Diaspor təşkilatları Azərbaycanın problemlərini finlandiyalılara çatdırır

Azərbaycan həqiqətləri, Dağlıq Qarabağ problemi, eləcə də ölkəmizin zəngin tarixi-mədəni irsimizin dünya ictimaiyyətinə çatdırılmasında aktiv rol oynayan diaspor təşkilatlarından biri də Finlandiya-Azərbaycan Assossiasiyasıdır. 2008-ci ilin mart ayında Helsinki şəhərində təsis edilən təşkilat ötən müddət ərzində yuxarıda qeyd edilən istiqamətlərdə bir sıra tədbirlər, layihələr həyata keçirib. Xüsusilə, Azərbaycanın haqq səsinin dünya ictimaiyyətinə çatdırılması üçün assosiasiya bütün mümkün imkanlardan istifadə edib. Bu məqsədlə assosiasiya rəhbərliyi müntəzəm olaraq Finlandiya parlamentində görüşlər keçirir, bu ölkə parlamentarilərini Azərbaycanın üzləşdiyi problemlər, Dağlıq Qarabağ münaqişəsi barədə məlumatlandırırlar.

Bir müddət öncə də Finlandiya-Azərbaycan Assosiasiyasının rəhbərliyi bu ölkə parlamentində görüş keçirib. Belə ki, Finlandiya-Azərbaycan Assosiasiyasının sədri Vasif Muradlı və təşkilat sədrinin müavini Arzu Oqtay Finlandiya parlamentində olublar. Görüşdən öncə azərbaycanlı qonaqlar və Assosiasiyanın üzvləri Eduskuntanın (Finlandiya Parlamenti) iclasında iştiraka dəvət ediliblər. Parlamentin spikeri Eero Heynyaluomanın sədrliyi ilə keçən iclasda Finlandiyada işçilərin əmək hüquqlarının qorunması, iş yerlərində təhlükəsizlik məsələləri müzakirə olunub. Sonra Finlandiya-Azərbaycan Parlamentlərarası Dostluq Qrupunun sədri Eero Lehti ilə görüş olub. Görüşdə Azərbaycan və Finlandiya arasında münasibətlərin inkişafından, ötən ilin noyabrında Finlandiya parlamentində Azərbaycan-Ermənistan, Dağlıq Qarabağ münaqişəsi ilə bağlı aparılan dinləmələrdən danışılıb. Deputat iqtisadi sahədə iki ölkə arasında əməkdaşlıq üçün geniş imkanların olduğunu vurğulayıb. Eyni zamanda parlamentin deputatı ilə Finlandiyada yaşayan azərbaycanlıların təşkilatı məsələlərinin həlli də müzakirə edilib. Eeri Lehti azərbaycanlıların Helsinkidə təşkil edəcəyi tədbirlərdə məmnuniyyətlə iştirak edəcəyini bildirib. Görüşdə Eero Lehtiyə Azərbaycanın mədəniyyəti, tarixi, Dağlıq Qarabağ münaqişəsi, Xocalı soyqırımı haqqında kitablar təqdim edilib. Deputat bu kitabların Azərbaycanı təbliğ etməkdə zəruri vəsait olduğunu bildirib. Finlandiya-Azərbaycan Assosiasiyası 20 Yanvar və Xocalı faciələrinin dünya ictimaiyyətinə çatdırılması işində də xüsusi fəallıq nümayiş etdirir. Belə ki, assosiasiyanın təşkilatçılığı ilə Helsinki şəhərinin "Caisa" Mədəniyyət Mərkəzində 20 Yanvar faciəsinin ildönümünə həsr olunmuş "20 Yanvar 1990-cı il-Azərbaycan xalqının unudulmayan tarixi" adlı seminar keçirilib. Tədbiri Finlandiya-Azərbaycan Assosiasiyasının sədr müavini, Azərbaycanlı Qadınlar Cəmiyyətinin sədri Arzu Oqtay açaraq, 1990-ci il yanvarın 19-dan 20-nə keçən gecə Ermənistana havadarlıq edən Sovet Ordusunun dinc Azərbaycan xalqına qarşı törətdiyi qırğın, erməni terrorçularının Azərbaycana qarşı hərbi təcavüzü haqda geniş məlumat verib. Tədbirdə Vaasa universitetinin tələbəsi Elxan Qəhrəmanlı və Zakir bəy işğalçılıq siyasəti və digər məsələlərə dair məruzələrlə çıxış ediblər. Finlandiya-Azərbaycan Assosiasiyasının fəal üzvləri tərəfindən qonaqları maraqlandıran suallara geniş və ətraflı cavab verilib. Tədbirdə təqdim olunan sənədlər, 20 Yanvar hadisələrinə dair müxtəlif dillərdə kitablar, sənədli filmlər qonaqları heyrətləndirib.

26 Fevral-Xocalı soyqırımının ildönümü də hər zaman Finlandiya Azərbaycanlıları Assosiasiyası tərəfindən qeyd edilib. Belə ki, Helsinki Caisa mədəniyyət mərkəzində Xocalı soyqırımınının 21-ci ildönümünə həsr olunmuş “XX əsrin ən böyük faciəsi- Xocalı soyqırımı” adlı konfrans keçirilib. Konfransda Helsinki parlamentinə Xocalı soyqırımı tanınması haqqda müraciət qəbul olunub. Müraciətdə qeyd olunub ki, Xocalı soyqırımı Azərbaycan xalıqının XX əsrdə üzləşdiyi dəhşətli faciələrdən biridir. Xocalı faciəsi Xatın, Lidisa, Oradur soyqırımı kimi insanlıq tarixinə düşmüş qanlı olaydır. Azərbaycan xalqına qarşı törədilmiş qətliamlardan biri və bəlkə də, ən amansızı Xocalıda quduz ermənilər tərəfindən törədilmiş soyqırımdır. Şəhidlərimizi unutmamaq və birgə anmaq hər birimizin müqəddəs borcudur. Artıq bəşəriyyət XX əsrin ən böyük faciəsi olan- Xocalı soyqırımını tanımalı və buna siyasi qiymət verməlidir.

Finlandiya-Azərbaycan Assosiasiyası ölkəmizin zəngin tarixi-mədəni irsinin təbliğində də yaxından iştirak edir. Bu məqsədlə Finlandiya-Azərbaycan Assosiasiyasının təşkilatçılığı ilə Finlyandiyanın paytaxtı Helsinkidə “Novruz” bayramı keçirilib. Helsinkinin mərkəzində yerləşən ən böyük mədəniyyət mərkəzi sayılan CAİSA mədəniyyət mərkəzində keçirilən tədbirdə Finlyandiyanın Mədəniyyət Nazirliyinin, Xarici işlər Nazirliyinin, Təhsil Nazirliyinin, Helsinki və Espoo şəhərlərinin meriya nümayəndələri, Finlandiyadakı Türk səfirliyinin diplomatları, Türkiyə Cümhuriyyəti, Başbakanlik Yurd Dışı Türkləri Danışma Kurulu Finlandiya Təmsilçiliyinin nümayəndələri iştirak edib. Finlandiya-Türk cəmiyyəti də Novruz bayramını Finlandiya-Azərbaycan Assosiasiyası ilə birgə qeyd edib. Novruz bayramı və adət ənənələrini bu ölkədə tanıtmaq məqsədi daşıyan “Novruz” bayramında Finlyandiya-Azərbaycan Assosiasiyasının nəzdində fəaliyyət göstərən Yeniyetmə Gənclər Təşkilatının hazırladığı bayram proqramı nümayiş etdirilib. Milli geyimlərdə olan gənclərimiz gülər üzlə gələn qonaqları qarşılayıblar. Milli geyimlərimiz gələn qonaqları heyran edib. Tədbiri Finlyandiya-Azərbaycan Assosiasiyasının nəzdində fəaliyyət göstərən Yeniyetmə Gənclər Təşkilatının sədiri Günay Muradlı və Yeniyetmə Gənclər Təşkilatının sədir müavini Vəfa Muradlı aparıb. Yeniyetmə Gənclər Təşkilatının sədiri Günay Muradlı və Yeniyetmə Gənclər Təşkilatının sədir müavini Vəfa Muradlı fin və azərbaycan dillərində Novruz bayramı və onun adət ənənələri, Azərbaycanda və digər türk dilli ölkələrdə bu bayramın necə qeyd olunması haqqında maraqlı məlumatlar veriblər. Tədbir zamanı Azərbaycanda Novruz bayramı şənliklərindən bəhs edən video nümayiş etdirilib. Bayramın rəsmi hissəsi bitdikdən sonra səhnəyə Ülviyyə Cabbarovanın rəhbərlik etdiyi Azər-Türk uşaq musiqi qrupu dəvət olunub. Onlar azərbaycan və türk mahnıları ifa ediblər. Ülviyyə Cabbarova və Leyli Hüseynovanın ifa etdikləri canlı musiqi bayram şənliyində qonaqları heyran edib. Bütun ifaçılara Finlandiya-Azərbaycan Assosiasiyası tərəfindən Novruz hədiyyələri təqdim olunub.

Finlandiya-Azərbaycan Assosiasiyasının mədəniyyət və musiqi işlər üzrə müdiri Ülviyyə Cabbarovanın rəhbərlik etdiyi “AZƏR-TÜRK “ uşaq musiqi qrupu isə Dünya Azərbaycanlılarının Həmrəylik Günü ərəfəsində Helsinki mədəniyyət mərkəzində maraqlıı konset proqramı ilə çıxış etdilər. Konsertdə “AZƏR-TÜRK” uşaq qrupu azəri, türk, fin, polyak və digər xalqların mahnılarını ifa ediblər. “AZƏR-TÜRK” uşaq qrupunun maraqlı konsert proqramı qonaqların böyük marağına səbəb oldu və alqışlarla qarşılanıb. Helsinki mədəniyyət mərkəzinin rəhbərliyi tərəfindən konsertin sonunda “AZƏR-TÜRK” uşaq musiqi qrupunun rəhbəri, Finlandiya-Azərbaycan Assosiasiyasının mədəniyyət və musiqi işlər üzrə müdiri Ülviyyə Cabbarovaya, 2013-cü ildə Helsinkidə keçiriləcək bir neçə konset proqramlarında çıxış etmək təklif olunub.

Finlandiya-Azərbaycan Assosiasiyası həm yerli, həm də xarici kütləvi informasiya vasitələri ilə də yaxından əməkdaşlıq edir, onlarla birgə layihələr, tədbirlər həyata keçirir. Belə tədbirlərdən biri bir müddət əvvəl baş tutub. Azərbaycan Dövlət Teleqraf Agentliyi (AzərTAC) və Finlandiya-Azərbaycan Assosiasiyasının birgə təşkilatçılığı ilə Helsinkinin “Caisa” mədəniyyət mərkəzində görkəmli oftalmoloq alim, akademik Zərifə xanım Əliyevanın 90 illik yubileyinə həsr olunmuş “Qadınların cəmiyyətdə rolu” mövzusunda tədbir keçirilib. Tədbirdə AzərTAC-ın Helsinkiyə ezam edilmiş əməkdaşları, Finlandiya Türk Cəmiyyətinin, Finlandiya-Azərbaycan Assosiasiyasının, Finlandiya Türk Dərnəyinin nümayəndələri və bu ölkənin fəal qadınları, həmçinin digər qonaqlar iştirak ediblər. İştirakçılar əvvəlcə AzərTAC-ın görkəmli alim, akademik Zərifə xanım Əliyevanın 90 illik yubileyi münasibətilə hazırladığı videoçarxa baxıblar.

Mərasimdə çıxış edən Finlandiya-Azərbaycan Assosiasiyasının nəzdində fəaliyyət göstərən Azərbaycanlı Qadınlar Cəmiyyətinin sədri Arzu Muradlı AzərTAC-la birgə təşkil edilmiş bu tədbirin əhəmiyyətindən danışıb, akademik Zərifə xanım Əliyevanın keçdiyi şərəfli həyat yolu, tibb elminə verdiyi töhfələr barədə söhbət açıb. Bildirilib ki, Zərifə xanım Əliyeva ümummilli lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olub. Görkəmli dövlət xadimi, tibb elmləri doktoru, professor Əziz Əliyevin ailəsində doğulan Zərifə xanım ulu öndər Heydər Əliyevə mənəvi dayaq, arxa olub. Arzu Muradlı akademik Zərifə Əliyevanın timsalında bütün Azərbaycan qadınlarının qazandıqları uğurlar barədə də danışıb. O, bu gün yüksək intellektual düşüncəyə malik, dünya görüşlü Azərbaycan xanımlarının həyatımızın müxtəlif sahələrində çalışdığını diqqətə çatdırıb. Mərasimdə çıxış edən Türkiyənin xaricdə yaşayan türklərlə iş komitəsinin Finlandiyadakı təmsilçisi Mina Eray belə tədbirlərin keçirilməsinin vacibliyini diqqətə çatdırıb. Türkiyə təmsilçisi bunun Azərbaycan, türk mədəniyyətinin, incəsənətinin, tarixi reallıqlarının təbliği baxımdan böyük əhəmiyyət daşıdığını qeyd edib. Eyni mədəniyyətə, incəsənətə, tarixə malik Azərbaycan və Türkiyə birliyinin, qardaşlığının xaricdə daha çox diqqət çəkdiyi bildirilmiş, türk qadınlarının bu gün daha böyük uğurlara imza atdığı diqqətə çatdırıb. Mərasimdə çıxış edən Finlandiya-Türkiyə Körpüsü Cəmiyyətinin İdarə Heyətinin üzvü Anna Liza ölkəsində yaşayan azərbaycanlılar və türklərlə dostluq münasibətindən söz açıb, xalqlarımızın tarixi, mədəniyyəti və mətbəxi ilə yaxından tanış olduğunu diqqətə çatdırıb. Tədbirin əhəmiyyətinə də diqqət çəkən fin xanım, ölkəsində Azərbaycanın tanınmış oftalmoloq alimi Zərifə xanım Əliyevanın 90 illik yubileyi ilə bağlı tədbirin keçirilməsindən məmnunluq ifadə edib. İştirakçılara ölkəmizin tarixi, mədəniyyəti haqqında kitablar, Azərbaycan və türk mətbəxinin nümunələri də təqdim edilib.

Azərbaycan Respublikası Prezidenti yanında KİV-in İnkişafına Dövlət Dəstəyi Fondunun maliyyə dəstəyilə çap edilmişdir

Olaylar.- 2013.- 28-29 may.- S.15.