərzində göstərdiyi fəaliyyət barədə geniş məlumat verilmişdir. Tədbirdə Azərbaycan xalqının ümummilli lideri Heydər Əliyevin, eləcə də Azərbaycan Respublikasının prezidenti İlham Əliyevin qayğısı və yüksək diqqəti sayəsində Azərbaycan diasporunun təşkilatlanaraq Azərbaycanın milli maraqlarını əzmlə qoruyan bir qüvvəyə çevrildiyi xüsusilə vurğulanmışdır. Həmçinin tədbir zamanı ötən dövr ərzində Dövlət Komitəsi tərəfindən və onun dəstəyi ilə 63 kitabın, 13 sənədli filmin hazırlandığı qeyd olunmuş və Azərbaycan diasporunun tarixi, məskunlaşma coğrafiyası, görkəmli şəxsiyyətləri barədə geniş məlumatı əks etdirən “Azərbaycan Diasporu: Ensiklopedik Məlumat” toplusunun təqdimatı olmuşdur. Qeyd edək ki, topluda Azərbaycan Respublikası Prezidentinin diasporun inkişafına xidmət edən fərman və sərəncamları, müxtəlif vaxtlarda diaspor nümayəndələri ilə keçirdiyi görüşlər, diasporumuzun görkəmli nümayəndələri və dövlət təltiflərinə, fəxri adlara layiq görülmüş xaricdə yaşayan azərbaycanlılar, Azərbaycan diasporunun tarixi, məskunlaşma coğrafiyası, diaspor təşkilatlarının nəzdində fəaliyyət göstərən kütləvi informasiya vasitələri haqqında məlumatlar, həmçinin Dünya Azərbaycanlılarının I, II və III qurultayları, eləcə də diaspor təşkilatlarının iştirakı ilə keçirilmiş yüksək səviyyəli tədbirlər və diasporla əlaqədar digər məlumatlar da öz əksini tapmışdır.

Türkiyənin Kocaeli vilayətinin İzmit şəhərində Türkiyə Azərbaycan Dərnəkləri Federasiyasının (TADF) III Qurultayı keçirilmişdir. Qurultayda ötən müddət ərzində həyata keçirilmış tədbirlər haqqında ətraflı məlumat verilmiş, reallaşdırılmış layihələrin Azərbaycan və Türkiyə münasibətlərinin daha da inkişafına, Azərbaycanın Türkiyədə daha yaxından tanıdılmasına xidmət etdiyi qeyd olunmuşdur. Həmçinin TADF-in hesabat məruzəsi dinlənilmiş və təkliflər əsasında Nizamnaməyə bəzi dəyişiklik və əlavələr edilmişdir. Qurultayda Türkiyə Azərbaycan Dərnəkləri Federasiyasının mətbu orqanının yaradılması, internet səhifəsinin təkmilləşdirilməsi, üzv təşkilatların fəaliyyətinin daha yaxşı koordinasiya olunması ilə bağlı tədbirlərin görülməsi və digər qərarlar da qəbul olunmuşdur. Toplantının sonunda qurultay iştirakçılarının Azərbaycan Respublikasının Prezidenti İlham Əliyevə və Türkiyə Respublikasının Prezidenti Abdullah Gülə müraciəti qəbul olunmuşdur.

Azərbaycan Respublikası Diasporla İş üzrə Dövlət Komitəsi görülən işlər barədə ictimaiyyətin məlumatlandırılmasının daha operativ və əhatəli şəkildə həyata keçirilməsi məqsədilə “Facebook” və “Twitter” sosial şəbəkələrində rəsmi səhifələrini yaratmışdır. Qeyd edək ki, “Facebook” və “Twitter”də rəsmi səhifələrinin yaradılması sosial şəbəkələrin imkanlarından bəhrələnərək yeni kommunikasiya növlərindən istifadə sayəsində ictimaiyyətin diaspor sahəsi ilə bağlı marağını təmin etməyə şərait yaradacaqdır.

Ümumilikdə, 2012-ci il ərzində keçirilmiş tədbirlərdən 133-ü Azərbaycan həqiqətlərinin dünya ictimaiyyətinə çatdırılması məqsədinə xidmət etmişdir. Xarici ölkələrdə fəaliyyət göstərən diaspor təşkilatlarının təbliğat sahəsində fəaliyyətinin daha da gücləndirilməsi, Ermənistanın Azərbaycana təcavüzü ilə bağlı beynəlxalq aləmin məlumatlandırılması və bu faktın dünya dövlətlərinin parlamentlərinin, siyasi dairələrinin müzakirəsinə çıxarılması prioritet məsələ olmuşdur. Hesabat dövrü ərzində Azərbaycan diaspor təşkilatları tərəfindən yeni kütləvi informasiya vasitələri təsis edilmiş, eyni zamanda ayrı-ayrı ölkələrdə fəaliyyət göstərən kütləvi informasiya vasitələrində Azərbaycanla bağlı məqalə və materialların işıqlandırılması istiqamətində tədbirlər həyata keçirilmişdir. Hesabat dövründə Ermənistanın Azərbaycana təcavüzü, həmçinin Ermənistan-Azərbaycan, Dağlıq Qarabağ münaqişəsi, “20 Yanvar” faciəsi, Xocalı soyqırımı, 31 mart- Azərbaycanlıların Soyqırımı Günü ilə bağlı İsveç, Almaniya, Rusiya, ABŞ, Kanada, Fransa, Böyük Britaniya, Belçika, Niderland, Türkiyə, Birləşmiş Ərəb Əmirlikləri, Ukrayna, Bolqarıstan, Çexiya, Rumıniya, Polşa, Macarıstan, Qazaxıstan, Özbəkistan, Qırğızıstan, Gürcüstan, Tacikistan, Estoniya, Latviya, Litva, Belarus, Moldova, Yaponiya, Avstraliya və digər ölkələrdə Azərbaycan icmaları tərəfindən anım mərasimləri, foto və rəsm sərgiləri, təbliğat kampaniyaları, elmi-praktik konfranslar və digər tədbirlər təşkil olunmuşdur.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 14 may.- S.15.