Türk diasporunun birliyi reallığa çevrilir

Son illər ərzində türkdilli ölkələrin diaspor təşkilatları arasında birlik və bərabərliyin təmin edilməsi, birgə əməkdaşlığın konturlarının müəyyən olunması istiqamətində səylər artmaqdadır. Sevindirici haldır ki, Azərbaycan və Türkiyənin başlamış olduğu bu işə artıq digər türkdilli respublikalar da dəstək nümayiş etdirir. Bu günlərdə qardaş Türkiyə Cümhuriyyətində keçirilən toplantını buna misal olaraq göstərmək olar.

Xəbər verildiyi kimi bu günlərdə Türkiyə Cümhuriyyətinin paytaxtı Ankara şəhərində Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin ikinci toplantısı keçirilib. Xaricdə Yaşayan Türklər və Əqrəba İcmalar Departamentinin sədr müavini Bəkir Bozdağın ev sahibliyi ilə keçən toplantıda Azərbaycan, Qazaxıstan, Qırğızıstan və Türkiyənin diaspor təşkilatlarının rəhbərləri qatılıb. Toplantıda Azərbaycan tərəfini Diasporla İş üzrə Dövlət Komitəsi sədrinin 1-ci müavini Valeh Hacıyev təmsil edib. İclasda “Türkdilli ölkələrin diaspor təşkilatlarının ortaq fəaliyyət strategiyası”nın əhəmiyyəti vurğulanıb. İlk çıxış edən Xaricdə Yaşayan Türklər və Əqrəba İcmalar Departamentinin rəhbəri Kemal Yurtnaç bu toplantını indiyədək keçirdikləri iclasların ən önəmlisi olduğunu, onun əhəmiyyətli qarşıdakı illərdə aydın olacağını deyib: “Xüsusilə türk dünyasındakı ölkələrlə bu addımı atmağı çox vacib sayırıq, Özbəkistan və Türkmənistanın da sıramıza qatılacağına inanıram”. Toplantıda çıxış edən Diasporla İş üzrə Dövlət Komitəsi sədrinin birinci müavini Valeh Hacıyev də türk dünyasının problemlərini həll etmək üçün türk xalqlarının vahid diaspor altında birləşməsinin vacibliyini vurğulayıb. O bildirib ki, soydaş xalqların ortaq fəaliyyəti onların güclü addımlarla irəliləməsini, gələcəkdə türk xalqlarının fərqli mövqedə yer almasını təmin edəcək. Valeh Hacıyev Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin birinci Forumunun Bakıda keçirilməsini də Azərbaycanın bu məsələni əhəmiyyətli hesab etməsi ilə əlaqələndirib. Toplantıya sədrlik edən Xaricdə Yaşayan Türklər və Əqrəba İcmalar Departamentinin sədr müavini Bəkir Bozdağ da iclasın əhəmiyyətini vurğulayaraq deyib ki, diasporların xaricdə birgə fəaliyyəti bir çox məsələlərin həllində önəmli rol oynayacaq. “Xaricdə birlikdə hərəkət edə bilmək iradəsini ortaya qoya bilmək üçün bu müsbət bir addımdır”. Bəkir Bozdağ bildirib ki, türk respublikaları öz aralarındakı əlaqələri fərqli məcraya yönəltməlidir: “Əlaqələrimizi daha məhsuldar bir mövqeyə gətirməyə qərarlıyıq. Bu səbəbdən bu addımın daha ciddi bir əhəmiyyəti olduğunu düşünürəm. Dost və qardaş ölkələrlə birlikdə atdığımız addımlarımız olduğu kimi Türkiyə Cümhuriyyəti olaraq da atdığımız ciddi addımlarımız var. Xaricdə Yaşayan Türklər və Əqrəba İcmalar Departamenti də bu məqsədlərə xidmət edir. Qurum xaricdəki bütün soydaşlarımızla olan əlaqələrimizi daha fərqli nöqtəyə gətirmək üçün fəaliyyət göstərir. Ortaq olan mədəniyyətimizi daha da ön plana çıxardıqca aramızdakı əlaqələrin fərqli bir yöndə olacağına inanıram. Bu istiqamətdə hər cür fəaliyyəti hökumət olaraq dəstəkləyəcəyik”. Çıxışlardan sonra Türkdilli Ölkələrin Əməkdaşlıq Şurasına üzv ölkələri – Türkiyə, Azərbaycan, Qazaxıstan və Qırğızıstan arasında “Türkdilli ölkələrin diaspor təşkilatlarının ortaq fəaliyyət strategiyası” imzalanıb. Toplantı çərçivəsində iyunun 21-də Bakıda keçiriləcək Bakıda Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin I Forumunun isə proqramına dair müzakirələr də aparılıb. Qərara alınıb ki, Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin Forumda ümumi iclasdan əlavə üç istiqamətdə - Amerika-Kanada, Avropa-Asiya və Müstəqil Dövlətlər Birliyi üzrə panel müzakirələr də təşkil olunsun. Qeyd edək ki, Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin ilk iclası bu il yanvarın 24-25-də Bakıda keçirilmişdi. Həmin iclasda Türkdilli Ölkələrin Əməkdaşlıq Şurasına üzv ölkələrin diaspor təşkilatları rəhbərlərinin I Forumunun Bakıda keçirilməsi barədə tərəflər arasında ümumi razılıq əldə edilmişdi.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 16 may.- S.15.