Azərbaycanın haqq səsini dünyaya çatdıran diaspor təşkilatları

Xaricdə yaşayan soydaşlarımızın hüquq və azadlıqlarının qorunması, onların problemlərinin həlli, eləcə də ölkəmizin mədəniyyətinin təbliği, Azərbaycanın üzləşdiyi problemlərin dünya ictimaiyyətinə çatdırılması hər zaman diaspor təşkilatlarımızın diqqət mərkəzində olub. Bu baxımdan son illər ərzində qeyd edilən istiqamətlərdə diaspor təşkilatlarımızın keçirdiyi tədbirlər xüsusi əhəmiyyət kəsb edib.

Danimarkanın Kopenhagen şəhərində “Vətən” Cəmiyyətinin təşkilatçılığı ilə “Azərbaycanlıların Avropaya inteqrasiyasının perspektivləri” mövzusunda konfrans keçirilmişdir. Konfransda Azərbaycan diasporunun lobbiçilik istiqamətində fəaliyyəti və dost xalqların diaspor təşkilatları ilə əlaqələrinin gücləndirilməsi yolları müzakirə olunmuşdur. Konfransda həmçinin Kopenhagen şəhərinin kütləvi informasiya vasitələrinin nümayəndələri də iştirak etmişdir. Almaniyanın Berlin şəhərində keçirilən Avropa Azərbaycanlıları Konqresinin IV Qurultayında da Avropada fəaliyyət göstərən Azərbaycan diaspor təşkilatları arasında əməkdaşlığın inkişafı sahəsində qarşıda duran vəzifələr, xalqımızın tarixi və müasir həyatı ilə bağlı həqiqətlərin dünya ictimaiyyətinə çatdırılmasının yeni metod və texnologiyaları müzakirə olunmuş və bu istiqamətdə tədbirlərin həyata keçirilməsinə dair bir sıra mühüm qərarlar qəbul olunmuşdur. Mayssen şəhərində isə Azərbaycan-Alman Dostluq Cəmiyyəti tərəfindən “Etnik konfliktlərin tarixi və psixoloji mexanizmi” mövzusunda elmi-praktiki konfrans keçirilmişdir. Tədbir zamanı Azərbaycanın tarixi, milli-mənəvi dəyərlərinin təbliği, Azərbaycan diasporunun lobbiçilik istiqamətindəki fəaliyyəti və dost xalqların diaspor təşkilatları ilə əlaqələrin gücləndirilməsi ilə bağlı məsələlər müzakirə olunmuşdur.

“Xəzər” Azərbaycan İsveç Dostluq Cəmiyyətinin səyləri nəticəsində Malmö şəhəri Mərkəzi Kitabxanasında rəsmi Azərbaycan şöbəsi açılmışdır. Diasporla İş üzrə Dövlət Komitəsi tərəfindən Azərbaycanın tarixi, mədəniyyəti, adət-ənənələri, turizm potensialı haqqında məlumatları əks etdirən 1000 ədəd kitab Malmö şəhəri Mərkəzi Kitabxanasınа hədiyyə edilmişdir. Parisdə Ermənistanın Fransadakı Səfirliyi qarşısında Almaniya, İsveçrə, İsveç, Hollandiya, Belçika, Böyük Britaniya, Lüksemburq və digər ölkələrdə fəaliyyət göstərən Azərbaycan və Türk diaspor təşkilatlarının birgə etiraz aksiyası keçirilmişdir. Aksiyanın məqsədi Ermənistanın işğalçılıq və soyqırım siyasətinə yerli və beynəlxalq ictimaiyyətin diqqətini cəlb etmək olmuşdur. Aksiya Avropada fəaliyyətə göstərən kütləvi informasiya vasitələri tərəfindən işıqlandırılmışdır. Аksiyanın sonunda qəbul olunmuş bəyanatda Ermənistanın işğalçılıq siyasəti kəskin şəkildə pislənilmiş, azərbaycanlılara qarşı törədilmiş terror və soyqırım aktlarına hüquqi-siyasi qiymət verilməsi tələb olunmuşdur. Almaniyadakı Azərbaycanlıların Koordinasiya Mərkəzində isə Azərbaycan dili kursları açılmışdır. Bu təşəbbüsün əsas məqsədi Almaniyada böyüyən azərbaycanlı uşaqlarda Azərbaycana qarşı məhəbbət hissi aşılamaq, Azərbaycan mədəniyyəti və incəsənətinə maraq oyatmaq, onlarа Ana dilini öyrənmələri üçün şərait yaratmaqdır.

2012-ci il oktyabrın 11-də Berlində Azərbaycanın qaçqın və məcburi köçkünlərinə həsr olunmuş “Evə dönən beş yol” adlı fotosərginin açılışı olmuşdur. Tanınmış fotoqraf Filip Ratmerin (Philipp Rathmer) fotoşəkillərindən ibarət sərgi Avropa-Azərbaycan Cəmiyyətinin (TeAS) təşkilatçılığı ilə keçirilmişdir. Sərgidə nümayiş etdirilən 50 fotoşəkil Azərbaycanın erməni işğalı altında olan Dağlıq Qarabağ və yeddi ətraf rayonundan olan bir milyondan çox qaçqın və məcburi köçkünün həyatını işıqlandırır. Oktyabrın 23-26-sı tarixlərində Fransa Yəhudi İnstitutları Təmsilçilər Şurasının nümayəndə heyəti Azərbaycana səfər etmişdir. Nümayəndə heyəti səfər çərçivəsində Quba rayonundakı “Soyqırım Memorial Abidə Kompleksi”ni ziyarət etmiş, habelə azərbaycanlı məcburi köçkünlərlə görüşmüşlər. Bundan başqa nümayəndə heyətinin bir sıra dövlət orqanlarının rəhbərləri ilə də görüşü olmuşdur.

Niderland Krallığında fəaliyyət göstərən “Vahid, Bölünməz Demokratik Azərbaycan uğrunda Birlik” cəmiyyətinin təşəbbüsü və Azərbaycan Respublikasının Diasporla İş üzrə Dövlət Komitəsinin dəstəyi ilə Niderlandın Valkenburq bələdiyyəsinin sədri Martinus Yorlinqsin başçılıq etdiyi nümayəndə heyəti ölkəmizdə səfərdə olmuşdur. Səfər Azərbaycanın mədəniyyəti, tarixi, gəzməli-görməli yerləri ilə tanışlıq məqsədi daşımışdır. Niderlandın nümayəndə heyəti Azərbaycanın bir sıra dövlət orqanlarında görüşlər keçirmiş, Azərbaycan-Niderland münasibətlərinin müxtəlif aspektlərinə dair bir çox məsələlər müzakirə edilmişdir. 2012-ci il dekabrın 29-da 26 təşkilatı özündə birləşdirən İsveç Azərbaycanlıları Konqresinin II Qurultayı keçilmişdir. Qurultay zamanı Konqresin iki illik fəaliyyətinə dair hesabat məruzəsi dinlənilmiş, İAK-ın ötən dövrdəki fəaliyyətinə dair fikir mübadiləsi aparılmışdır. Qurultayda Konqresin İdarə heyətinin üzvləri seçilmişdir.

Müstəqil Dövlətlər Birliyi məkanının əhatə etdiyi ölkələrdə keçirilən tədbirlərin və diaspor quruculuğu işinin əsas məqsədi burada məskunlaşmış azərbaycanlıların hüquq və azadlıqlarının qorunmasına, onların yerli cəmiyyətə inteqrasiyasına dəstək vermək olmuşdur. 2012-ci il ərzində Ümumrusiya Azərbaycan Konqresi tərəfindən Rusiyanın müxtəlif regionlarında Azərbaycan həqiqətlərinin yerli ictimaiyyətə çatdırılması, soydaşlarımızın cəmiyyətə inteqrasiyası, ictimai-siyasi fəallığının artırılması məqsədilə müxtəlif tədbirlər təşkil edilmişdir. İyul ayında ÜmumRusiya Azərbaycanlıları Konqresi Mərkəzi Şurası Krasnodar diyarında baş vermiş daşqın fəlakəti ilə əlaqədar zərərçəkənlərə yardım təşkil etmişdir. Sentyabr ayında isə konqresin təşkilatçılığı ilə Azərbaycan diaspor nümayəndələrinin ölkəmizin bir qrup yaradıcı ziyalısı ilə görüşü olmuşdur. Oktyabr ayında Ümumrusiya Azərbaycanlılar Konqresinin mərkəzi ofisində konqresin Rusiyanın Mərkəz Federal dairəsinin regional və yerli bölmələrinin rəhbərləri ilə müşavirə keçirilmişdir. Мüşavirənin əsas müzakirə mövzuları azərbaycanlıların Rusiya cəmiyyətinə inteqrasiyasına kömək, regionlarda millətlərarası həmrəylik, yerli hakimiyyət orqanları, həmçinin Moskvanın və Rusiya regionlarının müxtəlif ictimai təşkilatları ilə əməkdaşlıq məsələləri olmuşdur. Həmin müddətdə Ümumrusiya Azərbaycan Konqresinin nümayəndə heyəti Rusiya Federasiyasının Başqırdıstan Respublikasının paytaxtı Ufa şəhərinə səfər çərçivəsində Başqırdıstan Respublikasının Prezident Administrasiyasının siyasi və ictimai əlaqələrin inkişafı idarəsinin əməkdaşları ilə görüşmüşlər. Görüşdə ÜmumRusiya Azərbaycanlıları Konqresinın regional bölməsinin fəaliyyəti, Başqırdıstanın dövlət orqanları ilə əməkdaşlığa dair bir sıra məsələlər müzakirə olunmuşdur. Qeyd edək ki, 2012-ci ildə xüsusilə Rusiya Federasiyası və Ukraynada azərbaycanlı gənclərin fəallılığının artdığı müşahidə olunmuşdur. Belə ki, Rusiya Federasiyasında fəaliyyət göstərən Rusiyanın Azərbaycanlı Gənclər Təşkilatı tərəfindən Azərbaycan mədəni irsinin və tarixinin təbliği, ölkədə yaşayan azərbaycanlı gənclərin təşkilatlanması, cəmiyyətə inteqrasiyası, diaspor quruculuğu işinə fəal şəkildə cəlb olunmasına xidmət edən bir sıra uğurlu layihələr həyata keçirilmişdir. Belə ki, 2012-ci ildə Rusiya Azərbaycanlı Gənclər Birliyi Moskvada “Liderlik və fəal vətəndaş mövqeyi” adlı qış məktəbi təşkil etmişdir. Məktəb çərçivəsində Azərbaycanın və Rusiyanın dövlət qurumlarının, ekspertlərin və ictimai xadimlərin iştirakı ilə məşğələlərin, mühazirələrin və ustad dərslərinin təşkil olunması nəzərdə tutulmuşdur. Bundan başqa, Rusiyanın Azərbaycanlı Gənclər Təşkilatı Rusiya Dövlət Humanitar Universitetinin Azərbaycan klubu ilə birlikdə “1918-ci il 31 mart azərbaycanlıların soyqırımı: tarixi-hüquqi aspekt” mövzusunda “dəyirmi masa” keçirmişdir. Tədbirin məqsədi 1918-1920-ci illərdə Azərbaycanda baş vermiş qanlı faciəvi hadisələri bir daha təhlil etmək, erməni millətçiləri, xüsusən də “Daşnaksütyun” terror təşkilatı tərəfindən planlaşdırılmış sırf milli mənsubiyyətinə görə azərbaycanlıların kütləvi qətllərinin səbəbləri və nəticələri barədə fikir mübadiləsi аparmaq və bu barədə həqiqətləri Rusiya ictimaiyyətinə çatdırmaq olmuşdur. Moskvada isə Rusiyanın Azərbaycanlı Gənclər Təşkilatının dördüncü hesabat-seçki konfransı keçirilmişdir. Konfransda RAGT-nin Moskva və regional bölmələrinin 104 nümayəndəsi iştirak etmişdir. Rusiyanın Azərbaycanlı Gənclər Təşkilatının fəaliyyətinin yekunları barədə hesabat məruzəsi dinlənilmiş, təşkilatın gördüyü işlər haqqında ətraflı məlumat verilmiş, gələcək planlar ətrafında müzakirələr aparılmışdır. Кonfrans iştirakçıları təşkilati məsələləri nəzərdən keçirmiş, nəzarət-təftiş komissiyasının məruzəsini dinləmişlər. Leyla Əliyeva yenidən yekdilliklə Rusiyanın Azərbaycanlı Gənclər Təşkilatının sədri seçilmişdir. Görüş çərçivəsində Azərbaycan və Rusiya gənclərinin gələcək müştərək layihələri haqqında geniş fikir mübadiləsi aparılmışdır. Noyabr ayında Rusiyanın Azərbaycanlı Gənclər Təşkilatı Azərbaycan diasporuna ünvanlanmış bəyanatla çıxış etmişdir. Bəyanatda xəbərdarlıq edilir ki, ermənilərin çəkdiyi “Yarımçıq qalmış mahnı” kinofilmi təhrikçilikdir və bu təhrikə uymaq lazım deyildir. Qeyd edək ki, RAGT «Xocalıya Ədalət» təbliğat-təşviqat kampaniyası çərçivəsində də bir sıra ölkələrdə uğurlu tədbirlər həyata keçirməyə müvəffəq olmuşdur

Göstərilən müddət ərzində Ukrayna Azərbaycanlı Gənclər Birliyinin təşəbbüsü ilə Odessa şəhərində “Azərbaycan: Qərb ilə Şərqə açılan pəncərə” mövzusunda tədbir keçirilmişdir. Odessa vilayət administrasiyasının, diplomatik korpus nümayəndələrinin, azərbaycanlı gənclərin və diaspor fəallarının qatıldığı tədbirdə Azərbaycanın Avropaya və dünya birliyinə inamlı inteqrasiya siyasəti, beynəlxalq mədəni, iqtisadi layihələr barədə müzakirələr aparılmışdır..

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 22 may.- S.15.